பிரித்தானிய தமிழர் ஒருங்கிணைப்புக்குழு லண்டனில் ஆர்பாட்டத்தில் ஈடுபடவுள்ளனர்

[கிருபன்]

பிரித்தானிய தமிழர் ஒருங்கிணைப்புக்குழு லண்டனில் ஆர்பாட்டத்தில் ஈடுபடவுள்ளனர்

(ஆர்.யசி)

தமிழ் பேசும் மக்களின் அபிலாஷைகளை பூர்த்தி செய்வதும் இலங்கை இந்திய ஒப்பந்தமும் என்ற பெயரில் தமிழ் தேசிய கட்சிகள் ஒன்றிணைந்து இந்திய பிரதமருக்கு அனுப்பி வைக்கப்படவுள்ள கடிதத்தை கண்டித்தும், கடிதத்தை கைச்சாத்திட்ட தமிழ் அரசியல் தலைவர்களின் செயற்பாடுகளை கண்டித்தும் பிரித்தானிய தமிழர் ஒருங்கிணைப்புக்குழு எதிர்வரும் 16 ஆம் திகதி லண்டனில் எதிர்ப்பு நடவடிகைகளில் ஈடுபவுள்ளனர்.

தமிழ் மக்களின் அரசியல் அபிலாஷைகளை வென்றெடுக்கவும் 13 ஆம் திருத்த சட்டத்தை நடைமுறைப்படுத்தவும் வலியுறுத்தி தமிழ் பேசும் கட்சிகள் ஒன்றிணைந்து 'தமிழ் பேசும் மக்களின் அபிலாஷைகளை பூர்த்தி செய்வதும் இலங்கை இந்திய ஒப்பந்தமும்' என்ற பெயரில் தயாரித்துள்ள கடிதத்தை எதிர்வரும் 18 ஆம் திகதி இலங்கையில் உள்ள இந்திய உயர் ஸ்தானிகர் காரியாளையத்தில் கையளிக்கவுள்ளதாக தெரிவிக்கப்படுகின்ற நிலையில் சர்வதேச தரப்பில் இதற்கு எதிரான கருத்துக்கள் பதிவாகிக்கொண்டுள்ளன. 

இந்நிலையில் பிரித்தானிய தமிழர் ஒருங்கிணைப்புக்குழு குறித்த செயற்பாடுகளை கண்டித்துள்ளதுடன் அவர்களின் எதிர்ப்பு நடவடிக்கைகளை முன்னெடுக்கவுள்ளதாகவும் தெரிவித்துள்ளனர்.

இந்திய இலங்கை  ஒப்பந்ததின் கீழ் உருவாக்கப்பட்டுள்ள 13ம் திருத்தச்சட்டத்தின் கீழ் தமிழர்களின் இருப்பை இல்லாமல் ஆக்குவதற்கான கடிதம் ஒன்றில் தமிழ் அரசியல் வாதிகள் கையெழுத்திட்டுள்ளதாகவும்,  மிகக்குறிப்பாக இந்திய பிரதமருக்கு எழுதப்பட்டுள்ள இந்த கடிதத்தில், 13ம் திருத்தச்சட்டத்தை அமுல் படுத்தக்கோரியும் ஒற்றையாட்சிக்குள் தாம் சுயநிர்ணய உரிமையை அனுபவிப்பதாகவும் தமிழ் மக்களின் அடிப்படை அபிலாசைகளை இந்திய அரசிடம் அடகு வைத்திருக்கின்றனர் எனக் குறிப்பிட்டுள்ள பிரித்தானிய தமிழர் ஒருங்கிணைப்புக்குழு,

கடிதத்தின் இறுதியில் தாம் இந்தியாவிடம் 13ம் திருத்தச்சட்டத்திற்கான அழுத்தத்தை வழங்க கோருவதாகவும்  ஒற்றைசிக்குள்ளான பிரிக்கப்படமுடியாத நாட்டுக்குள்ளேயே தாம் தீர்வை எதிர்பார்ப்பதாகவும் குறிப்பிடப்பட்டுள்ளது. அது மட்டுமின்றி தமிழ் மக்களை பிராந்திய சிறுபான்மையினர் என்கின்ற வகையிலான வாசகங்கள் கூட குறிப்பிடப்பட்டுள்ளது. 

இவ்வாறு தமிழ் மக்களையும் அவர்கள் இதுவரை இழந்த பேரிழப்புக்களையும் ஒட்டுமொத்தமாக இந்தியாவிடம் அடகு வைத்து தமிழ் மக்களுக்கு பெரும் துரோகத்தை இழைத்திருக்கின்றனர்  

இவர்களின் கோரிக்கைபோல புதிய அரசியலமைப்பு ஒன்று நிறைவேற்றப்பட்டால் தமிழர்களின் இனப்பிரச்சனைக்கான ஒரு இறுதித்தீர்வாகவே சர்வதேசம் இதை எடுத்தக்கொள்ளும் அதன்பின் எமது குரலின் நீதி சாகடிக்கப்பட்டு நாம் ஏதிலிகளாக காலம் முழுதும் வாழ்ந்து சாகவேண்டிய பெரும் துயர நிலை எமக்கு ஏற்படும். 

ஆகவே தமிழ் பேசும் மக்களின் அபிலாஷைகளை பூர்த்தி செய்வதும் இலங்கை இந்திய ஒப்பந்தமும் என்ற பெயரில் தமிழ் தேசிய கட்சிகள் ஒன்றிணைந்து இந்திய பிரதமருக்கு அனுப்பி வைக்கப்படவுள்ள கடிதத்தை கண்டித்தும், கடிதத்தை கைச்சாத்திட்ட தமிழ் அரசியல் தலைவர்களின் செயற்பாடுகளை கண்டித்தும் எதிர்வரும் 16 ஆம் திகதி காலை 11 மணிக்கு லண்டனில் இலக்கம் 10 டவ்லிங் வீதிக்கு முன்பாக தாம் எதிர்ப்பு ஆர்ப்பாட்டத்தில் ஈடுபட்டு தமது எதிர்ப்பை வெளிப்படுத்தவுள்ளதாக அவர்கள் அறிவித்துள்ளனர். 
 

https://www.virakesari.lk/article/120727