பொங்கல் தொடர்ந்தாலும் நன்றி மறந்தாயிற்று

[nunavilan]

பொங்கல் தொடர்ந்தாலும் நன்றி மறந்தாயிற்று

 

இன்று தைப்பொங்கல். பூமியில் பயிர்கள் விளைந்து மானிடர் உள்ளிட்ட ஜீவராசிகள் பசியாறுவதற்கு மூல காரணனாய் நிற்கின்ற சூரிய பகவானுக்கு நன்றி செலுத்தும் நாளாகத் தைப்பொங்கல் அமைகிறது.

 

நிலத்தை  உழுது பயிரை விளைவித்த விவசாயிகள் தங்களின் வேளாண் செய்கைக்கு உதவிய சூரியபகவானுக்குச் சர்க்கரைப் பொங்கல் செய்து முக்கனிகளும் பசும் பால், நெய், தேன் வகைகளும் சேர்த்துப் படையல் செய்து, சூரியபகவானுக்குத் தமது நன்றியைத் தெரிவிக்கின்ற நாளாகத் தைப்பொங்கல் திருநாள் அமைகிறது.

 

தமிழர் திருநாள் என்று போற்றப்படுகின்ற தைப்பொங்கல் தட்சணாய காலம் கடந்து, உத்தராயண காலம் தொடங்கும் தைமாதத்தை வரவேற்கின்ற பொங்கலாகவும் அமைகிறது.

 

அறுவடை செய்த தானியங்களைக் கொண்டு பொங்கல் செய்து சூரியபகவானுக்கு நன்றி பாராட்டுகின்ற உயர்ந்த பண்பாடு தமிழ் இனத்துக்குப் பெருமை தருவதாகும்.

 

எனினும் இன்றைய சமகாலத்தில் தைப்பொங்கல் என்பது வெறும் பொங்கலாகத் தொடர்கிறதேயன்றி, அதற்குள் இருக்கக் கூடிய நன்றி என்ற உணர்வு மறக்கப்பட்ட விடயமாயிற்று.

 

தவிர, தமிழர் திருநாள் என்ற பேரால் பாதணிகளுடன் நின்று பொங்கல் செய்கின்ற கலாசாரமும் மேலைத்தேய காற்சட்டைகள் அணிந்து கொண்டு பொங்குகின்ற பண்பாடும் எங்களிடம் ஊடுருவிவிட்டது.

 

உண்மையில் தைப்பொங்கல் என்பது புனிதமானது. சூரியபகவானைக் கடவுளாகப் போற்றுகின்ற தமிழ் மக்கள் அதிகாலையில் எழுந்து நீராடி தூயவஸ்திரம் அணிந்து சிவ தீட்சைக்கான அனுட்டானம் பார்த்து, கோல மிட்டு சாணத்தால் மெழுகி அடுப்பு வைத்து புதிய பானையில் பொங்கல் செய்து அதனைச் சூரியபகவானுக்குப் படைத்து தேவராத் திருமுறை ஓதி, தூப தீபங்களாலும் பூக்களாலும் சூரியனுக்குப் போற்றுதல் செய்து எங்கள் நன்றியைத் தெரிவிப்பதே சூரியப் பொங்கலாம்.

எனினும் இப்போது இவை எதிர்பார்க்க முடியாததாயிற்று.

 

பொட்டலம் செய்யப்பட்டு பொங்கல் பொதி என்று விற்க, அதனை வாங்கி வந்து ஆசாரம் ஏதுமின்றி அடுப்பேற்றி பொங்குவதும் பருவத்தால் பழுக்காத காய்களுக்கு மருந்து தெளித்து நஞ்சேற்றிப் பழுக்க வைத்து படையல் செய்கின்ற நாகரிகமும் வந்து விட்ட பின்பு சூரியன் தான் என்ன செய்ய முடியும். 

 

எதுவாயினும் தை பிறந்தால் வழி பிறக்கும் என்பது தமிழரின் நம்பிக்கை. எனவே இன்று தைப்பிறப்பு. பழையன கழிந்து புதிய உத்வேகத்தில் எங்கள் வாழ்வைத் தொடங்க தைப்பொங்கல் பொங்கட்டும்.

 

தமிழ் மக்களின் வாழ்வில் மகிழ்ச்சியும் அமைதியும் சாந்தியும் நிலைக்கட்டும். இதற்கு கண்கண்ட கடவுளாய் - இயற்கையின் சாட்சியாய் விளங்கும் சூரியபகவான்  உதவட்டும்.

http://www.valampurii.lk/valampurii/content.php?id=20375&ctype=news

[குமாரசாமி]

இப்ப இருக்கிற சனத்துக்கு  பொங்கல் ஏன் என்னத்துக்கு எண்டே தெரியாது.ஹப்பி பொங்கல் எண்ட வாழ்த்து வேறை...😎

[Kapithan]

வலம்புரி எப்போதும் கொஞ்சம் இடக்கு மடக்காகத்தான் எழுதும் போலுள்ளது ?

ஆசிரிய பீடத்தில் கொஞ்சம் விசாலமாகவும் கால மாற்றத்துடன் சிந்திக்கத் தெரிந்தவர்களையும் உள்ளடக்க வேண்டும்.

[மெசொபொத்தேமியா சுமேரியர்]

என்ன செய்வது ?/ குளில் காலத்தில் பொங்கல் வருவதனால் வெளிநாடுகளில் வாழும் தமிழர் காற்சட்டையுடனும் சப்பாத்துக்களுடனும் நின்று பொங்கவேண்டியுள்ளது. அப்படியாவது எமது சடங்காகவேனும் அடுத்த தலைமுறைக்கு இது கடத்தப்படுகிறது என்று மனத்தைத் தேற்றவேண்டியதுதான்