அமெரிக்காவின் முக்கிய அரசியல் தலைவர்களுக்கு சீனாவிற்குள் நுழைய தடை!

[தமிழ் சிறி]

அமெரிக்காவின் முக்கிய அரசியல் தலைவர்களுக்கு சீனாவிற்குள் நுழைய தடை!

பதிலடி கொடுக்கும் வகையில், அமெரிக்காவின் முக்கிய அரசியல் தலைவர்களுக்கு நாட்டுக்குள் நுழைய சீன அரசு தடையுத்தரவு பிறப்பித்துள்ளது.

சீனாவில் துன்புறுத்தல்களுக்கு உள்ளாகும் முஸ்லிம் சிறுபான்மையினருக்கு எதிரான மனித உரிமை மீறல்களுக்கு காரணமானவர்களுக்கு, அமெரிக்க அரசு சில தடையுத்தரவுகளை அறிவித்த சில நாட்களில் இந்த அறிவிப்பு வெளியாகியுள்ளது.

சீனாவின் உத்தரவின் படி, சர்வதேச மத சுதந்திரத்திற்கான அமெரிக்க தூதர் சாமுவல் பிரவுன்பேக், நாடாளுமன்ற உறுப்பினர் கிரிஸ் ஸ்மித், செனட்டர் மார்கோ ரூபியோ மற்றும் டெட் க்ரூஸ் ஆகியோருக்கு நாட்டுக்குள் நுழைய தடை விதிக்கப்படுகிறது.

இது தொடர்பாக சீன வெளியுறவு அமைச்சக செய்தித் தொடர்பாளர் ஜாவோ லிஜியான் கூறுகையில், ‘அமெரிக்காவின் செயற்பாடுகள் இரு நாட்டு உறவை சீர்குலைக்கும் வகையில் உள்ளன. சீன இறையாண்மையை மீறி உள்நாட்டு விவகாரங்களில் யார் தலையிட்டாலும் அதனை ஏற்க முடியாது. சீன உள்விவகாரங்கள் குறித்தும், சீனாவுக்கு எதிராகவும் பேசிய நால்வருக்கு சீனாவுக்குள் நுழைய தடை விதிக்கப்படுகிறது’ என கூறினார்.

அமெரிக்க அரசியல் தலைவர்களுக்கு இவ்வாறு சீனா தடை விதிப்பது இதுவே முதல் முறை என்பது குறிப்பிடத்தக்கது.

https://athavannews.com/அமெரிக்காவின்-முக்கிய-அர/

[புரட்சிகர தமிழ்தேசியன்]

ஹொங்கொங்குக்கு அமெரிக்கா வழங்கிவந்த சிறப்புரிமைகளை இரத்துச் செய்தார் ட்ரம்ப்.!

தன்னாட்சிப் பிராந்தியம் என்ற வகையில் ஹொங்கொங்குக்கு அமெரிக்கா இதுவரை வழங்கிவந்த சிறப்புரிமைகளை இரத்து செய்யும் உத்தரவில் அமெரிக்க ஜனாதிபதி டொனால்ட் டிரம்ப் கையெழுத்திட்டுள்ளார்.

ஹொங்கொங்கை கட்டுப்படுத்தும் வகையில் தேசிய பாதுகாப்புச் சட்டத்திருத்தத்தை அமெரிக்கா நிறைவேற்றியதை அடுத்து இந்த நடவடிக்கை எடுக்கப்பட்டுள்ளது.

ட்ரம்ப் நிர்வாகத்தின் சீனாவுக்கு எதிரான நடவடிக்கைகளில் ஒன்றாக இது பார்க்கப்படுகிறது.

புதிய சட்டத்தால் சீனாவின் ஒரு அங்கமாகவே இனி ஹொங்கொங்கும் நடத்தப்படும் என வெள்ளை மாளிகையில் நேற்று செய்தியாளர்களிடம் பேசிய ட்ரம்ப் தெரிவித்தார்.

பிரிட்டனில் ஆதிக்கத்தின் கீழ் இருந்த ஹொங்கொங் சீனாவிடம் ஒப்படைக்கப்பட்டபோதும் அதற்கு தன்னாட்சி அதிகாரங்கள் வழங்கப்பட்டிருந்தன.

ஒரு நாடு இரு தேசங்கள் என்ற கொள்கையின் கீழ் ஹொங்கொங்குக்கு சில சுயாட்சி அதிகாரங்களும் இருந்தன.

ஆனால் சீனா அண்மையில் நிறைவேற்றிய புதிய பாதுகாப்புச் சட்டம், 1984 ஆம் ஆண்டு சீனா மற்றும் பிரிட்டன் இடையே ஒப்புக்கொள்ளப்பட்ட ஹொங்கொங்க்கான சிறப்பு உரிமையை முடிவுக்கு கொண்டு வரும் வகையில் இருப்பதாக பலரும் கருதுகின்றனர்.

சமீபத்திய பாதுகாப்பு சட்டம் 1997ஆம் ஆண்டு ஹொங்கொங் பிரிட்டனால் சீனாவிடம் திரும்ப ஒப்படைக்கப்பட்ட பின்பு கொண்டுவரப்பட்டுள்ள மிகப் பெரிய மாற்றமாக கருதப்படுகிறது.

இந்தச் சட்டம் ஹொங்கொங்கில் இயங்கும் 1,300க்கும் மேற்பட்ட அமெரிக்க நிறுவனங்களுக்கு சிக்கலை ஏற்படுத்தியுள்ளது.

ஹொங்கொங்குக்கு தற்போது அமெரிக்கர்கள் விசா இல்லாமலேயே பயணம் மேற்கொள்ள முடியும். ஆனால் புதிய பாதுகாப்பு சட்டத்தால் இனி அவர்கள் சீனாவின் கடுமையான விசா விதிமுறைகளை எதிர்கொள்ள வேண்டியிருக்கும்.

ஹொங்கொங்கில் இருக்கும் நிறுவனங்களின் உற்பத்திப் பொருட்கள் மற்றும் சேவைகளுக்கு அமெரிக்கா குறைந்த வரி விதித்து வருகிறது. இனி அமெரிக்காவின் வரி விகிதம் அதிகரிக்கப்படும் .

இந்நிலையில் இந்த நடவடிக்கை அமெரிக்கா மற்றும் ஹொங்கொங் இடையே நடக்கும் பல நூறு கோடி டொலர் மதிப்பிலான வர்த்தகத்தை கேள்விக்குறியாக்கும் எனவும் கருதப்படுகிறது.

இவ்வாறான நிலையிலேயே தன்னாட்சிப் பிராந்தியம் என்ற வகையில் ஹொங்கொங்குக்கு அமெரிக்கா இதுவரை வழங்கிவந்த சிறப்புரிமைகளை இரத்து செய்யும் உத்தரவில் அமெரிக்க ஜனாதிபதி டொனால்ட் ட்ரம்ப் கையெழுத்திட்டுள்ளார்.

http://aruvi.com/article/tam/2020/07/15/14464/