சிறைப்பிடிக்கப்பட்ட ஈரான் கப்பலில் இருந்த 24 இந்தியர்களை விடுவித்துள்ளது இங்கிலாந்து அரசு..!

[ampanai]

லண்டன்: ஈரான் கடல் எல்லைக்குள் அத்துமீறி நுழைந்ததாக கூறி, அரபு நாட்டு கப்பலான எம்.டி. ரியாவை இம்மாத தொடக்கத்தில் ஈரான் அதிகாரிகள் சிறைப்பிடித்தனர். இந்த கப்பலில் மொத்தம் 12 இந்தியர்கள் பணியாற்றி வந்த நிலையில், அவர்களும் கப்பலோடு சிறைபிடிக்கப்பட்டனர். இதனால், சிறைபிடிக்கப்பட்ட இந்தியர்களை விடுவிக்க வேண்டும் என ஈரானிடம் மத்திய அரசு கோரிக்கை விடுத்தது. இதையடுத்து 9 இந்தியர்களை ஈரான் அரசு விடுவித்துள்ளதாக இந்திய வெளியுறவுத்துறை அதிகாரிகள் தகவல் தெரிவித்துள்ளனர். முன்னதாக, ஈரான் நாட்டுக்கு சொந்தமான எண்ணெய் கப்பலை கடந்த சில நாட்களுக்கு முன்பு இங்கிலாந்து சிறைப்பிடித்தது.

இதற்கு பதிலடியாக, பாரசீக வளைகுடாவில் ஹோர்முஸ் ஜலசந்தி பகுதியில் கடந்த 19ம் தேதி சென்று கொண்டிருந்த பிரிட்டன் எண்ணெய் கப்பலை ஈரான் கடற்படை சிறை பிடித்தது. ஈரான் கடல் எல்லைக்குள் அத்துமீறி நுழைந்ததாகவும், ஈரான் புரட்சிகர படையினரின் எச்சரிக்கையை பொருட்படுத்தாமல் தவறான வழியில் சென்றதால் சிறை பிடித்ததாகவும் ஈரான் தெரிவித்துள்ளது. ஸ்டெனா இம்பெரோ என்ற அந்த கப்பலில், 18 இந்தியர்கள் பணியாற்றி வந்த நிலையில், அவர்களும் ஈரானின் பிடியில் உள்ளனர். இதனால், தற்போது எம்.டி. ரியா கப்பலில் எஞ்சியுள்ள 3 பேர் உள்பட மொத்தம் 21 இந்தியர்கள் ஈரானின் பிடியில் உள்ளனர். எனவே, எஞ்சியுள்ள இந்தியர்களை விடுவிக்க பேச்சுவார்த்தை நடந்து வருவதாகவும் அதிகாரிகள் கூறியுள்ளனர்.

இந்நிலையில் இங்கிலாந்தில் உள்ள இந்திய தூதரகத்துடன் வெளியுறவுத்துறை இணை அமைச்சர் முரளிதரன் தொடர்பு கொண்டு பேசினார். ஈரான் கப்பலில் இருந்த இந்திய மாலுமிகள் 24 பேரை விடுவிக்க பிரிட்டிஷ் அரசுடன் பேசுமாறு தூதரக அதிகாரிக்கு உத்தரவு பிறப்பிக்கப்பட்டுள்ளது. இந்திய தூதரக அதிகாரி பேச்சுவார்த்தையை தொடர்ந்து இந்திய மாலுமிகள் 24 போரையும் இங்கிலாந்து அரசு விடுவித்தது.

http://www.dinakaran.com/News_Detail.asp?Nid=518358