Jump to content
களத்தில் உள்நுழையும் வழிமுறையில் மாற்றம் செய்யப்பட்டுள்ளது. மேலதிக விளக்கங்களிற்கு

சூரியனை நெருங்கும் பூமி.


Recommended Posts

  • கருத்துக்கள உறவுகள்

சூரியனை நெருங்கும் பூமி

தமிழகத்தில் குளிர் காலத்தில் குறிப்பாக சில இடங்களில் நல்ல குளிர் இருக்கும். அப்போது ஏழை மக்கள் திறந்த வெளிகளில் கட்டைகளை, சுள்ளிகளை எரித்து அதில் குளிர் காய்வர். இவ்விதம் எரியும் நெருப்பிலிருந்து மிக அப்பால் இருந்தால் சூடு உறைக்காது. சற்றே அருகில் இருந்தால் வெப்பம் இதமாக இருக்கும்.

பூமியைப் பொருத்தவரையில் சூரியன் தான் நமக்கு வெப்பத்தை அளிக்கிறது. சூரியன் இன்றேல் நாம் அனைவரும் குளிரில் விறைத்து மடிந்து விடுவோம். ஆனால் சூரியனிலிருந்து நாம் எப்போதும் ஒரே தூரத்தில் இருப்பது கிடையாது. சூரியனைச் சுற்றி பூமியின் சுற்றுப்பாதையானது சற்றே நீள் வட்டத்தில் அமைந்துள்ளது. ஆகவே நாம் குறிப்பிட்ட சமயத்தில் சூரியனிலிருந்து சற்று விலகியபடி இருக்கிறோம். அப்போது பூமிக்கும் சூரியனுக்கும் உள்ள தூரம் 15 கோடியே 21 லட்சம் கிலோ மீட்டராகும். வேறு சில சமயங்களில் பூமியானது தனது பாதையில் சற்றே சூரியனுக்கு அருகாமையில் உள்ளது. அப்போது சூரியனுக்கு உள்ள தூரம் 14 கோடியே 71 லட்சம் கிலோ மீட்டராகும்.

2007-ஆம் ஆண்டு ஜனவரி மாதம் 3-ந் தேதியன்று பூமியானது சூரியனுக்கு மிக அருகாமையில் இருக்கும். ஆண்டு தோறும் ஜனவரியில் தான் பூமியானது சூரியனுக்கு மிக அருகாமையில் உள்ளது என்றாலும் இத் தேதி ஆண்டுக்கு ஆண்டு மாறுபடும். 2006-ஆம் ஆண்டில் ஜனவரி 5-ந் தேதி இந்த நிலை இருந்தது.

விஞ்ஞானி ஜோகன்னஸ் கெப்ளர் கண்டறிந்து கூறிய விதிகளின் படி சூரியனுக்கு அருகாமையில் இருக்கின்ற வேளையில் பூமி தனது பாதையில் செல்கின்ற வேகம் அதிகரிக்கும். சூரியனிலிருந்து அப்பால் இருக்கிற வேளையில் பூமியின் வேகம் குறைவாக இருக்கும். பூமியின் வேகம் அதிகரிப்பதும் குறைவதும் இயல்பாக நடைபெறுவதாகும். ஓடிப் பிடித்து விளையாடுகையில் பிடிக்கின்றவரின் அருகே இருக்க நேரிட்டால் ஒருவர் பிடிபடாமல் இருக்க வேகமாக ஓடுவார். சற்றே தள்ளி இருந்தால் அவர் அந்த அளவு வேகத்தில் இல்லாமல் நிதானமாக ஓடுவார். பூமி - சூரியன் சமாச்சாரமும் அப்படித்தான்.

சூரியனை சுற்றுகையில் பூமியின் சராசரி வேகம் மணிக்கு ஒரு லட்சத்து 4 ஆயிரம் கிலோ மீட்டராகும். சூரியனை நெருங்குகின்ற வேளையில் இந்த வேகம் ஒரு லட்சத்து 9 ஆயிரம் கிலோ மீட்டராக அதிகரிக்கிறது. நாம் பூமியில் இதுவரை உருவாக்கியுள்ள எந்த வாகனமும் - விண்வெளி ராக்கெட் உட்பட - இந்த வேகத்தில் செல்வதில்லை. பூமியோ நம் அனவைரையும் - காடு, மலை, கடல்கள் அனைத்தையும் சுமந்து கொண்டு இவ்விதம் அனாயாசமாக மணிக்கு ஒரு லட்சம் கிலோ மீட்டர் வேகத்தில் - அசுர வேகத்தில் பறந்து சென்றுகொண்டிருக்கிறது. ஆனால் நம்மால் இந்த வேகத்தை உணர முடிவதில்லை. நீங்கள் விமானத்தில் செல்லும்போது உங்களால் வேகத்தை உணர முடியாது என்பதைப் போலத்தான் இதுவும்.

பொதுவில் ஜூலை 4-ந் தேதி பூமியானது சூரியனிலிருந்து மிக அப்பால் இருக்கும். ஜூலை 4-ந் தேதி இருப்பதை விட ஜனவரி 4-ந் தேதி பூமி மொத்தத்துக்கும் கூடுதலாக 7 சதவிகித அளவுக்கு சூரிய ஒளி கிடைக்கிறது. ஆனால் வியப்பான வகையில் - வட கோளார்த்தத்தில் - அக் காலகட்டத்தில் தான் கடும் குளிர் வீசுகிறது. அதாவது சூரியனுக்கு அருகாமையில் இருக்கும்போது தான் நமக்கு குளிர்காலம் ஏற்படுகிறது.

இந்த விசித்திர நிலைமைக்குக் காரணம் உண்டு. பூமியில் குளிர்காலமும் கோடைக்காலமும் - பருவங்கள் - ஏற்படுவதற்கு பூமி தனது அச்சில் 23 டிகிரி சாய்ந்து இருப்பது தான் காரணம். சூரியனுக்கும் பூமிக்கும் இடையில் உள்ள தூரம் காரணமல்ல. டிசம்பர் முதல் மார்ச் வரையிலான காலத்தில் சூரியனிலிருந்து வரும் கிரணங்கள் வட கோளார்த்தத்தின் மீது சாய்வாக விழுகின்றன. சாய்வாக விழும் கிரணங்கள் அவ்வளவாக உறைக்காது என்பதால் தான் வட கோளார்த்தத்தில் குளிர் நிலவுகிறது.

http://www.dinamani.com/

Link to comment
Share on other sites

Archived

This topic is now archived and is closed to further replies.

×
×
  • Create New...

Important Information

By using this site, you agree to our Terms of Use.