யேர்மனியில் உயிரணை நாவல் ,நாங்கள் சஞ்சிகை அறிமுக விழா

[shanthy]

கடந்த ஞாயிற்றுக் கிழமை (09.04.2017) அன்று யேர்மனி டோட்முண்ட் நகரில் அமைந்துள்ள தமிழர் அரங்கத்தில் அறிவியல் எழுத்தாளர் ராஜ்சிவா அவர்களுடனான கலந்துரையாடல், சாந்தி நேசக்கரம் அவர்களின் 'உயிரணை' நாவல் அறிமுகம், என்னுடைய 'நாங்கள்' சிற்றிதழ் அறிமுகம் ஆகிய மூன்று நிகழ்வுகளும் சிறப்பாக நடந்தன.

50இற்கும் மேற்பட்டவர்கள் நிகழ்ச்சியில் கலந்து கொண்டார்கள்.

ராஜ்சிவா அவர்களுடைய அறிவியல் விளக்கங்களை சபையோர் கவனமாக செவிமடுத்தனர். இப்படி ஒரு கலந்துரையாடல் எமது சூழலுக்கு புதிது என்பதனால், இந்த முயற்சிக்கு ஆதரவு இருக்குமா என்கின்ற சந்தேகத்தில் நான் அவருக்கு ஒரு மணித்தியாலமே ஒதுக்கியிருந்தேன். சபையோரின் ஆர்வத்தினால் நிகழ்வு மேலும் அரை மணித்தியாலம் நீண்டது.

ராஜ்சிவா அவர்கள் பல அறிவியல் விடயங்களைப் பேசினார். ராஜ்சிவா அவர்களுக்கு மட்டும் ஒரு நாளை ஒதுக்கி தனியாக ஒரு நிகழ்வை 3, 4 மணித்தியாலங்கள் செய்ய வேண்டும் எனப் பலர் என்னிடம் வலியுறுத்தினார்கள். இது ஒரு நல்ல நிகழ்ச்சி, அடுத்த முறை நான் என் மனைவியையும், மகனையும் இந்த நிகழ்ச்சிக்கு அழைத்து வருவேன் என ஒருவர் என்னிடம் கூறினார்.

ஓரிரு மாதங்களில் ராஜ்சிவா அவர்களுடனான அறிவியற் கலந்துரையாடல் நிகழ்வை மீண்டும் நடத்துவேன் என்று அனைவருக்கும் நான் உறுதி கூறியிருக்கிறேன்.

அதன் பின்னர் சாந்தி நேசக்கரம் அவர்களின் 'உயிரணை' நாவல் அறிமுக நிகழ்வு நடந்தது. நூல் அறிமுகத்தை போராளிக்கலைஞர் துளசிச்செல்வன் அவர்கள் நிகழ்த்தினார். துளசிச்செல்வன் அவர்கள் ஒரு சிறந்த பேச்சாளர் என்பதை அதில் நான் கவனித்தேன். துளசிச்செல்வனின் உரை முடிந்ததும் கொண்டு வந்திருந்த புத்தகங்கள் அனைத்தும் உடனடியாகவே விற்பனையாகி விட்டன.

நான் ஒன்றை மீண்டும் இதில் சொல்ல வேண்டும். இதுவரை நான் நடத்திய எந்த ஒரு புத்தகம் சம்பந்தமான நிகழ்விலும், புத்தகங்கள் வாங்குவதற்கு என்று யாரையும் ஒழுங்கு செய்தது இல்லை. முதற் பிரதி பெறுபவர், இரண்டாவது பிரதி பெறுபவர் என்று எந்த ஏற்பாடும் இருந்தது இல்லை. அறிமுக உரை, விமர்சன உரை என்பன முடிந்த பின்னர் தாமாகவே எல்லோரும் வந்து புத்தகங்களை வாங்கிச் சென்று விடுவார்கள். இது பற்றி எனக்கு பெருமிதம் கலந்த மகிழ்ச்சி உண்டு.

அதன் பின்னர் என்னுடைய 'நாங்கள்' சிற்றிதழ் அறிமுகம் நடந்தது. என்னை வாழ்த்திப் பேசிய பெரும்பாலானவர்கள் மறக்காமல் ஒரு விடயத்தை குறிப்பிட்டனர். 'எனக்கு சபேசனுடைய சில கருத்துக்களோடு முரண்பாடு உண்டு' என்பதே அது.

கருத்தியல் முரண்பாடுகள் இருந்த போதிலும், எங்கள் எல்லோராலும் அன்போடும், நட்போடும் பழக முடிகிறது என்பதே இதில் முக்கியமான செய்தி.

நாங்கள் இங்கே அறிவியற் கலந்துரையாடல் ஒன்றினை ஆரம்பித்திருக்கின்ற அதே நாளில் பிரான்ஸில் தோழர் கோமகன் 'கதைப்போம்' என்கின்ற இலக்கிய உரையாடல் நிகழ்வை ஆரம்பித்திருக்கிறார். புலம்பெயர் இலக்கியம் ஆரோக்கியமான பாதையிலேயே பயணிக்கின்றது.

 

மேற்படி செய்தியை சபேசன் அவர்கள் எழுதியிருந்தார்.

சபேசனின் ஏற்பாட்டில் பல இலக்கிய கலந்துரையாடல்கள் ,நூல் அறிமுகம் ,மற்றும் தமிழ்மொழி ,யேர்மன் மொழி கற்பித்தல் போன்ற பல்வேறு விடயங்கள் தமிழர் அரங்க மண்டபத்தில் நடந்து வருகிறது.