யார் ஜனாதிபதியானாலும் ஐ.நாவிற்குப் பொறுப்புக்கூற வேண்டும் ; செல்வம் அடைக்கலநாதன்

[கிருபன்]

யார் ஜனாதிபதியானாலும் ஐ.நாவிற்குப் பொறுப்புக்கூற வேண்டும் ; செல்வம் அடைக்கலநாதன்

(நா.தனுஜா)

நாட்டில் ஆட்சிமாற்றம் ஏற்பட்டாலும், யார் ஜனாதிபதியாக வந்தாலும் அவர்கள் ஐக்கிய நாடுகள் சபைக்குப் பொறுப்புக்கூறும் நிலையிலேயே இருப்பார்கள்.

 ஜனாதிபதி மாறினாலும் ஐக்கிய நாடுகள் மனித உரிமைகள் பேரவையின் தீர்மானம் மாறாது.அந்தத் தீர்மானங்கள் முழுமையாக நிறைவேற்றப்படும்வரை அரசாங்கத்தின் மீதான ஐக்கிய நாடுகள் சபையின் அழுத்தங்கள் தொடர்ந்து கொண்டேயிருக்கும் என்று தமிழ்த் தேசியக் கூட்டமைப்பின் பாராளுமன்ற உறுப்பினர் செல்வம் அடைக்கலநாதன் தெரிவித்தார்.

காணிவிடுவிப்பு தொடர்பில் ஜனாதிபதியிடம் வலியுறுத்தியுள்ளமை, காணாமல்போனோர் அலுவலகத்தின் செயற்பாடு உள்ளிட்ட விடயங்கள் குறித்து வினவிய போது அவர் இவ்வாறு குறிப்பிட்டார். அவர் மேலும் கூறியதாவது:

ஜனாதிபதி எதிர்வரும் 30 ஆம் திகதி வடக்கிற்கு விஜயம் செய்வதற்கு முன்னர் படையினர் வசமுள்ள தமிழ் மக்களின் காணிகளை விடுதியான அறிவிப்பினை விடுக்க வேண்டும் என்று அவரிடம் வலியுறுத்தியிருக்கின்றோம். 

நிறைவேற்றதிகாரம் உடைய ஜனாதிபதி மற்றும் முப்படைகளின் பிரதானி என்ற வகையில் உண்மையில் நினைத்தால் காணிகள் அனைத்தையும் விடுவிக்கச் செய்ய முடியும். 

தமிழ் மக்களின் பிரதிநிதிகள் என்ற வகையில் காணிகளை விடுவிப்பதற்கான உத்தரவை ஜனாதிபதி வழங்கவேண்டும் என்று அவரிடம் வலியுறுத்துவது எம்முடைய கடமை. நாங்கள் அதனைச் செய்திருக்கின்றோம். எனினும் இவ்விடயம் தொடர்பில் உரிய நடவடிக்கை எடுப்பது ஜனாதிபதியின் கைகளிலேயே இருக்கின்றது என அவர் இதன்போது தெரிவித்தார்.

 

https://www.virakesari.lk/article/63289

[ampanai]

பேச்சளவில் உறுதிமொழி வழங்கும் தரப்பை  ஜனாதிபதித் தேர்தலில் ஆதரிக்க மாட்டோம் ; த .தே. கூ

ஜனாதிபதித் தேர்தலைப் பொறுத்தவரையில் வெறுமனே பேச்சளவில் மாத்திரம் உறுதிமொழிகளை வழங்கும் தரப்பினரை ஆதரிக்க முடியாது.

 

 தமிழ் மக்களின் அபிலாசைகளைப் பூர்த்தி செய்யத்தக்க வகையில் சாத்தியமான செயல்வடிவத் திட்டங்களை முன்வைக்கும் தரப்பு எதுவென்பதையும், அத்திட்டங்கள் அத்தரப்பின் அதேபோன்று தேர்தல் விஞ்ஞாபனத்தில் உள்ளடக்கப்பட்டுள்ளதா என்பதையும் கவனத்திற்கொள்வோம்.

 இவற்றுக்கு மேலாக தமிழ் மக்களின் மனங்களில் என்ன இருக்கின்றது என்பதை அறிந்து, அவற்றுக்கு அமைவாகவே ஜனாதிபதித் தேர்தலில் யாரை ஆதரிப்பது என்ற இறுதித் தீர்மானத்தை எடுப்போம் என்று தமிழ்த் தேசியக் கூட்டமைப்பு தெரிவித்திருக்கிறது.

https://www.virakesari.lk/article/63297