'குழந்தையின் உதையை உணர்ந்தேன்!’- இறந்த பெண்ணின் கர்ப்பப்பையை பெற்று குழந்தை பிரசவித்த பெண்

[பிழம்பு]

ஜெனிஃபர் கோப்ரெட்ச்க்கு தனது 17 வயதில்தான் 'தன்னால் குழந்தை பெற்றுக்கொள்ள முடியாது' என்ற செய்தி தெரிய வந்துள்ளது

அமெரிக்காவைச் சேர்ந்த 33 வயது பெண்ணான ஜெனிஃபர் கோப்ரெட்ச் சமீபத்தில் அழகான ஆண் குழந்தை ஒன்றைப் பெற்றெடுத்தார். இறந்த பெண் ஒருவரிடமிருந்து தானமாகப் பெறப்பட்ட கர்ப்பப்பை மூலம் ஜெனிஃபருக்கு இந்தக் குழந்தை பிறந்துள்ளது.

இதன் மூலம் "அமெரிக்காவில், இறந்த கொடையாளரிடமிருந்து பெற்ற கர்ப்பப்பைமாற்று அறுவைசிகிச்சைக்குப் பிறகு, பிறந்த இரண்டாவது குழந்தை" என்ற சிறப்பையும் இந்தக் குழந்தை பெற்றுள்ளது.

 

 

ஜெனிஃபர்-ட்ரு தம்பதியினர்

அமெரிக்காவில் கர்ப்பப்பைமாற்று அறுவைசிகிச்சையில் பிறந்த முதல் குழந்தை 2017-ம் ஆண்டில் உலகுக்கு வந்தது. அடுத்த ஆண்டு, பிரேசிலிய பெண் ஒருவர் இறந்த கொடையாளரிடமிருந்து பெறப்பட்ட கர்ப்பப்பை வழியாக ஒரு குழந்தையைப் பெற்றெடுத்தார். இவ்வரிசையில் ஜெனிஃபரும் கர்ப்பப்பைமாற்று அறுவைசிகிச்சையின் மூலம் குழந்தையைப் பெற்றெடுத்துள்ளார்.

 

ஜெனிஃபர் கோப்ரெட்ச் `மேயர்-ரோகிடான்ஸ்கி-கோஸ்டர்-ஹவுசர்' (MRKH) என்ற குறைபாட்டுடன் பிறந்துள்ளார். இது பெண்களின் இனப்பெருக்கத்தைப் பாதிக்கும் முக்கியக் குறைபாடு. இந்தக் குறைபாடுடையவர்களுக்கு பிறப்புறுப்பு மற்றும் கர்ப்பப்பை வளர்ச்சியடையாமலிருக்கும். இதனால் அவர்களால் தங்களது கர்ப்பப்பையில் குழந்தை பெற்றுக்கொள்ள இயலாது.

 

குழந்தை பெஞ்சமின்

ஜெனிஃபர் கோப்ரெட்ச்க்கு தனது 17 வயதில்தான் 'தன்னால் குழந்தை பெற்றுக்கொள்ள முடியாது' என்ற செய்தி தெரிய வந்துள்ளது.

ஜெனிஃபர், ட்ரூ என்பவரைத் திருமணம் செய்துகொண்ட பிறகு, இந்தத் தம்பதியினர் செயற்கை முறையில் குழந்தை பெற்றுக்கொள்ள மருத்துவரிடம் சென்றுள்ளனர். அப்போதுதான் இவர்களுக்குக் கர்ப்பப்பை மாற்று அறுவைசிகிச்சை பற்றித் தெரியவந்துள்ளது. அதன்படி 2019-ம் ஆண்டில், ஜெனிஃபர் 10 மணிநேர அறுவைசிகிச்சைக்கு உட்படுத்தப்பட்டார். இறந்த கொடையாளரிடமிருந்து பெறப்பட்ட கர்ப்பப்பை அவருக்குப் பொருத்தப்பட்டது.

இந்தச் சிகிச்சை நடந்த சில வாரங்களில் ஜெனிஃபர் கருவுற்றார். அவருக்கு அழகான ஆண் குழந்தை பிறந்தது. இது பற்றி அவர் கூறும்போது, "நான் உண்மையான பிரகாசத்தை உணர்ந்தேன்; கருவுற்றிருந்தபோது குழந்தையின் உதையை உணர்ந்தேன். அவை என் வாழ்வில் மறக்க முடியாத தருணங்கள்" என்று குறிப்பிட்டார்.

 

குழந்தை

ஜெனிஃபர்-ட்ரு தம்பதியினர் தங்கள் குழந்தைக்கு `பெஞ்சமின்' என்று பெயரிட்டு வளர்த்து வருகின்றனர். இந்தக் குழந்தை பிறந்த பிறகு, ஜெனிஃபருக்கு பொருத்தப்பட்ட கர்ப்பப்பை பலவீனமாக இருந்ததால் மருத்துவர்களால் நீக்கப்பட்டுவிட்டது.

https://www.vikatan.com/lifestyle/relationship/33-years-old-us-woman-to-get-a-uterus-from-a-deceased-donor-and-have-a-successful-pregnancy