Jump to content
களத்தில் உள்நுழையும் வழிமுறையில் மாற்றம் செய்யப்பட்டுள்ளது. மேலதிக விளக்கங்களிற்கு

ஏராளன்

கருத்துக்கள உறவுகள்
  • Posts

    2,508
  • Joined

  • Last visited

  • Days Won

    2

Posts posted by ஏராளன்

  1. தமிழ்நாட்டில் தமிழ்மொழியினை சிதைத்து அழிய விடுவது மறைமுகமாக நடக்கிறது. தாய்மொழிக் கல்வி தமிழ்நாட்டில் கட்டாயம் இல்லையாமே?

  2. காரைக்கால் பாமக மாவட்டச் செயலாளர் வெட்டிக் கொலை

    8 மணி நேரங்களுக்கு முன்னர்
    தேவமணி
     
    படக்குறிப்பு,

    தேவமணி

    காரைக்கால் மாவட்ட பாமக செயலாளர் தேவமணி நேற்று இரவு மர்ம நபர்களால் வெட்டிக் கொலை செய்யப்பட்டார். இந்த சம்பவத்தால் காரைக்காலில் பதற்றமான சூழல் நிலவுகிறது.

    புதுச்சேரி யூனியன் பிரதேசம், காரைக்கால் மாவட்ட பாட்டாளி மக்கள் கட்சி செயலாளராக இருந்தவர் தேவமணி. வயது 53. இவரது வீடு காரைக்கால் திருநள்ளாறு சனீஸ்வரன் கோவில் அருகே உள்ளது.

    வீட்டுக்கு அருகிலேயே திருநள்ளாறு சனீஸ்வரன் கோயில் பிரதான சாலையில் பாட்டாளி மக்கள் கட்சி அலுவலகம் உள்ளது. நேற்றிரவு சுமார் 10 மணியளவில் கட்சி அலுவலகத்திலிருந்து, தேவமணி அவரது ஆதரவாளருடன் வீட்டுக்கு இரு சக்கர வாகனத்தில் சென்றுள்ளார்.

    அப்போது அடையாளம் தெரியாத மர்ம நபர்கள் தேவமணியின் இரு சக்கர வாகனத்தை மறித்து தாக்கியுள்ளனர். தப்பி செல்ல முயன்ற தேவமணியை மர்ம நபர்கள் ஓட ஓட துரத்தி வெட்டியதாக போலீஸ் தரப்பில் கூறப்படுகிறது.

    சம்பவத்தைத் தொடர்ந்து தேவமணியை மீட்டு அவரது நண்பர்கள் காரைக்கால் அரசு பொது மருத்துவமனையில் சேர்த்தனர். அங்கு சிகிச்சை பலனின்றி அவர் உயிரிழந்தார்.

    இது குறித்து திருநள்ளாறு காவல் நிலைய ஆய்வாளர் லெனின் பாரதி மற்றும் போலீசார் வழக்கு பதிவு செய்து விசாரணை நடத்தி வருகின்றனர். இந்த சம்பவத்தை அடுத்து திருநள்ளாறு சாலை மற்றும் தேவமணி வீடு, கட்சி அலுவலகம் அருகே பதற்றமான சூழல் நிலவியதால் பாதுகாப்புக்காக நூற்றுக்கும் மேற்பட்ட போலீசார் குவிக்கப்பட்டுள்ளனர்.

    இந்த சம்பவம் பற்றி திருநள்ளாறு காவல் நிலைய ஆய்வாளர் லெனின் பாரதியை பிபிசி தமிழ் தொடர்பு கொண்டு கேட்டபோது "நேற்று இரவு குமார் என்ற ஆதரவாளருடன் தேவமணி வீட்டிற்கு சென்றுள்ளார். அப்போது அவரது இரு சக்கர வாகனத்தை மறித்த 6 நபர்கள் தேவமணியை வெட்ட முயன்றுள்ளனர். அப்போது அங்கிருந்து தப்பியோடிய தேவமணியை அவர்கள் துரத்திச் சென்று வெட்டியுள்ளனர். பிறகு அவர் இறந்துவிட்டார்.

    இதையடுத்து ஆதரவாளர் குமார் கொடுத்த புகாரின் அடிப்படையில் வழக்குப் பதிவு செய்து விசாரணை மேற்கொண்டு வருகிறோம். காவல் துறை முதற்கட்ட விசாரணையில், தேவமணி மற்றும் மணிமாறன் இருவருக்கும் இடைய ஏற்கனவே சொத்து பிரச்சினை இருந்து வந்துள்ளது. அவர் ஆட்களை வைத்து தேவமணியை வெட்டியிருக்கலாம் என்று சந்தேகிக்கப்படுகிறது.

    தற்போது இந்த வழக்கில் சம்பந்தப்பட்ட மணிமாறன் மற்றும் கொலை சம்பவம் நடைபெற்ற இடத்தில் கிடைத்த சிசிடிவி கேமரா ஆதாரங்களை கொண்டு குற்றவாளிகளை தேடும் பணியில் ஈடுபட்டு வருகிறோம்," என்று தெரிவித்தார்.

    பாட்டாளி மக்கள் கட்சி

    பட மூலாதாரம்,@THEPMKOFFICIAL, TWITTER

     
    படக்குறிப்பு,

    பாட்டாளி மக்கள் கட்சி

    இந்த சம்பவத்தை அடுத்து பாமக நிறுவனர் ராமதாஸ் அறிக்கை ஒன்றை வெளியிட்டுள்ளார். அதில் "தேவமணி காரைக்கால் மாவட்டம் திருநள்ளாறில் நேற்றிரவு கூலிப்படையினரால் கொடூரமான முறையில் படுகொலை செய்யப்பட்டதை அறிந்து மிகுந்த வேதனையடைந்தேன். தேவமணியை படுகொலை செய்தவர்கள் யாராக இருந்தாலும் அவர்கள் கைது செய்யப்பட்டு கடுமையான நடவடிக்கை மேற்கொள்ளப்பட வேண்டும். பொதுவாழ்வில் இருப்பவர்கள் மீது கூலிப்படையை ஏவி கொலை செய்யும் கலாச்சாரம் ஒடுக்கப்பட வேண்டும். தேவமணியின் படுகொலைக்கு காரணமானவர்களை சட்டத்தின் முன் நிறுத்தி அவரது குடும்பத்திற்கு நீதி பெற்றுத்தர புதுவை அரசு நடவடிக்கை எடுக்க வேண்டும்," எனக் குறிப்பிட்டுள்ளார்.

    இந்த கொலையை அடுத்து, அசம்பாவிதங்கள் ஏதும் ஏற்படாமல் தவிர்க்க சனிக்கிழமை பகலில் இருந்து காரைக்காலில் 144 தடையுத்தரவு பிறப்பிக்கப்பட்டுள்ளது.

    https://www.bbc.com/tamil/india-59020815

  3. மனிதருக்கு பன்றி சிறுநீரகம்: அமெரிக்க அறுவை சிகிச்சை நிபுணர்கள் சாதனை

    • மிஷெல் ராபர்ட்ஸ்
    • சுகாதார ஆசிரியர், பிபிசி இணைய செய்திகள்
    3 மணி நேரங்களுக்கு முன்னர்
    சிறுநீரக மாற்று அறுவை சிகிச்சை

    பட மூலாதாரம்,NYU LANGONE

     
    படக்குறிப்பு,

    சிறுநீரக மாற்று அறுவை சிகிச்சை

    அமெரிக்க அறுவை சிகிச்சை வல்லுநர்கள், ஒரு மனிதருக்கு பன்றியின் சிறுநீரகத்தை பொருத்தி சோதித்தனர். இது உடல் உறுப்பு தான பற்றாக்குறையை தீர்க்கும் என அவர்கள் நம்புகின்றனர்.

    மூளைச்சாவு ஏற்பட்டு மருத்துவக் கருவிகளின் உதவியோடு சுவாசித்துவந்த நபருக்கு இந்த பன்றியின் சிறுநீரகத்தைப் பொருத்தி அதை உடல் ஏற்றுக்கொள்கிறதா அல்லது நிராகரிக்கிறதா என்று மருத்துவர்கள் சோதித்தனர்.

    முன்னதாக, பன்றியிடம் இருந்து வந்த சிறுநீரகத்தை, மனித உடல் நிராகரித்து விடக் கூடாது என்பதற்காக மரபணு ரீதியாக சில மாற்றங்கள் செய்யப்பட்டன.

    இந்த ஆய்வினை சக வல்லுநர்கள் சீராய்வு செய்யவில்லை. சீராய்வு செய்த ஆராய்ச்சிக் கட்டுரைகளை வெளியிடும் சஞ்சிகைகளிலும் இந்த ஆய்வு வெளியாகவில்லை. ஆனால், அதற்கான முயற்சிகள் நடந்துவருகின்றன.

    உறுப்பு மாற்று அறுவை சிகிச்சை துறையில், இதுவரை மேற்கொள்ளப்பட்டவைகளில் இது ஒரு மிகப் பெரிய சோதனை முயற்சி என நிபுணர்கள் கூறுகின்றனர்.

    பன்றியின் உறுப்புகளை மனிதர்களுக்கு பயன்படுத்துவது இது ஒன்றும் முதல் முறையல்ல. பன்றியின் இதய வால்வுகள் பரவலாக மனிதர்களுக்கு பொருத்தப்பட்டுள்ளன.

    சிறுநீரக மாற்று அறுவை சிகிச்சையில் ஈடுபட்ட மருத்துவ குழுவினர்

    பட மூலாதாரம்,NYU LANGONE

     
    படக்குறிப்பு,

    சிறுநீரக மாற்று அறுவை சிகிச்சையில் ஈடுபட்ட மருத்துவ குழுவினர்

    பொதுவாக பன்றியின் உடல் உறுப்புகள், அளவின் அடிப்படையில் மனிதர்களுக்கு சிறப்பாக பொருந்திப் போகக்கூடியவை.

    அந்த சிறுநீரகத்தை மனிதருக்குப் பொருத்திய பிறகு அடுத்த இரண்டரை நாட்களுக்கு சிறுநீரகத்தை தீவிரமாக கண்காணித்து பல்வேறு மருத்துவ பரிசோதனைகளை வல்லுநர்கள் மேற்கொண்டனர்.

    ஒரு பன்றியின் சிறுநீரகம், மனிதர்களின் சிறுநீரகத்தைப் போலவே செயல்படுவதைக் கண்டோம் என மருத்துவர் ராபர்ட் மான்ட்கொமெரி பிபிசி வேர்ல்ட் டுனைட் நிகழ்ச்சியில் கூறினார்.

    "அந்த சிறுநீரகம் சீராக வேலை செய்தது, மனித உடல் அதை நிராகரிப்பது போலத் தெரியவில்லை" என்றார்.

    அறுவை சிகிச்சை வல்லுநர்கள், சிறுநீரகத்தோடு பன்றியின் ஒரு சிறு பகுதி தைமஸ் சுரப்பியையும் மாற்றியுள்ளனர். நீண்ட காலத்தில், மனித உடல் சிறுநீரகத்தை நிராகரிப்பதிலிருந்து காப்பாற்ற, பன்றியின் திசுக்களோடு போராடும் மனித உடலின் எதிர்ப்புத் திறன் கொண்ட செல்களை திரட்டி, நிராகரிப்பைத் தடுக்க இந்த பாகம் உதவும் என மருத்துவ வல்லுநர்கள் கருதுகின்றனர்.

    வழக்கமாக ஒருவர் உறுப்பு தானம் பெற வேண்டுமானால், தானம் கொடுப்பவர் இறக்க வேண்டும், அப்போது தான் மற்றொருவர் வாழ முடியும். இது நீண்ட காலத்துக்கு சரிப்பட்டு வராது என்கிறார் மருத்துவர் ராபர்ட்.

    தற்போது உறுப்பு மாற்று அறுவை சிகிச்சைக்காக காத்திருக்கும் 40 சதவீத நோயாளிகள், அவர்களுக்கான உறுப்பு கிடைப்பதற்கு முன்பே இறந்துவிடுகிறார்கள். நாம் பன்றியை உணவாக உட்கொள்கிறோம், பன்றியை மருத்துக்காகவும், அதன் ரத்த நாளங்களையும் பயன்படுத்துகிறோம். எனவே பன்றியின் உறுப்பை மனிதர்களுக்கு பயன்படுத்துவதும் பெரிய விஷயமல்ல என்கிறார் ராபர்ட்.

    இந்த உறுப்பு மாற்று அறுவை சிகிச்சை தொடர்பான ஆராய்ச்சிகள் தொடக்க கட்டத்தில்தான் இருக்கின்றன என்றும், இது குறித்து நிறைய ஆய்வுகள் தேவை என்றும் கூறியுள்ளார் மருத்துவர் ராபர்ட்.

    இந்த அறுவை சிகிச்சையைப் மேற்கொள்ளப்பட்டவரின் குடும்பத்தினர், இந்த சிகிச்சைக்கு சம்மதம் தெரிவித்துள்ளனர். அமெரிக்காவின் எஃப்.டி.ஏ என்கிற உணவு மற்றும் மருந்து நிர்வாக அமைப்பும் மரபணு மாற்றப்பட்ட பன்றியின் உறுப்புகளை இது போன்ற ஆய்வுகளுக்கு பயன்படுத்த அனுமதித்துள்ளது குறிப்பிடத்தக்கது.

    பத்தாண்டு காலத்தில் பன்றியின் இதயம், நுரையீரல், கல்லீரல் மனிதர்களுக்கு வழங்கப்படலாம் என நம்புகிறார் மருத்துவர் ராபர்ட்.

    https://www.bbc.com/tamil/science-59020822

  4. இலங்கை போலீஸ்காரர் கைது, இடைநீக்கம்: பொது இடத்தில் இரு இளைஞர்களை மோசமாகத் தாக்கிய வழக்கில் நடவடிக்கை

    47 நிமிடங்களுக்கு முன்னர்
    இலங்கை போக்குவரத்துப் போலீஸ்.

    பட மூலாதாரம்,GETTY IMAGES

     
    படக்குறிப்பு,

    இலங்கை போக்குவரத்துப் போலீஸ். சித்தரிப்புப் படம்.

    இலங்கையில் இளைஞர்கள் இருவரை மனிதாபிமானமற்ற முறையில், பொது இடத்தில் வைத்து தாக்கிய போக்குவரத்து போலீஸ் உத்தியோகஸ்தர் ஒருவரை கைது செய்துள்ளதாக போலீஸ் பேச்சாளர் தெரிவித்துள்ளார்.

    இதற்கு முன்னதாக, குறித்த போலீஸ் உத்தியோகஸ்தர் பணியிருந்து இடைநிறுத்தப்பட்டதாக அமைச்சர் சரத் வீரசேகர கூறியிருந்தார்.

    மட்டக்களப்பு மாவட்டத்தின் ஏறாவூர் பிரதேசத்தில் நேற்று (அக்டோபர் 22) இளைஞர்கள் இருவரை போலீஸ் உத்தியோகஸ்தர் ஒருவர் தாக்கும் காட்சிகளைக் கொண்ட வீடியோ ஒன்று, சமூக வலைத்தளங்களில் பகிரப்பட்டது.

    இந்த வீடியோவை தமிழ்த் தேசியக் கூட்டமைப்பின் நாடாளுமன்ற உறுப்பினர் ரா. சாணக்கியனும் தனது ட்விட்டர் பக்கத்தில் பகிர்ந்திருந்ததோடு, "போலீசார் அராஜகம் மட்டக்களப்பில் தொடர்கிறது" என்று குறிப்பிட்டிருந்தார். அத்துடன், ரியர் அட்மிரல் சரத் வீரசேகரவுக்கு இது கேட்குமா என்று பொருள்படும் ஒரு குறிப்பையும் அவர் இட்டிருந்தார்.

    போலீஸ் தாக்குதல்
     
    படக்குறிப்பு,

    இளைஞர் மீது போலீஸ் தாக்குதல்.

    பொதுமக்கள் பாதுகாப்பு அமைச்சராக சரத் வீரசேகர பதவி வகிப்பதும், அந்த அமைச்சின் கீழேயே போலீஸ் திணைக்களம் வருகின்றமையும் குறிப்பிடத்தக்கது.

    சரத் வீரசேகர

    பட மூலாதாரம்,SARATH VEERASEKARA

     
    படக்குறிப்பு,

    சரத் வீரசேகர

    இதனையடுத்து மேற்படி சம்பவம் தொடர்பில் நேற்று பேசிய அமைச்சர் சரத் வீரசேகர; "பொதுமக்களைத் தாக்குவதற்கு போலீஸாருக்கு அதிகாரமில்லை" என்றும், "சட்டத்தை அமல்படுத்துவதுதான் போலீஸாரின் பணி" எனவும் தெரிவித்திருந்தார். மேலும், இந்தச் சம்பவம் தொடர்பில் நடவடிக்கை எடுக்குமாறு போலீஸ் மா அதிபர் மற்றும் கிழக்கு மாகாணத்துக்கான சிரேஷ்ட பிரதிப் போலீஸ் மா அதிபர் ஆகியோரை அறிவுறுத்தியுள்ளதாகவும் கூறியிருந்தார்.

    இந்த சம்பவத்தில் ஏறாவூர் பிரதேசத்தைச் சேர்ந்த முஸ்லிம் இளைஞர்கள் இருவரே இவ்வாறு தாக்கப்பட்டனர்.

    ஏறாவூர் போலீஸ் நிலையத்தின் போக்குவரத்துப் பிரிவில் கடமையாற்றிய போலீஸ் உத்தியோகஸ்தர் ஒருவர் இந்தத் தாக்குதலை மேற்கொண்டதாகவே குறிப்பிட்ட காணொளியில் தெரிகிறது.

    தாக்குதலுக்கான பின்னணி

    போலீஸ் தாக்குதல்

    குறித்த பகுதியில் விபத்தொன்று நடைபெற்றதாகவும், அந்த விபத்து நடந்த இடத்தை - அளந்து அடையாளப்படுத்தும் பணியில் போலீஸார் ஈடுபட்டுக் கொண்டிருந்த போது, மேற்படி இளைஞர்கள் இருவரும் மோட்டார் சைக்கிளில் அந்த இடத்தை மிகவும் வேகமாகக் குறுக்கறுத்து கடந்த சென்றுள்ளனர் என்றும், பொதுமக்கள் பாதுகாப்பு அமைச்சர் தெரிவிக்கிறார்.

    இதன்போது போலீஸாரின் அளவை நாடா - அந்த இளைஞர்களின் மோட்டார் சைக்கிளில் மாட்டி இழுபட்டுச் சென்ற போதிலும், அவர்கள் மோட்டார் சைக்கிளை நிறுத்தாமல் ஓட்டிச் சென்றதாகவும் அமைச்சர் கூறுகிறார்.

    இதனையடுத்தே, அந்த இளைஞர்களை குறித்த போலீஸ் உத்தியோகஸ்தர் விரட்டிச் சென்று - பிடித்து தாக்கியுள்ளார் எனக் குறிப்பிட்ட அமைச்சர் "அவ்வாறு தாக்குவதற்கு குறித்த போலீஸ் உத்தியோகஸ்தருக்கு உரிமை கிடையாது" எனவும் தெரிவித்தார்.

    இன்று (23) கைது செய்யப்பட்ட மேற்படி போலீஸ் உத்தியோகஸ்தர், ஏறாவூர் சுற்றுலா நீதிமன்ற நீதவான் முன்னிலையில் ஆஜர் செய்யப்பட்டபோது, அவரை ஒரு லட்சம் ரூபாய் பெறுமதியான சரீரப் பிணையில் விடுவிக்குமாறு நீதவான் உத்தரவிட்டார்.

    இது தொடர்பான வழக்கு விசாரணை எதிர்வரும் நவம்பர் மாதம் 10ஆம் திகதி நடக்கவுள்ளது.

    https://www.bbc.com/tamil/sri-lanka-59022473

  5. கொரோனா வைரஸ்: டெல்டா பிளஸ் புதிய கொரோனா திரிபு அதிவேகமாக பரவக் கூடியதாக இருக்கலாம்

    • மிஷெல் ராபர்ட்ஸ்
    • சுகாதார ஆசிரியர், பிபிசி இணைய செய்திகள்
    ஒரு மணி நேரத்துக்கு முன்னர்
    கொரோனா வைரஸ் - மாதிரிப் படம்

    பட மூலாதாரம்,GETTY IMAGES

     
    படக்குறிப்பு,

    கொரோனா வைரஸ் - மாதிரிப் படம்

    கொரோனா வைரசின் புதிய திரிபை சிலர் 'டெல்டா பிளஸ்' என்று அழைக்கிறார்கள். அத்திரிபு வழக்கமான டெல்டா திரிபை விட எளிதாக பரவக்கூடியதாக இருக்கலாம் என பிரிட்டனைச் சேர்ந்த நிபுணர்கள் தற்போது கூறுகின்றனர்.

    யூகே ஹெல்த் செக்யுரிட்டி ஏஜென்சி எனப்படும் சுகாதார பாதுகாப்பு அமைப்பு, இத்திரிபை 'ஆய்வில் உள்ள திரிபு' என வகைப்படுத்தியுள்ளது.

    இந்த புதிய டெல்டா பிளஸ் திரிபு ஏற்கெனவே உள்ள திரிபுகளைவிட அதிக பாதிப்பை ஏற்படுத்தும் என் சொல்வதற்கு ஆதாரம் இதுவரை இல்லை.

    தற்போது பயன்பாட்டில் இருக்கும் கொரோனா தடுப்பூசிகளே, இந்த திரிபுக்கு எதிராகவும் சிறப்பாக வேலை செய்யும் என விஞ்ஞானிகள் நம்பிக்கை தெரிவித்துள்ளனர்.

    பிரிட்டனில் ஏற்படும் கொரோனா தொற்றில் வழக்கமான டெல்டா திரிபால் பாதிக்கப்படுபவர்களின் எண்ணிக்கை அதிகமாக இருக்கிறது. தற்போது டெல்டா பிளஸ் அல்லது AY.4.2 என்றழைக்கப்படும் இந்த திரிபால் பாதிக்கப்படுபவர்களின் எண்ணிக்கை அதிகரித்து வருகிறது.

    ஒட்டுமொத்த கொரோனா பாதிப்புகளில் ஆறு சதவீதம் பேர் இந்த திரிபால் பாதிக்கப்பட்டிருப்பதாக சமீப கால அதிகாரபூர்வ தரவுகள் கூறுகின்றன.

    கொரோனா வைரஸ்

    பட மூலாதாரம்,GETTY IMAGES

     
    படக்குறிப்பு,

    கொரோனா வைரஸ்

    பிரிட்டனின் டெல்டா திரிபை விட, டெல்டா பிளஸ் திரிபின் பரவும் விகிதம் அதிகமாக இருப்பதாக சில ஆரம்பகட்ட ஆதாரங்கள் கிடைத்திருப்பதாக அதிகாரிகள் கூறியுள்ளனர்.

    இதெல்லாம் ஒரு பக்கம் இருக்க, டெல்டா திரிபைப் போல, டெல்டா ப்ளஸ் திரிபு கவலைக்குரிய திரிபு வகைகளில் ஒன்றாக கருதப்படவில்லை. இது தான் கொரோனா திரிபுகளின் ஆபத்தை பொறுத்து வழங்கப்படும் படிநிலைகளில் உச்சபட்சமானது என்பது குறிப்பிடத்தக்கது.

    உலக அளவில் பல கொரோனா திரிபுகள் உள்ளன. வைரஸ் பிறழ்வு எப்போதுமே வழக்கமாக நடக்கும் ஒன்று தான், எனவே புதிய திரிபைக் காண்பதில் ஆச்சர்யம் ஒன்றும் இல்லை.

    AY.4.2 திரிபில் உள்ள சில புதிய பிறழ்வுகள் மனித உடலுக்குள் இருக்கும் செல்களை பாதிக்க வைரஸ் பயன்படுத்தப்படும் ஸ்பைக் புரதங்களை பாதிப்பதாக உள்ளன.

    கொரோனா பெருந்தொற்று தொடங்கியதிலிருந்தே Y145H மற்றும் A222V பிறழ்வுகள் பல்வேறு கொரோனா துணைவரிசைகளில் காணப்பட்டன.

    தற்போது இருக்கும் கொரோனா வைரசின் பல்வேறு திரிபுகளுக்கு எதிராக, புதிய கொரோனா தடுப்பூசி மேம்பாடு தொடர்பாக எந்த வித பரிந்துரைகளும் இல்லை.

    "எல்லா கொரோனா திரிபுகளுக்கும் ஒரே மாதிரியான பொது சுகாதார அறிவுரைகள்தான் வழங்கப்படுகின்றன. யார் எல்லாம் தடுப்பூசி செலுத்திக் கொள்ள தகுதியானவர்களோ, அவர்கள் எல்லாம் கொரோனா தடுப்பூசி செலுத்திக் கொள்ளுங்கள், உங்களுக்கு எப்போது பூஸ்டர் டோஸ் செலுத்திக்கொள்ள அழைப்பு விடுக்கப்படுகிறதோ, அப்போது முன்வந்து பூஸ்டர் டோஸை செலுத்திக் கொள்ளுங்கள்" என பிரிட்டனின் சுகாதார பாதுகாப்பு முகமையின் மருத்துவர் ஜென்னி ஹாரிஸ் கூறியுள்ளார்.

    "எப்போதும் எச்சரிக்கையோடு இருங்கள். மக்கள் நெருக்கமாக இருக்கும் இடங்களில் முகக்கவசம் அணிந்து கொள்ளுங்கள், மற்றவர்களை உள் அரங்குகளில் சந்திக்கும் போது காற்றோட்டத்துக்காக ஜன்னல் கதவுகளை திறந்துவிடுங்கள். கொரோனா அறிகுறிகள் இருந்தால் பிசிஆர் சோதனை செய்து கொள்ளுங்கள், நெகட்டிவ் என சோதனை முடிவு கிடைக்கும் வரை சுயமாக தனிமைப்படுத்திக் கொள்ளுங்கள்" என்கிறார் ஜென்னி.

    https://www.bbc.com/tamil/science-59020011

  6. On 21/10/2021 at 10:33, அன்புத்தம்பி said:

    163302620_770528680545787_35427386899047

    இந்த கருவியை பார்த்ததும் சிறுவயதில் வீட்டில் வந்து முடிவெட்டிவிடும் அப்புவைத் தான் ஞாபகம் வருது. எனக்கு சலூனில் போய் முடிவெட்டத் தான் விருப்பம். அப்பு வந்தால் அழுது கொண்டு போய் இருக்க அவர் அழாதையணை என்று சமாதனம் சொல்லி முடிவெட்டி விடுவார். அவரின் இந்த கையால் அழுத்தி செயற்படுத்தும் கருவி முடியை பிடித்து இழுக்கும், அப்ப கொஞ்சம் வலிக்கும்.

    • Like 1
  7. இந்தியா Vs பாகிஸ்தான் டி20 உலகக் கோப்பை: 'இது சாதாரண ஆட்டமல்ல' - இரு நாடுகளிலும் உணர்ச்சிப் பெருக்கு

    20 அக்டோபர் 2021
    கோலி ரோஹித்

    பட மூலாதாரம்,GETTY IMAGES

    அக்டோபர் 24 ஞாயிற்றுக்கிழமை துபாயில் இந்தியா- பாகிஸ்தான் அணிகளுக்கு இடையிலான டி20 உலகக் கோப்பை போட்டி குறித்து இந்திய கேப்டன் விராட் கோலியிடம் ஒரு கேள்வி கேட்கப்பட்டது.

    அதற்கு, "எங்களுக்கு இது மற்ற போட்டிகளைப் போன்றதே.", என்று விராட் கோலி பதிலளித்துள்ளார்.

    இந்தியா-பாகிஸ்தான் போட்டி குறித்து கேப்டன் விராட் கோலி கூறிய இந்த கருத்தை 'விதிவிலக்காக' எடுத்துக் கொள்ளலாம்.

    சுமார் 28 மாதங்களுக்குப் பிறகு, இரு நாடுகளின் அணிகளும் நேருக்கு நேர் சந்திக்கும். மேலும் அவர்களுக்கு இடையேயான 'மோதல்' குறித்து எல்லை முழுவதும் கடுமையான விவாதம் நடைபெறுகிறது.

    பிசிபி தலைவர் ரமீஸ் ராஜாவும் இது 'சாதாரண போட்டி' அல்ல என்றும், இந்தியாவுக்கு எதிராக பாகிஸ்தான் வெற்றி பெற்றால், 'நாட்டின் மன உறுதியும் உயரும்' எனவும் கூறியுள்ளார்.

    இந்தியாவிலும் இந்த போட்டி பற்றிய எதிர்பார்ப்பு உள்ளது. ஆனால், 'பல அரசியல் கட்சிகள் 'இந்த போட்டியை ரத்து செய்ய' கோருகின்றன.

    ரமீஸ் ராஜா கூறியது என்ன?

    தனது அணிக்கும் தனது நாட்டிற்கும் இது ஒரு சிறப்பு வாய்ந்த போட்டி என்று பாகிஸ்தான் கிரிக்கெட் வாரியத் தலைவர் ரமீஸ் ராஜா கருதுகிறார்.

    இது தொடர்பாக, ரமீஸ் ராஜா ஒரு வீடியோ பதிவை வெளியிட்டார், அதை பாகிஸ்தான் கிரிக்கெட் வாரியம் தனது அதிகாரப்பூர்வ ட்விட்டர் கணக்கில் வெளியிட்டது.

    இதில், பாகிஸ்தான் அணிக்கு ஆதரவளிக்குமாறு ரமீஸ் ராஜா ரசிகர்களிடம் வேண்டுகோள் விடுத்துள்ளார்.

    ரமீஸ்

    பட மூலாதாரம்,TWITTER/@IRAMIZRAJA

    ரமீஸ் ராஜா கூறுகையில், "போட்டி நடைபெறுவது உங்களுக்கு ஏற்கனவே தெரியும். நீங்கள் பாகிஸ்தான் அணிக்கு உறுதுணையாக நிற்க வேண்டும் என்று நான் ரசிகர்கள் அனைவரையும் கேட்டுக்கொள்கிறேன், ஏனெனில் இது மிகவும் முக்கியமான போட்டி. ஒரு வகையில், இந்த போட்டியில் நாம் வெற்றி பெற்றால்; இன்ஷா அல்லாஹ் வெற்றி பெற்றால் - ஒரு முழு சமூகத்திற்கும் ஒரு நல்ல செய்தியாக இருக்கும்" என்று தெரிவித்துள்ளார்.

    இந்தியா மற்றும் பாகிஸ்தான் அணிகளுக்கு இடையிலான கடைசி போட்டி ஒருநாள் உலகக் கோப்பையில் 2019 ஆம் ஆண்டு ஜூன் மாதம் 16ம் நாளன்று நடைபெற்றது. அந்த போட்டியில், இந்திய அணி பாகிஸ்தானை மோசமாக வீழ்த்தியது.

    இப்போது அக்டோபர் 24 ஆம் தேதி நடைபெறவுள்ள போட்டி பற்றிய விவாதம் தொடர்ந்து தீவிரமடைந்து வருகிறது, இது கிரிக்கெட் வீரர்கள், நிர்வாகிகள், அதிகாரிகள், விளையாட்டு விமர்சகர்கள் மற்றும் ரசிகர்கள் மட்டும் சம்பந்தப்படவில்லை. அரசியலில் உள்ள பெரும் தலைவர்களும் போட்டி குறித்த கருத்துகளை தெரிவித்து வருகின்றனர்.

    போட்டியில் விளையாட வேண்டாம் என்ற கோரிக்கை

    இந்தியாவில் பாகிஸ்தானுடனான கசப்பான உறவு மற்றும் ஜம்மு -காஷ்மீரில் சமீபக்காலமாக சந்தேகிக்கப்படும் தீவிரவாத சம்பவங்களை மேற்கோள் காட்டி, இந்த போட்டியை ரத்து செய்ய வேண்டும் என்ற கோரிக்கை எழுப்பப்பட்டுள்ளது. இந்த கோரிக்கை விடுக்கும் நபர்கள் நாளுக்கு நாள் அதிகரித்து வருகின்றனர்.

    பாபர் ஆசம்

    பட மூலாதாரம்,GETTY IMAGES

     
    படக்குறிப்பு,

    பாபர் ஆசம்

    எதிர்க்கட்சித் தலைவர்களுடன், மத்தியில் ஆளும் பாரதிய ஜனதா கட்சியின் பல தலைவர்களும் பாகிஸ்தானுடன் கிரிக்கெட் போட்டிகள் விளையாடக்கூடாது என்று கூறிவருகின்றனர்.

    இவ்வாறு நடப்பது இது முதல் முறை அல்ல. இந்தியா மற்றும் பாகிஸ்தான் இடையேயான இருதரப்பு கிரிக்கெட் போட்டிகள் நீண்ட காலமாக நிறுத்திவைக்கப்பட்டு இருந்தது.

    ஆனால், எந்த ஐசிசி போட்டியிலும் இந்த இரண்டு அணிகளும் மோதும்போது, எல்லை முழுவதும் நிலவரம் உச்சத்தை எட்டிவிடுகிறது. வேறு எந்த விளையாட்டிலும் இது நடக்காது.

    'அதிகரிக்கும் டிக்கெட்டின் தேவை'

    டி20 உலகக் கோப்பைக்குப் பிறகு, இந்த டி20 போட்டி வடிவத்தில் இந்திய அணியின் கேப்டன் பதவியில் இருந்து விலகுவதாக இந்திய கேப்டன் விராட் கோலி அறிவித்துள்ளார். விராட் கோப்பையை வெல்ல விரும்புகிறார். இந்திய அணி பாகிஸ்தானுக்கு எதிரான பிரச்சாரத்தைத் தொடங்க வேண்டும்.

    பல நாட்களாக போட்டியின் மீதான எதிர்பார்ப்புக்கு மாறாக, பாகிஸ்தானுக்கு எதிரான போட்டியைப் பற்றி 'ஒருபோதும் வித்தியாசமாக உணரவில்லை' என்று கோலி கூறுகிறார்.

    செய்தி முகமையான பிடிஐயின் செய்திப்படி, கோலி, "உண்மையைச் சொல்வதானால், நான் எப்போதும் அப்படி உணர்ந்ததில்லை", என்று தெரிவித்துள்ளார்.

    கோலி

    பட மூலாதாரம்,GETTY IMAGES

    "கிரிக்கெட்டில் மற்ற போட்டிகளைப் போலவே நான் எப்போதும் இதை கருதுகிறேன்," என்று அவர் கூறினார்.

    மேலும், 'இது ரசிகர்களுக்கு சாதாரண போட்டி அல்ல' என்பதை அறிந்திருப்பதாக இந்திய கேப்டன் கோலி கூறியுள்ளார். அத்தகைய நபர்களில் அவரது நண்பர்களும் அடங்குவர்.

    "இந்த போட்டி குறித்து பெரும் பரபரப்பு உள்ளது என்று எனக்கு தெரியும், டிக்கெட்டுகளுக்கான தேவை மிகவும் அதிகமாக உள்ளது. மேலும், டிக்கெட் விலைகள் இப்போது மிக அதிகமாக உள்ளது. என் நண்பர்களும் டிக்கெட் கேட்கின்றனர், நான் 'இல்லை' என்று பதிலளிக்கிறேன். ", என்று கோலி கூறியுள்ளார்.

    எந்த அணி பலம் வாய்ந்தது?

    பாகிஸ்தானின் கேப்டன் பாபர் அசாமும் போட்டிக்கு முன்னதாக 'மைண்ட் கேமி'ல் ஈடுபட்டுள்ளார். பிசிபி தலைவரைப் போலவே, அவரது அணியின் வெற்றியில் தீவிரமாக இருக்கிறார்.

    பாகிஸ்தானின் ஊடகங்களும் ரசிகர்களும் பாபர் ஆசாமுடன் இந்திய கேப்டன் விராட் கோலியை ஒப்பிடுகின்றனர்.

    ரசிகர்கள்

    பட மூலாதாரம்,REUTERS

    தரவரிசை மற்றும் பதிவுகளில், இந்தியா சிறந்த நிலையில் உள்ளது. டி20 தரவரிசையில், இந்தியா இரண்டாவது இடத்திலும், பாகிஸ்தான் மூன்றாவது இடத்திலும் உள்ளது.

    பதிவுகளின் அடிப்படையில், டி20 போட்டிகளில் இந்தியா எட்டு போட்டிகளில் ஆறு போட்டிகளில் வெற்றி பெற்றுள்ளது.

    செளரவ்-ஜெய் ஷாவுடனான சந்திப்பு குறித்து ரமீஸ் ராஜா

    ஆனால், இந்த போட்டி முனையில், பாகிஸ்தானின் அதிகாரிகள் மற்றும் வீரர்கள் பின்தங்கியிருக்க விரும்பவில்லை.

    இந்திய அணிக்கு அழுத்தம் கொடுப்பதன் காரணம் இதுவா? கிரிக்கெட் மற்றும் அரசியல் வல்லுநர்கள் இதை மறுக்கவில்லை.

    ரமீஸ் ராஜா வெளியிட்டுள்ள கருத்தில், பிசிசிஐ தலைவர் செளரவ் கங்குலி மற்றும் வாரிய செயலாளர் ஜெய் ஷா உடனான சந்திப்பையும் அவர் குறிப்பிட்டுள்ளார்.

    ரமீஸ் ராஜா, "நான் செளரவ் கங்குலியை சந்தித்தேனோ? என்ற கேள்வி நிலவி வருகின்றது. நிச்சயமாக சந்தித்தேன். நான் ஜெய் ஷாவையும் சந்தித்தேன்."

    "பாருங்கள், நாங்கள் ஒரு கிரிக்கெட் பந்தத்தை நிறுவ வேண்டும். அரசியலில் இருந்து கிரிக்கெட் எவ்வளவு விலகி இருக்கிறதோ அவ்வளவு நன்மை என்று நான் எப்போதும் நினைக்கிறேன்.", என்று அவர் மேலும் கூறியுள்ளார்.

    ரமீஸ் ராஜா கிரிக்கெட்டை 'அரசியலில் இருந்து விலக்கி வைப்பது' பற்றி பேசிக்கொண்டிருக்கலாம். ஆனால் அதைச் செய்வது எளிதல்ல. வல்லுநர்கள் ரமீஸ் ராஜாவின் கருத்து கூறிய நேரத்திலிருந்து இதையே யூகிக்கின்றனர்.

    மற்ற விளையாட்டுகளை விட இரு நாடுகளிலும் கிரிக்கெட் மிகவும் பிரபலமாக உள்ளது. இதன் மூலம் பல நேரங்களில் உணர்ச்சிகளின் அலை அதிகரித்து வருகிறது.

    கோப்பு

    பட மூலாதாரம்,GETTY IMAGES

    நிபுணர்களின் கருத்துப்படி, இந்தியா மற்றும் பாகிஸ்தானில் கிரிக்கெட்டையும் அரசியலையும் தனித்தனியாக வைத்திருக்கும் முயற்சிகள் பெரும்பாலும் வெற்றிபெறாததற்கு இதுவே காரணம்.

    பாகிஸ்தானில் நாட்டின் நிலைமை கிரிக்கெட் அணியின் முன்னாள் கேப்டன் இம்ரான் கானின் கையில் உள்ளது. அதே நேரத்தில், தற்போதைய பிசிசிஐ செயலாளர் ஜெய் ஷாவின் தந்தை அமித் ஷா உள்துறை அமைச்சராக உள்ளார். ஞாயிற்றுக்கிழமை பாகிஸ்தானுக்கு எதிரான போட்டி குறித்து அவரிடமும் கேள்விகள் கேட்கப்படுகின்றன.

    சுப்பிரமணியன் சுவாமியின் கேள்வி

    திங்கள்கிழமையன்று பிசிபியின் ட்விட்டர் கணக்கில் ரமீஸ் ராஜாவின் அறிக்கை வெளியிடப்பட்ட இரண்டு மணி நேரத்திற்குப் பிறகு பாஜக தலைவர் சுப்பிரமணியன் சுவாமி ஒரு ட்வீட் செய்தார்.

    அதில், அவர் கேள்வி அம்புகளை வீசினார். பாகிஸ்தானுக்கு எதிரான போட்டியை ரத்து செய்ய வேண்டும் என்ற கோரிக்கையை எழுப்பினார்.

    சுப்பிரமணியன் சுவாமி, "பயங்கரவாதத்தை விற்கும் பாகிஸ்தானுடன் கிரிக்கெட் போட்டிக்கு என்ன அவசரம்? பிசிசிஐயின் ஜெய் ஷாவுக்கு அவரது தந்தை உள்துறை அமைச்சராக என்ன சொல்கிறார் என்று தெரியுமா? துபாயில் தாதாக்கள் கிரிக்கெட் பந்தயம் மூலம் பணம் சம்பாதிப்பது முக்கியம். இந்த கிரிக்கெட்டை ரத்து செய்து நாட்டின் மதிப்பை காப்பாற்றுங்கள்." என்று பதிவிட்டுள்ளார்.

    இந்தக் கோரிக்கையை எழுப்பியது சுப்பிரமணியன் சுவாமி மட்டுமல்ல.

    சுப்பிரமணியன் சுவாமி

    தொழிலதிபரும் எழுத்தாளருமான சுஹைல் சேத்தும் இந்தியா மற்றும் பாகிஸ்தான் இடையேயான போட்டி குறித்து கேள்விகளை எழுப்பியுள்ளார்.

    சுஹைல் சேத், "எல்லை தாண்டி காஷ்மீரில் அப்பாவி இந்தியர்கள் மீது தொடர்ந்து தாக்குதல் நடத்தும் போது, இந்தியாவுக்கும் பாகிஸ்தானுக்கும் இடையே ஒரு போட்டியை அவசியம் நடந்தவேண்டுமா? அல்லது பாகிஸ்தானின் எந்த ஆப்-களை நாம் தடை செய்யலாம் என்று பார்ப்போமா?. அல்லது கிரிக்கெட் என்று வரும்போது, நாட்டை விட வணிகத்திற்கு முன்னுரிமை அளிக்கப்படுகிறதா?

    பாகிஸ்தானுடனான கிரிக்கெட் போட்டியின் சரியான தன்மை குறித்து கேள்விகள் எழுப்பப்பட்டுள்ளன. நரேந்திர மோதி அரசின் அமைச்சர் கிரிராஜ் சிங் மற்றும் பீகாரின் துணை முதல்வர் தர்கிஷோர் பிரசாத் ஆகியோர் எழுப்பியுள்ளனர்.

    சமீபத்தில், காஷ்மீர் பள்ளத்தாக்கில் தீவிரவாதிகள் என சந்தேகிக்கப்பட்டு பீகார் மக்கள் மீது குறிவைக்கப்பட்டது. பீகாரைச் சேர்ந்த இந்த இரண்டு தலைவர்களும் இந்த காரணத்திற்காக போட்டி குறித்து கேள்விகளை எழுப்புகின்றனர் என்று நம்பப்படுகிறது.

    மறுபுறம், ஏஐஎம்ஐஎம் தலைவர் அசாதுதீன் ஓவைசி மற்றும் ஆம் ஆத்மி கட்சியும் பாகிஸ்தானுக்கு எதிரான போட்டியில் விளையாட வேண்டாம் என்று கோரியுள்ளனர்.

    காங்கிரஸ் கட்சியின் இளைஞரணி தலைவர் பி.வி.ஸ்ரீனிவாஸ் இந்தியா-பாகிஸ்தான் போட்டியின் மூலமாக உள்துறை அமைச்சர் அமித் ஷாவை குறி வைத்து பதிவிட்டுள்ளார்.

    அவர், "இந்தியா-பாகிஸ்தான் கிரிக்கெட் போட்டியை பாஜக தலைவர்கள் சிலர் எதிர்க்கின்றனர். இந்த நிலையில், முன்னாள் பாஜக தலைவரும் தற்போதைய உள்துறை அமைச்சருமான அமித் ஷாவின் மகன் ஜெய் ஷா, இந்த போட்டி நடத்தப்பட வேண்டும் என்று முயற்சிக்கிறார். என்ன நடக்கிறது?", என்று ட்விட்டரில் பதிவிட்டுள்ளார்.

    ஆனால், காங்கிரஸ் தலைவர்கள் அனைவரும் ஒரே மாதிரியாக பேசுவது இல்லை.

    காங்கிரஸ் தலைவரும் பிசிசிஐ துணைத் தலைவருமான ராஜீவ் சுக்லாவின் கருத்துப்படி, 'ஐசிசியுடன் இருக்கும் கடமை காரணமாக நீங்கள் எந்த அணிக்கும் எதிராக விளையாட மறுக்க முடியாது. நீங்கள் ஐசிசி போட்டிகளில் விளையாட வேண்டும்." என்று தெரிவித்துள்ளார்.

    பல தசாப்தங்களாக இந்தியா மற்றும் பாகிஸ்தான் இடையேயான போட்டிகளுடன் பதற்றமும் அழுத்தமும் நிலவி வருகின்றது. தற்போதைய வீரர்கள் வெளிப்படையாக எதுவும் சொல்லாமல் இருக்கலாம். ஆனால் பல முன்னாள் வீரர்கள் இந்தியா மற்றும் பாகிஸ்தான் போட்டி ஒரு போட்டி போல இல்லை என்று கருத்து தெரிவிக்கின்றனர்.

    சச்சினின் தூங்கா நாட்கள்

    பல நேரங்களில், மன அழுத்தம் காரணமாக, வீரர்கள் தூக்கத்தை தொலைக்கின்றனர்.

    பிரபல கிரிக்கெட் வீரரான சச்சின் டெண்டுல்கர் தனது சுயசரிதையான 'ப்ளேயிங் இட் மை வே' என்ற புத்தகத்திலும் இதைக் குறிப்பிட்டுள்ளார்.

    சச்சின் டெண்டுல்கர், 2003 ஆம் ஆண்டு பாகிஸ்தானுக்கு எதிராக தென்னாப்பிரிக்காவின் செஞ்சுரியனில் நடந்த உலகக் கோப்பை போட்டியைப் பற்றி எழுதியுள்ளார். அதில், "இரு அணிகளுக்கும் இது ஒரு பெரிய போட்டியாக இருக்கும். உணர்ச்சிகள் மிகவும் வலுவாக இருந்ததால் போட்டிக்கு முந்தைய மூன்று இரவுகள் என்னால் சரியாக தூங்கமுடியவில்லை. நாங்கள் ஏதாவது ஒரு போட்டியில் வெல்ல விரும்பினால், அது இந்த போட்டிதான். " என்ற் குறிப்பிட்டுள்ளார்.

    சச்சின்

    பட மூலாதாரம்,GETTY IMAGES

    இந்தியா- பாகிஸ்தான் இடையிலான ஆட்டம் எல்லா காலத்திலும் மிகச்சிறந்த ஒருநாள் போட்டியாக கருதப்படுகிறது. அந்த போட்டியில் சச்சின் டெண்டுல்கர் 75 பந்துகளில் 98 ரன்கள் எடுத்தார். சோயிப் அக்தரின் பந்தில் சச்சின் அடித்த சிக்ஸர் இன்றும் நினைவில் உள்ளது.

    "(அப்போது) நாடு தோல்வியைத் தாங்க முடியாது. இது எங்களுடைய பல ரசிகர்களின் உண்மையான இறுதிப் போட்டி. நாங்கள் பாகிஸ்தானை செஞ்சுரியனில் வீழ்த்தினால், மீதமுள்ள போட்டிகளில் என்ன நடக்கிறது என்பது அவர்களுக்கு முக்கியமல்ல.", என்று சச்சின் டெண்டுல்கர் குறிப்பிட்டுள்ளார்.

    அந்த போட்டி முடிந்து 18 ஆண்டுகள் கடந்துவிட்டன, ஆனால் 'வெற்றி பெறுவதற்கான பிடிவாதம்' எல்லைகளை தாண்டி அப்படியே உள்ளது.

    சச்சின் டெண்டுல்கருடன் பல ஆண்டுகளாக உடை மாற்றும் அறையைப் பகிர்ந்து கொண்ட சுழற்பந்து வீச்சாளர் ஹர்பஜன் சிங்கின் வீடியோ சமீபத்தில் வைரலானது.

    இதில், ஹர்பஜன் பாகிஸ்தான் அணிக்கு இந்தியாவுடன் டி20 போட்டிகளில் விளையாட வேண்டாம் என்றும், போட்டியை விட்டு விலகி செல்லுங்கள் எனவும் வேடிக்கையாக அறிவுறுத்தியுள்ளார்.

    ஹர்பஜன், "நான் சோயப் அக்தரிடம் சொன்னேன், இந்த முறை விளையாடுவதால் என்ன பயன்? நீங்கள் விலகி விடுங்கள். நீங்கள் எங்களுடன் விளையாடுவீர்கள், பிறகு நீங்கள் தோல்வியடைவீர்கள், பிறகு நீங்கள் ஏமாற்றமடைவீர்கள், எங்கள் அணி மிகவும் வலிமையானது, எங்கள் வீரர்கள் ஜெயித்துவிடுவார்கள்! " என்று கூறியுள்ளார்.

    ஆனால், இப்போது இந்த போட்டி குறித்து வெளியிடப்படும் கருத்துகளை வைத்து, யாரும் விட்டுக் கொடுக்கவோ விலகி செல்லவோ தயாராக இருப்பதாகத் தெரியவில்லை - அது களத்திற்கு உள்ளாக இருந்தாலும் சரி, வெளியில் இருந்தாலும் சரி!

    https://www.bbc.com/tamil/sport-58981094

  8. 1 minute ago, பிரபா சிதம்பரநாதன் said:

    SCO v OMN அவுஸ் நேரப்படி 22/10/21 அதிகாலை 1am. அதனால்தான் ஒரு போட்டி என நினைத்தேன்..

    ஓமோம், தெளிவுபடுத்தலுக்கு நன்றி.

  9. மனித குல வரலாற்றை கேள்விக்குள்ளாக்கும் ட்ராச்சிலோஸ் காலடித் தடங்கள்

    • ஃபெர்னாண்டோ டுஆர்டே
    • பிபிசி உலக சேவைகள்
    21 அக்டோபர் 2021, 02:01 GMT
    ட்ராச்சிலோஸ் காலடித் தடங்கள்

    பட மூலாதாரம்,PER AHLBERG

     
    படக்குறிப்பு,

    ட்ராச்சிலோஸ் காலடித் தடங்கள்

    இந்த சர்ச்சைக்குரிய காலடித்தடங்கள் மனித இனத்தின் தோற்றம் பற்றி நாம் அறிந்த வரலாற்றுக்கு சவால் விடுகின்றன.

    கிரேக்க தீவான கிரீட்டில் தற்செயலாக கண்டுபிடிக்கப்பட்ட காலடித் தடங்களின் தொகுப்பு, மனித இனத்தின் தோற்றம் குறித்த வியப்பான கேள்விகளையும் - பெரும் சர்ச்சையையும் எழுப்புகிறது.

    ட்ராச்சிலோஸ் காலடித் தடங்கள் என்று அறியப்படும் இந்த தடங்களை போலந்து புதைபடிவ ஆராய்ச்சியாளர் ஜெரார்ட் ஜியர்லின்ஸ்கி 2002ஆம் ஆண்டு கண்டுபிடித்தார். ஆனால், அவை இந்த வகையான மனித மூதாதையர்களின் பழமையான ஆதாரம் என்று ஒரு புதிய ஆய்வு கூறுகிறது.

    அக்டோபர் 11ஆம் தேதியன்று ஒரு சர்வதேச குழுவால் 'சயின்டிஃபிக் ரிப்போர்ட்ஸ்' சஞ்சிகையில் வெளியிடப்பட்ட இந்த ஆராய்ச்சி, ஹோமினின்கள் (நவீன மனிதர்கள், அழிந்துபோன மனித இனங்கள் மற்றும் நமது உடனடி மூதாதையர்கள் அடங்கிய குழுவை விவரிக்கப் பயன்படுத்தப்படும் சொல்) வேறு எங்கும் தோன்றுவதற்கு முன் ஆப்ரிக்காவில் தோன்றி, பரிணாம வளர்ச்சி அடைந்தனர் என்று பரவலாக ஏற்றுக்கொள்ளப்பட்ட கோட்பாட்டிற்கு சவால் விடுக்கிறது.

    ஆப்ரிக்காவுக்கு வெளியே

    'மனிதகுலத்தின் தொட்டில்' ஆப்ரிக்காவே என்ற கருதுகோளை புதைபடிவ ஆராய்ச்சியாளர்கள் பரவலாக ஒப்புக்கொண்டுள்ளனர்.

    இந்த கோட்பாட்டின்படி, இரு மில்லியன் ஆண்டுகளுக்கு குறைவான காலத்தில், உலகின் பிற பகுதிகளுக்கு நடந்த 'பெரும் இடப்பெயர்வு'க்கு முன் மனிதகுலம் அந்த கண்டத்தில் மட்டுமே உருவானது.

    ஆனால், ஸ்வீடனின் புதைவடிவ ஆராய்ச்சியாளர் பெர் அஹல்பெர்க் தலைமையிலான ஆராய்ச்சியாளர்கள் குழு, இந்த காலவரிசைக்கு சவால் விடுகிறது: ட்ராச்சிலோஸ் காலடித்தடம் ஆறு மில்லியன் ஆண்டுகள் பழமையானது என அவர்கள் கூறுகின்றனர்.

    1976 ஆம் ஆண்டில் தான்சானியாவில் கண்டுபிடிக்கப்பட்ட லாடோலி கால்தடங்கள் - நடக்க பயன்படுத்தப்பட்ட மனிதனைப் போன்ற பாதத்தின் முதன்மையான நேரடி சான்று என்று கருதப்படுவதை விட, கிட்டத்தட்ட 2.5 மில்லியன் ஆண்டுகள் பழமையான தடங்களாக இது இருக்கும்.

    ஆப்பிரிக்காவின் கண்டுபிடிப்புகள் நம் "மனித இன மரத்தை" ஒருங்கிணைப்பதில் முக்கியமானவை.

    காலடித் தடங்களைப் போல, கடந்த 100 ஆண்டுகளில் ஆப்பிரிக்காவில் மனிதனுக்கு முந்தைய புதைபடிவ கண்டுபிடிப்புகள் பலவும் உள்ளன. இதில் ஏழு மில்லியன் ஆண்டுகளுக்கு முன்பு ஆப்பிரிக்காவில் வாழ்ந்ததாக கருதப்படும் சஹேலாந்த்ரோபஸின் (Sahelanthropus) மண்டை ஓடும் அடங்கும்; தற்போது அறியப்படும் மிகப் பழமையான ஹோமினின் இதுவாகும்.

    ஒப்பீட்டு அளவில், ஐரோப்பாவில் இதுபோன்ற எலும்பு படிமங்களின் கண்டுபிடிப்புகள் மிகக் குறைவு.

    க்ரீட்டில் காலடித் தடங்களை விட்டுச் சென்றது எது?

    லாடோலி கால்தடங்கள்

    பட மூலாதாரம்,GETTY IMAGES

     
    படக்குறிப்பு,

    லாடோலி கால்தடங்கள்

    பெர் அஹ்ல்பெர்க், 2017 ஆம் ஆண்டில் ட்ராச்சிலோஸ் காலடித் தடம் பற்றிய முதல் அறிக்கையை வெளியிட்ட குழுவில் ஒருவராக இருந்தார். அக்டோபர் 2021-ல் நடத்தப்பட்ட ஆய்வில், அவற்றின் வயது 5.7 மில்லியன் ஆண்டுகளில் இருந்து 6.05 மில்லியனாக மாற்றியமைத்து அச்சிடப்பட்ட புவியியல் பகுப்பாய்வு என்கிற ஆய்வு.

    அஹ்ல்பெர்க் மற்றும் அவரது சக ஆராய்ச்சியாளர்கள், அந்த காலடித் தடம் கொரில்லாக்கள் மற்றும் சிம்பன்ஸிகள் போன்ற விலங்குகளின் காலடிகளைப் போல் இல்லாமல், ஹாலிக்ஸ் (பெருவிரல்) மற்ற விரல்களுக்கு நெருக்கமாகத் தோன்றும் வகையில், ஹோமினின் காலடித் தடங்களை ஒத்திருப்பதாக தங்கள் ஆய்வில் முடிவு செய்தனர்.

    "மனிதரல்லாத குரங்கின் காலடித் தடங்கள் மிகவும் வித்தியாசமாகத் தெரிகின்றன; அதன் கால் ஒரு மனிதக் கையைப் போன்ற வடிவத்தில் உள்ளது, பெருவிரல் கால்விரலின் பக்கவாட்டில் தாழ்வாக இணைக்கப்பட்டு ஒட்டிக்கொண்டுள்ளது" என்று அவர் பிபிசியிடம் கூறினார்.

    "நம் சக விலங்குகளுடன் ஒப்பிடுகையில், நம் பெருவிரல்கள் பாதத்தின் நீண்ட அச்சிற்கு ஏற்ப உள்ளன - அவை ஒரு பக்கமாக துருத்திக் கொண்டு இல்லை."

    ஆனால், சில புதைபடிவ ஆராய்ச்சியாளர்களால் இக்கண்டுபிடிப்புகள் சந்தேகத்துடன் பார்க்கப்படுகிறது.

    விமர்சகர்கள் தடங்களை பகுப்பாய்வு செய்ய பயன்படுத்தப்படும் முறைகளைக் குறித்து கேள்வி எழுப்பினர். மேலும், சிலர் அவை உண்மையான கால்தடங்களா என்று கூட கேட்டனர்.

    இங்கிலாந்தில் உள்ள போர்ன்மவுத் பல்கலைக்கழகத்தைச் சேர்ந்த முன்னணி காலடித் தட நிபுணர் பேராசிரியர் மேத்யூ பென்னட், கிரீஸில் உள்ள தடங்களைப் படிக்கும் குழுவில் ஒருவராக இருந்தார். ஆனால் அவரும் அவரது மதிப்பீட்டில் எச்சரிக்கையாக இருக்கிறார்.

    "அவை மிகவும் புதிரான ஆர்வத்தைத் தூண்டக் கூடிய புதைபடிவ காலடித் தடங்கள்; அநேகமாக ஒரு இரு கால்களைக் கொண்டு நடக்கும் விட்டுச் சென்ற தடமாக இருக்கலாம், சில வகையான மனிதக் குரங்குகளாக இருக்கலாம்" என பேராசிரியர் பென்னட் பிபிசியிடம் விளக்கினார்.

    "காலடித் தடங்கள் மனித மரபுவழி வந்தவை என்றால் அது மற்றொரு கதை."

    பென்னட்டின் தயக்கத்தை புரிந்து கொள்ள, ஐரோப்பாவில் ஒரு ஹோமினின் புதைபடிவ எலும்பு கூட இல்லாததை நாம் மீண்டும் நினைவில் கொள்ள வேண்டும்.

    மேலும், மனித பரிணாமத்தின் காலவரிசை ஒரு எளிய விவகாரத்திலிருந்து வெகு தொலைவில் உள்ளது.

    பெரிய மனிதக் குரங்குகள் - ஒராங்குட்டான்கள், கொரில்லாக்கள், சிம்பன்ஸிகள் மற்றும் மனிதர்கள் - தோராயமாக 23 மில்லியன் முதல் 5 மில்லியன் ஆண்டுகளுக்கு முன்பு, மியோசீன் என்று அறியப்பட்ட காலத்தில் தோன்றி பன்முகப்பட்டதாக புதைபடிவ ஆராய்ச்சியாளர்கள் நம்புகின்றனர்.

    ஆனால், மனிதர்கள் எப்போது அவைகளிடமிருந்து பிரிந்து வந்தனர் என்கிற விஷயத்தில் அவர்கள் மத்தியில் குறைவான அளவுக்கே ஒருமித்த கருத்து நிலவுகிறது.

    மனிதர்கள் அல்லாத பெரிய குரங்குகள் ஐரோப்பாவில் சுற்றித் திரிந்ததற்கான ஆதாரங்களை விஞ்ஞானிகள் கண்டறிந்துள்ளனர். எனவே, அவை க்ரீட்டில் காலடித் தடங்களை விட்டுச் சென்றிருக்கலாம் என இங்கிலாந்தில் உள்ள லிவர்பூல் பல்கலைக்கழகத்தின் உயிரியல் மானுடவியல் நிபுணர் ராபின் குரோம்டன் விளக்குகிறார்.

    "தடங்கள் நிச்சயமாக ஹோமினினாக இருக்கலாம், அது நிச்சயமாக உற்சாகமளிக்கிறது. ஆனால், இன்னும் மேற்படி செய்யவேண்டிய ஆராய்ச்சி மற்றும் கண்டுபிடிப்புகள் மட்டுமே ஒரு பெரிய கேள்விக்குறியைத் தீர்க்கக்கூடும்", என குரோம்ப்டன் பிபிசியிடம் கூறினார்.

    வேறு வகையில் கூறுவதானால், ஐரோப்பாவில் அதிக எலும்புகள் மற்றும் காலடித் தடங்களை கண்டுபிடிக்க வேண்டும்.

    ட்ராச்சிலோஸ் காலடித் தடங்கள் எவ்வளவு முக்கியம்?

    ஹோமினின் மண்டை ஓடுகள்

    பட மூலாதாரம்,GETTY IMAGES

     
    படக்குறிப்பு,

    ஹோமினின் மண்டை ஓடுகள்

    சுமார் 300,000 ஆண்டுகளுக்கு முன்பு ஆப்ரிக்காவில் நம் இனமான 'ஹோமோ சேபியன்ஸ்' உருவானது என்பதில் எந்த சந்தேகமும் இல்லை என அஹ்ல்பெர்க் கூறுகிறார். அவரது ஆர்வம் நம் வரலாற்றில் மிகவும் முந்தைய காலகட்டத்தில் உள்ளது.

    இது (ஹோமோ சேபியன்ஸ் ஆப்பிரிக்க வம்சாவளி) நன்கு ஆவணப்படுத்தப்பட்டுள்ளது, "என்று அவர் கூறுகிறார்.

    "இங்குள்ள கேள்வி என்னவென்றால், முழு மனித மரபுவழியும் இன்னும் முன்னதாகவே ஆப்ரிக்காவில் தோன்றியதா என்பதுதான்."

    "ஒருவேளை அதுவும் இல்லாமல், எங்கள் ஆராய்ச்சி கூறுவதுபோல, ஆரம்பகால மனித மூதாதையர்கள் தெற்கு ஐரோப்பாவிலும் கிழக்கு ஆபிரிக்காவிலும் சுற்றி திரிந்திருக்கலாம்." என அஹ்ல்பெர்க் கூறுகிறார்.

    'அவுட் ஆப் ஆப்ரிக்கா' கருத்தை மறுப்பதற்கு பதிலாக, நாம் தற்போது நம்புவதை விட முன்னதாகவே நம் முன்னோர்கள் ஐரோப்பாவில் பரவியிருக்கலாம் என வேலை பார்ப்பதாக அஹ்ல்பெர்க் கூறுகிறார்.

    "நாங்கள் சொல்வது என்னவென்றால், இந்த ஆரம்பகால ஹோமினின்களின் சுற்றிதிரிந்த வரம்பு மக்கள் நினைப்பதை விட பரந்துபட்டதாக இருக்கலாம்."

    கிரேகோபிதேகஸின் தாடை

    பட மூலாதாரம்,UNIVERSITY OF TUBINGEN

     
    படக்குறிப்பு,

    கிரேகோபிதேகஸின் தாடை

    2017 ஆம் ஆண்டில், ட்ராச்சிலோஸ் காலடித் தடம் பற்றிய முதல் அறிக்கை வெளியிடப்பட்ட அதே ஆண்டில், டுபிங்கன் பல்கலைக்கழகத்தைச் சேர்ந்த ஜெர்மன் புதைபடிவஆராய்ச்சியாளர் மடேலைன் போஹ்மே தனது சொந்த அறிக்கை மூலம் உலகை திரும்பி பார்க்க வைத்தார்.

    மனிதர்களுக்கு சிம்பான்ஸிகளுக்கும் "பொதுவான கடைசி மூதாதையரின்" கண்டுபிடிப்பு ஆப்பிரிக்காவில் இல்லை, ஐரோப்பாவில் கண்டுபிடிக்கப்பட்டது என்று அவர் அறிவித்தார்.

    கிரேகோபிதேகஸ் (Graecopithecus), பால்கன் பகுதியில் 7.18 மற்றும் 7.25 மில்லியன் ஆண்டுகளுக்கு முன்பு வாழ்ந்ததாக போஹ்மே மற்றும் ஆராய்ச்சியாளர்கள் குழு கூறினர். இது தற்போது நிமிர்ந்து நடக்கும் ஆரம்பகால மனித மூதாதையாக கருதப்படும் சஹேலாந்த்ரோபஸை (Sahelanthropus) விட பழமையானது.

    இன்றுவரை, கிரேகோபிதேகஸின் எச்சங்களில் ஒரு பல் மற்றும் தாடை எலும்பைக் கொண்டுள்ளது - அது கிரீட்டில் இருந்து 250 கிலோ மீட்டர் தொலைவில் உள்ள கிரேக்க நாட்டில் கண்டுப்பிடிக்கப்பட்டது.

    "எங்கள் ஆய்வுகள் ஐந்து மில்லியன் ஆண்டுகளுக்கு முன்பு மனித பரிணாம வரலாற்றை சவால் விடுவில்லை, ஆனால், அந்த நேரத்திற்கு முன்பு என்ன நடந்தது என்பதைதான் ஆராய்கிறது", என போஹ்மே வாதிடுகிறார்.

    ஐயமும் அறிவியலும்

    ட்ராச்சிலோஸ் காலடித் தடங்கள்

    பட மூலாதாரம்,PER AHLBERG

     
    படக்குறிப்பு,

    ட்ராச்சிலோஸ் காலடித் தடங்கள்

    ட்ராச்சிலோஸ் காலடித் தடங்களால் கொண்டுவரப்பட்ட சர்ச்சை, விஞ்ஞானிகள் எப்படி ஒரு வெளிப்புற கருத்தை எதிர்கொள்கின்றனர் என்கிற கேள்விகளையும் எழுப்புகிறது.

    ட்ராச்சிலோஸ் காலடித் தடங்களைப் பற்றி அவருக்கு குறைபாடு இருக்கின்றபோதிலும், சக ஆராய்ச்சியாளர்கள் ஹோமினின் தடங்கள் நிராகரிக்கப்பது மனித இனத்தின் தோற்றம் பற்றிய ஆய்வுக்கு உதவாது என்பதில் உறுதியாக இருக்கிறார் ராபின் குரோம்ப்டன்.

    "அவை விசாரிக்கப்பட வேண்டும், வெறுமனே நிராகரிக்கப்படக் கூடாது. விஞ்ஞானிகள் திறந்த மனதுடன் இருக்க வேண்டும்," என்று அவர் கூறுகிறார்.

    மனித இனத்தின் தோற்றம் பற்றிய கோட்பாடுகளில் பெரும் மாற்றங்கள் ஏற்பட்டுள்ளன என குறிப்பிட்டு, மடேலைன் போஹ்மே ஒப்புக்கொள்கிறார்.

    உதாரணமாக, 2.8 மில்லியன் ஆண்டுகளுக்கு முன்பு வாழ்ந்த டாங் (Taung) குழந்தை குழந்தையின் எச்சங்கள் தென்னாப்பிரிக்காவில் 1924ஆம் ஆண்டு கண்டுபிடிக்கப்பட்டபோது, அந்த ஆப்பிரிக்க கருத்து உடனடியாக பரவலாக ஏற்றுக்கொள்ளப்படவில்லை.

    "வரலாற்றில் மனித இனம் ஆப்பிரிக்காவை விட உலகின் பல்வேறு பகுதிகளில் தோன்றியிருக்கலாம் என்று நம்பப்பட்ட காலங்களும் இருந்தன," என்று கூறுகிறார்.

    சிம்பன்ஸி

    பட மூலாதாரம்,GETTY IMAGES

     
    படக்குறிப்பு,

    சிம்பன்ஸி

    சந்தேகம் இல்லாத அறிவியல் நல்ல அறிவியல் அல்ல, ஆனால் மக்கள் வாதங்களுக்கு தயாராக இருக்க வேண்டும். ஆம், நமக்கு அதிக ஆய்வும் அதிக கண்டுபிடிப்புகளும் தேவை, ஆனால் சக ஆராயச்சியாளர்கள் வெறுமனே எங்கள் கண்டுபிடிப்புகளை நிராகரிப்பதை பார்க்க முற்றிலும் வேறாக இருக்கிறது".

    அஹ்ல்பெர்க் அவரது குழுவால் கூறப்பட்ட ஆய்வுகள் அசாதாரணமானவை என்று சக ஊழியர்கள் பரிந்துரைப்பதால், அவர் குறிப்பாக கோபமடைந்ததாக தெரிகிறது.

    "அவுட் ஆஃப் ஆப்பிரிக்கா கோட்பாட்டை மக்கள் தீவிரமாக பற்றி கொண்டதால்தான், எங்கள் ஆய்வுகள் அப்படி பார்க்கப்படுகின்றன," என்று அவர் நம்புகிறார்.

    "இந்த சூழ்நிலையில், புதைபடிவ ஆராய்ச்சி சமூகம் இப்போது என்ன சொல்லப்போகிறது என்று நான் கவலைப்படவில்லை. நாங்கள் ஆதாரங்களை முன்வைத்து எங்கள் ஆய்வை செய்துள்ளோம்."

    "மக்களின் நம்பகத்தன்மையை எதிர்த்துப் போராடுவதில் துளியும் ஆர்வம் இல்லை," என்று அவர் மேலும் கூறினார்.

    காலடித் தடம் திருட்டு

    டாங் குழந்தை மண்டை ஓடு

    பட மூலாதாரம்,GETTY IMAGES

     
    படக்குறிப்பு,

    டாங் குழந்தை மண்டை ஓடு

    ட்ராச்சிலோஸ் தடங்கள் நிச்சயமாக விஞ்ஞானிகளைத் தாண்டி பலரின் ஆர்வத்தை தூண்டியுள்ளன.

    2017 ஆம் ஆண்டு கண்டுபிடிக்கப்பட்டதாக அறிவிக்கப்பட்ட சில வாரங்களுக்குப் பிறகு, எட்டு காலடித் தடங்கள் பாறையிலிருந்து பெயர்த்து எடுக்கப்பட்டு திருடப்பட்டன.

    பின்னர், ஓர் உள்ளூர் உயர்நிலைப் பள்ளி ஆசிரியர் கிரேக்க போலீசாரால் கைது செய்யப்பட்டு புதைபடிவங்கள் மீட்கப்பட்டன.

    https://www.bbc.com/tamil/global-58983644

  10. 18 minutes ago, பிரபா சிதம்பரநாதன் said:

    இன்றைக்கு ஒருவருக்கும் 🍳இல்லை.. அதே நேரம் இடங்களிலும் மாற்றமில்லை😅.. 

     

    அடுத்த போட்டி இருக்கெல்லோ!

    3 hours ago, பையன்26 said:

    அண்ணா உங்க‌ளை நினைக்க‌ சிரிப்பு தான் வ‌ருது ஹா ஹா.......................😁😀

    அப்ப உங்களை சிரிக்க வைத்து சந்தோசப்படுத்தி இருக்கிறன்.😀

    • Haha 1
  11. “கோவிட் நெருக்கடி 2022ஆம் ஆண்டு வரை நீளும்” – உலக சுகாதார நிறுவனத்தின் எச்சரிக்கைக்கு காரணம் என்ன?

    2 மணி நேரங்களுக்கு முன்னர்
    தடுப்பூசி

    பட மூலாதாரம்,GETTY IMAGES

    ஏழை நாடுகளுக்கு தேவையான கொரோனா தடுப்பு மருந்து கிடைக்காத காரணத்தால் கொரோனா தொற்று நெருக்கடி மேலும் ஒரு வருடத்திற்கு தொடரலாம் என உலக சுகாதார நிறுவனம் தெரிவித்துள்ளது.

    இதன் பொருள், கொரோனா நெருக்கடி `வெகு சுலபமாக 2022 வரை நீளும்` என உலக சுகாதார நிறுவனத்தின் மூத்த தலைவரான ப்ரூஸ் அல்வேர்ட் தெரிவித்துள்ளார்.

    பிற நாடுகளுடன் ஒப்பிட்டால் ஆப்ரிக்காவில் வெறும் 5 சதவீதம் பேருக்குதான் தடுப்பு மருந்து கிடைத்துள்ளது. இது பிற நாடுகளில் 40 சதவீதமாக உள்ளது.

    பிரிட்டன் மொத்தமாக தடுப்பு மருந்து தேவைப்படும் நாடுகளுக்கு 10 கோடி தடுப்பு மருந்துகளை வழங்குவதாக தெரிவித்திருந்தது ஆனால் இதுவரை வெறும் ஒரு கோடிக்கும் மேலான தடுப்பு மருந்துகளையே வழங்கியுள்ளது.

    "வளர்ந்த நாடுகள் தடுப்பு மருந்து பெறுவதற்கான தங்களின் வாய்ப்பை குறைந்த வருமானம் கொண்ட நாடுகளுக்கு விட்டுக் கொடுக்க வேண்டும், அப்போதுதான் மருந்து தயாரிக்கும் நிறுவனங்களும் குறைந்த வருமானம் கொண்ட நாடுகளுக்கு முன்னுரிமை வழங்க முடியும்" என அல்வெட் தெரிவித்துள்ளார்.

    G7 மாநாட்டில் வளர்ந்த நாடுகள் தடுப்பு மருந்துகளை வழங்குவதாக உறுதியளித்திருந்தனர். எனவே உடனடியாக அதுகுறித்து ஆய்வு செய்து எவ்வளவு தடுப்பு மருந்துகளை இதுவரை அளித்துள்ளார்கள் என்பதை பார்க்க வேண்டும் என்கிறார் அவர்.

    `நாம் கொடுத்த வாக்கின் பாதையில் செல்லவில்லை`. நாம் இந்த நடவடிக்கையை விரைவுப்படுத்த வேண்டும் அல்லது பெருந்தொற்று மேலும் ஒரு வருடத்திற்கு நீண்டு விடும் என்றார்.

    தொண்டு நிறுவனங்களின் கூட்டணியான மக்கள் தடுப்பு மருந்து அமைப்பு - ஏழை நாடுகளுக்கு வழங்குவதாக வளர்ந்த நாடுகளும் மருந்து தயாரிப்பு நிறுவனங்களும் அளித்த வாக்குறுதிகளில் ஏழு டோஸ்களில் ஒரு டோஸ் மட்டுமே ஏழை நாடுகளுக்கு வழங்கப்படுகிறது என்று தெரிவித்துள்ளது.

    வளர்ந்த நாடுகள் அல்லது அதிக வருமானம் கொண்ட நாடுகளுக்கே அதிகப்படியான கொரோனா தடுப்பு மருந்துகள் கொடுக்கப்படுகின்றன. சர்வதேச அளவில் ஒப்பிட்டால் ஆப்ரிக்காவில் இதுவரை 2.6 சதவீதம் டோஸ் தடுப்பு மருந்துகள் மட்டுமே செலுத்தப்பட்டுள்ளன.

    தடுப்பு மருந்து

    பட மூலாதாரம்,GETTY IMAGES

    ஓக்ஸ்ஃபேம் மற்றும் ஐநாஏய்ட்ஸ் (Oxfam and UNAids) போன்ற தொண்டு நிறுவனங்கள் பிரிட்டன் மற்றும் கனடா ஆகிய நாடுகள் கோவேக்ஸ் திட்டத்தின் மூலம் தங்களின் மக்களுக்காக தடுப்பு மருந்து கொள்முதல் செய்வதாக குற்றம் சாட்டியுள்ளன. இந்த கோவேக்ஸ் திட்டம் சர்வதேச அளவில் தடுப்பு மருந்து அனைத்து நாடுகளுக்கும் சம்மாக கிடைக்க ஐநா ஆதரவுடன் உருவாக்கப்பட்ட திட்டம்.

    தடுப்பு மருந்தை வழங்குவதாக உறுதியளித்திருந்த ஜி7 நாடுகள் மருந்து தயாரிக்கும் நிறுவனங்களுடன் நேரடியான ஒப்பந்தத்தை மேற்படுத்திக் கொண்ட பிறகு கோவேக்ஸ் திட்டத்தில் தடுப்பு மருந்தை அளிக்கும் முடிவை நிறுத்தின.

    பிரிட்டன் மற்றும் கனடா ஆகிய நாடுகள் கோவேக்ஸ் திட்டத்திற்கு நிதி அளித்து தடுப்பு மருந்துகளை பெற்று கொள்ளலாம். ஆனால் அவர்கள் தங்களின் ஒப்பந்தங்களின் மூலம் ஏற்கனவே மில்லியன் கணக்கான டோஸ்களை பெற்றுவிட்டதால் கோவேக்ஸ் திட்டத்தின் மூலம் அவர்கள் தடுப்பு மருந்துகளை பெறுவது நியாயமற்றது என ஆக்ஸ்ஃபேம் அமைப்பின் சர்வதேச சுகாதார ஆலோசகர் தெரிவித்துள்ளார்.

    பிரிட்டன், கனடா போன்ற நாடுகள் கோவேக்ஸ் மூலம் தடுப்பு மருந்துகளை பெற்றுவிட்டால், அந்த திட்டத்தின் மூலம் தடுப்பு மருந்தை பெற காத்திருக்கும் ஏழை நாடுகள் மேலும் காத்திருக்க நேரிடும் என அவர் எச்சரிக்கிறார்.

    இருப்பினும் கடந்த வருடம் 548 மில்லியன் பவுண்ட் நன்கொடை கொடுத்து கோவேக்ஸ் திட்டத்தை தொடங்கிய நாடுகளில் பிரிட்டனும் ஒன்று என அந்நாடு தெரிவித்துள்ளது.

    கனடா அரசு தற்போது தாங்கள் கோவேக்ஸ் தடுப்பு மருந்துகள் பயன்படுத்துவதை நிறுத்திவிட்டதாக தெரிவித்துள்ளது.

    மேலும் தங்களின் ஒப்பந்தம் மூலம் போதுமான தடுப்பு மருந்துகள் கிடைத்துவிட்டால் கோவேக்ஸ் மூலம் தாங்கள் பெற்ற தடுப்பு மருந்துகளை திரும்ப கொடுத்து விடுவதாக அந்நாடு தெரிவித்துள்ளது. அவற்றை மீண்டும் வளரும் நாடுகளுக்கு வழங்கலாம் என்றும் கனடா தெரிவித்துள்ளது.

    கோவேக்ஸ் திட்டம் மூலம் இந்த வருட இறுதியில் 2 பில்லியன் டோஸ் தடுப்பு மருந்தை வழங்க வேண்டும் என திட்டமிடப்பட்டிருந்தது ஆனால் இதுவரை 371 மில்லியன் டோஸ் தடுப்பு மருந்துகளே வழங்கப்பட்டுள்ளன.

  12. ஸ்மார்ட்போனில் தங்கம்: பழைய போன்களில் இருந்து தங்கத்தைப் பிரித்தெடுக்கும் பிரிட்டன் நாணய ஆலை

    3 மணி நேரங்களுக்கு முன்னர்
    தங்கம்

    பட மூலாதாரம்,GETTY IMAGES

     
    படக்குறிப்பு,

    உலகில் ஐந்தில் ஒரு பகுதி மின்கழிவுகளே மறுசுழற்சிக்கு வருகின்றன

    பழைய ஸ்மார்ட்போன்கள் மற்றும் லேப்டாப்களில் இருந்து மதிப்பு மிக்க உலோகமான தங்கத்தைப் பிரித்தெடுக்க முடிவு செய்திருக்கிறது பிரிட்டனின் அரசு நாணய ஆலை.

    பிரிட்டன் அரச குடும்பத்தின் கீழ் இயங்கும் ராயல் மின்ட் எனப்படும் அரசின் நாணய தயாரிப்பு நிறுவனம் மின்னணுக் கழிவுகளில் இருந்து மறு சுழற்சி செய்யும் இத்தகைய தொழில்நுட்பத்தை முதன் முதலாகப் பயன்படுத்த இருக்கிறது.

    மின்னணு கழிவுகளில் ஐந்தில் ஒரு பங்குக்கும் குறைவான அளவே மறு சுழற்சி செய்யப்படுவதாக மதிப்பிடப்படுகிறது.

    "இந்த தொழில்நுட்பம் உலகின் மிகப்பெரிய சுற்றுச் சூழல் சவால்களில் ஒன்றின் மீது உண்மையான தாக்கத்தை ஏற்படுத்தும்" என்று ராயல் மின்டின் தலைமைச் செயல் அதிகாரி ஆன்னி ஜெசோப் கூறினார்.

    மின்னணுக் கருவிகளின் மின்சுற்று அட்டைகளில் (circuit boards) இருந்து 99 சதவிகிதம் தங்கத்தைப் பிரித்தெடுக்க கனடாவின் தொடங்கு நிறுவனமான எக்சைருடன் ராயல் மின்ட ஒப்பந்தம் செய்திருக்கிறது

    தேர்ந்தெடுக்கப்பட்ட விலையுயர்ந்த உலோகங்களை மின்சுற்று அட்டைகளில் இருந்து வேதியியல் தொழில்நுட்பம் நொடிகளில் பிரித்தெடுக்கிறது என்று ராயல் மின்ட் கூறுகிறது

    2021 ஆம் ஆண்டில் தூக்கி எறியப்பட்ட மின்னணு மற்றும் மின் சாதனங்கள் 5.7 கோடி டன்களுக்கு மேல் இருக்கும் என்று ஆராய்ச்சியாளர்கள் மதிப்பிட்டுள்ளனர்.

    ஸ்மார்ட்போன்

    பட மூலாதாரம்,ROYAL SOCIETY OF CHEMISTRY

     
    படக்குறிப்பு,

    ஸ்மார்ட்போன்களில் சுமார் 30 வெவ்வேறு தனிமங்கள் உள்ளன, அவற்றில் சில பூமியில் காலியாகிக் கொண்டிருக்கிறது.

    இந்தச் சிக்கலை எதிர்கொள்ள எதுவும் செய்யவில்லை என்றால், 2030 க்குள் மின்னணு கழிவுகள் 7.4 கோடி டன்களை எட்டும். அதாவது ஒரு தசாப்தத்தில் கிட்டத்தட்ட இரட்டிப்பாகும் என்று ராயல் மின்ட் கூறுகிறது.

    உயர் வெப்பநிலையில் உருக்குவதற்குப் பதிலாக, இந்தத் திட்டத்தின்படி ரொண்டா சினான் டாப்பில் உள்ள ராயல் மின்ட் ஆலையில் அறை வெப்பநிலையிலேயே விலைமதிப்பற்ற உலோகங்கள் பிரிக்கப்பட இருக்கின்றன.

    ராயல் மின்ட் நாணய ஆலையில் இந்தத் தொடழில்நுட்பத்தின் தொடக்கநிலைப் பயன்பாடு மூலமாக ஏற்கெனவே 999.9 தூய்மையான தங்கம் பிரித்தெடுக்கப்பட்டிருக்கிறது. இதே தொழில்நுட்பம் முழுமையாகப் பயன்படுத்தப்பட்டால், பல்லேடியம், வெள்ளி மற்றும் தாமிரம் போன்ற உலோகங்களையும் பிரித்தெடுக்க முடியும்.

    மின்னணு கழிவுகளைக் குறைப்பதிலும், மதிப்புமிக்க உலோகங்களைக் மீட்பதிலும், புதிய திறன்களை வளர்ப்பதிலும் இந்தத் தொழில்நுட்பம் மிகப்பெரிய சாத்தியமான ஆற்றலைக் கொண்டிருக்கிறது என்று மின்டின் ஜெசோப் கூறினார்.

    இந்த வேதியல் தொழில்நுட்பம் "புரட்சிகரமானது" என்று நாணய ஆலையின் தலைமைய வளர்ச்சி அதிகாரி ஷான் மில்லார்ட் கூறிகிறார்.

    "இது ராயல் மின்ட் மற்றும் கழிவுகளே இல்லாத சுற்றுப் பொருளாதாரத்துக்கு பெரும் ஆற்றலை வழங்குகிறது. பூமியின் மதிப்புமிக்க வளங்களை மீண்டும் பயன்படுத்த உதவுகிறது. பிரிட்டனில் புதிய திறன்களை உருவாக்குகிறது"

    https://www.bbc.com/tamil/science-58982005

×
×
  • Create New...

Important Information

By using this site, you agree to our Terms of Use.