Jump to content
களத்தில் உள்நுழையும் வழிமுறையில் மாற்றம் செய்யப்பட்டுள்ளது. மேலதிக விளக்கங்களிற்கு

கருத்துக்கள விதிமுறைகள் பதிப்பு 3.0


Recommended Posts

வணக்கம்,

கால மாற்றங்களுக்கு ஏற்ப இதுவரை இருந்த யாழ் கள விதிகள் மீளாய்வு செய்யப்பட்டு தெளிவற்றவை சிலவற்றில் மாற்றங்களும், புதிய விதிகளும் புகுத்தப்பட்டு கருத்துக்கள விதிமுறைகள் பதிப்பு 3.0 கீழே பட்டியலிடப்பட்டிருக்கின்றன.

கீழே பட்டியலிடப்பட்டிருக்கின்ற விதிமுறைகள் 15 டிசம்பர் 2014 ஞாயிறு முதல் (15.12.2014 - 00:00 மணி) நடைமுறைக்கு எடுத்துக்கொள்ளப்படுகின்றன. ஆகவே யாழ் கள உறுப்பினர்கள் விதிமுறைகளை உள்வாங்கி ஆக்கபூர்வமான கருத்துக்களை வைத்து யாழின் வளர்ச்சிக்குத் துணைபுரியுமாறு வேண்டிக்கொள்கின்றோம். மேலும் கள விதிமுறைகளை மீறும் பதிவுகள் மீதும், பதிவர்கள் மீதும் மட்டுறுத்துதலும் நடவடிக்கைகளும் எடுக்கப்படும் என்பதையும் கவனத்தில்கொள்ளும்படி கேட்டுக்கொள்கின்றோம்.


அ) உறுப்பினர்கள்

1. உறுப்பினர் பெயர்

  • யாழ் கருத்துக்களத்தில் இணையும் உறுப்பினர்கள் இரண்டு வகைப் பெயர்களைத் தெரிவு செய்துகொள்ளலாம்.
    • பயனர் பெயர் (username): இது யாழ் கருத்துக்களத்தில் கள உறுப்புரிமைப் பதிவிற்கான பெயர்.
    • புனைபெயர் (nickname): இது கள உறுப்பினர் ஒருவர் யாழ் கருத்துக்களத்தில் தன்னை அடையாளப்படுத்துவதற்கான பெயர்.
  • இவை இரண்டும் கற்பனைப் பெயர்களாகவோ அல்லது உண்மைப் பெயர்களாகவோ இருக்கலாம்.
  • பயனர் பெயராக மின்னஞ்சல் முகவரியை அல்லது புனைபெயரைப் பாவிக்கலாம். பயனர் பெயர் கள உறுப்பினருக்கு மட்டுமே தெரிந்திருக்கும்.
  • கள உறுப்பினர் ஒருவர் யாழ் கருத்துக்களத்தில் உள்நுழைவதற்குப் பயனர் பெயரினையும் கடவுச் சொல்லையும் பாவிக்கவேண்டும்.
  • பெயர்கள் தமிழில் அல்லது ஆங்கிலத்தில் எழுதப்படலாம். (சில தொழில்நுட்பக் குறைபாடுகள் காரணமாக நீளமான பெயர்களை தமிழில் எழுத முடியாதுள்ளது).
  • பின்வரும் பெயர்கள் தெரிவுசெய்யப்படல் ஆகாது:
    • உயிரோடு வாழும் பிரபலமானவர்களின் பெயர்கள்.
    • தமிழீழத் தலைவர்கள்/போராளிகள் ஆகியோரின் பெயர்கள் (எ.கா.: அன்ரன் பாலசிங்கம்).
    • பண்பற்ற பெயர்கள்/பிறரை இழிவுபடுத்தப் பயன்படுத்தப்படும் சொற்கள் (எ.கா.: சொறிநாய்).
  • பின்வரும் முறையில் பெயர்கள் எழுதப்படல் ஆகாது:
    • இணையத்தள முகவரிகள் (எ.கா.: www.yarl.com)
    • மின்னஞ்சல் முகவரிகள் (எ.கா.: valainjan@yarl.com)
    • இலக்கங்கள் (எ.கா.: 12345678)
    • குறியீடுகள் (எ.கா.: _ / + * # : - $ § & % ( ] ) = } { ? \ " ! < > , . )

2. உறுப்பினர் படம்

  • யாழ் களத்தில் இரண்டு வகைப் படங்களை உங்கள் படமாக இணைக்கலாம்.
    • பயனர் படம் (profile photo): யாழ் கருத்துக்களத்தில் உங்கள் "எனது அகம்" (profile) பக்கத்தில் இந்தப்படம் காண்பிக்கப்படும்.
    • அவதாரம் (avatar): யாழ் கருத்துக்களத்தில் எழுதும் உங்கள் கருத்துக்களோடு இந்தப்படம் காண்பிக்கப்படும்.
  • இவை இரண்டும் கள உறுப்பினர்களின் உண்மையான படமாகவோ அல்லது கணினியில் உருவாக்கப்பட்ட படங்களாகவோ இருக்கலாம்.
  • படங்களின் அளவு பின்வருமாறு இருக்க வேண்டும்:
    • பயனர் படம்: 90px * 90px
    • அவதாரம்: 80px * 80px
  • பின்வரும் படங்கள் தெரிவுசெய்யப்படல் ஆகாது:
    • உயிரோடு வாழும் பிரபலமானவர்களின் படங்கள்.
    • குறிப்பாக, சினிமாப் பிரபலங்களின் படங்கள்.
    • தமிழீழத் தலைவர்கள்/போராளிகள் ஆகியோரின் படங்கள் (எ.கா.: அன்ரன் பாலசிங்கம்).
    • மாவீரர்களின் படங்கள் (எ.கா.: கெளசல்யன்).
    • பாலியல் உணர்வுகளைத் தூண்டும் விதமான படங்கள்.

3. கையொப்பம்
யாழ் கருத்துக்கள உறுப்பினர்களின் கையொப்பம் தொடர்பான விதிகள்:

  • கையொப்பம் யாழ் கருத்துக்கள விதிகளுக்கு உட்பட்டதாக இருத்தல் வேண்டும்.
  • கையொப்பத்தில் பேரழிவு ஆயுதங்களை தயாரித்தல் மற்றும் ஊக்குவித்தல் தொடர்பான தளங்களுக்கும், வன்முறைகளைத் தூண்டும் தளங்களிற்கும், தகவல் திருட்டுக்களில் ஈடுபடும் தளங்களிற்கும், வக்கிரமான பாலியல் தளங்களிற்கும் இணைப்புக்கள் கொடுப்பது தவிர்க்கப்படல் வேண்டும்.
  • விரும்பிய நிறங்களைப் பயன்படுத்தமுடியும். எனினும் "சாதாரண அளவு" எழுத்தில் கையொப்பம் இருத்தல் விரும்பப்படுகின்றது.
  • கையொப்பத்தின் உயரம் அதிகமாக இருந்தால் கருத்துக்களை வாசிப்பதில் இடையூறுகள் உண்டாகலாம். எனவே இணைக்கப்படும் படங்களின் அளவு "உயரம்: 80px" க்கு உள்ளடங்கியதாக இருத்தல் விரும்பப்படுகின்றது.
  • இணைக்கப்படும் படங்களின், அசைபடம் (animation) அடங்கலாக, கோப்பு அளவு (file size) அதிகமாக இருப்பது யாழ் கருத்துக்களத்தின் வேகத்தைக் குறைக்கலாம். எனவே இயலுமானவரை கோப்பு அளவு குறைந்த படங்களைப் பாவிப்பது விரும்பப்படுகின்றது.
  • சீண்டும் வகையிலும், பிறரை இழிவுபடுத்தும் அல்லது அவதூறு செய்யும் வகையிலும் கையொப்ப வசனங்கள் இருத்தல் ஆகாது.

4. கருத்தாடல்

  • சக கருத்துக்கள உறுப்பினர்களோடு நட்போடும், பண்போடும் கருத்தாடல் செய்யவேண்டும்.
  • புதிய உறுப்பினர்களை நட்போடும், பண்போடும் வரவேற்றல் வேண்டும்.
  • யாழ் கருத்துக்களத்தில் குழுக்களாக இணைந்து இயங்குவதையும், ஆரோக்கியமற்ற குழுநிலைக் கருத்தாடல்களையும் தவிர்த்தல் வேண்டும்.
  • கருத்துக்கள விதிகளைச் சட்டை செய்யாது தொடர்ந்தும் குழுக்களாக இயங்குவது அவதானிக்கப்பட்டால் விதிகளுக்கு அப்பால் சென்று கடுமையான தீர்க்கமான நடவடிக்கைகள் எடுக்கப்படும்.
  • யாழ் கருத்துக்கள உறுப்பினர்கள் பற்றிய குறைகளையும், விமர்சனங்களையும் நேரடியாக நிர்வாகத்துக்கு முறைப்பாட்டு முறை (Report) மூலமாகவோ அல்லது தனிமடல் மூலமாகவோ அறியத்தரல் வேண்டும். (அதற்கான தனித் தலைப்புகள் தொடக்கப்படல் ஆகாது).
  • சக கருத்தாளரின் தனிப்பட்ட விடயங்களை எழுதுவதையும், அவரது குடும்ப உறுப்பினர்களை விமர்சிப்பதையும் கண்டிப்பாக தவிர்த்தல் வேண்டும்.
  • எக்காரணம் கொண்டும் எழுதும் சக கருத்தாளரின் சொந்த அடையாளங்களை கோருவதும், பிரசுரிப்பதும் கூடாது.
  • கருத்தாளர் ஒருவர் தனது அடையாளங்களை பகிரங்கமாக குறிப்பிடுவதை கூடியவரைக்கும் தவிர்த்தல் வேண்டும். இணையத்தில் இடம்பெறும் தகவல் / தனிநபர் தகவல் திருட்டுக்களைத் தடுக்கும் நோக்கில் உறுப்பனர்கள் தங்கள் சுயவிபரங்களை பகிரங்கப்படுத்தாது இருப்பது விரும்பப்படுகின்றது. தனிப்பட்ட விபரங்களை உறுப்பினர்கள் பகிர்ந்தால் அவர்களே அதற்கான விளைவுகளுக்குப் பொறுப்பாளர் ஆவர்.
  • யாழ் கருத்துக்களத்தை விளம்பர நோக்கில் வெறும் செய்திகளையும் ஆக்கங்களையும் இணைக்கும் தளமாக மட்டும் பாவித்தல் தவிர்க்கப்படவேண்டும்.
  • கருத்தாடலைத் திசை திருப்பும் வகையிலும் தலைப்புக்கு தொடர்பில்லாத விதத்திலும், வீண் விதண்டாவாதங்களாகவும் எழுதுவதை கண்டிப்பாகத் தவிர்க்க வேண்டும்.
  • சக உறுப்பினரை நேரடியாகவோ மறைமுகமாகவோ தரமற்ற முறையிலும், அநாகரீகமான முறையிலும் விமர்சிப்பதும், அவர்களின் அனுமதி இல்லாமல் நையாண்டி செய்வதற்கு அவர்களது பெயர்களைப் பயன்படுத்துவதும் கூடாது.
  • யாழ் கருத்துக்களத்தினைக் குப்பைக்கூடமாகவும், மனவக்கிரங்களையும், மனோவிகாரங்களையும் கொட்டும் இடமாகவும் பயன்படுத்தக்கூடாது.

5. தனிமடற் சேவை

  • யாழ் கருத்துக்கள உறுப்பினர்களோடு தனிப்பட நட்புப் பாராட்ட தனிமடற் சேவையினைப் பயன்படுத்தலாம்.
  • தனிமடற் சேவையினை தவறான முறையில் பயன்படுத்தல் ஆகாது. (அப்படி ஏதாவது நடந்தால், சம்பந்தப்பட்டவர்கள் நிர்வாகத்துக்கு அறியத்தரலாம்).
  • தனிமடற் சேவையினை நிறுவனங்களுக்கான விளம்பரங்களுக்கு பயன்படுத்தல் ஆகாது.
  • ஒருவரின் தனிமடலை நிர்வாகப் பிரிவில் இருப்பவர்கள் தவிர்ந்த இன்னொருவருக்கு அனுப்புவதும், யாழ் கருத்துக்களத்தில் அல்லது பிற தளங்களில் பகிரங்கப்படுத்துவதும் முற்றாகத் தவிர்க்கப்படல் வேண்டும். இவ்விதி நிர்வாகத்தில் உள்ளவர்களால் அனுப்பப்படும் தனிமடல்களுக்கும், நிர்வாக நடவடிக்கைகள் சம்பந்தமான தொடர்பாடல்களுக்கும் பொருந்தும்.
  • கள உறவுகளுக்கிடையில் ஆபாசமாகவோ அல்லது வக்கிரமாகவோ தனிமடல் பிரயோகம் முற்றாகத் தவிர்க்கப்படல் வேண்டும்.

 

6. உறுப்பினர் குழுமங்கள்
யாழ் கருத்துக்களத்தில் பின்வரும் உறுப்பினர் குழுமங்கள் உள்ளன.



 

விண்ணப்பித்தோர்:
இக்குழுமத்தில் உள்ளவர்கள் யாழ் கருத்துக்களத்தில் உறுப்பினர்களாக இணைந்தவர்களெனினும் யாழ் களத்தினால் அனுப்பப்பட்ட மின்னஞ்சலில் உள்ள இணைப்பைச் சொடுக்கி அவர்தம் மின்னஞ்சல் முகவரிகளை உறுதிப்படுத்தாதோர் ஆவர்.

எனவே இக்குழுமத்தில் உள்ளவர்களால் அவர்தம் மின்னஞ்சல் முகவரியை உறுதிப்படுத்தி புதிய உறுப்பினர்கள் குழுமத்திற்குள் அனுமதிக்கப்படும்வரை யாழ் கருத்துக்களத்தில் பதிவுகள் எதனையும் மேற்கொள்ளமுடியாது.

புதிய உறுப்பினர்கள்:
இக்குழுமத்தில் உள்ளவர்கள் யாழ் கருத்துக்களத்தின் சகல பகுதிகளிலும் கருத்துக்கள் பதியலாம். ஆயினும் யாழ் அரிச்சுவடி பகுதியில் மட்டுமே புதிய தலைப்புகளை அவர் தம்மை அறிமுகப்படுத்தவும் உதவிகளை நாடவும் திறக்கலாம்.

கருத்துக்கள உறுப்பினர்கள்:
இக்குழுமத்தில் உள்ளவர்களுக்கு யாழ் கருத்துக்களத்தின் சகல பகுதிகளிலும் புதிய தலைப்புக்களைத் திறக்கவும், கருத்துக்களைப் பதியவும், திண்ணையில் உரையாடவும் அனுமதி உண்டு.

ஒன்றுக்கு மேற்பட்ட கருத்துக்களை தமிழில் பதிந்த புதிய உறுப்பினர்கள் “கருத்துக்கள உறுப்பினர்கள்” எனும் நிலைக்கு மாற்றப்படுவார்கள். எனினும் கருத்துக்களின் எண்ணிக்கையின் அடிப்படையில் மட்டும் இந்நிலைக்கு அங்கத்துவம் வழங்கப்படமாட்டாது. எழுதப்படும் கருத்துக்களின் அடிப்படையிலேயே “கருத்துக்கள உறுப்பினர்கள்” குழுமத்தில் சேர்த்துக்கொள்வது பற்றி நிர்வாகத்தால் தீர்மானிக்கப்படும். குறிப்பாகத் தமிழில் எழுதுகிறார்களா, ஏனைய கருத்துக்கள உறுப்பினர்களுடன் பண்போடும், நட்போடும் பழகுகின்றார்களா போன்ற விடயங்கள் முதன்மையாகக் கவனிக்கப்படும்.

 

ஆ) வடிவம்

1. எழுத்து

  • யாழ் கருத்துக்களத்தில் எழுதப்படும் கருத்துக்கள் யாவும் ஒருங்குறி (Unicode) எழுத்துருவில் எழுதப்படல் வேண்டும்.
  • கருத்துக்கள் அனைத்தும் "சாதாரண அளவு" எழுதிலேயே எழுதப்படல் வேண்டும்.
  • தலைப்புகளுக்கு மட்டும் "அளவு 2" இனைப் பயன்படுத்தலாம்.
  • வேறுபடுத்திக் காட்டுவதற்கு "மொத்த(bold) – சரிந்த(italic) – அடிக்கோடிட்ட(underline)" எழுத்து வடிவங்களைப் பயன்படுத்தலாம்.
  • தலைப்புக்களில் (Topic Title) வடிவமைப்புக்களை இணைக்க முடியாது என்பதால் தலைப்புக்கள் அனைத்தும் வடிவமைப்புகள் இன்றியே இணைக்கப்பட வேண்டும்.

2. நிறம்

  • வேறுபடுத்திக் காட்டுவதற்கு மட்டுமே நிறங்கள் பயன்படுத்தப்படல் வேண்டும்.

3. படம்

  • இணைக்கப்படும் படங்களின் அளவு "அகலம்: 640px" க்கு உள்ளடங்கியதாக இருத்தல் வேண்டும்.

 

இ) பதிவுகள்

1. கருத்து/விமர்சனம்
யாழ் கருத்துக்களத்தில் பதியப்படும் கருத்துக்கள், பின்னூட்டங்கள் விமர்சனங்கள் சம்பந்தமான விதிகள்:

  • கருத்துக்கள், பின்னூட்டங்கள் சொந்தமானதாக இருத்தல் வேண்டும்.
  • கருத்துக்கள், பின்னூட்டங்கள், விமர்சனங்கள் சமூகப் பொறுப்புடனும் பண்பான முறையிலும், கண்ணியமான முறையிலும் வைக்கப்படல் வேண்டும்.
  • ஊகங்களின் அடிப்படையிலான கருத்துக்கள் இயலுமானவரை தவிர்க்கப்படல் வேண்டும். எனினும் ஆக்கபூர்வமான கருத்தாடலுக்கு துணைபுரியும் நோக்கில் வைக்கப்படும் கருத்துக்களுக்கு இவ்விதியில் தளர்வுப்போக்கு காட்டப்படும்.
  • தனிநபர்களைத் தாக்குதல், சக கள உறுப்பினர்களை நேரடியாகவோ அல்லது மறைமுகமாகவோ தாக்குதல், சீண்டுதல், இழிவுபடுத்தல், அவதூறு செய்தல் போன்ற கருத்துக்கள் முற்றாகத் தவிர்க்கப்படல் வேண்டும்.
  • சங்கங்கள், நிறுவனங்கள் அல்லது அவற்றின் உறுப்பினர்களையும் செயற்பாடுகளையும் விமர்சிப்பவர்கள் அவதூறுகளைத் தவிர்த்து, ஆக்கபூர்வமான முறையில் ஆதாரங்களை இயன்றவரை குறிப்பிட்டு விமர்சிக்கவேண்டும்.
  • நாடுகளின் நிர்வாகத்தில் பொறுப்பான பதவிகளில் இருப்பவர்களையும் (உதாரணம்: சனாதிபதி, பிரதமர், மந்திரிகள்), சர்வதேச நிறுவனங்களின் பொறுப்பில் இருப்பவர்களையும், கலைஞர்களையும் (சினிமாத்துறை உள்ளடங்கலாக) ஒருமையில் விளித்தலும் அவதூறான சொற்களால் இகழ்தலும் தவிர்க்கப்படல் வேண்டும்.
  • தமிழீழ விடுதலைக்காக தம்மை ஆகுதியாக்கிய மாவீரர்களை விமர்சிப்பதும், ஏளனப்படுத்துவதும், அவர்களின் தியாகங்களை மலினப்படுத்தி அவதூறு செய்வதும் முற்றாகத் தவிர்க்கப்படல் வேண்டும்.
  • பிரதேசவாதம். சாதீயம் என்பனவற்றை ஊக்குவிக்கும் கருத்துக்கள் முற்றாகத் தவிர்க்கப்படல் வேண்டும்.
  • வன்முறைகளைத் தூண்டுதல், ஊக்குவித்தல் தொடர்பான சகல கருத்துக்களும் முற்றாகத் தவிர்க்கப்படல் வேண்டும்.
  • ஆயுதங்களை தயாரித்தல், ஏவுகணை, இரசாயன ஆயுதம், உயிரியல் ஆயுதம் போன்ற பேரழிவு ஆயுதங்களை தயாரித்தல் மற்றும் ஊக்குவித்தல் தொடர்பான சகல கருத்துக்களும் முற்றாகத் தவிர்க்கப்படல் வேண்டும்.
  • இணையத்தினூடாக தனிப்பட்டவர்களின் பெறுமதியான தரவுகளையும், வங்கி அட்டைகள் போன்றவற்றையும் திருடும் வழிமுறைகள் தொடர்பான சகல கருத்துக்களும் முற்றாகத் தவிர்க்கப்படல் வேண்டும். மாறாக இணையப் பாதுகாப்பு பற்றிய அறிவூட்டும் கருத்துக்கள் வரவேற்கப்படும்.

2. தலைப்பு
யாழ் கருத்துக்களத்தில் ஆரம்பிக்கப்படும் தலைப்புகள் பற்றிய பொதுவான விதிகள்:

  • ஆரம்பிக்கப்படும் திரிகளின் தலைப்புகள் அனைத்தும் தமிழில் எழுதப்படல் வேண்டும்.
  • தலைப்புகள் சுருக்கமானதாகவும், பொருள்பொதிந்ததாகவும் எழுதப்படல் வேண்டும்.
  • யாழ் கருத்துக்களத்தைப் பார்வையிடும் பார்வையாளர்களை ஏமாற்றும் வகையில் தலைப்புகள் அமைதல் ஆகாது.
  • வன்முறைகளையும், பாலியல் உணர்வுகளையும் தூண்டும் வகையிலான தலைப்புகள் இடப்படல் கூடாது.
  • பின்வரும் முறையில் தலைப்புகள் எழுதப்படல் ஆகாது:
    • இணையத்தள முகவரிகள் (எ.கா.: www.yarl.com)
    • மின்னஞ்சல் முகவரிகள் (எ.கா.: valainjan@yarl.com)
    • குறியீடுகள்: (எ.கா.: _ / + * # : - $ § & % ( ] ) = } { ? \ " ! < > , .)

3. மொழி

  • யாழ் கருத்துக்களத்தில் எழுதப்படும் கருத்துக்கள் அனைத்தும் தமிழிலேயே எழுதப்படல் வேண்டும். தமிழில் எழுதப் பின்வருவனவற்றைப் பயன்படுத்தலாம்.
    • விண்டோஸ் இயங்குதளத்தில் அமைந்த கணினி:
      • இகலப்பை. காணொளி விளக்கம்:
      • Keyman - தமிழ் சுரதா பாமுனி. கட்டணமற்றது. விண்டோஸ் 8 எனில் அதில் உள்ள Short-Cut வசதியைப் பாவித்து தமிழுக்கும் ஆங்கிலத்திற்கும் மாற்றிக் கொள்ள முடியும்
      • Keyman Tavultesoft * கட்டணம் செலுத்தவேண்டும்.
    • iOS இயங்குதளத்தில் அமைந்த iPad வரைபட்டிகை (tablet), iPhone திறன்பேசி (smartphone):
      • தமிங்கில விசைப்பலகை முறை: Settings >> Keyboard >> Keyboards >> Tamil >> Anjal
      • தமிழ்99 விசைப்பலகை முறை: Settings >> Keyboard >> Keyboards >> Tamil >> Tamil 99
    • Android இயங்குதளத்தில் அமைந்த வரைபட்டிகை (tablet), திறன்பேசி (smartphone):
  • கொச்சைத் தமிழிலும் தமிங்கிலத்திலும் எழுதுவது இயன்றவரையில் தவிர்க்கப்படல் வேண்டும்.
  • பிறமொழி ஆக்கங்களாக இருப்பின்:
    • மிகவும் முக்கியமானதும் நிகழ்காலத்துக்குரியதுமான ஆங்கில அல்லது பிறமொழிச் செய்தியினது அல்லது அரசியல் ஆய்வுக்கட்டுரையினது உள்ளடக்கம் பற்றிய சிறு விளக்கத்தை சுருக்கமாகத் தமிழில் தந்துவிட்டு நேரடி மூலத்துடன் முழுமையாக மூலமொழியில் இணைத்தல் வேண்டும்.
    • உள்ளடக்கத்தை மாற்றாது இயலுமானவரை தமிழில் மொழிபெயர்த்து இணைத்தல் வேண்டும்.
    • பிறமொழிப் பகுதியான யாழ் திரைகடலோடிப் பிரிவில் மட்டும் பதியப்படல் வேண்டும்.

4. உரையாடல்

  • "நீ, வா, போ, அவன், அவள்" என்று ஒருமையில் சக கள உறுப்பினர்களை விளித்தல், அழைத்தல், குறிப்பிடுதல் ஆகாது.
  • "நீர், உமது, உமக்கு, உம்முடைய" என்றும் சக கள உறுப்பினர்களை விளித்தல், அழைத்தல், குறிப்பிடுதல் ஆகாது.
  • துரோகி, பச்சோந்தி, பன்னாடை, நாதாரி, வாந்தி, புண்ணாக்கு, மொக்குக் கூட்டம் போன்ற மலினமான தூற்றுதலுக்குரிய பதங்கள் பயன்படுத்தப்படுவது தவிர்க்கப்படல் வேண்டும்.
  • சோனி, காக்கா, தொப்பி பிரட்டி, பயங்கரவாதி, காட்டுமிராண்டி போன்ற பதங்களும் தவிர்க்கப்படல் வேண்டும்
  • க ற் ப ழி ப் பு (பாலியல் வல்லுறவு/வன்புணர்வு), விபச்சாரி (பாலியல் தொழிலாளி), விபச்சாரம் (பாலியல் தொழில்), அலி (திருநங்கை) போன்ற பிற்போக்கான பதங்கள் தவிர்க்கப்படல் வேண்டும். பதிலாக அடைப்புக்குள் குறிப்பிடப்பட்டுள்ள பதங்களைப் பயன்படுத்துதல் வேண்டும்.
  • சாதிப்பெயர்களாலும், இழிவான வசைச் சொற்களாலும் சுட்டுதல், திட்டுதல், தூற்றுதல் முற்றாகத் தவிர்க்கப்படல் வேண்டும்.
  • மாற்றுத் திறனாளிகளைத் தூற்றுதல் தவிர்க்கப்படல் வேண்டும்.

5. அரட்டை

  • யாழ் கருத்துக்களம் அரட்டைக்களம் அல்ல - எனவே, அரட்டை அடித்தல் தவிர்க்கப்படல் வேண்டும்.
  • ஒரு தலைப்பில் அதனுடன் தொடர்பற்ற கருத்துக்கள், அரட்டைகள் தவிர்க்கப்படல் வேண்டும். அதே போன்று வேறு ஒரு திரியில் எழுதியவற்றை மீண்டும் இன்னொரு திரியில் அவசியமின்றிப் பதிவது தவிர்க்கப்படல் வேண்டும்.
  • அரும்பாலை [இளைப்பாறுங்களம்] பகுதியிலும் யாழ் உறவுகள் பகுதியில் உள்ள யாழ் நாற்சந்தி பிரிவிலும், திண்ணையிலும் இவ்விதிமுறை தளர்த்தப்படுகிறது.
  • எனினும் மேற்குறிப்பிட்ட பிரிவுகளில் புதிய ஆக்கங்களை இணைப்போர், அதில் அரட்டையடிப்பதைத் தவிர்க்குமாறு வேண்டுகோள் விடுப்பின் அரட்டை அடித்தல் தவிர்க்கப்படல் வேண்டும்.
  • யாழ் கருத்துக்களம் உறுப்பினர்கள் அல்லாத பார்வையாளர்களுக்கும் பொதுவானது என்பதால் கள உறுப்பினர்களுக்கு மட்டுமான திண்ணையில் அரட்டை அடிப்பது போன்று கருத்துக்களத்தில் அரட்டை அடிப்பது கண்டிப்பாகத் தவிர்க்கப்படவேண்டும்.
  • தனியே முகக்குறிகளால் மட்டும் கருத்துக்கள் பதிவதைத் தவிர்த்தல் வேண்டும். எனினும் திண்ணையில் மாத்திரம் இவ்விதிமுறை தளர்த்தப்படுகின்றது.

6. செய்திகள்/ஆக்கங்கள்/பதிவுகள்
யாழ் கருத்துக்களத்தில் பதியப்படும் செய்திகள், ஆக்கங்கள், பிற பதிவுகள் சம்பந்தமான பொதுவான விதிகள்:

  • செய்திகள், ஆக்கங்கள், பிற பதிவுகள் அவற்றுக்குரிய பிரிவுகளில் இணைக்கப்படல் வேண்டும்.
  • காப்புரிமை காரணமாகப் பகிர்வதற்குத் தடை உள்ளவற்றை இணைப்பது தவிர்க்கப்படல் வேண்டும்.
  • செய்திகள், ஆக்கங்கள், பதிவுகள் முழுமையாக இணைக்கப்படல் வேண்டும். விளம்பரக் கட்டணம் செலுத்திப் பதியப்படும் செய்திகளுக்கும், ஆக்கங்களுக்கும் இவ்விதி தளர்த்தப்படுகின்றது.
  • இணைக்கப்படுபவை யாழ் கள உறுப்பினர்களின் சுயமான பதிவு இல்லையாயின் மூலம் கண்டிப்பாகக் குறிப்பிடப்படல் வேண்டும்.
  • சிறுவர் துஷ்பிரயோகம், பெண்ணடக்குமுறை, பெண்ணடிமைத்தனம் போன்றவற்றை ஊக்குவிக்கும் பதிவுகள் தவிர்க்கப்படல் வேண்டும்.
  • அப்பட்டமாகப் பாலியல் உணர்வுகளைத் தூண்டும் வக்கிரமான ஆக்கங்கள் முற்றாகத் தவிர்க்கப்படல் வேண்டும்.
  • எதுவித அடிப்படையும், உண்மைத்தன்மையும் அற்ற சாத்திரம், மூட நம்பிக்கைகள், சாமியார்கள் வழிபாடு சம்பந்தமான பதிவுகள் தவிர்க்கப்படல் வேண்டும். தீவிர நம்பிக்கையை ஊக்கப்படுத்தாமல் பொழுதுபோக்காக அமையும் பதிவுகளுக்கு இவ்விதி தளர்த்தப்படுகின்றது.
  • மானுடம், மக்கள் நலன், நன்நெறி, பண்பாடு, சீர்திருத்தங்கள், தனிமனித ஒழுக்கம், ஆன்மீகம் சார்ந்து மக்களை நெறிப்படுத்தும் மெய்யியல்/இறையியல் சம்பந்தமான பதிவுகள் ஊக்குவிக்கப்படுகின்றது. எனினும் மதப் பிரச்சாரம் செய்யும் வகையிலான பதிவுகள் அனுமதிக்கப்படமாட்டாது.
  • யாழ் கருத்துக்கள விதிமுறைகளை மீறும் பதிவுகளை நேரடியாக நிர்வாகத்துக்கு முறைப்பாட்டு முறை (Report) மூலம் அறியத்தருவது விரும்பப்படுகின்றது. இது கருத்துக்களத்தின் தரத்தினைப் பேண உதவும்.

யாழ் கருத்துக்களத்தில் பதியப்படும் செய்திகள் சம்பந்தமான விதிகள்:

  • செய்திகள் நம்பகத்தன்மை வாய்ந்த செய்தித் தளங்களில் இருந்து இணைக்கப்படல் வேண்டும்.
  • யாழ் இணையத்தின் கறுப்புப் பட்டியலில் உள்ள இணையத்தளங்களில் இருந்து செய்திகளை இணைப்பது தவிர்க்கப்படல் வேண்டும்.
  • செய்திகளின் உண்மைத்தன்மை முடிந்தளவு உறுதிப்படுத்தப்பட்டு இணைக்கப்படுதல் வேண்டும்.
  • செய்திகளை இணைக்கும்போது அதுதொடர்பான தலைப்பொன்று ஏற்கனவே இணைக்கப்பட்டிருந்தால் அத்தலைப்பின் கீழ் பதிய வேண்டும்.
  • செய்திகள் ஏற்கனவே இணைக்கப்பட்டிருக்கின்றனவா என்று தேடற்கருவி மூலம் பார்த்துவிட்டு இணைக்கப்படுதல் வேண்டும்.
  • பார்வையாளர்களைக் கவரும் வகையில் இணைக்கப்படும் செய்திகளின் தலைப்பை மாற்றுவது தவிர்க்கப்படல் வேண்டும்.
  • ஆர்வத்தைத் தூண்டும் வினோதச் செய்திகள் செய்தித் திரட்டி பிரிவில் இணைக்கப்படல் வேண்டும். எனினும் வக்கிரமான செய்திகளை இணைப்பது தவிர்க்கப்படல் வேண்டும்.
  • யாழ் கள உறுப்பினர்கள் தமது தனிப்பட்ட கருத்துக்களைப் புதிய செய்திகளாக செய்திப் பிரிவுகளில் இணைப்பது தவிர்க்கப்படல் வேண்டும்.

யாழ் கருத்துக்களத்தில் பதியப்படும் ஆக்கங்கள் சம்பந்தமான விதிகள்:

  • யாழ் கள உறுப்பினர்கள் சுயமான ஆக்கங்களை பதிவது விரும்பப்படுகின்றது.
  • யாழ் கருத்துக்கள உறுப்பினர்களின் சுயமான ஆக்கங்கள், படைப்புக்களிற்கு சக கள உறுப்பினர்கள் பச்சைப்புள்ளிகளை வழங்கி ஆதரவு கொடுத்து ஊக்குவிப்பது விரும்பப்படுகின்றது.
  • யாழ் கருத்துக்கள உறுப்பினர்களின் சுயமான ஆக்கங்களை மெருகூட்ட ஆக்கபூர்வமானதும் காத்திரமானதுமான விமர்சனங்கள் வரவேற்கப்படுகின்றது.
  • பிற தளங்களில் இருந்து இணைக்கப்படும் ஆக்கங்களின் உள்ளடக்கம் யாழ் களவிதிகளுக்கு உட்பட்டதாக இருத்தல் வேண்டும்.

7. சமூகவலைத்தள இணைப்புக்கள்
சமூகவலைத் தளங்களில் (முகநூல், டுவிட்டர் போன்றவை) இருந்து இணைக்கப்படும் பதிவுகள் தொடர்பான விதிகள்:

  • சமூகவலைத் தளத்தில் இருந்து இணைக்கப்படும் பதிவுகள் அவ்வலைத் தளங்களின் உறுப்புரிமை இல்லாதவர்களாலும் பார்க்கக் கூடியதாக இருத்தல்வேண்டும்.
  • இணைக்கப்படும் பதிவுகளை உறுதிப்படுத்த அப்பதிவுகளுக்கு நேரடி இணைப்புக் கொடுக்கப்படல் வேண்டும்.
  • சமூகவலைத் தளங்களை மட்டும் ஆதாரமாகக் கொண்டு செய்திகள், அரசியல் அலசல்கள் இணைப்பது தவிர்க்கப்படல் வேண்டும். எனினும் நம்பகத்தன்மை வாய்ந்தவர்களில் முகநூல் குழுமம், பக்கம், சுவர் பகுதிகளில் இருந்து இணைக்கப்படும் காத்திரமான பதிவுகள் அனுமதிக்கப்படும்.
  • தனிப்பட்டவர்களின் சமூகவலை தளங்களின் நிலைத் தகவல்களை அவர்களின் அனுமதி இல்லாமல் பதிவது தவிர்க்கப்படல் வேண்டும். இத்தகைய அனுமதிகளை சமூகவலைத் தளங்களினூடாகப் முன்கூட்டியே பெற்று வைத்திருப்பது விரும்பத்தக்கது.
  • தனிப்பட்டவர்களின் சமூக வலைத்தளங்களில் பகிரப்படும் அவர்களின் தனிப்பட்ட புகைப்படங்கள், விழாக்களின் போது எடுக்கப்படும் ஒளிப்பதிவுகள், அவர்களது தனிப்பட்ட விபரங்கள் என்பனவற்றை இணைப்பதும் பகிர்வதும் முற்றாகத் தவிர்க்கப்படல் வேண்டும்.
  • மக்கள் போராட்டம் மற்றும் கவனியீர்ப்பு போன்ற விடயங்களையும் நிகழ்வுகளையும் யாழ் இணையத்தின் பொதுவான கள விதிகளுக்கு ஏற்ப இணைப்பது அனுமதிக்கப்படுகின்றது. எ.கா: உதாரணமாக மாணவர் போராட்டங்கள், நினைவு தின ஒன்றுகூடல்கள், கவனயீர்ப்பு போராட்டங்கள், மாவீரர்களின் முக்கிய நிகழ்வுகள் போன்றன.
  • சமூக வலைத்தளங்களில் இணைக்கப்படும் ரசிக்கத்தக்க படங்கள், நாகரீகமான துணுக்குகள், மகிழ்வூட்டும் நகைச்சுவை விடயங்கள், கருத்துப்படங்கள் போன்றவற்றைப் இணைப்பதும் பகிர்வதும் அனுமதிக்கப்படுகின்றது. இவ்வாறு இணைக்கப்படுபவை யாழ் களவிதிகளுக்கு உட்பட்டதாக இருத்தல் வேண்டும். பார்க்க: விதி எண் இ) 8.
  • மத வழிபாட்டுக்குரிய தகவல்கள், புகைப்படங்கள் மற்றும் காணொளிகள் போன்றவற்றை இணைப்பது அனுமதிக்கப்படுகின்றது. எ.கா: கோயில்/தேவாலயத் திருவிழாக்களின் புகைப்படங்கள், காணொளிகள், மதங்களின் நன்நெறிக் குறிப்புகள் போன்றவை.
  • யாழ் கள உறுப்பினர் ஒருவர் தனது சமூகவலைத் தளத்தில் பகிர்வதை யாழ் கருத்துக்களத்திலும் பகிர விரும்பின் அவை யாழ் களவிதிகளுக்கு உட்பட்டதாக இருப்பின் அனுமதிக்கப்படும். எனினும் இவ்வாறு பகிர்வதன் மூலம் ஏற்படும் விளைவுகளுக்கு யாழ் களம் பொறுப்பேற்காது.
  • யாழ் கருத்துக்களத்தில் உள்ள ஆக்கங்களையும் கருத்துக்களையும் முகநூல், டுவிட்டர் போன்ற சமூகவலைத் தளங்களில் இணைத்து யாழ் களத்தின் வளர்ச்சிக்கு உதவுவது விரும்பப்படுகின்றது. எனினும் நாற்சந்திப் பகுதி கள உறுப்பினர்கள் மட்டுமே பார்க்கக்கூடியவாறு உள்ளதால் இப்பகுதியில் உள்ள பதிவுகளை சமூகவலைத் தளங்களில் பகிர்வது கூடாது.

8. படங்கள்/காணொளிகள்
யாழ் கருத்துக்களத்தில் பதியப்படும் கருத்துக்களோடும் ஆக்கங்களோடும் இணைக்கப்படும் படங்கள்/காணொளிகள் தொடர்பான விதிகள்:

  • காப்புரிமை காரணமாக பகிர்வதற்குத் தடை உள்ள படங்கள்/காணொளிகளை இணைப்பது தவிர்க்கப்படல் வேண்டும்.
  • கள உறுப்பினர்கள் தமது தனிப்பட்ட அடையாளங்களைக் காட்டும் படங்களையும், காணொளிகளையும், அவர்தம் குடும்ப உறுப்பினர்களினதும் நண்பர்களினதும் படங்களையும், காணொளிகளையும் இணைப்பதைக் இயலுமானவரை தவிர்த்தல் வேண்டும்.
  • எக்காரணம் கொண்டும் சக கள உறுப்பினர்களின் தனிப்பட்ட புகைப்படங்கள், காணொளிகள் என்பனவற்றை அவர்களின் எழுத்துமூல முன் அனுமதி இன்றி பிரசுரித்தல் ஆகாது.
  • கள உறுப்பினர்களுக்குச் சொந்தமற்ற படங்கள்/காணொளிகள் இணைக்கப்படும்போது அவற்றைப் பகிர்வதற்கு அனுமதி உள்ளதா என்று சரிபார்க்கப்படல் வேண்டும். இவ்விதி அரசியல், சினிமா மற்றும் மக்கள் மத்தியில் பிரபலமானவர்களின் படங்கள், காணொளிகளுக்கு தளர்த்தப்படுகின்றது.
  • குழந்தைகள், சிறுவர்களது படங்கள்/காணொளிகள் இணைப்பதற்கு தகுந்த அனுமதி உள்ளதா என்று சரி பார்க்கவேண்டும்.
  • அப்பட்டமாக பாலியல் உணர்வுகளைத் தூண்டும் படங்கள்/காணொளிகள் இணைக்கப்படல் ஆகாது.
  • வக்கிரங்களையும், வன்முறையையும் தூண்டும் படங்கள்/காணொளிகள் இணைக்கப்படல் ஆகாது.
  • சடலங்களிலும் காயமடைந்து இருக்கும் உடல்களிலும் பாலுறுப்புகள் மறைக்கப்பட்டே படங்கள்/காணொளிகள் இணைக்கப்படல் வேண்டும். இவ்விதி பிற தளங்களில் இருந்து எடுத்து ஒட்டப்படும் படங்களுக்கும், காணொளிகளுக்கும் பொருந்தும்.
  • சிறுவர்கள் மற்றும் குழந்தைகளினது நிர்வாணப் படங்களும், காணொளிகளும் முற்றாகத் தவிர்க்கப்படல் வேண்டும்.
  • செய்திகளோடு தொடர்புடையதாக இணைக்கப்படும் படங்களில் சடலங்கள், இரத்தம் போன்றன இடம்பெற்றிருந்தால் - தலைப்பில் அது பின்வருமாறு குறிப்பிடப்படல் வேண்டும்:
    • எ.கா.: [எச்சரிக்கை!] சுனாமியும் அதன் வடுக்களும்
  • படங்களினதும் காணொளிகளினதும் மூலம் குறிப்பிடப்படல் வேண்டும். (பார்க்க: மூலம்)
  • காணொளிச் செய்திகள் இணைக்கப்படும்போது அச்செய்தியின் உள்ளடக்கம் பற்றிய சிறு விளக்கத்தை இயன்றவரை சுருக்கமாகக் குறிப்பிடுதல் வேண்டும்.

9. மூலம்

  • யாழ் கருத்துக்களத்தில் இணைக்கப்படும் செய்திகள், பதிவுகள், ஆக்கங்கள் வேறு இடத்திலிருந்து பெறப்பட்டதாயின் மூலம் கண்டிப்பாகக் குறிப்பிடப்படல் வேண்டும்.
    • அது எங்கிருந்து பெறப்பட்டது என குறிப்பிடப்படல் வேண்டும்.
    • அது யாரால் எழுதப்பட்டது என்பது குறிப்பிடப்படல் வேண்டும்.
    • நேரடி மூல இணைப்பு கொடுக்கப்படல் வேண்டும்.
  • மூலம் பற்றிய விபரங்கள் தெரியாதவிடத்து, அது இணைப்பவரது சொந்த ஆக்கம் இல்லை என்று குறிப்பிடல் வேண்டும்.
  • அதேபோல், யாழ் கருத்துக்களத்தில் இணைக்கப்படும் கள உறுப்பினர்களின் சுய ஆக்கங்களை வேறெங்கும் (வேறு ஊடகங்களில்) பயன்படுத்தும் போது:
    • மூலம்: யாழ் இணையம் என்று குறிப்பிடப்பட வேண்டும்.
    • ஆக்கத்தை எழுதிய கருத்துக்கள உறுப்பினரின் பெயர் குறிப்பிடப்பட வேண்டும்.
    • ஆக்கத்துக்கான நேரடி இணைப்பு கொடுக்கப்படல் வேண்டும்.

10. பொறுப்பு

  • யாழ் கருத்துக்களத்தில் எழுதப்படும் கருத்துக்களுக்கு யாழ் இணையம் பொறுப்பேற்காது.
  • யாழ் கருத்துக்களத்தில் எழுதப்படும் கருத்துக்களுக்கு அவற்றை எழுதும் உறுப்பினர்களே முழுப் பொறுப்பும் ஏற்க வேண்டும்.
  • கள உறுப்பினர்கள் எழுதும் கருத்துக்கு வருகின்ற எதிர்வினைகளுக்கும், விளைவுகளுக்கும் அவரவரே முழுப் பொறுப்பும் ஏற்க வேண்டும்.
  • யாழ் களத்தில் கள உறுப்பினர்களால் அறியத்தரப்படும் மற்றும் யாழில் விளம்பரம் செய்யப்படும் அமைப்புகள், நிதி நிறுவனங்கள் / மனித நேய அமைப்புகள் என்பனவற்றுடனான கள உறுப்பினர்களின் தனிப்பட்ட தொடர்புகளுக்கும் அவர்களுக்கிடையான கள உறுப்பினர்களின் தொடர்பாடலின் விளைவுகளுக்கும் அவரவரே முழுப் பொறுப்பும் ஏற்க வேண்டும்.

 

ஈ) திருத்தங்கள்

1. கருத்துகளை திருத்துதல்

  • கள உறுப்பினர்கள் தமது பதிவில் கருத்துகளில் உள்ள எழுத்துப் பிழைகள், இலக்கணப் பிழைகள் மற்றும் தவறான மூலம் என்பனவற்றை மட்டுமே திருத்தலாம்.
  • சக கள உறுப்பினர்கள் பதில் கருத்துக்களை வைத்தபின்னர் தாம் எழுதிய கருத்துகளை நீக்குவதும் அல்லது பிரதான கருத்தில் மாற்றத்தைச் செய்வதும் முற்றாகத் தவிர்க்கப்படல் வேண்டும்.
  • கள உறுப்பினர்கள் நிர்வாகத்தின் அனுமதி இன்றி திரியில் எழுதியவற்றை முழுமையாகவோ, பகுதியாகவோ நீக்குதல் கூடாது.
  • கள உறுப்பினர் ஒருவரால் ஆரம்பிக்கப்பட்ட திரி ஒன்றை பூட்ட வேண்டுமாயின் மட்டுறுத்தினர்களுக்கு தனிமடலில் அறியத் தருதல் வேண்டும். மட்டுறுத்தினர்களின் இறுதி முடிவே செயல்படுத்தப்படும்.

2. மட்டுறுத்தப்பட்ட கருத்துகள்:

  • மட்டுறுத்தப்பட்ட கருத்துகளை மீண்டும் பதிவதும் வேறு தலைப்புகளில் கொண்டுவந்து பிரசுரிப்பதும் கண்டிப்பாகத் தவிர்க்கப்படல் வேண்டும்.
  • மட்டுறுத்தப்பட்ட கருத்துக்கள் தொடர்பாக திரிகளில் கருத்துக்கள் பதிவது தவிர்க்கப்படல் வேண்டும்.
  • ஏதாவது ஒரு நியாயமான காரணத்திற்காக ஒருவரின் சுயபடைப்பு திருத்தப்படவோ அல்லது சில பகுதிகள் நீக்கப்படவோ வேண்டி ஏற்படின், அப் படைப்பை எழுதியவரிடமே அதற்கான பொறுப்பு வழங்கப்படும். அவ்வாறு படைப்பாளி அதனை திருத்தும் வரைக்கும் அப்படைப்பு நிர்வாகத்தினரைத் தவிர வேறு எவரும் பார்க்க முடியாத பகுதிக்கு நகர்த்தப்பட்டு, படைப்பாளி திருத்தம் செய்து அனுப்பிய பின்னர் மூன்று நாட்களுக்குள் மீண்டும் வழமையான இடத்தில் இணைக்கப்படும்.
  • மட்டுறுத்தப்பட்ட கருத்துகள் தொடர்பாக முரண்பாடுகள் இருப்பின் மட்டுறுத்தினர்களிடம் முறைப்பாட்டு முறை மூலமாக அல்லது தனி மடலில் விளக்கம் கோரலாம்.
  • மேற்கூறிய விடயத்துக்கு மட்டுறுத்தினர்கள் பொதுவாக 12 இல் இருந்து 24 மணி நேரத்திற்குள் பதில் அளிப்பர். அவ்வாறு பதில் அளிக்கவில்லையாயின் அதனையும் குறிப்பிட்டு நாற்சந்திப் பகுதியில் மட்டும் தனித் திரி திறந்து மட்டுறுத்தியதற்கான காரணங்களை தெளிவுபடுத்தக் கேட்கலாம்.

 

உ) திண்ணை
யாழ் கள உறுப்பினர்கள் தமக்குள் உரையாடுவதற்காக அமைக்கப்பட்டுள்ள திண்ணைப் பகுதி தொடர்பான விதிகள்:

  • திண்ணை உரையாடல்கள் யாழ் கருத்துக்கள விதிகளுக்கு உட்பட்டதாக இருத்தல் வேண்டும்.
  • திண்ணை உரையாடல்கள் கண்ணியமான முறையிலும் நட்பு ரீதியிலும் இருத்தல் வேண்டும்.
  • தனிநபர் தாக்குதல், சீண்டும் வகையிலும் ஆத்திரமூட்டும் வகையிலும் உரையாடுதல், நீ, வா, போ என ஒருமையில் சக உறுப்பினரை விளித்தல், அநாகரீகமாக உரையாடுதல், இழிவான வார்த்தைகளைப் பிரயோகித்தல் போன்றன கண்டிப்பாகத் தவிர்க்கப்படல் வேண்டும்.
  • திண்ணையில் உரையாடப்பட்டவற்றை யாழ் களத்திற்கு வெளியே கொண்டு செல்வது, பரப்புவது, பிரதியிடுவது போன்றன முற்றாகத் தவிர்க்கப்படல் வேண்டும்.
  • திண்ணையில் உரையாடப்பட்டவற்றை களத்தில் உள்ள திரிகளில் ஒட்டுதலும், தனியாகத் திரி திறந்து இடுதலும் ஆகாது.
  • திண்ணையில் தமது அடையாளங்களை (பெயர் / முகவரி / பால் / தொலைபேசி இலக்கம் போன்றவற்றை) பகிரங்கமாக வெளிப்படுத்துவதும் உரையாடும் சக கள உறுப்பினரின் அடையாளங்களை கோருவதும் (பெயர் / பால் / முகவரி / தொலைபேசி இலக்கம் போன்றவற்றை) கண்டிப்பாகத் தவிர்க்கப்படல் வேண்டும்.
  • ஒரு திரியில் எழுதிய விடயத்தை அப்படியே கொண்டு வந்து திண்ணையில் இடுவது தவிர்க்கப்படல் வேண்டும். இதற்குப் பதிலாக எழுதிய விடயம் உள்ள திரியின் இணைப்பைக் குறிப்பிடலாம்.
  • யாழ் கருத்துக்களத்தில் இருந்து நீக்கப்பட்ட எந்தக் கருத்தையும் / பதிவையும் கண்டிப்பாகத் திண்ணையில் இடுதல் கூடாது.
  • நிர்வாகத்தால் எடுக்கப்படும் முடிவுகள் தொடர்பாக நிர்வாகத்தினரைத் தவிர ஏனையோருடன் திண்ணையில் வைத்து உரையாடுவதும் கலந்தாலோசிப்பதும் தவிர்க்கப்படல் வேண்டும். பார்க்க: விதி எண் ஈ) 2.
  • கள உறுப்பினர் ஒருவர் திண்ணை விதிகளை மீறியது அவதானிக்கப்பட்டால் அல்லது நிர்வாகத்தின் கவனத்திற்குக் கொண்டுவரப்பட்டால் பின்வருமாறு நடவடிக்கைகள் எடுக்கப்பட்டும்.
    • முதலாவது மீறல்: திண்ணை தொடர்பான விதிகளை அறிவுறுத்தும்/நினைவூட்டும் வகையில் நிர்வாகத்தால் குறிப்பிட்ட கள உறுப்பினருக்கு தனிமடல் மூலம் எச்சரிக்கை வழங்கப்படும் .
    • இரண்டாவது மீறல்: குறிப்பிட்ட கள உறுப்பினர் திண்ணையில் ஒரு மாதம் தடை செய்யப்படுவார்.
    • மூன்றாவது மீறல்: குறிப்பிட்ட கள உறுப்பினர் திண்ணையில் நிரந்தரமாகத் தடை செய்யப்படுவார்.

 

ஊ) நடவடிக்கைகள்

கள உறுப்பினர் ஒருவர் மீது நடவடிக்கை எடுக்கவேண்டி வரும் சந்தர்ப்பங்களும் முறைகளும் பற்றிய விதிகள்:

  • மீறப்படும் கள விதியின் அடிப்படையில் ஒருவருக்கு எச்சரிக்கைப் புள்ளிகள் வழங்கப்படும். அவரது கருத்துக்கள நடத்தையில் முன்னேற்றங்கள் இருக்குமிடத்து எச்சரிக்கைப் புள்ளிகள் நீக்கப்படும்.
  • கள உறுப்பினர் ஒருவர் எட்டுக்கு மேற்பட்ட (8+) எச்சரிக்கைப் புள்ளிகள் பெற்றால் அவர் உடனடியாகத் தானியங்கி மூலமாகவோ அல்லது மட்டுறுத்தினர் மூலமாகவோ நிரந்தரமாகத் தடை செய்யப்படுவார்.
  • கள உறுப்பினர் ஒருவர் ஐந்திற்கு மேற்பட்ட (5+) எச்சரிக்கைப் புள்ளிகள் பெற்றால் அன்றிலிருந்து ஒரு மாதத் தடை வழங்கப்படும்.
  • சக கள உறவுகளை மிரட்டினாலோ, ஆபாசமாக தனிமடல் அனுப்பினாலோ அல்லது யாழின் விதிகளை அப்பட்டமாக மீறினாலோ உடனடியாக குறிப்பிட்ட உறுப்பினர் நிரந்தரமாகத் தடை செய்யப்படுவார்.
  • சக கள உறுப்பினர்களை யாழுக்கு எதிராக இயங்குமாறு கருத்துக்களத்தில் நேரடியாகவோ, தனிமடல் மூலமாகவோ கோரினாலோ அல்லது பிற சமூகவலைத் தளங்கள், தொடர்பாடல் சேவைகள் மூலம் கோரினாலோ உடனடியாகக் குறிப்பிட்ட உறுப்பினர் நிரந்தரமாகத் தடை செய்யப்படுவார்.
  • குடும்ப உறவுகளை இழுத்து இழிவாகக் கருத்து எழுதுகின்றவருக்கு அன்றிலிருந்து உடனடியாக ஒரு மாதத் தடை வழங்கப்படும். மீண்டும் ஒரு முறை மீறினால் நிரந்தரமான தடை வழங்கப்படும்.
  • கள உறுப்பினர் ஒருவர் வசைச் சொற்கள் (தூஷண வார்த்தைகள்), இழிவான கெட்ட வார்த்தைகள், பாலியல் ரீதியிலான வசைகள் போன்றவற்றை நேரடியாகவோ அல்லது மறைமுகமாகவோ எழுதினால் உடனடியாக ஒரு மாதம் மட்டுறுத்துனர் பார்வைக்குள் கொண்டு வரப்படுவார். இரண்டாவது முறை மீறினால் ஒரு மாதத் தடையும், மூன்றாவது முறை மீறினால் நிரந்தரமான தடையும் வழங்கப்படும்.
  • வெறுமனே சீண்டுவதற்காக தொடர்ந்து எழுதுகின்றவர்கள் மீதும், ஒருவர் ஆத்திரமூட்டும் வகையில் கருத்துக்களை வைக்கும்போது பதிலுக்கு களவிதிகளை மீறும் கருத்துக்களை வைப்பவர்கள் மீதும் தகுந்த நடவடிக்கை எடுக்கப்படும். முதலில் எச்சரிக்கைப் புள்ளிகளும், பின் மட்டுறுத்துனரின் பார்வைக்குள் உட்படுத்தப்படுவதும், அதன் பின் தடைகளும் வழங்கப்படும். இவற்றில் எத்தகைய நடவடிக்கை முதலில் எடுக்கப்படும் என்பது மட்டுறுத்துனரின் முடிவுக்குட்பட்டது.
  • நிர்வாகத்தின் வேண்டுகோள்களையும், அறிவுறுத்தல்களையும் தொடர்ச்சியாக மீறுபவர்கள் மீதும் ஒரு மாதத் தடையும், மீண்டும் ஒரு முறை மீறுபவர்களுக்கு நிரந்தரமான தடையும் வழங்கப்படும்.
  • கள உறுப்பினர் ஒருவர் தனது கருத்துகளை நிர்வாகத்தின் அனுமதி இன்றி நீக்கினால் அல்லது நிர்வாகத்தினரால் அனுப்பப்பட்ட தனிமடல் அல்லது நடவடிக்கை சார்ந்த விடயங்களைப் பகிரங்கப்படுத்தினால் அவர் தடை செய்வதற்குரிய சூழ்நிலைகளை தோற்றுவித்தவராகக் கருதப்பட்டு தடை செய்யப்படுவார்.
  • பிறரின் ஆக்கங்களை தன் சொந்த ஆக்கமாக பிரசுரித்தால் முதலில் எச்சரிக்கை வழங்கப்படும். மீண்டும் அதே தவறு நிகழுமாயின் அவர் நிரந்தரமாகத் தடை செய்யப்படுவார்.

எச்சரிக்கைப் புள்ளிகள் நீக்குவது தொடர்பான நடைமுறை:

  • எச்சரிக்கைப் புள்ளிகள் எடுத்தவர்கள் அடுத்த மூன்று மாதத்திற்கு எதுவித எச்சரிக்கைப் புள்ளிகளும் எடுக்காதவிடத்து மூன்றாவது மாதத்தின் பின்னரிலிருந்து ஒவ்வொரு எச்சரிக்கைப் புள்ளி குறைக்கப்படும்.
  • ஆறு மாதத்திற்குள் எதுவித எச்சரிக்கைப் புள்ளிகளும் எடுக்காதவிடத்து அனைத்து எச்சரிக்கைப் புள்ளிகளும் நீக்கப்படும். இந்நடைமுறை ஒவ்வொரு உறுப்பினரதும் நடத்தைகளில் உள்ள முன்னேற்றங்கள் நிர்வாகத்தால் ஆராயப்பட்ட பின்னரே தீர்மானிக்கப்படும்.
  • நிரந்தரத் தடை தவிர்ந்த ஏனைய நடவடிக்கையை ஒருவர் மீது எடுக்கப்படும் போது அவருக்கு ஆதரவாகத் திரி திறக்கப்படுவது அனுமதிக்கப்படமாட்டாது.
  • இதேபோன்று ஒருவர் நிர்வாகத்தின் நடவடிக்கை மீது கோபம் கொண்டு நிரந்தரமாக விலகுகின்றேன் என விலகினால், அவரை மீண்டும் யாழ் கருத்துக்களத்துக்கு வரச் சொல்லி திறக்கப்படும் திரிகளும் அனுமதிக்கப்படமாட்டாது.

மேற்கூறிய அனைத்து விதிகளின் எல்லைகள் எவை என்பது மட்டுறுத்தினரின் முடிவாகவே இருக்கும். களவிதிகளை மீறும் கருத்தொன்றை எப்படித் தணிக்கை செய்வது (திருத்துவது/ஒரு பகுதியை நீக்கி *** இடுவது/முற்றாக நீக்குவது) என்பதனையும் மட்டுறுத்தினரே தீர்மானிப்பர். மட்டுறுத்தினரின் முடிவே இறுதியானது ஆகும். மேலும் களவிதிகளை மீறும் கள உறுப்பினர் ஒருவர் மீது எத்தகைய நடவடிக்கை எடுக்கவேண்டும் என்பதனை நிர்வாகத்தினர் கூடி ஆராய்ந்து முடிவெடுப்பர்.

நாமார்க்கும் குடியல்லோம்

நன்றி,
யாழ் இணையம்.

Link to comment
Share on other sites

Archived

This topic is now archived and is closed to further replies.

Guest
This topic is now closed to further replies.
  • Tell a friend

    Love கருத்துக்களம்? Tell a friend!
  • Topics

  • Posts

    • உதறல்-சப்னாஸ் ஹாசிம்   ஓவியம் : எஸ்.நளீம் நீண்ட நாட்களுக்குப் பிறகு அச்சமற்ற மனித நடமாட்டத்தை சந்தைக்கூச்சலை வாகன நெரிசலை, பாடசாலை சிறுவர்களை அவர்கள்  கண்டிருந்தனர். அநுராதபுரத்தில் ஆங்காங்கே இருந்த புத்தர் சிலைகளைச் சுற்றியிருந்த வெண் அலரிப்பூக்கள் பகலிலும் மணத்துக்கிடந்தன. சில இடங்களில் பாதை தடுப்புகள் போடப்பட்டு வாகனங்கள் கண்காணிக்கப்பட்டன. நீண்ட நாள் பசி, வயிறு ஒட்டி அடியிலிருந்து பிழம்பாய் எரிவது மூக்கு நாசிவரை சுட்டது. வேறு வழியின்றி ஒரு முஸ்லிம் ஹோட்டலை பார்த்து உள்ளே முதலாளியிடம் ஒரு சிலர் நிலைமையைப் புரியவைக்க அவர்களில் ஒருவனுக்கு அவசரமாய் அடைத்துக்கொண்டு வந்திருந்ததில் ஒதுங்கப் போனான். கழிவறையில் மஞ்சள் சுவர் பூச்சு போலக் கசந்து ஒழுகியதும் அந்த இடம் எரியத் துவங்கியது. ஒரு வாளி நிறையத் தண்ணீர் எடுத்துக் குறியைத்தணிய விட்டான். “முதல்ல போய் சாப்பிடுங்கோ புள்ளையாள்..” . முதலாளி பேசுவதிலே ஆள் காத்தான்குடியென்று தெரிந்திருந்தது. பேச்சிலேயே அக்கறையும் வாஞ்சையும் கலந்திருந்தது. “புள்ளையள் யாழ்ப்பாணத்தில இருந்து தப்பி வாறாக. கேக்கிறத்த குடுமகன்..” என வேலை பார்ப்பவர்களிடம் அவரது ஏவல் சத்தமாகவிருந்தது. பெரிய உள் கடையில் ஒரு பெரிய மேசையைச்சுற்றி பத்து கதிரைகளும் புத்தகப்பைகளும் குந்தியிருந்தன. இடைக்கிடை ஒருவன் மட்டும் ஒருவாளித்தண்ணீரோடு ஒதுங்கப் போனான். தாகம் தீரும் பத்து முழிகள் வெளுத்தன. யுத்தம் மீள மூண்டதில் புலிகள் கிழக்கிலிருந்த பொலிஸ் நிலையங்களை தாக்கி கைப்பற்றியிருந்தனர். அதனால் மட்டக்களப்பு கல்முனை வழியாக அக்கறைப்பற்றுக்கு செல்வதில் சிரமமும் அச்சமுமிருந்தது. கடை முதலாளியின் யோசனைப்படி பத்து பேரும் கண்டிக்கு செல்வதென முடிவாகியது. அன்றிரவு வேனில் கடிகார டிக் டிக் சத்தமும் ஆஸ்த்துமா இளைச்சலும் பல ரகமான குறட்டை வீசலும் நிறைந்திருந்தன. பலநாளாக கண்களில் தேங்கிய தூக்கமென்பதால் பைகளுக்கு மேலே கண்டபடி அசந்திருந்தனர்.அவர்கள் கடந்துவந்த கடுமையான நாட்களை, நினைத்தாலே தசைகளுக்குள் சுள்ளெனும் உதறலை அசைபோடாமலில்லை. 000000000000000000000000000 “இந்த கண்றாவி வீடிய விட்டுட்டு எப்படா சிகரெட்டுக்கு மாறுற..”. “இருக்கிற பிரச்சினைக்குள்ள ஒனக்கு சிகரெட் தேவப்படுது எலா…”. ரயில் தண்டாவாளக்கேடர்களை அறுத்துக் குறுக்காகவும் நீளப்பாட்டிலும் வைத்து மண்ணைத் தோண்டிய மடுவிலிருந்து மூட்டை மூட்டையாகக் கட்டி குறுக்காகச் சுவரைப் போல எழுப்பித் துப்பாக்கி முனை மட்டும் வெளியே நீட்டத் தக்க இடைவெளியோடு அந்தப் பங்கரை பதுங்குவதெற்கென இயக்கத்தினர் கட்டுவதை வேடிக்கை பார்த்தபடி நின்றவர்களுக்குக் கொண்டு வந்த பீடி தீர்ந்து போனது சலிப்படித்தது. அடிவானைத்தொட சூரியன் யாழ்கோட்டையின் சுவர்களுக்குள் வழக்கமான பங்கருக்குள் பதுங்கிக்கொள்ள ஆங்காங்கே மின் குமிழ்கள் கொஞ்சம் கொஞ்சமாகக் கருந்தவளையின் கண்களைப்போலப் பளிச்சென்றன. “அடேய். புதினம் பாக்குறியள் என்ன..”. பங்கருக்குள்ளிருந்து குரலும் கண்களும் வெளியே நீண்டன. “இல்ல அண்ணா, நாங்க படிக்க வந்த, சும்மா சுத்திப்பாப்பம் எண்டு…” சொன்ன இழுவையான பதிலில் அமிழ்ந்து மூடியிருந்த குரலை அவர்களில் ஒருவன் எச்சிலை திரட்டி விழுங்கி சரிப்படுத்தியபடியிருந்தான். “எந்த ஊரடா நீங்கள்.?..”. “அக்கரைப்பற்று ண்ணா…” “முஸ்லிமே…? “ கேள்விகளைச் சுருக்கமாக முடித்துவிட்டு பீடிக்குறைகளை சாஷ்டாங்கமான முகமனைப்போலக் காலுக்கு கீழே நசுக்கியவுடன் தங்களது அறையை நோக்கி வேகமாக அவர்களிருவரும் நடக்கத்துவங்கியதில் யாழ்ப்பாணக் கோட்டையைச் சுற்றிலும் புலிகள் பல பங்கருகளை கட்டுகிற சப்தங்கள் தெளிவாகக்கேட்டன. முந்தைய இரவில் பூத்திருந்த வெண் அலரி வாசம் வழியெங்கும் கும்மென்று அடைத்திருந்தது. ஆங்காங்கே ஆயுதங்களோடு ஆட்கள் சுதந்திரமாகச் சுத்தி திரிவதை கோட்டை மேலிருந்த இராணுவத்தினரும் பார்த்தபடியிருந்தனர். தொன்னூறுகளில் இலங்கை ஜனாதிபதியாகவிருந்த ரணசிங்க பிரேமதாசா புலிகளோடு செய்திருந்த யுத்த நிறுத்தக் காலத்தில் புலிகள் பல அரண்-சுவர்களையும் பதுங்கு குழிகளையும் அமைக்கத்துவங்கியிருந்தனர். இது தெரிந்திருந்தும் இராணுவத்தரப்பு தங்கள் வீரர்களை அமைதியாக இருக்கும் படியே கட்டளையிட்டிருந்தது. பேச்சுவார்த்தை பிற்காலகட்டத்தில் இலங்கை பாதுகாப்புத்தரப்பு ஆயுதங்களைத் தவிர்க்கச்சொன்னதில் புலிகள் அதிருப்தியடைந்திருந்தனர். இந்தக்காலத்தில் தான் கிழக்கிலிருந்து நிறைய மாணவர்கள் யாழ்நகருக்கு கல்விகற்க வந்திருந்தனர். அறையை அடைந்ததும் வெளியே இருளைக்கவிழ்க்க போராடும் மஞ்சள் விளக்கை அணைத்துக் கொண்டனர். அவர்கள் தங்கியிருந்த அறைக்கு அடுத்தாற்போல் தான் உரிமையாளரும் குடியிருந்தார். சாப்பாடு தங்குமிடத்தோடு சேர்த்து மாதவாடகை உரிய நாளில் வங்கிக்கணக்கிற்கு வந்துவிடுமென்பதால் அவரும் தொந்தரவு தருவதில்லை. அவர் பிள்ளைகள் அறைக்குள் அடிக்கடி இவர்களோடு விளையாட வருவது அவருக்கு அவ்வளவு பிடிப்பாக இல்லை. வெளியே சண்டை மூளும் நாட்களில் குண்டுகளுக்குப் பயந்து பதுங்கும் குழிகள் வேறு வேறாக அமைக்கப்பட்டிருந்தன. வேறான வாயிலோடு கொல்லைப்புறத்தை பிரிக்கும் பெரிய சுவரில் இருந்த ஜன்னல் மட்டுமே தொடர்பாடலுக்கென்றிருந்தது. யாழில் ஒரே கிணற்றுக்காக ஒரே கோயிலுக்காக ஒரே தேநீர்க்கடைக்காகப் போராடியது போல ஒரே பங்கருக்காகவெனப் பஞ்சமர் போராட்டங்கள் வீதிக்கு இறங்கியிருக்க முடியாது தான். அன்றிரவே மீண்டும் போர் துவங்கியது. சரமாரியாகக் குண்டுகள் அதிர தீட்டால் பிரிந்திருந்த பங்கருகளில் ஒரே மரணபீதி ஒரே வியர்வையென அடைத்திருந்தது. அவர்களிருவரும் எப்படியாவது ஊருக்குச் செல்வதென முடிவெடுத்து வழக்கமாகச் சாப்பிடப்போகும் முஸ்லிம் கடை முதலாளியிடம் பேசிப் பார்த்தனர். அந்தக் கடைமுதலாளிக்கு புலிகளிடத்தில் செல்வாக்கிருந்தது. புலிகளின் தளபதியொருவர் மூலமாக வாகனம் ஒன்றை ஏற்பாடு செய்து தந்திருந்ததில் அவர்களோடு சேர்த்து மொத்தம் பத்து மாணவர்கள் ஏறியிருந்தனர். உண்மையில் அவர்களில் நால்வர் இலங்கை பொலிஸ் பிரிவில் பணியாற்றிய முஸ்லிம்கள். கடைமுதலாளியினால் ஏற்கனவே திட்டமிட்டபடி அவர்கள் தங்கள் சீருடைகளை புதைத்து விட்டு இவர்களோடு மாணவர்களாகப் புத்தகங்களை பகிர்ந்து பிரித்து வாங்கியபடி பயணத்தில் சேர்ந்திருந்தனர். வேனில் நன்கு தெரிந்தவர்கள் போலத் தங்களைக்காட்டிக்கொள்வது அவ்வளவு கடினமாக இருக்கவில்லை. மாற்றுவீதிகளின் வழியே வேன் மத்திம வேகத்தில் செல்ல முன் விளக்குகளை மங்கலாய்க்கியிருந்தார் ட்ரைவர். பத்துக்கனவுகளெல்லாம் இல்லை; உயிர் வாழும் பிரயாசைகள் மட்டும் ஜன்னலிலிருந்து வெளியே தொங்கிக்கொண்டிருந்தன. இயக்கச்சியிலிருந்து ஆனையிறவுப்பாதைக்கு வேன் போகாமல் கோவில்வயல் வைரவர் கோவில்வரைக்கும் வந்து விட்டிருந்தார்கள். அங்கிருந்து கால்நடையாக ஆனையிறவுக்கு வர விடிந்திருந்தது. எதிரில் இருந்த இராணுவ முகாமில் சோதனைக்காக நின்றிருந்தனர். முன்னால் நீண்ட வரிசை. வரிசையிலிருந்து யாரோ ஒருவர் அடையாளம் காட்டுபவர்களை அடித்து இழுத்து சென்ற சிப்பாய்களின் பூட்ஸ் சத்தம் அச்சுறுத்தியது. தாகம் நீண்டு நாக்கிலிருந்து அடித்தொண்டை வரை வறண்டு வெடித்திருந்தது. அவர்களில் ஒருவன் சிங்களம் சரளமாகப் பேசத்தெரிந்தவன் என்பதால் புத்தகப்பைகளை காட்டி நிலைமையை விளக்கிப்பேச பைகளை ஒவ்வொன்றாகச் சோதனையிட்டனர். ஒவ்வொரு பையிலும் புத்தகங்களும் கழுவாத ஆடைகளும் சுருட்டிக்கிடந்தன. ஒவ்வொரு பையாகச் சோதனைக்கு நீட்டிவிட்டு வரிசையாகக் காத்திருந்தனர். திடீரென இருவரின் பின் முழங்காலில் உதை விழ முட்டி அடிபடக் கீழே சரிய துவக்குகள் லோட் ஆகின. ஒரு பைக்குள் இருந்து டிக் டிக் என்ற சத்தம் வந்ததும் சுதாகரித்த இராணுவ சிப்பாய்களுடன் இன்னும் சிலரும் வந்து சேர கவனமாக அந்த பையைத் திறந்து பார்த்தனர். அவர்களை விடவும் அந்தக் குழுவிலிருந்த மாணவர்களுக்கே திடுமென்றிருந்தது. தெரியாத பொலிஸில் இருந்த சிலரோடு சேர்ந்து தாங்களும் இரையாகிவிடுவோமென்ற அச்சம் மூள வியர்த்த கழுத்துகளும் பொத்தான் திறந்த நெஞ்சுப் பகுதிகளும் அதிகாலை வெயிலில் பளபளத்தன. உள்ளே இருந்த மேசைக்கடிகாரத்தை வெளியே எடுத்துத் துருவிச் சோதனை செய்தபின்னர் அவர்கள் பத்துப் பேரையும் செல்ல அனுமதித்தனர். 000000000000000000000000000 காடுகள் வழியாகக் கவனமாக ஒரு ஆள் முன்னே செல்லத் தனித்தனியாக ஒரு எறும்பு நிரையைப் போல மனிதர்களும் புத்தகவடுக்குகளும் மேசை கடிகார டிக் டிக் சத்தமும் விரைந்து கொண்டிருந்ததில் புதிதாக இழுத்து எறியும் மூச்சு சப்தமும் சேர்ந்திருந்தது. அதில் ஒருவனுக்கிருந்த ஆஸ்த்துமா இளைச்சல் மற்றவர்களுக்குப் புத்தகப்பைக்கு மேலே ஒரு சுமையை ஏற்றியது போலிருந்தது. மூன்று நாட்கள் மாறி மாறிப் பல புலிகளின் காவலரண்களுக்கு நடக்கவேண்டியிருந்தது. அதே சோதனைகளும் அதே கேள்விகளும் திரும்பத் திரும்ப வந்தன. “முஸ்லிமோ..” . “படிக்க வந்த நீங்களோ..”. “ஓமந்தை வரப் போகலாமப்பன்…”. புலிகளின் காவலரண்களில் தங்க கிடைத்த எல்லா நாட்களும் அவர்களுக்குச் சோதனையாயிருந்தன. செட்டிக்குளம் காவலரணில் அவர்களுக்குத் தங்குவதற்கென மரங்களடர்ந்த காட்டில் அருகருகேயான நான்கு மரங்களைச் சுற்றி வேயப்பட்ட புடவையினுள் அவர்கள் தங்கவைக்கப்பட்டனர். பல இடங்களில் தொடரும் சண்டைகளில் இடம்பெயர்ந்த குடும்பங்களும் தங்களுக்கு போதிய அளவு பெரிய சதுரப்புடவைச்சுவரினுள் தங்கியிருந்தனர். குழந்தைகளுக்காகப் புகைந்திருந்த அடுப்புக்கருகலும் துண்டிக்கப்பட்ட உடலங்கங்களிலிருந்து வரும் அழுகைச்செருமலும் பத்து புத்தக மூட்டைகளை கொளுத்துவதுபோலவிருந்தன. வயோதிபர்கள், பெண்கள், குழந்தைகள் ஊனமுற்றவர்களோடு வரிசையில் நின்று சாப்பாட்டு பொட்டலங்களை வாங்கக்கூச்சமாக இருந்தது. இப்படித்தான் ஊரிலும் ஆயுதக் குழுக்களைத் தாக்கும் வான் ஹெலிகாப்டர்களுக்குப் பயந்து சிதறிய படைகளின் ஆயுதங்களைப் பொறுக்கி கொல்லைப்புறங்களில் புதைத்தபோதும் யார் பணத்தை யார் புதைப்பதென்று கூச்சமாயிருந்திருக்கும். திரும்பவும் விடிய முன்னரைப் போல வேறொரு ஆள் ஆயுதத்தோடு முன்னே செல்ல அதே எறும்புவரிசை கால்கள் விறைத்தபடி முன்னேறின. புதிய ஆள் சாரத்தை தூக்கி கட்டியிருந்தான். அவன் கெண்டைச்சதையில் ஒரு துண்டு இருக்கவில்லை. அவன் கால்களை இழுத்து இழுத்து நடந்தாலும் இதுவரை முன்னே வழித்துணையாக வந்தவர்களில் அவனே வேகமாக நடந்தான். பனை வடலிகளும் வேப்பம் பற்றைகளும் கள்ளிச்செடிகளும் குளக்கரைகளும் கண்ணிவெடி புதைக்கப்பட்ட முட்புதர்கள் மண்டிய நீரேரிகளுமென அவர்கள் நிற்காமல் கடக்கவேண்டியிருந்தது. இரண்டு நாட்கள் நீண்ட பயணத்தில் கால்கள் நடுங்கி அந்த உதறல் தலை வரை எழும்பியிருந்தது. இன்னும் சில மைல்களில் இராணுவ முகாம் வந்துவிடுமென்பதால் அந்த ஆளிடம் அவர்கள் விடைபெறவேண்டியிருந்தது. “நாங்கள் தான் சண்டையெண்டு அழியிறம். நீங்களாவது படியுங்கோடா…”. திரும்பிப்பார்க்காத அந்த இழுவைக்கால்கள் துப்பாக்கியோடு சாரத்தை உயர்த்திய ஆளை மறைத்துவிடும் படி விரைவாக நடந்திருந்தன. அங்கிருந்து நடந்து வந்து வழக்கமான சோதனைச்சாவடிகள் பலவற்றை தாண்டி ஒரு மரக்கறி லாரியில் பத்து பேரும் மொத்தமாக ஏறியிருந்தனர். அதற்குப் பிறகு அநுராதபுரம் வரை அவர்களை ஏற்றியபடியால் அவர்களையும் லாரியையும் வழக்கத்திற்கு மேலதிகமாகச் சோதனை செய்தனர். லாரி ட்ரைவரை கடைசியாக அனுராதபுரத்தில் வழியனுப்பியபோது அதில் ஓரிருவர் அழுதேவிட்டனர். கருணை என்பது குப்பிவிளக்கின் சுடர் போலச் சினுங்காமல் எங்காவது ஒரு மூலையில் எரிந்து கொண்டிருப்பது தான். 000000000000000000000000000 கண்டி முஸ்லிம் ஹோட்டலில் நூற்றியெட்டாம் அறையில் அவர்கள் தங்கியிருந்தனர். பலநாள் கழித்து ஒரு உற்சாகம் தேறியிருந்தது. அது கண்டி பெரஹர காலம் என்பதால் ஊர்வலம் போகும் வீதிகள் மின்விளக்கு சோடனையில் கிறக்கமாயிருந்தன. அலங்காரப்பந்தல்களும் தென்னோலைத் தோரணங்களும் சந்திக்குச் சந்தி வைக்கப்பட்டு பார்வையாளர் நிற்கும் இடங்களில் கயிறுகள் பின்னப்பட்டிருந்தன. அரச பௌத்த உற்சவமென்பதால் தலதா மாளிகையையும் அதனைச் சுற்றிய இடங்களிலும் பாதுகாப்பு பலப்படுத்தப்பட்டிருந்தது. திறந்த ஜன்னலிருந்து அடிக்கும் குளிர் காற்றை முகரவெனத் தலைகள் எட்டிப் பார்த்தபடியிருந்தன. விடிந்தால் ஊருக்குப் போகமுடியும் என்கிற சுலபமான வாயிலைக் குளிர்ந்த நம்பிக்கையை அவர்கள் அடிக்கடி திறந்து பார்த்துக்கொண்டிருந்தனர். உதறி நடுங்கும் கால்களை ஆறப்போட்டுத் தொடைகளை நீவி நீண்டு படுத்திருந்தனர். கண்கள் மட்டும் வீடுவரை நீண்டிருந்தன. ஒரு வழி போலச் செம்மையாக ஒரு பளிங்கு போல அதைவிடச்செம்மையாக நாளையை அவர்கள் எதிர்பார்த்திருந்தனர். கதவு படாரென்று திறந்து இரண்டு துண்டுகளாகப் பறந்து விழச் சில கொமாண்டோக்கள் ஆயுதங்களோடு உள்ளே திடுதிப்பென்று பாய்ந்தனர். இருண்ட சீலைகளை தலையில் கட்டி கறுப்பு நிறத்தை முகத்தில் பூசியிருந்தனர். “வேச மவனுகளா…”. ஆடை கழட்டப்பட்டு எல்லோரும் நிர்வாணமாக்கப்பட்டனர். சுன்னத் செய்யப்பட்ட குறிகளைக் கண்டதும் அவர்களின் தீவிரம் தணிந்திருந்தது. ஆண்குறி மையவாதம் இங்கே மட்டும் உயிர்ப்பிச்சை அளித்திருந்தது. இப்படித்தான் எல்லாச் சோதனைச்சாவடி களிலும் அறுக்கப்பட்ட குறிகளுக்கு மரியாதை இருந்தது. நீண்ட நாட்கள் வெயிலில் கிடந்த கருமையும் அழுக்கும் பெரிய முடிச்சுகளைப் போலவிருந்த பைகளின் நடமாட்டமும் புலனாய்வுத்துறையின் காதுகளைச் சீவியிருக்க வேண்டும். பெரஹர உற்சவத்திற்கு குண்டடிக்கும் புலிகளோவென அவர்கள் சந்தேகப்பட்டிருக்க வேண்டும். நீண்ட சோதனையின் பின்னர் அவர்கள் ஆடை அணிய அனுமதிக்கப்பட்டனர். “படிக்க…?”. “யாழ்ப்பாணத்திற்கு..?”. சிப்பாய்கள் ஆச்சரியப்பட்டனர். பயத்தில் சிலருக்கு மூத்திரம் கொதித்தபடி வந்திருந்தது. இப்போது மூடிய ஜன்னல், உடைந்த கதவோடு டிக் டிக் சத்தம், ஆஸ்த்துமா இளைச்சலோடும் மூத்திர நெடியோடும் அவர்கள் படுத்திருந்தனர். அந்தக் குளிரிலும் வியர்த்த பிசுபிசுப்பு தரையில் அங்கங்களை ஒட்டிக் கிடக்கச்செய்தது. மறுநாள் ஐந்து மணிக்கு அக்கறைப்பற்று பஸ்ஸை பிடிப்பது வரை அவர்களின் உதறல் நிற்கவே இல்லை. சப்னாஸ் ஹாசிம்-இலங்கை   https://naduweb.com/?p=17718
    • ஐ.எம்.எவ் கடன்: மூன்றாமுலகக் கடன் பற்றிய கதைகள் தெ. ஞாலசீர்த்தி மீநிலங்கோ     இலங்கையின் பொருளாதார நெருக்கடியை, இன்னும் கடனை வாங்குவதன் மூலம் தீர்த்து விடலாம் என்று பலரும் நம்புகிறார்கள்.  இலங்கையின் பொருளாதார நெருக்கடி, இரண்டு விடயங்களை அடிப்படையாகக் கொண்டது. முதலாவது, பொருளாதாரக் கொள்கை; இரண்டாவது, அதன்வழியமைந்த பொருளாதாரக் கட்டமைப்பு.  இவை இரண்டிலும், அடிப்படையான மாற்றங்களைச் செய்யாத வரை, இலங்கையின் பொருளாதார நெருக்கடிக்குத் தீர்வில்லை. கடன் வாங்குவது, தற்காலிகமான ஆறுதலைத் தரும். ஆனால், வாங்கிய கடனையும் அதற்கான வட்டியையும் சேர்த்தே மீளச்செலுத்த வேண்டும் என்பதே யதார்த்தம்.  இன்று தனிமனிதர்கள் வாழ்வில், நிதிநிறுவனங்கள் எவ்வாறு செயற்படுகின்றன என்பதை ஆழமாக யோசித்தால், செயற்பாட்டில் சர்வதேச நிதி நிறுவனங்கள் கொஞ்சமும் சளைத்தவையல்ல என்பது புலனாகும். ஐ.எம்.எவ், ஒரு கந்துவட்டிக்காரனுக்கு எவ்வகையிலும் சளைத்ததல்ல.  இன்று உலகெங்கும், மூன்றாமுலக நாடுகள் கடனில் அகப்பட்டுள்ளன. இயற்கை வளங்களும் மனித வளமும் கொண்ட இந்நாடுகள், ஏன் கடனாளியாகின என்ற கேள்வி, பெரும்பாலும் கேட்கப்படுவதில்லை.  மாறாக, கடன் என்பது சமூக அசைவியக்கத்தின் ஒரு பகுதியாக மாற்றப்பட்டுள்ளது. கடன் வாங்குவதை ஊக்குவிப்பதே, இன்றைய பொருளாதார முறையின் முக்கியமான அம்சமாக உள்ளது. இது கடன் வாங்காத ஒருவரை விட, கடன் வாங்கித் தட்டுத்தடுமாறி மீளச்செலுத்துகின்ற ஒருவரை, நம்பிக்கையானவராகப் பார்க்கிறது.  ஒருவரைத் தொடர்ச்சியாகக் கடனுக்குள் வைத்திருப்பதை, நிதிநிறுவனங்களும் அரசும் உறுதி செய்கின்றன. இதனால் கடனுக்கான வட்டி என்பது, மிகப்பெரிய இலாபமாகிறது. எனவே, இந்த விஷச் சுழலில் மக்களைச் சிக்கவைப்பதில், இந்தப் பொருளாதார முறை வெற்றிகண்டுள்ளது. இதன் நீட்சியே, சர்வதேச நிதி நிறுவனங்கள் ஆகும். கடந்தாண்டு தொடக்கத்தில், கொரோனா தொற்றுக்கு முன்வரை, மூன்றாமுலக நாடுகளின் வெளியகக் கடனின் மொத்தத்தொகை அண்ணளவாக 11 ரில்லியன் அமெரிக்க டொலராகும். பெருந்தொற்றும் விலைவாசி ஏற்றமும் காலநிலை மாற்றமும், இந்தத் தொகையைக் கடந்த ஒன்றரை ஆண்டுகளில் பலமடங்கு அதிகரித்துள்ளன. ஆனால், இதற்கு முன்னர், இவ்வளவு கடனுக்கு இந்நாடுகள் எவ்வாறு ஆளாகின என்ற கதையைப் பார்க்க வேண்டியுள்ளது.  நாடுகளின் வளர்ச்சி மாதிரிகளும் அவை மேற்கொண்ட பொருளாதாரச் சமூகத் தேர்வுகளுமே, மூன்றாமுலக நாடுகளின் கடன்களுக்கான பிரதான காரணமாகும். மூன்றாமுலக நாடொன்றின் தேசிய கடன், எவ்வாறு மிகப்பெரிய சிக்கலாக உருவெடுத்து, அந்நாட்டை வங்குரோத்து நிலைக்குக் கொண்டு செல்கிறது என்பது புதிர்போல் தோன்றினாலும், அதுதான் கடந்த பல தசாப்தங்களாக மூன்றாமுலக நாடுகளின் கதையாக உள்ளது.  இரண்டாம் உலகப் போருக்குப் பிந்தைய காலத்தில் தோற்றம்பெற்ற தாராளவாதமும் உலகமயமாக்கலும், அரசின் வகிபாகத்தைக் குறைப்பதை நோக்காகக் கொண்டிருந்தன. சோசலிச அரசுகளில் ஆழமாக ஊன்றியிருந்த ‘சமூக நல அரசுகள்’ என்ற கருத்தாக்கத்துக்கு மாறாக, திறந்த சந்தையையும் அரசுகளின் கட்டுப்பாடற்ற நிலையையும் முன்னிறுத்தின. இதன் ஒரு பகுதியாக, ‘வளர்ச்சி’ என்பது பரிந்துரைக்கப்பட்டது. அதேபோல, உலகமயமாக்கல் நுகர்வைப் பிரதானமாக்கியது.   கொலனியாதிக்கத்துக்குப் பிந்தைய அரசுகள், இக்கொள்கைகளை நடைமுறைப்படுத்தத் தொடங்கின. இதன் விளைவால், ‘வளர்ச்சி’ பற்றிய தவறான புதிதலுக்கு ஆளாகின. வளர்ச்சி என்பது எதற்கானது, யாருக்கானது ஆகிய கேள்விகள் கேட்கப்படவேயில்லை.  காலப்போக்கில் இது, ‘நவீனமயமாதல்’ என்ற புதிய பெயரைச் சூடிக் கொண்டது. மூன்றாமுலக நாடுகள், இந்தக் கவர்ச்சிகரமான சொல்லாடலில் வீழ்ந்தன. தங்கள் பொருளாதாரத்தின் அடிப்படைகளை, மாற்றிக் கொள்ளத் துணிந்தன. விவசாயத்தை மையமாகக் கொண்ட நாடுகள், தொழில்மயமாகின; தொழில்மயமான நாடுகள், சேவைமயமாகின. இவ்வாறு, தங்களின் பொருளாதார பலங்களில் இருந்து விடுபட்டு, புதியவகை பொருளாதார அடிப்படைகளை நோக்கி அவை நகர்ந்தன. இதனால், அவர்களின் பொருளாதார பலம் கேள்விக்குள்ளானது. எனவே, ‘நவீனமயமாகுவதற்காக’ சர்வதேச நிதி நிறுவனங்களின் கடன் பொறிக்குள் அகப்பட்டுக் கொண்டன.   இதன் தொடர்ச்சியாக, வட்டியுடன் கடனை மீளச் செலுத்துவது என்ற நிதி நிறுவனத்தின் நிகழ்ச்சி நிரலுக்குள், இந்த நாடுகள் ஆட்பட்டன. அரச நிறுவனங்களை ‘மீள்கட்டமைப்பு’ செய்வதும் ‘சீர்திருத்தங்களை’ மேற்கொள்வதும் இதன் பகுதியாகின. இவற்றின் மோசமான பலன்களை அனுபவிப்பது, இந்நாடுகளில் உள்ள ஏழை மக்களாவர்.  வளர்ச்சிக்காக வாங்கப்படும் கடனில் பெரும்பகுதி, ஆட்சியாளர்களின் தனிப்பட்ட வங்கிக் கணக்குகளை நிரப்பும். எனவே, திட்டமிட்ட திட்டத்துக்குரிய பணம் அரசிடம் இருப்பதில்லை. பின்னர், அக்கடனைத் திருப்பிச் செலுத்த புதிய கடனை நாடுகள் வாங்கும்; அவையும் ஆட்சியாளர்களின் தனிப்பட்ட கஜனாக்களை நிரப்பும். அதன் பின்னர் வாங்கிய கடனுக்கான வட்டியைச் செலுத்துவதற்கு, புதிய கடன்கள் வாங்கப்படும். இது ஒரு முடிவற்ற தொடராக விரியும். 1980களில் பிலிப்பைன்ஸ், நிக்கரகுவா, ஆர்ஜென்டீனா போன்ற ஏராளமான நாடுகளின் கதை இதுதான்.  1970களின் இறுதிப்பகுதியில், சிலியில் செப்புச் சுரங்கங்களின் வருமானம் உப்பிப்பெருத்த பொருளாதாரமாக உருமாறியது. சிலியின் நாணயத்தின் (பெசோ) பெறுமதி, திட்டமிட்டு வலுவானதாகக் காட்டப்பட்டது. அமெரிக்க டொலருக்கு எதிரான பெசோவின் பெறுமதி உயர்வாக, இதனால் இறக்குமதி செய்வது மலிவானது போன்றதொரு தோற்றம் உருவாகியது.  இதனால் சிலியின் மத்தியதர வர்க்கம், அளவற்ற நுகர்வில் இறங்கியது. பொருளாதாரம் சில ஆண்டுகளில் இறக்குமதியில் நம்பியிருக்குமாறு மாறியது. இதனால், உள்ளூர் உற்பத்தியாளர்கள் பாதிக்கப்பட்டனர். மெதுமெதுவாக, இறக்குமதிக்குக் கடன் வாங்கும் நிலைக்கு, சிலி தள்ளப்பட்டது.  உள்ளூர் உற்பத்தியாளர்கள் தொழிலற்றவர்களாகினர். ஏற்றுமதி அதிகரிக்காத நிலையில், இறக்குமதி பலமடங்கு அதிகரித்தது. இதனால் தொடர்ந்தும் கடன்வாங்க வேண்டிய நிலைக்கு சிலி ஆளாகியது. அப்போது, சர்வதேச நாணய நிதியம் உதவிக்கு வந்தது.  இதன் இன்னொரு வடிவம், நிக்கரகுவாவில் அரங்கேறியது. 1970களில் ஆட்சியில் இருந்த ‘சமோசா’ குடும்பத்தினர் சுருட்டிய பணம் அளவில்லாதது. 1972ஆம் ஆண்டு, நிக்கரகுவாவில் ஏற்பட்ட நிலநடுக்கத்துக்குக் கொடுக்கப்பட்ட அனைத்து உதவித்தொகைகளையும் இக்குடும்பம் சுருட்டிக்கொண்டது.  1979ஆம் ஆண்டு, ‘சண்டனிஸ்டா’ புரட்சியாளர்கள், இவர்களைத் துரத்தும்வரை இக்குடும்பம் ஆட்சியில் இருந்தது. இவர்கள் துரத்தப்படும் போது, அரசாங்கக் கையிருப்பு  300 மில்லியன் அமெரிக்க டொலர் மட்டுமே! ஆனால், மொத்தக் கடன் 4,000 மில்லியன் அமெரிக்க டொலராகும். 1980களில் பிலிப்பைன்சில், மார்க்கோசின் ஊழல்களும் சுரண்டல்களும் உலகறிந்த விடயங்கள். 1986இல் பிலிப்பைன்சின் மொத்தக் கடன் 26,000 மில்லியன் டொலர். இதில் 15 சதவீதமானவை, மார்க்கோசின் மனைவி இமெல்லாடவின் ஆடம்பரச் செலவுக்கானவை.  இன்னொருபுறம், பிலிப்பைன்ஸ் அணுசக்தித் திட்டமொன்றைத் தொடங்கியது. இதற்காக வாங்கப்பட்ட கடனுக்கு கொடுக்கப்பட்ட ஒருநாள் வட்டி 3,50,000 அமெரிக்க டொலர் ஆகும். இவ்வட்டி 1989ஆம் ஆண்டு 5,00,000 ஆக உயர்ந்தது. வாங்கிய கடன் மார்க்கோசினால் சுருட்டப்பட்டது.  இதேபோலவே, இன்னும் பல மூன்றாமுலக நாடுகளில் வாங்கப்படும் கடன், ஆட்சியாளர்களால் சுருட்டப்படுகிறது. 1979 முதல் 1983 வரையான நான்கு ஆண்டு காலத்தில் மெக்சிக்கோவிலிருந்து வெளியேறிய மொத்தப் பணம் 9,000 பில்லியன் அமெரிக்க டொலராகும். ஆனால், மெக்சிக்கோ கடனில் தத்தளித்தது. கடனை அடைக்க மேலும் கடன் வாங்கிய வண்ணம் இருந்தது.  ஆர்ஜென்டீனாவில் இராணுவ சர்வாதிகார ஆட்சி நடைபெற்ற வேளை, பெரும்பாலான கடன் இராணுவச் செலவீனங்களுக்காகவே பயன்படுத்தப்பட்டது. பெருவின் கதையும் இதுதான். எனவே, மூன்றாமுலக நாடுகள் எவ்வாறு கடனாளியாகின்றன என்பதற்கான ஒரு குறுக்குவெட்டுச் சித்திரமே, மேற்சொன்ன உதாரணங்கள் ஆகும். இதன் பின்னணியில், கடன் வழங்குனர்களாக உள்நுழையும் சர்வதேச நிதி நிறுவனங்கள் குறிப்பாக, சர்வதேச நாணய நிதியம் நிபந்தனைகளுடன் கடன்களை வழங்குகின்றது. அந்நிபந்தனைகளாக, அரச சேவைகளைத் தனியார்மயமாக்கல், சமூகநலன்களைக் குறைத்தல், தனியார்துறைக்கு வரி குறைப்பு, வரிச்சலுகைகளை அறிமுகப்படுத்தல் போன்றவற்றை வேண்டுகிறது.  மூன்றாம் உலக நாடுகளின் அரசுகள், பெருவாரியான தருணங்களில் சமூகப் பாதுகாப்பினது காவலனும் அத்தியாவசிய சேவைகளை வழங்குவோனும் என்ற தனது வகிபாகத்தில் தவறி விட்டன. இதற்கு மூன்றாமுலகக் கடன் மிகவும் முக்கியமான காரணியாகும்.  மேற்சொன்ன கதைகள், பல வகைகளில் இலங்கையைப் பிரதிபலிக்கின்றன. இவ்வாறான கடன்கள் மூலம், ஏற்கெனவே மக்கள் அனுபவித்து வந்த சமூகப் பாதுகாப்புகளை, சர்வதேச நாணய நிதியத்தின் கடன்கள் மூலம், இலங்கையர்கள் இழந்து விட்டார்கள்.  இலங்கை சர்வதேச நாணய நிதியத்திடம் கையேந்திக் கடன்வாங்கிய ஒவ்வொரு தடவையும் அதற்குப் பாரிய விலையை இலங்கை கொடுத்துள்ளது. எம்மிடம் எஞ்சியிருப்பது, இலவசக் கல்வியும் இலவச மருத்துவமும் தான். அதையும் நாம் தனியாரிடம் கையளிக்கும் நாள் தூரத்தில் இல்லை. அதைச் சாத்தியமாக்கவே ஐ.எம்.எவ் கடனை இலங்கை பெறவேண்டும் என்று வற்புறுத்துவோர் நினைக்கிறார்கள். மறைமுகமாக,  இலங்கையின் ஏழைக் குடிமகனை, சுடுகாட்டுக்குச் கூட்டிச் செல்லும் வழியையே காட்ட முனைகிறார்கள்.       https://www.tamilmirror.lk/சிறப்பு-கட்டுரைகள்/ஐ-எம்-எவ்-கடன்-மூன்றாமுலகக்-கடன்-பற்றிய-கதைகள்/91-283722
    • பங்களாதேஷுக்கு பாடம் கற்பித்த இலங்கை பங்களாதேஷ் அணிக்கு நல்ல பாடம் கற்பித்த இலங்கை துடுப்பாட வீரர்கள் இலக்கை துரத்தும்போது, 7 பந்துகள் மீதமிருந்த நிலையில் 172 என்ற இலக்கை விரட்டினர்.  பங்களாதேஷுக்கு எதிரான டி-20 உலகக் கிண்ண போட்டியில் இதுவரை தோல்வியை சந்திக்காத இலங்கை அணி, நேற்றைய ஆட்டத்திலும் வெற்றி பெற்று 100 சதவீதத்தை தக்க வைத்துள்ளது. நேற்யை தினம் தனது 5 ஆவது டி-20 போட்டியில் விளையாடிய அசலங்க, தனது முதல் அரை சதம் அடித்து பங்களாதேஷுக்கு மிகப்பெரிய தலைவலியாக மாறினார்.  இந்த இன்னிங்ஸிற்காக அசலங்க ஆட்ட நாயகன் விருதையும் வென்றார். குசல் பெரேரா ஆட்டமிழந்ததால் முதல் ஓவரில் பேட்டிங் செய்ய வந்த 24 வயதான இடது கை ஆட்டக்காரரான அசலங்க, இரண்டாவது ஓவரில் ஹசனின் நான்காவது பந்தில் பவுண்டரி அடித்து இன்னிங்ஸைத் தொடங்கினார்.  அதன் பின்னர் அவரின் தொடர்ச்சியான அதிரடிகளின் விளைவாக பவர் - ப்ளேயில் 6 ஓவர்களில் 1 விக்கெட் இழப்புக்கு 54 ஓட்டங்களை எடுத்தது இலங்கை. 8.1 ஆவது ஓவரில் பதும் நிஷாங்க 24 ஓட்டங்களுடன் ஆட்டமிழந்து வெளியேற, அடுத்தடுத்து வந்த அவிஷ்க பெர்னாண்டோ டக்கவுட்டுடனும், வனிந்து ஹசரங்க 6 ஓட்டங்களுடனும் ஆட்டமிழந்தனர். இதனால் 79 ஓட்டங்களுக்கு இலங்கையின் நான்கு விக்கெட்டுகள் வீழ்த்தப்பட்டது. அதன் பின்னர் பானுக ராஜபக்ஷ களமிறங்கினார். அசலங்காவின் வேகமான இன்னிங்ஸால் அதிரடியை ஆரம்பிக்காத பானுக முதல் 9 பந்துகளில் 6 ஓட்டங்களை மாத்திரமே எடுத்தார். தொடர்ந்து பானுகாவின் முதல் சிக்ஸர் அஃபிஃப் ஹொசைனின் சுழற்பந்து பந்தில் பெறப்பட்டது, அதையடுத்து இலங்கையின் அதிரடி ஆட்டம் சார்ஜாவில் நிலை கொண்டது. இலங்கைக்கு கடைசி 8 ஓவர்களில் 82 ஓட்டங்கள் தேவைப்பட்ட நிலையில், அசலங்கா மற்றும் பானுகா மஹ்முதுல்லா வீசிய 14 ஆவது ஓவரில் 16 ஓட்டங்களையும், சஃபுதீன் வீசிய 16 ஆவது ஓவரில் 22 ஓட்டங்களையும் பெற்று நெருக்கடியிலிருந்து விடுபட்டனர். பானுகாவின் பெயருக்கு முன்னதாக 53 ரன்கள் இன்னிங்ஸில், அவர் 31 பந்துகளை எதிர்கொண்டார், மூன்று சிக்ஸர்கள் மற்றும் 3 பவுண்டரிகள் அடித்தார்.  வெற்றியின் தருவாயில் தனது 30 ஆவது பிறந்த தினத்தை அரை சதத்தை குவித்த பானுக மொத்தமாக 31 பந்துகளில் 3 சிக்ஸர்கள், 3 பவுண்டரிகளுடன் ஆட்டமிழந்தார். இறுதியாக அணித் தலைவர் தசூன் சானக்க களமிறங்கி துடுப்பெடுத்தாட ஆரம்பிக்க 18.5 ஆவது பந்துப் பரிமாற்றத்தில் மேலும் ஒரு பவுண்டரியுடன் வெற்றியை பறை சாற்றினார் அசலங்க. இறுதிவரை ஆட்டமிழக்காதிருந்த அவர் 49 பந்துகளில் 80 ஓட்டங்களை குவித்தார்.   போட்டியின் சிறம்பம்சங்கள் துஷ்மந்த சமீர ஒரு மணி நேரத்திற்கு 150 கி.மீ வேகத்தில் பந்துப் பறிமாற்றம் மேற்கொண்டமை ஒரு சிறப்பான விடயமாகும். இன்னிங்ஸின் தொடக்கத்தில் லிட்டன் தாஸை எதிர்த்த லஹிரு குமாரவின் திறமை மைதானத்தில் சற்று சூடுபிடித்தது. ஆனால் வீரர்களின் தலையீட்டினால் அது சரி செய்யப்பட்டது, லஹிருவின் பந்து வீச்சில் தாஸ் விக்கெட்டை இழந்தார்.  நான்கு முக்கிய வேகப்பந்து வீச்சாளர்களுடன் இலங்கை இன்னிங்ஸ் நுழைந்ததால் மகேஷ் தீக்ஷனாவுக்கு இந்த போட்டியில் ஓய்வு அளிக்கப்பட்டது.  தீக்ஷனாவுக்கு பதிலாக பினுரா பெர்னாண்டோ உள்ளீர்க்கப்பட்டார்.      https://www.virakesari.lk/article/115945
    • இந்தியாவை 10 விக்கெட்டுகளால் அபார வெற்றிகொண்டு பழிதீர்த்தது பாகிஸ்தான் இருபதுக்கு - 20 உலகக்கிண்ண சுப்பர் 12 சுற்றின் பரபரப்பான போட்டியில் இந்தியா மற்றும் பாகிஸ்தான் அணிகள் நேற்று மோதின. இந்தியாவுக்கு எதிரான போட்டியில் பொறுப்புடன் ஆடிய பாகிஸ்தானின் பாபர் அசாம் மற்றும் மொஹமட் ரிஸ்வான் ஜோடி 151 என்ற வெற்றி இலக்கை இணைப்பாட்டமாக பெற்றுக்கொடுத்து பாகிஸ்தானுக்கு வரலாற்று வெற்றியை பெற்றுக்கொடுத்தது. இரு அணிகளுக்கும் இடையிலான போட்டி நேற்று இரவு டுபாயில் இடம்பெற்றது. இப்போட்டியில் நாணயச்சுழற்சியில் வெற்றிபெற்ற பாகிஸ்தான் அணி இந்திய அணியை முதலில் துடுப்பெடுத்தாடுமாறு பணித்தது. அதன்படி முதலில் துடுப்பெடுத்தாடிய இந்திய அணி ஆரம்பத்தில் சற்று தடுமாறியது. விராட் கோலி, ரிஷப் பண்ட் இருவரும் நிதானமாக ஆடினர். ரிஷப் பண்ட் 39 ஓட்டங்களுடன் ஆட்டமிழந்து வெளியேறினார். நிதானத்துடனும் பொறுப்புடனும் ஆடிய அணித்தலைவர் விராட் கோலி 57 ஓட்டங்களை பெற்று ஆட்டமிழந்தார். இறுதியில், இந்தியா அணி 20 ஓவர் நிறைவில் 7 விக்கெட் இழப்பிற்கு 151 ஓட்டங்களை பெற்றது. பாகிஸ்தான் சார்பில் ஷாகீன் அப்ரிடி 3 விக்கெட்டுகளையும் ஹசன் அலி 2 விக்கெட்டுகளையும் எடுத்தனர். இதையடுத்து, 152 ஓட்டங்கள் எடுத்தால் வெற்றி என்ற இலக்குடன் பாகிஸ்தான் களமிறங்கியது. அந்த அணியின் ஆரம்ப ஆட்டக்காரர்களாக பாபர் அசாம், மொகமது ரிஸ்வான் இறங்கினர். ஆரம்பத்தில் இருந்தே இருவரும் நிதான ஆட்டத்தை வெளிப்படுத்தினர். கிடைத்த பந்துகளை சிக்சர், பவுண்டரிகளாக விரட்டியடித்தனர். இருவரும் அரை சதமடித்து இந்திய அணியின் பந்து வீச்சாளர்களுக்கு சிம்மசொப்பனமாக திகழ்ந்தனர். இருவரையும் ஆட்டமிழக்கச் செய்வதற்கு இந்திய அணி பல வியூகங்களையும் வகுத்த போதிலும் அவை கைகூடவில்லை. இறுதியில், பாகிஸ்தான் அணி 10 விக்கெட் வித்தியாசத்தில் வரலாற்று வெற்றி பெற்றது.  இப்போட்டியில் பாகிஸ்தானின் ஷாகீன் அப்ரிடி ஆட்டநாயகனாக தெரிவு செய்யப்பட்டார்.   https://www.virakesari.lk/article/115938
    • அமெரிக்காவில் தடுப்பூசி ஏற்றாத மருத்துவ ஊழியர்கள் பணி நீக்கம் ம.ரூபன். உலகில் 2020 ஜனவரி-2021 மே வரை கொவிட் நோயால் 80 ஆயிரம் முதல் ஒரு இலட்சத்து 80 ஆயிரம் மருத்துவத்துறை  ஊழியர்கள் மரணமானதாக உலக சுகாதார ஸ்தாபனம் (WHO) தெரிவித்துள்ளது. ஐரோப்பிய நாடுகளில் குறையும்போது தற்போது ரஷ்யாவில் தொற்று அதிகரித்துள்ளது. இந்நோய் பரவ காரணமான சீனாவில்  மீண்டும் தொற்று கூடியுள்ளது. அமெரிக்காவில்  மக்கள் ஆர்வத்துடன் தடுப்பூசி மருந்தை ஏற்றிக்கொள்கிறார்கள். எனினும் சில இடங்களில் கோவிட் தொற்றால் பலர் மரணமடைகின்றனர். கொரோனா ஆட்கொல்லி நோய் அமெரிக்காவிலேயே பல இலட்சம் பேரை காவு கொண்டு பொருளாதாரத்தையும் பாதித்து யுத்த கால சூழலைப்போல மக்களின் வாழ்க்கை காணப்பட்டது. ஜனாதிபதி தேர்தலில் ட்ரம்பின் தோல்விக்கும்,பைடனின் வெற்றிக்கும் இதுவும் காரணம் பைடன் ஜனாதிபதியாக பதவிக்கு வந்ததும் தடுப்பு மருந்தை சகலரும் பெறுவதற்கு உடன் நடவடிக்கை எடுத்து, சகலரும் தடுப்பூசியை ஆர்வத்துடன் ஏற்றி வருகின்றனர். இந்நோய் தொற்றும் குறைந்து வரும்போது மருத்துவத்துறையில் சில ஊழியர்கள் தடுப்பூசியை ஏற்றிக்கொள்ள மறுத்து வருகின்றனர். பாதுகாப்பாக சிறுவர்கள் முதல் சகலரும் முக்கவசம் (Mask) அணிந்து சமூக இடைவெளியை பேணுகின்றனர். வர்த்தகநிலையங்கள்,உணவகங்கள், தேவாலங்கள், அலுவலகங்கள் மக்கள் அதிகமாக கூடும் இடங்களில் மாஸ்க் கட்டாயம் என அறிவித்தல்கள் உள்ளன. அமெரிக்காவுக்கு 33 நாடுகளின் பயணத்தடை நவம்பர் 8 நீக்கப்படவுள்ளதுடன்  72 மணி நேரத்திற்கு முன்னர் பயணிகள் தடுப்பூசியை ஏற்றியிருக்க வேண்டும் என்ற நிபந்தனை விதிக்கப்பட்டுள்ளது. இந்த நிலைமையில் நியூயோர்கில் (Northwell Health ) என்ற மிகப்பெரிய  தனியார் வைத்தியசாலையில் பணிபுரியும் 1,400 ஊழயர்கள் கொவிட்-19 தடுப்பு மருந்தை ஏற்ற மறுத்ததால் ஒக்டோபர் 6  பணிநீக்கப்பட்டனர். உலகில் எந்தவோரு நாடும் இதேபோல வேலை நீக்கும் நடவடிக்கையை மருத்து வத்துறை ஊழியர்களுக்கு எதிராக எடுத்திருக்காது. நியூயோர்க்கின் வைத்தியசாலைகளில் பணிபுரியும் 92 வீதமான 450,000 ஊழியர்கள் தடுப்பூசியை ஏற்றிக்கொண்டதாக சுகாதாரப்பிரிவு கூறியுள்ளது. Presbyterian Hospital  இல் 250 ஊழியர்களும், மேற்கு வேர்ஜினியாவில் இரு பெண் ஊழியர்களும் ஒக்டோபர் 22 இல் நீக்கப்பட்டனர்.(KAISER PERMANENT) என்ற மிகப்பெரிய சுகாதார பராமரிப்பு நிறுவனத்தில் 2,200 ஊழியர்கள் தடுப்பூசியை ஏற்றிக்கொள்ள டிசம்பர் 31 வரை கால அவகாசம் வழங்கப்பட்டுள்ளது. செப்டம்பருக்குள் நியூயோர்க் (State) மாநில வைத்தியசாலைகளின் சகல ஊழியர்களும் கொவிட்- 19 தடுப்பூசியை கட்டாயம் எற்றிக்கொள்ள்வேண்டும் என  ஆளுநர் (Governor) அன்ட்ரூ கியூமோ உத்தரவிட்டிருந்தார். நியூயோர்க் நகரில் தடுப்பூசி ஏற்றாத 500 தாதிமாருக்கு  சம்பளமற்ற லீவு வழங்கப்பட்டது. ஹூஸ்டன் மெதடிஸ்ட் வைத்தியசாலையில் (Houston Methodist Hospital)  தாதிமார் தடுப்பூசி  உத்தரவை எதிர்த்து ஆர்ப்பாட்டம் செய்தனர். 26 தாதிகள் உட்பட 153 ஊழியர்கள் மருந்தை ஏற்ற மறுத்து நீக்கப்பட்டனர். இங்கு பணிபுரியும் 117 பேர் தடுப்பு மருந்தை ஏற்றும் உத்தரவுக்கு எதிராக  வழக்கு தாக்கல் செய்துள்ளனர். கொலராடா கனியன்ஸ் வைத்தியசாலையில் (Colorada Canyons Hospital)-ஒரு தாதி நீக்கப்பட்டார். ஒகியோவில் "மாஸ்க்"அணிதல், தடுப்பூசி ஏற்றும் உத்தரவை  எதிர்த்து சிலர் வீதியில் போராட்டம் செய்தனர். நியூயோர்க்-ஸ்ரேற்றன் ஐலன்ட் பல்கலைக்கழ வைத்தியசாலைக்கு முன்பாகவும்  கடந்த ஆகஸ்ட் மாதம் தடுப்பூசிக்கு எதிராக சிலர் ஆர்ப்பாட்டம் செய்தனர். தாதி ஒருவர் தடுப்பூசி ஏற்றி ஒவ்வாமையால் மயக்கமானதால், இவர்கள் தடுப்பூசியை ஏற்ற மறுப்பதாகவும் கூறப்படுகிறது.கொவிட்-19 சிகிச்சைக்கான பணிகளில் மருத்துவர்கள்,தாதியர்கள்,ஏனைய தரத்திலான ஊழியர்களும் தினமும் ஈடுபடுவதால் அவர்களின் குடும்பத்தினர்,சூழவுள்ளோர்  பாதுகாப்பு கருதி தடுப்பூசியை ஏற்றுவது மிகவும் அத்தியாவசியமானது என்று  (Northwell Health)  அதிகாரி பார்பரா ஒஸ்போர்ன் கூறியுள்ளார். வட கரோலினா மாநிலத்தில் 15 வைத்தியசாலைகளில் 35 ஆயிரம் ஊழியர்களில் தடுப்பூசி ஏற்றாத 175 பேர் நீக்கப்பட்டனர்.சிலர் தற்காலிகமாக நீக்கப்பட்டு  தடுப்பூசி ஏற்ற கால அவகாசமும் அளிக்கப்பட்டது.லொஸ் ஏஞ்சலில் தடுப்பூசி போடாத ஊழியர்களுக்கு ஒக்டோபர் வரை அவகாசம் வழங் கப்பட்டது. பல வைத்தியசாலைகளில் கொவிட்  அச்சம் காரணமாக  சில ஊழியர்கள் சமூகமளிக்காததால் புதியவர்கள் நியமிக்கப்படுவதைப்போலவே வேலை நீக்கம் செய்யப்பட்டவர்களின் இடங்களுக்கும் புதிய நியமனங்கள் மேற்கொள்ளப்படுகிறது. அல்பனி மருத்துவ நிலையத்தில் (Albany Medical Center) இல் தடுப்பூசி மருந்தை ஏற்றாத 204 ஊழியர்கள் தற்காலிகமாக நீக்கப்பட்டுள்ளனர். இதேவேளை நியுயோர்க்கின் சில ஆசிரியர்களும்,கல்வித்துறை ஊழியர்களும் கோவிட்-19 தடுப்பூசி ஏற்றும் உத்தரவுக்கு எதிராக தாக்கல் செய்திருந்த மனுவை மன்ஹற்றன் மாவட்ட நீதிபதி மேரி கே விஸ்கொசில் நிராகரித்து,தடுப்பூசி ஏற்றாது நோய் தொற்றால்  பிள்ளைகளும்,அவர்களின் குடும்பங்களுமே பாதிக்கப்படுவார்கள் எனவும் கூறியுள்ளார். மன்ஹற்றன் (Manhattan) நகரில் 95 வீதமான கல்வித்திணைக்கள ஊழியர்கள் தடுப்பூசி மருந்தை பெற்றுள்ளதாகவும் 3000 ஆசிரியர்கள் பெறவுள்ளதாகவும் நகர மேயர் பில் டி பிலாசியோ தெரிவித்தார். United Airlines விமான நிறுவனத்தின் ஊழியர்களில் 593 பேர் தடுப்பூசியை  ஏற்ற மறுத்ததால் பணி நீக்கப்பட்டனர்.வேலை இழந்தவர்களுக்காக அரசு வழங்கும் நிவாரண உதவி கொடுப்பனவும் இவர்களுக்கு வழங்கப்படாது எனவும் இந்நிறுவனத்தின் நிறைவேற்றதிகாரி கூறியுள்ளார். அமெரிக்காவில் கொவிட்-19 காரணமாக மூடப்பட்ட நிறுவனங்களின் ஊழியர்களுக்கு நிவாரண நிதி   (Unemployment Benifits) வழங்கப்பட்டது இவ்வாறு மூடப்பட்ட பல நிறுவனங்கள்,வர்த்தக நிலையங்கள்,தொழிலகங்கள் மீண்டும் இயங்கத்தொடங்கியுள்ளன. சி.என்.என் ஊடக நிறுவனத்தில் தடுப்பூசி ஏற்றாத மூன்று ஊழியர்கள் நீக்கப்பட்டுள்ளனர். அமெரிக்க சுகாதார செயலாளர் (அமைச்சு) சேவியர் பெக்கெறா சகலரும் கொவிட் தடுப்பூசி மருந்தை ஏற்றி, இந்நோயில் இருந்து பாதுகாத்து கொள்ள்ளுமாறு  மக்களை கேட்டுள்ளார். https://www.virakesari.lk/article/115947  
×
×
  • Create New...

Important Information

By using this site, you agree to our Terms of Use.