யாழ் இணையத்தில் அறிவித்தல் விளம்பரங்களை இணைத்துக் கொள்வதன் மூலம் தாயக மக்களின் நல்வாழ்வுக்கு உதவிடலாம்.
விபரங்களிற்கு
கிருபன்

புத்தகங்களின் எதிர்காலம்

Recommended Posts

புத்தகங்களின் எதிர்காலம்

ebooks.jpg

ஏப்ரல் 23 உலக புத்தக தினம். புத்தக வாசிப்பை ஊக்குவிக்க யுனெஸ்கோஅமைப்பால் ஏற்படுத்தப்பட்ட தினம். புத்தகங்களின் அருமை குறித்து நினைவுகூர்ந்து பல நண்பர்கள் பதிவிடுவதைக் காண முடிகிறது. அதே நேரத்தில் இன்னும் சில ஆண்டுகளில் புத்தகங்கள் வாசிப்பதையே மக்கள் நிறுத்தி விடுவார்களோ என்ற பொதுவான ஒரு அச்சம் இங்கே நிலவுவதையும் உணர முடிகிறது. உண்மையிலேயே புத்தக வாசிப்பு குறைந்திருக்கிறதா, அப்படிக் குறைந்திருந்தால் அது குறித்து அறிவார்ந்த சமுதாயம் என்ன செய்ய வேண்டும், புத்தகங்களின் எதிர்காலம் என்ன என்பது போன்ற உரையாடல்கள் இந்தக் காலகட்டத்தில் அவசியமானவை.

நெட்ஃபிளிக்ஸ், கணினி விளையாட்டுகள், யூடியூப், ஸ்ம்யூல், டிக்டாக், சமூக வலைதளங்கள் என்று நமது கவனத்தையும் நேரத்தையும்கோரும் புதிய பொழுதுபோக்கு வடிவங்கள் ஒவ்வொரு நாளும் உருவாகத்தொடங்கிய பிறகு நம் வாழ்வில் புத்தகங்களுக்கான இடம் குறித்த ஒரு கேள்வி எழுகிறது. இது புத்தகங்கள் குறித்த கேள்வி மட்டுமல்ல. வாசிப்புக்கான நேரத்தை நம்மால் ஒதுக்க முடிகிறதா, அதற்கான ஒரு மனநிலையை இன்றைய வாழ்க்கை முறை நமக்கு அளித்திருக்கிறதா என்ற சுய அலசலும் கூட. புதிய பொழுதுபோக்கு வடிவங்கள் துரித உணவு மாதிரியானவை. விரைவில் செரித்து நமக்கு மயக்கத்தை ஊட்டக்கூடியவை. பெரும்பாலான மக்களின் விருப்பமாக துரித உணவுதான் இருக்கும். வாசிப்பு என்பது உடற்பயிற்சி போல. பழகவேண்டும். ஆரோக்கியமானது என்றாலும் முனைப்பு தேவைப்படும். முனைப்பு தேவைப்படும் எதையும் மனிதர்கள் அத்தனை எளிதில் தொடுவதில்லை.

Digital-Book-300x211.jpg

ஒவ்வொரு ஆண்டும் கல்வி கற்றவர்களின் எண்ணிக்கை உயர்ந்துகொண்டேதான் வருகிறது. அதன் பொருள் வாசிக்கத்தெரிந்தவர்களின் எண்ணிக்கை கூடிவருகிறது. அப்படியானால் புத்தகங்களைத் தேடுபவர்கள் அதிகரித்திருக்க வேண்டும். புத்தகங்களின் சந்தை பல மடங்கு உயர்ந்திருக்க வேண்டும். ஆனால் மூடப்படும் பதிப்பகங்களின் எண்ணிக்கைதான் உயர்ந்து வருவதாக ஆய்வுகள் சொல்கின்றன. திரைப்படங்கள், தொலைக்காட்சிகள் ஆகியவை மனித சமுதாயத்தில் முக்கிய இடத்தைப் பிடித்த போதும்கூட புத்தகங்கள் தனக்கான இடத்தை விட்டுவிடவில்லை. ஆனால் கணினி, இணையம், கைபேசி ஆகியவற்றின் மிகப்பெரிய தாக்கம் மனித வாழ்வின் ஒவ்வொரு பகுதியையும் புரட்டிப் போட்டது. தொலைத்தொடர்பு, வங்கிப் பரிமாற்றங்கள், வியாபாரம் செய்யும் முறைகள் என்று மனித வாழ்வின் அன்றாட நியமங்கள் அனைத்தும் மாறிப் போயின. இதற்குப் புத்தகங்களும் விதிவிலக்கல்ல.

ஆரம்பத்திலேயே கணினிகளை சரியாகப் பயன்படுத்திக் கொண்ட துறைகளில் பதிப்புத்துறைதான் முக்கியமான பங்கு வகித்தது. 1970ஆம் ஆண்டு டெஸ்க்டாப் பப்ளிஷிங் (டிடிபி) அறிமுகமானது. இதன்மூலம் சுலபமாகவும் எளிமையாகவும் அதே நேரம் முன்னெப்போதையும்விட அழகாகவும் புத்தகங்கள் வரத்தொடங்கின. ஆனால் புத்தகங்களின் வடிவம் மாறவில்லை. முதன்முதலாக பைபிள்கள் அச்சடிக்கப்பட்ட அதே வடிவத்தில்தான் புத்தகங்கள் தொடர்ந்து வெளிவந்தன. பல நூறு ஆண்டுகளாக இதே வடிவத்தில்தான் நூல்கள் வெளிவந்தன. ஏனெனில் அந்த வடிவத்தில் எந்தக் குறையும் இல்லை. மனிதர்கள் செப்புத்தகடுகளில் பட்டயங்களை செதுக்கியபோதும், பனை ஓலைகளைப் பயன்படுத்தியபோதும்கூட அதே வடிவம்தான். 90களில்தான் மின்னூல் என்ற வடிவம் பயன்பாட்டு அளவில் பேசப்பட்டது.

பெரும்பாலான துறைகளில் கணினி நுழைவதற்கு முன்பாகவே கணினிகளின் பாதிப்பால் காகித நூல்கள் மின்னணு வடிவில் மாறும் என்று கணித்தார்கள் மின்னணு விஞ்ஞானிகள். இது தொடர்பான விவாதங்கள் 1930களிலேயே தொடங்கிவிட்டன என்றாலும் 1971இல் உருவாக்கப்பட்ட ப்ராஜக்ட் கூட்டன்பெர்க்தான் பெரிய அளவில் மின்னூல்கள் குறித்த விவாதத்தைத் தொடங்கி வைத்தது. காப்புரிமையற்ற 54000 பழைய படைப்புகளை மின்னூல் வடிவில் சேகரித்து வைத்திருக்கும் இதுதான் உலகின் மிகப் பழைய மின் நூலகம். அனைத்து நூல்களும் இலவசம்தான். புத்தகப் பிரியர்களை மின்னூல்களின் பக்கத்தில் இழுத்துவந்த முக்கியமான ஒரு முயற்சி இது.

மின்னூல்களின் வளர்ச்சி அச்சுக் காகிதங்களுக்காக வெட்டப்படும் மரங்களின் எண்ணிக்கையைக் குறைத்து வனங்களைக் காக்கும் என்ற வகையில் ஒரு சுற்றுச்சூழலைக் காக்கும் முன்னேற்றமாகவும் காணப்பட்டது. தொடர்ந்து பயணத்தில் இருப்பவர்கள் ஒரு கிண்டில் கருவியை வாங்கிவிட்டால் தங்களோடு 40000 புத்தகங்கள் வரை சுமந்து திரிய முடியும். நினைத்த நேரத்தில் நினைத்த இடத்திலிருந்து தாங்கள் நினைத்த புத்தகத்தை வாங்க முடியும். அது தவிர கிண்டில் அன்லிமிடெட் போன்ற புத்தகத்தை வாடகைக்கு எடுக்கும் திட்டங்களும் உள்ளன. ஒரு மாதத்துக்கு ஒரு சிறிய தொகை கட்டிவிட்டால் பல நூல்கள் உங்களுக்குப் படிக்கக் கிடைக்கும். சந்தா காலம் முடிவடைந்த பிறகு அவை நம்முடைய கிண்டில் கருவியில் இருக்காது. புத்தகப்பிரியர்களுக்கு இதைவிட பொற்காலம் ஒன்று இருந்திருக்க முடியாது. 2020ம் ஆண்டு அமெரிக்கப் பதிப்பாளர்களின் வருமானத்தில் 50% மின்னூல்கள்வழியாகவே வரும் என்று கணித்திருக்கிறார்கள். உலக அளவில் மின்னூல் சந்தையானது தொடர்ந்து வளர்ந்து வருகிறது. இந்தியாவில் இப்போதைக்கு 10% சந்தை மதிப்பைக் கொண்டிருக்கும் மின்னூல்கள் 2020 வாக்கில் 20% அளவை அடையும் என்று கணிக்கிறார்கள்.

book-igloo-1-300x165.jpg

இது தவிர ஆடிபிள் போன்ற ஒலி வடிவப்புத்தகங்களும் இப்போது பரவலான வரவேற்பைப் பெற்று வருகின்றன. காலை நேர நடையின்போதோ, வாகனத்தைச் செலுத்தும்போதோ, நீண்ட ஒரு பயணத்தின்போதோ கண்களுக்கு வலிக்காமல் ஒரு புத்தகத்தைக் கேட்டுவிட முடிகிறது. இது தவிர ஒவ்வொரு அத்தியாயத்திற்கும் பணம் செலுத்திப் படிக்கும் செயலிகள் இப்போது வந்திருக்கின்றன. சீரியல் பாக்ஸ் என்ற செயலி மூலம் வாரம் ஒரு அத்தியாயம் என்று நமது கைபேசிக்கு அனுப்பி விடுகிறார்கள். டிவி சீரியல்களைப்போல புத்தக சீரியல்கள் இவை. நமக்குப் பிடிக்கவில்லை என்றால் இரண்டாவது அத்தியாயத்துடன் நிறுத்திக்கொண்டு விடலாம். முன்னூறு ரூபாய் கொடுத்து ஒரு புத்தகத்தை வாங்கி முன்னுரை மட்டும் படிக்கத் தேவையில்லை. இந்தியாவிலும் பிரதிலிபி போன்ற முன்னெடுப்புகள் நிகழ்ந்து வருகின்றன. எனவே புத்தகம் என்ற பழைய வடிவத்தின் வளர்ச்சி வேண்டுமானால் தடைபட்டிருக்கலாம். ஆனால் வாசிப்பு என்ற செயல்பாடு வேறு வடிவங்களில் வளர்ந்து கொண்டுதான் வருகிறது.

இத்தனை தொழில்நுட்பங்கள் இருந்தும் வாசிப்பு ஏன் எதிர்பார்த்த அளவு வளரவில்லை என்ற கேள்விக்கும் விடை தேட வேண்டியிருக்கிறது. வாசிப்பை ஊக்குவிக்க வேண்டிய அரசுகள் இதற்கான எந்த முன்னெடுப்பையும் செய்வதாகத் தெரியவில்லை. அரசு நூலகத்திற்குத் தரமான நூல்கள் வாங்குவதைவிட அதன் வாயிலாக எவ்வளவு பணம் பார்க்கலாம் என்பதே பிரதான நோக்கமாகியிருக்கிறது. யாரிடம் புத்தகம் வாங்குகிறார்கள், எவ்வளவு வாங்குகிறார்கள் என்பதே பெரிய மர்மமாக இருக்கிறது. வாங்கும் நூல்களும் சேக்கிழார் எழுதிய கம்பராமாயணம் வகையறாவாக இருக்கின்றன. இது குறித்த ஆர்டிஐ கேள்விகளுக்கு மௌனத்தையே பதிலாக அளிக்கிறது மாநில அரசு. புத்தக வாசிப்பையும் விமர்சனத்தையும் மேற்கு நாடுகளில் பள்ளிக் கல்வித் திட்டத்திலேயே வைத்திருக்கிறார்கள். ஆனால் ஆசியாவிலேயே சிறந்த நூலகத்தை மருத்துவமனையாக மாற்ற முயன்ற அரசிடமிருந்து இதைவிட வேறு எதையும் எதிர்பார்க்க முடியாது.

இவை தாண்டி நாம் கவனிக்க வேண்டிய இன்னொரு விஷயமும் இருக்கிறது. ஏப்ரல் 23 என்பது உலக புத்தக தினம் மட்டுமல்ல. உலக காப்புரிமை தினமும் கூட. துரதிருஷ்டவசமாக காப்புரிமை குறித்த தீவிரமான ஒரு பார்வை இந்திய சமுதாயத்தில் இல்லை. மின்னூல்கள் வளர்ச்சியோடு மின்னூல்களைத் தரவிறக்கி அவற்றை சட்டத்துக்குப் புறம்பாக இலவசமாகத் தரும் ஆட்களும் கூடவே வளர்ந்து வருகிறார்கள். அமேசான் உட்பட எந்தத் தளத்தில் நூல் வெளியானாலும் உடனே வாங்கி அதன் பாதுகாப்பை உடைத்து அதை பிடிஎப் வடிவத்தில் மாற்றி ஒரு குறைந்தபட்ச தொகையை மாதம் வாங்கிக் கொண்டு தங்கள் கொள்ளையைப் பலருக்கும் பகிர்கிறார்கள். தமிழ் தினசரிகள், மாத இதழ்களை இப்படி வாட்ஸ்ஆப் மூலமாக அளித்துவந்த ஒருவர் மாதம் லட்ச ரூபாய்வரை சம்பாதித்திருக்கிறார். சினிமா, இசை உலகம் போன்றவை டிஜிட்டல் மயமானதால் சந்திக்கும் அதே சோதனையைத்தான் நூல்களும் சந்தித்து வருகின்றன. இது தொடர்பாக எந்த வலிமையான சட்டமும் இல்லாத இந்தியாவில் மின்னூல்களின் பரவல் மிகவும் மந்தமாக இருப்பதில் ஆச்சரியம் எதுவுமில்லை.

இணையம் செய்த ஒரு காரியம் முதலில் அனைத்தையும் இலவசமாக்கி வைத்தது. இணையத்தில் நேரடியாக நாம் எந்தத் தகவலுக்கும் பணம் செலுத்துவதில்லை. புத்தகம் வாங்கினால் பணம் தரவேண்டும். அது வீண் செலவு என்று பலரும் நினைக்கிறார்கள். எப்படியும் தமிழ் ராக்கர்ஸில் கிடைக்கும் என்பதுபோல எப்படியும் பிடிஎஃப் கிடைக்கும் என்று நம்பத் தொடங்கியிருக்கிறார்கள். எழுதியவரிடமே வந்து பிடிஎஃப் கிடைக்குமா என்று கேட்கும் அளவுக்கு அது ஒரு திருட்டு என்ற விஷயமே நமக்குப் புரியாமல் இருக்கிறது. அப்படியானால் இதை மாற்றமுடியுமா என்றால் முடியாது என்பதுதான் கசப்பான பதில். அதே நேரத்தில் எல்லாவற்றையும் இலவசமாகவே வாசகர்கள் எதிர்பார்த்தால் தரமான எழுத்தைத் தருபவர்கள் எதற்காக எழுத வேண்டும்? நல்ல எழுத்தாளர்கள் எழுத்தைப் புறக்கணித்தால் என்ன நடக்கும்?

வாசகர்கள் அப்படி இருந்தால் ராயல்டி என்ற ஒரு சொல்லே நகைச்சுவையாகப் பார்க்கப்படும் சூழல் பதிப்புத்துறையில் உருவாகியிருக்கிறது என்பதையும் இந்த நாளில் நினைத்துக்கொள்ள வேண்டியிருக்கிறது. தொலைநோக்கில் பார்த்தால் இது குறித்த பிரக்ஞை இன்றி இருப்பது பதிப்புத்துறையை மெல்லக் கொன்றுவிடும். பெருகி வரும் தயாரிப்பு செலவுகள், சுருங்கி வரும் விற்பனை என்பதெல்லாம் பதிப்பாளர்கள் எதிர்கொள்ளும் பிரச்னைகள் என்றாலும் இத்தனை பிரதிகள், இத்தனை விற்பனை, இவ்வளவுதான்ராயல்டி என்று வெளிப்படையாக அறிவித்து பத்தே ரூபாய் என்றாலும் அந்த எழுத்தாளருக்கு அனுப்பும்முறை உருவாக வேண்டும். பதிப்பாளர்களின் பிரச்னையை எழுத்தாளர்கள் அறிந்துகொள்ளவும் இது பயன்படும். இதற்கான பொதுவான ஒரு இணையதளம் உருவாக்கப்பட்டு எழுத்தாளர்களும் பதிப்பாளர்களும் அங்கே பதிவுசெய்து கொள்ளலாம். நூல்களின் அச்சு மற்றும் விற்பனை விவரங்கள் அங்கே பதிவேற்றப்பட்டு சம்பந்தப்பட்ட எழுத்தாளர் எப்போது வேண்டுமானாலும் பார்த்துக் கொள்ள வகைசெய்யலாம். பபாசி போன்ற அமைப்புகளும் எழுத்தாளர்களின் கூட்டமைப்புகளும் இணைந்து இப்படியான ஒரு வெளிப்படைத்தன்மையை உருவாக்கும் வேலையில் ஈடுபடுவது அவசியம்.இதெல்லாம் நடக்கிற காரியமா என்று நகைக்கலாம். சமூக வலைதளங்களில் மாறி மாறி கை நீட்டி சண்டையிடலாம். ஆனால் அமேசான், நெட்ஃபிளிக்ஸ், ஹாட்ஸ்டார் போன்ற சுறாக்கள் நீந்தும் கடலில் மெல்ல மூழ்கிக்கொண்டிருக்கும் புராதனமான கப்பலில் நின்று சண்டையிட்டுக் கொண்டிருக்கிறோம் என்பதை மட்டும் அப்போது நினைவில் வைத்துக் கொள்ளவேண்டும். யார் வெல்வார்கள் என்பதல்ல, எவ்வளவு நாட்கள் கப்பல் நம் கால்களுக்கடியில் இருக்கும் என்பதுதான் கேள்வி.

 

https://uyirmmai.com/article/புத்தகங்களின்-எதிர்காலம/

 

Share this post


Link to post
Share on other sites

சிறப்பான பகிர்வு, காப்புரிமைப் பற்றிய கருத்து முற்றிலும் உண்மையானது.

இத்தலைப்பைப் பற்றி பல நாட்களாக எழுத வேண்டுமென்று எண்ணியிருந்தேன். புத்தக வாசிப்பில் இருக்கும் சுவை ஏனோ மின்னூல்கள் மூலமாகக் கிடைப்பதில்லை. பல்வேறு மின்னூல்களைக் கைப்பேசியிலும் மடிக்கணிணியிலும் சேமித்து வைத்திருந்தாலும், அவற்றை வாசிக்க மனம் முன்வருவதில்லை.  

காகித வாசனையை முகர்ந்து வாசித்துப் பழகிய எனக்கு டிஜிட்டல் வடிவில் அவ்வளவு விருப்பமில்லை. மின்னூல் வாசிப்பு கண்களுக்கு நல்லதல்ல, கண்பார்வையில் பாதிப்பு ஏற்பட அதிக வாய்ப்புள்ளது. ஆனால் புத்தகங்களை கையாள்வதைக் காட்டிலும் மின்னூலே சௌகரியமானதாகத் தெரிகிறது.  

  • Like 1

Share this post


Link to post
Share on other sites
On 6/9/2019 at 6:50 PM, அருள்மொழிவர்மன் said:

காகித வாசனையை முகர்ந்து வாசித்துப் பழகிய எனக்கு டிஜிட்டல் வடிவில் அவ்வளவு விருப்பமில்லை.

அச்சுப் புத்தக வாசிப்புக்கு ஈடாக டிஜிட்டல் புத்தக வாசிப்பு வர முடியாது.

  • Like 1

Share this post


Link to post
Share on other sites

Join the conversation

You can post now and register later. If you have an account, sign in now to post with your account.

Guest
Reply to this topic...

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


யாழ் இணையத்தில் அறிவித்தல் விளம்பரங்களை இணைத்துக் கொள்வதன் மூலம் தாயக மக்களின் நல்வாழ்வுக்கு உதவிடலாம்.
விபரங்களிற்கு


  • Topics

  • Posts

    • என்வாழ்வில் புதுப்பாதை கண்டேன் ....!   😁
    • கன்னியா: சிவபுராணம் எதிர் இராணுவம்? நிலாந்தன்.. July 21, 2019   கன்னியா வெந்நீரூற்றில் தமது மரபுரிமைச் சொத்தைக் காப்பாற்றுவதற்காக சுமார் இரண்டாயிரம் மக்கள் திரண்டிருக்கிறார்கள். கடந்த செவ்வாய்க்கிழமை தென்கயிலை ஆதீனமும், கன்னியா மரபுரிமை அமைப்பும் மேற்படி திரட்சியை ஒழுங்குபடுத்தியிருந்தன. ஒரு வழிபாடாக தேவாரங்களைப் பாடிக்கொண்டு கன்னியாப் பிரதேசத்திற்குச் செல்வது இத்திரட்சியின் நோக்கமாகும். முகநூலில் விடுக்கப்பட்ட அழைப்பு மற்றும் கைபேசிச் செயலிகளின் வலையமைப்பு போன்றவற்றிற்கூடாக மக்கள் திரட்டப்பட்டிருக்கிறார்கள். தமிழ்த்தேசிய மக்கள் முன்னணி, தமிழ்த்தேசியக் கூட்டமைப்பு, தமிழ் மக்கள் கூட்டணி ஆகிய மூன்று கட்சிகளின் பிரதிநிதிகளும் அங்கே காணப்பட்டார்கள். கூட்டமைப்பில் இரண்டு நாடாளுமன்ற உறுப்பினர்களும், மக்கள் முன்னணியின் தலைவரும் பிரதானிகளும் உட்பட தொகையான அரசியற் செயற்பாட்டாளர்களும் அங்கே காணப்பட்டார்கள். எனினும் கூட்டமைப்பின் திருமலை மாவட்ட பிரதானிகளை அங்கே காண முடியவில்லை. 2009ற்குப் பின் தமிழ் பகுதிகளில் நடந்து வரும் பெரும்பாலான போராட்டங்களைப் போலவே இப்போராட்டத்திலும் மக்கள் முன்சென்றார்கள். தென்கயிலை ஆதீனத்தின் குரு முதல்வர் இத்திரட்சிக்குத் தலைமை தாங்கினார். 2009ற்குப் பின் தமிழ் அரசியற்பரப்பில் துருத்திக்கொண்டு மேலெழுந்த ஒரு சமயப் பெரியார் அவர். யாழ்ப்பாணத்தைப் பூர்வீகமாகக் கொண்ட ஒர் ஓய்வுபெற்ற சங்கீத ஆசிரியர். கட்டையான தோற்றம். ஆனால் சுறுசுறுப்பானவர். தமிழ் பகுதிகளில் காணப்படும் ஏனைய ஆச்சிரமங்கள், ஆதீனங்களோடு ஒப்பிடுகையில் வளம் குறைந்த ஓர் ஆதீனம் அது. சில மாதங்களுக்கு முன்பு முள்ளிவாய்க்காலில் மே பதினெட்டை எப்படி நினைவு கூர்வது என்ற கூட்டத்தில் கலந்து கொள்வதற்கு மேற்படி குருமுதல்வர் தனது உதவியாளரோடு திருகோணமலையிலிருந்து முல்லைத்தீவிற்கு மோட்டார் சைக்கிளில் வந்திருந்தார். அண்மைக் காலங்களில் தமிழ் பகுதிகளில் நடக்கும் போராட்டங்களில் அடிக்கடி காணப்படும் ஒருவராக அவர் துருத்திக்கொண்டு தெரிகிறார். ஏற்கெனவே ஈழத்தமிழர்கள் மத்தியில் ஸ்தாபிதமாக இருக்கும் பல ஆதீனங்கள் ஆன்மீகப் பணிகளுக்குமப்பால் அகலக்கால் வைப்பதில்லை. பொது வைபவங்களிலும் சில சமயங்களில் அரசியல் நிகழ்வுகளிலும் தோன்றி ஆசியுரை வழங்குவதோடு சரி. ஆனால் அண்மைக்காலங்களாக விதி விலக்காக யாழ்ப்பாணம் சின்மயா மிஷனைச் சேர்ந்த ஒரு துறவியும் தென்கையிலை ஆதீனக் குருமுதல்வரும் அரசியல் நிகழ்வுகளிலும் குறிப்பாகப் பொதுமக்கள் போராட்டங்களிலும் அதிகமாகக் கலந்து கொள்கிறார்கள். துணிச்சலாகவும், கூர்மையாகவும் கருத்துக்களை முன்வைக்கிறார்கள். பொதுவாகத் தமிழ் அரசியல் பரப்பில் கிறிஸ்தவ மதகுருக்களே அதிகம் காணப்படுவதுண்டு. எனினும் ஆயுதப் போராட்டத்தில் பெருமளவு இந்து மதகுருக்கள் இணைந்திருக்கிறார்கள். கிறிஸ்தவ சமய மரபில் மதகுருவே போதகராகவும் சமூகச்சிற்பியாகவும் தொழிற்படுவார். இந்து சமயத்தில் பூசகர் வேறு பிரசங்கி வேறு ஆதீனம் வேறு என்ற ஒரு வலுவேறாக்கம் உண்டு. அரிதான சில புறநடைகள் தவிர பூசகர்கள் பூசையோடு நின்று விடுவார்கள். ஆதீன முதல்வர்கள் ஆன்மீகத்தோடு நின்றுவிடுவார்கள். இவ்வாறானதோர் சமூக சமய அரசியல் பாரம்பரியத்தில் 2009ற்குப் பின் ஒரு தனிக் குரலாகச் சன்னமாக ஒலித்தவர் முன்னாள் மன்னார் ஆயர் ராயப்பு ஜோசப் ஆவார். அக் காலக்கடத்தில் அவருக்கு நிகராக வேறெந்த மதத்தலைவரும் குரல்கொடுத்ததில்லை. இப்போதிருக்கும் திருமலை ஆயரும் செயல்களில் தீவிரமானவர். முன்னாள் மன்னார் ஆயரைப் போல வெளிப்படையாக அரசியலைக் கதையாதவர். ஆனால் பாதிக்கப்பட்ட மக்களுக்கு துணிச்சலாக வழிகாட்டும் ஒருவர். திருமலை கத்தோலிக்க ஆதீனத்திற்கு அப்படியொரு ஆயர் கிடைத்திருக்கும் ஓர் அரசியற் சூழலில் இந்து மதப்பரப்பில் யாழ்ப்பாணம் சின்மயா மிஷனைச் சேர்ந்த ஒரு துறவியும் திருமலை தென்கயிலை ஆதீன முதல்வரும் துணிச்சலாக துருத்திக்கொண்டு மேலெழுகிறார்கள். கடந்த செவ்வாய்க்கிழமை நடந்த ஆர்ப்பாட்டத்தில் ஆதீனத்தின் குரு முதல்வர் அவமதிக்கப்பட்டிருக்கிறார். தேவாரம் பாடிக்கொண்டு சென்ற மக்களை பொலிசும் படைத்தரப்பும் ஆயுதங்களோடு மறித்திருக்கின்றன. தேவாரங்களை மட்டும் ஆயுதங்களாகக் கொண்டு தமது வழிபாட்டு உரிமையைக் கேட்டு அங்கு திரண்ட மக்களை ஆயுதம் தாங்கிய நூற்றுக்கணக்கான பொலிசாரும், படை வீரர்களும் எதிர்கொண்டிருக்கிறார்கள். தமிழர்கள் உதிரியாகக் கன் னியாவுக்குச் செல்வதை யாரும் தடுப்பதில்லை. ஆனால் ஒரு திரளாகத் தமது மரபுரிமையைக் கேட்டுச் செல்லும் போதே தடுக்கப்பட்டிருக்கிறார்கள். 2009ற்குப் பின் திருமலையில் இப்படியாக மக்கள் திரண்டது ஓர் அசாதாரணம். அந்த மக்களை அடக்க பெருந்தொகை இராணுவமும் பொலிசும் திரண்டதும் ஓர் அசாதாரணம். குறிப்பாகப் படை வீரர்கள் முகங்களை கறுப்புத்துணியால் மூடிக்கொண்டு காணப்பட்டார்கள். தேவாராத்தோடு வந்த தமிழ் மக்களை அரசாங்கம் தனது அனைத்து உபகரணங்களோடும் எதிர்கொண்டது. பொலிசும் படைத்தரப்பும் மட்டுமல்ல நீதிமன்றமும் அந்த மக்களுக்கு தடையுத்தரவு பிறப்பித்தது. அந்த மக்கள் தமது மரபுரிமைச் சொத்தைக் வழிபடுவதற்கு அனுமதிக்கப்படவில்லை. தடையுத்தரவைக் காட்டி மக்கள் திரட்சியைத் தடுத்த பொலிசார் முடிவில் ஆதீன முதல்வரையும் கன்னியாப் பிள்ளையார் கோவில் அமைந்திருக்கும் காணிக்குச் சொந்தக்காரரான மூதாட்டியையும் உள்ளே செல்ல அனுமதித்திருக்கிறார்கள். உள்ளே சென்ற இருவர் மீதும் அரசாங்கத்தின் மற்றொரு உபகரணமான காடையர்கள் சூடான எச்சில் தேநீரை முகத்தில் ஊற்றி அவமதித்திருக்கிறார்கள். தென்கயிலை ஆதீன முதல்வரின் மீது வீசப்பட்ட எச்சில் தேநீர் முழுத் தமிழ் மக்கள் மீதும் வீசப்பட்ட ஒன்றுதான். தமது மரபுரிமைச் சொத்துக்களைப் பாதுகாக்கச் சென்ற ஒரு சிறிய மக்கள் கூட்டத்தின் மீது வீசப்பட்ட எச்சில் தேநீர்தான். தமது வழிபாட்டு உரிமையைக் கேட்டுச்சென்ற ஒரு மக்கள் கூட்டத்தின்மீது வீசப்பட்ட எச்சில் தேநீர்தான். தேவாரங்களோடு வந்த ஒரு மக்களை ஓர் அரச எந்திரம் இப்படியாக எதிர்கொண்டிருக்கிறது. ஆதீன முதல்வர் ஒரு அரசியற் செயற்பாட்டாளரல்ல. முதலாவதாக அவர் ஒரு சமயப் பெரியார். ஓர் அரசியல் செயற்பாட்டாளரின் நோக்கு நிலையிலிருந்து சிந்தித்திருந்தால் அவர்களை நம்பி அங்கே திரண்ட கிட்டத்தட்ட 2000 பொதுமக்களுக்கு மறுக்கப்பட்ட அனுமதி தங்களுக்கும் வேண்டாம் என்று மறுத்திருந்திருக்க வேண்டும். மாறாக இரண்டு பேர் மட்டும் அந்த அனுமதியைப் பெற்றுக்கொண்டு சென்று அவமதிக்கப்பட்டிருக்கிறார்கள். எனினும் அந்த அவமதிப்பு அப்போராட்டத்தை உணர்ச்சிகரமாகத் திருப்பியிருக்கிறது. நிலமை மிகவும் கொதிப்பாகக் காணப்பட்டது. ஆனால் அவ்வுணர்ச்சிகரமான சூழலை வெற்றிகரமாகக் கையாண்டு அதன் அடுத்த கட்டத்திற்குத் தலைமை தாங்க அங்கே யாரும் இருக்கவில்லை. கடந்த பத்தாண்டுகளாக தமிழ்ப் பகுதிகளில் நடந்து வரும் பெரும்பாலான மக்கள் மையப் போராட்டங்களில் காணப்படும் அதே பலவீனம் இங்கேயும் வெளிப்பட்டிருக்கிறது. போராட்டத்தின் முடிவில் தென்கயிலை ஆதீனம் வெளியிட்டிருக்கும் அறிக்கையில் அது மிகச் சரியாகவே கூறப்பட்டிருக்கிறது. ஆதீன முதல்வர் அவமதிக்கப்பட்டதற்கு எதிராக பொலிசில் முறைப்பாடு செய்யுமாறு அங்கிருந்த பொலிஸ் அதிகாரிகள் கூறியிருக்கிறார்கள். அடிப்படை உரிமைகளில் ஒன்றாகிய வழிபாட்டுரிமை தடுக்கப்பட்டமை குறித்து மனித உரிமைகள் ஆணையக்குழுவில் சில முறைப்பாடுகளும் செய்யப்பட்டுள்ளன. இவற்றோடு கன்னியாவிலிருப்பது தமிழ் மரபுரிமைச் சொத்தே என்பதனை சான்றாதாரங்களோடு நிரூபித்துச் சட்டப்படி அதற்கொரு தீர்வைப் பெறுவதற்கும் சில தரப்புக்கள் முயல்வதாகத் தெரிகிறது. ஆனால் அது ஒரு சட்ட விவகாரம் மட்டுமல்ல. அடிப்படை உரிமைகள் விவகாரம் மட்டுமல்ல. அதைவிட ஆழமாக அது ஓர் அரசியல் விவகாரம். அதை அரசியற் தளத்திலேயே அணுக வேண்டும். அரசியல்வாதிகளும் அரசியல் இயக்கங்களும், அரசியற் செயற்பாட்டாளர்களும் அதற்குத் தலைமை தாங்க வேண்டும். சமயப் பெரியார்களும், சமூக அமைப்புக்களும் அவர்கள் பின் திரள வேண்டும்.இது போன்ற போராட்டங்களை சமய அமைப்புகள் எதுவரை முன்னெடுக்கலாம்? சில மாதங்களுக்கு முன் டாண் ரிவியின் சாதனை விருது வழங்கும் நிகழ்ச்சியில் கலந்து கொண்ட போது என்னருகில் மூத்த நிர்வாக சேவை அதிகாரி ஒருவர் இருந்தார். அவர் ஒரு கிறிஸ்தவர். இம்முறை அவ்விருது ஆறு திருமுருகனுக்கு வழங்கப்பட்டது. என்னருகில் இருந்த அதிகாரி சொன்னார் ‘நாவற்குழியில் திட்டமிட்டு உருவாக்கப்பட்ட குடியேற்றம் அதையொட்டிக் கட்டப்பட்டுவரும் விகாரை என்பவற்றின் பின்னணியில் ஆறு திருமுருகனின் திருவாசக அரண்மனைக்கு ஒரு முக்கியத்துவம் உண்டு’ என்று அதாவது, நாவற்குழியில் சிங்கள பௌத்த மயமாதலுக்கு எதிரான மதப்பல்வகைமையை திருவாசக அரண்மணை கட்டியெழுப்பபுகிறது என்ற பொருளில். ஆனால் சிங்கள பௌத்த மயமாதலுக்கு எதிராக சைவசமயத்தை முன்னிறுத்துவது ஒர் இறுதித் தீர்வல்ல. பௌத்த மதத்தின் பலவர்ணக் கொடிகளுக்கு மாற்றாக நந்திக்கொடியை உயர்த்திப் பிடிப்பதும் ஒர் இறுதித் தீர்வல்ல. இது முதலாவதாக ஒரு மதப்பிரச்சினையல்ல. இது முதலாவதாகவும் இறுதியானதாகவும் ஓர் அரசியற் பிரச்சினை. இங்கு மதம் ஆக்கிரமிப்பின் ஒரு கருவி. தேசியம் எனப்படுவது ஒரு நவீன சிந்தனை. அது பல்வகைமைகளின் திரட்சி. தமிழ்த்தேசியம் மதப் பல்வகைமைiயின் மீதே கட்டியெழுப்பப்படவேண்டும். மதம் ஆக்கிரமிப்பின் கருவியாக வரும் போது அதை அரசியல்த்தளத்திலேயே எதிர் கொள்ள வேண்டும். அதன் அரசியல் அடர்த்தியை மத விவகாரமாகக் குறுக்கவும் கூடாது குறைக்கவும் கூடாது. புத்தர் சிலைகளை அவர்கள் எல்லைக் கற்களாக முன்ந்கர்த்தும் போது தமிழர்கள் அதற்கு எதிராக சிவலிங்கத்தை முன் நகர்த்தக் கூடாது. ஏனெனில் சிங்கள பௌத்த பெருந் தேசியவாதம் தமிழ்த் தேசியத்திற்கு ஆசிரியர் இல்லை. ஒரு மதத்தின் சின்னங்களுக்கு எதிராக அல்லது மாற்றாக இன்னொரு மதத்தின் சின்னங்களை முன்னிறுத்தும் போது அது தேசியவாத அரசியலுக்கு எதிராகத் திரும்பாமற் பார்த்துக் கொள்ள வேண்டும். கொடிகளும் சின்னங்களும் உணர்ச்சிகரமாகச் சனங்களைத் திரட்டும். ஆனால் அத்திரளாக்கம் சிலசமயம் தேசியத்தை உடைக்கும். சில சமயம் அடிப்படைவாதிகளின் வழிகளை இலகுவாக்கிக் கொடுத்துவிடும். ஏற்கெனவே தமிழில் இந்து அடிப்படைவாதிகள் மெல்ல மேலெழத் தொடங்கி பார்க்கிறார்கள். எனவே கன்னியா விவகாரத்தை ஓர் அரசியல் விவகாரமாக முன்னெடுக்கவல்ல தரப்புக்கள் ஒன்று திரள வேண்டும். அதை கூட்டமைப்பிற்கு எதிரான ஒரு களமாகப் பயன்படுத்த விளையும் கட்சிகளும் சரி ஏனைய செயற்பாட்டாளர்களும் சரி அதை ஒரு கூட்டுப் பொறிமுறைக்கூடாக முன்னெடுக்க வேண்டும். அதற்கொரு ஒட்டுமொத்த அரசியற் தரிசனமும் வழிவரைபடமும் கொண்ட ஒரு மக்கள் இயக்கம் வேண்டும். இப்பொழுது கன்னியாவைப் பற்றியும் செம்மலை நீராவியடியைப் பற்றியும் கட்டுரை எழுதும் நாங்கள் சில மாதங்களுக்கு முன்பு காணாமல் ஆக்கப்பட்டவர்களைப் பற்றியும் கேப்பாபிலவைப் பற்றியும் கட்டுரைகளை எழுதிக்கொண்டிருந்தோம். இடைக்கிடை அரசியற் கைதிகளுக்காகவும் கட்டுரை எழுதினோம். இப்பொழுதும் ஓர் அரசியற் கைதி சாகும்வரை உண்ணாவிரதமிருக்கிறார். இதில் எந்தவொரு விடயத்திலும் முழுத் தீர்வு கிடைக்கவில்லை. முடிவுறாத முன்னைய போராட்டத்தை புதிதாக எழும் ஒரு புதிய போராட்டம் பின்தள்ளிவிடுகிறது. நாளை இந்தப் போராட்டமும் ஒரு பழைய போராட்டமாகிவிடும். வேறொரு புதிய போராட்டம் அல்லது வேறொரு புதிய விவகாரம் முன்னுக்கு வந்துவிடும். இப்போராட்டங்கள் யாவும் உதிரியானவையல்ல. 2009ற்குப் பின்னரான ஓர் ஒட்டுமொத்த யுத்த வியூகத்தின் பகுதிகளே இவை. ஒரு போராட்டத்திற்குத் தீர்வு கிடைக்காமலேயே இன்னொரு போராட்டத்திற்குத் தாவுவது என்பது தற்செயலானது அல்ல. தமிழ் மக்களின் கவனத்தை திட்டமிட்டே சிதறடிக்கிறார்கள். எனவே உதிரி உதிரியாகப் போராடாமல் ஓர் ஒட்டுமொத்த யுத்த வியூகத்தை எதிர்கொள்ள முதலில் ஒட்டுமொத்த தற்காப்புக் கவசத்தையும் அதைத்தொடர்ந்து ஒட்டுமொத்த கூட்டு எதிர்ப் பொறிமுறையையும் தமிழ் மக்கள் கண்டுபிடிக்க வேண்டும்.   http://globaltamilnews.net/2019/127003/
    • பெர்லின் மெற்ரோவுக்கு  அருகில் இருக்கும் ஒரு பிரசித்தமான  தெருவோர கடையில்  மதிய உணவு.......!  👍
    • “எனது கணவர் திருகோணமலை அரசியல்துறை பொறுப்பாளராக இருந்தபடியால், எனக்கும் கிழக்குக்கும் ஒரு தொடர்பு இருக்கிறது” July 21, 2019   பாறுக் ஷிஹான் “கூட்டமைப்பு கிழக்கு மாகாணத்தில் சரியான பாதையில் செல்ல வேண்டும் தற்போது கூட்டமைப்பின் பாதை ஒழுங்கீனமானது. எனது கணவர் திருகோணமலை அரசியல்துறை பொறுப்பாளராக இருந்தபடியால் எனக்கும் கிழக்குக்கும் ஒரு தொடர்பு இருக்கிறது எனவே மக்களை பாதுகாக்கவே நாம் கிழக்கு மாகாணத்திற்கு அடிக்கடி பயணம் செய்கிறோம்” என முன்னாள் வட மாகாண அமைச்சரும் ஈழத் தமிழர் சுயாட்சிக் கழகத்தில் செயலாளர் நாயகமுமான அனந்தி சசிதரன் தெரிவித்தார். கல்முனையில் சனிக்கிழமை (20) மாலை 4 மணியளவில் ஊடக சந்திப்பொன்றில் கலந்து கொண்டு மேற்கண்டவாறு தனது கருத்தை கூறினார். வட மாகாண அரசியல் தலைமைகள் ஏன் அண்மைக்காலமாக அம்பாறை மாவட்டத்தை குறிவைத்து செயல்படுகின்றனர் இது அம்பாரை மாவட்டத்திற்கு கிடைக்கின்ற ஒரே ஒரு தமிழ் பிரதிநிதித்துவத்தை சிதைப்பதற்காகவா என ஊடகவியலாளர்கள் எழுப்பிய கேள்விகளுக்கு பதிலளித்த அவர் “நாங்கள் கூட்டமைப்பை சிதைப்பதற்காக கிழக்கில் களமிறங்கவில்லை கூட்டமைப்பு சரியான பாதையில் பயணிக்க வேண்டும் என்பதற்காக அழுத்தத்தை கொடுப்பதற்காகவே கிழக்கிற்கு விஜயம் செய்கின்றோமே தவிர வாக்குகளை சிதைப்பதற்காகவல்ல.நாங்கள் வடக்கிலே ஸ்திரமான நிலையில் எமது கட்சி காலூன்றாத நிலையில் கிழக்கில் அரசியல் செய்வது நமது நோக்கமல்ல. கூட்டமைப்பின் தலைமை உள்ள கிழக்கு மாகாணத்தில் பல இடங்கள் பறிபோயுள்ளது இவற்றைக் கூட கூட்டமைப்பு சரிவர செய்யவில்லை இதன் நிமித்தமே நாங்கள் வடக்கு கிழக்கு என்ற பாராமல் தமிழர்கள் என்ற நோக்கிலே குரல் கொடுப்பதற்காக வருகின்றோம்.கிழக்கில் உள்ள மக்கள் தங்களுக்கான சரியான தலைமைகளை தேர்ந்தெடுக்க வேண்டிய கட்டாயத்தில் இருக்கின்றார்கள் நாங்கள் ஒரு போதும் வடக்கிலிருந்து வந்து கிழக்கிலே தேர்தலில் இறங்கப் போவதில்லை. விடுதலைப் போராட்டத்தில் கூட பலவற்றை இழந்து இருக்கிறார்கள் வடக்கில் நிலைமை வேறு கிழக்கின் நிலைமை வேறு காலத்திற்கு காலம் பல்வேறுபட்ட நெருக்கடிகளை கிழக்கு மக்கள் அனுபவித்து வருகிறார்கள் . எனது கணவர் திருகோணமலை அரசியல்துறை பொறுப்பாளராக இருந்தபடியால் எனக்கும் கிழக்குக்கும் ஒரு தொடர்பு இருக்கிறது. யாருக்கும் அஞ்சி வடக்கு வேறு கிழக்கு வேறு என வேறுபடுத்த தயாரில்லை. காணாமல் ஆக்கப்பட்டோர் சார்பாக சரிவர குரல் கொடுக்கவில்லை என காணாமல் ஆக்கப்பட்டோர் சங்கத்தினர் உங்களை பலர் விமர்சிக்கின்றனர் இது குறித்து உங்களுடைய கருத்து என்ன? 2014 மார்ச்சில் இருந்து வெறும் அறிக்கை மாத்திரம் அல்ல அவர்களுடைய சரியான விவரங்கள் வரை ஐநா சபைக்கு வழங்கியுள்ளேன். காணாமல் ஆக்கப்பட்டோர் சம்பந்தமாக நான் காத்திரமாக செயற்பட்டு வருகிறேன் . இன்று வடக்கு கிழக்கு மாகாணங்களில் காணாமல் ஆக்கப்பட்டோர் சம்பந்தமான விடயங்களில் யாரோ ஒருவரது நிகழ்ச்சி நிரலின் கீழ் போய்க் கொண்டு இருக்கிறார்கள். எனவே இதனை பெரிய விடயங்களாக பார்க்காமல் எம்மால் முடிந்ததை செயற்படுத்துவது எமது நோக்கம்” என தெரிவித்தார்.   http://globaltamilnews.net/2019/127034/
    • மன்னார் பாலியாற்றில் தொடர்ச்சியாக மணல் அகழ்வு -அணைக்கட்டு இடிந்து விழும் நிலையில் July 21, 2019   மன்னார் – பாலியாற்று அணைக்கட்டுப் பகுதியில் இரவு பகலாக தொடர்ச்சியாக மணல் மண் அகழ்வு செய்யப்பட்டு வெளியிடங்களுக்கு விற்பனைக்காக கொண்டு செல்லப்படுகிறது. இதனால் அடம்பன் குளம் , பெரிய வெள்ளாங்குளம் , முள்ளிக்குளம் , உயிலங்குளம் , போன்ற பகுதிகளில் உள்ள 800 ஏக்கர் விவசாய நிலங்கள் பாதிப்படையும் நிலை ஏற்பட்டுள்ளதாகவும், இவ்விடயம் தொடர்பாக அனைத்து தரப்பினருக்கும் தெரியப்படுத்தியும் எந்த விதமான நடவடிக்கைகளும் மேற்கொள்ளப்படவில்லை. எனவே வடக்கு மாகாண ஆளுநர் இவ்விடையத்தில் தலையிட்டு பாலியாற்று மணல் அகழ்வை தடுத்து நிறுத்த வேண்டும் என அப்பகுதி விவசாய அமைப்பினர் தெரிவித்துள்ளனர். -இவ்விடயம் தொடர்பாக மேலும் தெரிய வருகையில்,,, பாலியாற்று அணைக்கட்டானது 1978 ஆம் ஆண்டு கட்டி முடிக்கப்பட்டு அது சேதமடைந்த பின் 2012ஆம் ஆண்டு புதிதாக கட்டப்பட்டது. இந்த அணைக்கட்டு ஊடாக அடம்பன் குளம் , பெரிய வெள்ளாங்குளம் , உயிலங்குளம் , போன்ற பகுதிகளில் உள்ள பெரிய ,சிரிய நீர்ப்பாச குளங்களினூடாக சுமார் 800 ஏக்கர் விவசாய நிலங்கள் பயிரிடப்படுகின்றது. அணைக்கட்டுகளின் அருகில் ஒரு நாளைக்கு 150 டிப்பருக்கும் அதிகமாக மணல்கள் எடுக்கப்படுகிறது.நீர் ஊற்று வரும் வகையில் மணல் அகழ்வு செய்யப்படுவதுடன் உழவு இயந்திரங்கள் மூலமாக இரும்புத்தகடுகளை பொருத்தி ஆற்றுக்குள் இருந்து மணல்களை கரைக்கு வழித்துக்கொண்டு செல்கின்றனர். இதனால் கரையோரங்களில் உள்ள பெரிய மரங்கள் பல விழுந்துள்ளதுடன் அணைக்கட்டுப் பகுதிகளும் மணல் அரிப்பினால் விழும் நிலையில் உள்ளது. அப்படி இந்த அணைக்கட்டு சேதப்பட்டு உடையுமானால் உடனடியாக எவரும் சீரமைத்துத் தருவதற்கு முன்வர மாட்டார்கள். இதனால் விவசாயத்தை வாழ்வாதாரமாக கொண்டு வாழும் ஆயிரக்கணக்கான குடும்பங்களும் 800 ஏக்கருக்கும் அதிகமான விவசாய நிலங்களும் பாதீப்படையும்.இந்த அணைக்கட்டில் நீர் தேங்கி இருப்பதனால் கிராமங்களில் உள்ள வீட்டுக் கிணறுகளில் குடி நீர் தட்டுப்பாடு ஏற்பட்டதில்லை. இதன் மூலம் மேட்டு நில பயிர்ச் செய்கையும் பாரிய அளவில் மேற் கொள்ளப்பட்டு வருகிறது. இந்த மணல் அகழ்வை தடுத்து நிறுத்தாவிட்டால் இன்னும் இரண்டு வருடங்களில் அணைக்கட்டு முற்றாக அழிந்து விடும் அபாயம் உள்ளது.பாலியாற்று மணல் அகழ்வு தொடர்பாக அனைத்து அரச அதிகாரிகளுக்கும் பல வருடங்களாக தெரியப்படுத்தியும் எந்த ஒரு நடவடிக்கையும் எடுக்கவில்லை. -எனவே வடக்கு மாகாண ஆளுநர் தலையிட்டு பாலியாற்று மணல் அகழ்வினை தடுத்து நிறுத்தி எமது ஆற்று நீர் வளங்களையும் மக்களின் வாழ்வாதாரத்தினையும் பாதுகாக்க உதவுமாறு அப்பகுதி விவசாய அமைப்புகள் வேண்டுகோள் ஒன்றை விடுத்துள்ளமை குறிப்பிடத்தக்கது.  #மன்னார்  #பாலியாற்றில் #மணல் அகழ்வு #அணைக்கட்டு #இடிந்து   http://globaltamilnews.net/2019/127020/