கவிதைக் களம்

கனவாய் வந்தாய் காவியமே-பா.உதயன்

4 months ago

கனவாய் வந்தாய் காவியமே 


எங்கு இருந்தாய் எங்கு இருந்தாய் 
எந்தன் கவியே எங்கு இருந்தாய் 
கண்ணில் உனை நான் கட்டிவைத்தேன் 
என் காதல் கவியே எங்கு இருந்தாய் 

என்னில் உனக்காய் உயிர் வடித்தேன் 
என் இதயம் முழுக்க உனை வரைந்தேன் 
உன்னில் பின்னால் நிழல் போலே 
உன்னோடு இருந்தேன் உன் உயிர் போலே 

காலை வந்த மழை துளிபோல் 
கவித்துளி  போலே  உனை வரைந்தேன் 
மாலை வந்த மதி போலே 
காலைக் கனவில் உனை கண்டேன் 

அழகே தமிழே என் கவியே 
என் அருகில் பூவாய் பூத்தவளே 
புலரும் பொழுதில் எனை எழுப்பி 
கனவாய் வந்தாய் காவியமே .

குருதிஸ்தான் குழந்தைகளுக்காக- பா .உதயன்

4 months ago


 


யுத்தமும் அழிவும் 
அநீதியும் அவலமும்
ஆக்கிரமிப்பும் 
பசியும் பட்டினியுமாக 
மனிதம் மறைந்துபோன 
உலகத்தின் மேனி
சீழ் பிடித்து 
ஒழுகிக்கொண்டிருக்கும் போது 
உண்மைகளையும் 
சத்தியங்களையும்  
எழுதுங்கள் 
உலகத்தின் ஒரு மூலையில் 
ஒரு ஒரமாக நின்று 
அழும் குழந்தை
எப்படியாவது
வாழ்ந்து தான் 
ஆகவேண்டும் என்ற 
ஒரு சிறு நம்பிக்கையுடன் .

இளவேனிலும் உழவனும் வ.ஐ.ச.ஜெயபாலன்

4 months 1 week ago

 

இளவேனிலும் உழவனும் வ.ஐ.ச.ஜெயபாலன்

1970ல் பிரசுரமான எனது ஆரம்பகால கவிதை ஒன்று

காட்டை வகிடுபிரிக்கும்
காலச்சுவடான
ஒற்றையடிப்பாதை.
வீடுதிரும்ப
விழைகின்ற காளைகளை
ஏழை ஒருவன்
தோளில்
கலப்பை சுமந்து
தொடர்கிறான்.
.
தொட்டதெல்லாம் பொன்னாக
தேவதையின் வரம்பெற்ற
மாலைவெய்யில்
மஞ்சட்பொன் சரிகையிட்ட
நிலபாவாடை
நீளவிரிக்கிறது:
இதயத்தைக் கொள்ளையிட
வண்ணத்துப் பூச்சிகள்
வழிமறிக்கும்
காட்டுமல்லிகைகள்
காற்றையே தூதனப்பி
கண்சிமிட்டும்.

அழகில்
கால்கள் தரிக்கும்.
முன்நடக்கும் எருதுகளோ,
தரிக்கா.

ஏழையவன்
ஏகும்வழி நெடுந்தூரம்.

 

.

Image may contain: 1 person, smiling, close-up

.

.

ஆண் ஆதிக்கம்-பா.உதயன்

4 months 1 week ago

 


எமது உடலின்
சதைகளை மட்டும்
உண்டு விட்டு 
எங்களின் எலும்புகளை 
எறிந்து விட்டு 
மதம் என்ற 
போர்வைக்குள் 
போய் ஒளிந்து கொள்கின்றன 
ஆண் ஆதிக்கம் 
என்னும் மனித மிருகங்கள் 
அன்பே சிவம் 
என்று அறியாதவர் 
ஆயிரம் முறை 
ஆண்டவனை தொழுது 
என்ன பயன் .

ரூமிக்கு -வ.ஐ.ச.ஜெயபாலன் ,

4 months 2 weeks ago

.

Image may contain: one or more people, hat and text

Image may contain: 1 person, beard, close-up and indoor

 

.

ரூமிக்கு
-வ.ஐ.ச.ஜெயபாலன்

,
நலமா ரூமி,
கவிஞர்களின் கவிஞரே

உலரும் நமது உடலும் உயிரும் செளிக்க
மது வார்க்கிறவர்கள் எங்கே?
சுவர்கத்து நூலேணிகளில்
இறங்கி வருகிறதே வசந்தம்.
பாரசீக ரோஜாவோ,
மதுரை மல்லியோ தேன் சிந்துமுன்னம்
நம் இதயங்கள் திறக்க வேண்டுமே?.
.
”இதயம் திறக்கும்வரை
உடைத்துக்கொண்டிரு” என்கிறாயே. ரூமி.
ஆம், மூடிய இதயம்
சிறையிலும் கொடிதே.
ஆனாலும் உடைந்த இதயம்
நினைவின் ஆறாப் புண்ணல்லவா?
என்போல் நீயும்
தகிக்கும் படைப்பு வெறியில் உளறுகிறாய்.
.
அவசரப்படாதே ரூமி,
இது எப்பவுமே திறந்திருக்கும் மதுக்கடை.
நானோ இதயம் எப்பவும்
இயல்பாக பூக்குமென காத்திருப்பவன்.
உலகில் முத்தமிட
அம்மாவாக சகோதரியாக தோழியாக
காதலியாக மகளாக
கடைசிப் பெண் இருக்கிற வரைக்கும்
மூடிய நம் இதயங்கள் மலராது போமோ?
.
ரூமி,
அவரவர் வழிகள் அவரவருக்கு எனினும்
அவசரப்பட்டு இதயத்தை உடைக்காதே.
வசந்த காலம் பூச்சி புழுக்களுக்குக்கூட
அழகிய நாட்க்களை வைத்திருக்கிறதே.
நீயும் காத்திரு.
.

 


.

 

ஒரேயொரு.........!

4 months 2 weeks ago

                              உ 
        ஒரேயொரு ....................!

ஒரேயொரு  வானுயர்ந்த கட்டிடம் - உயரத்தில் 
ஒரேயொரு  நீள்சதுர அறை  - உச்சியில் 
ஒரேயொரு  சாரளம்  கூரைக்குள் அசையும்  - ஆங்கே 
ஒரேயொரு  கட்டிலோடு மெத்தையுடன் தலையணை ......!

ஒரேயொரு  குறுக்கு மறைப்பில் சமையலறை - எதிரே 
ஒரேயொரு  குளியலறை நாலடி நடையில் 
ஒரேயொரு  மீன்தொட்டி ஒரு பொன் மீனோடு 
ஒரேயொரு  நாய்குட்டி கழுத்தில் கயிறோடு .....!

ஒரேயொரு  அம்மணி அகவையோ எண்பது  - காலையில் 
ஒரேயொரு  முறை திறப்பாள் சாரளத்தை 
ஒரேயொரு  தரம் வரும் தென்றல் தங்கி நிக்கும் 
ஒரேயொரு  துளிகளாய் வரும் மழை முகம் நனைக்கும் ....!

ஒரேயொரு  தடவை அழைப்புமணி எதிரொலிக்கும் 
ஒரேயொரு  க்கால் திறந்த கதவிடுக்கில் உணவிருக்கும் 
ஒரேயொரு  கதிரவன் அவள் நோக்க மலைமேல் உதயம் - அந்த 
ஒரேயொரு  பகலவன் அவள் பார்க்க கடல் விளிம்பில் அஸ்தமனம்.....!
 

நிலம்-பா .உதயன்

4 months 3 weeks ago

நிலம்


எமக்கோ குந்தி 
இருக்க ஒரு முழ 
நிலம் கூட இல்லை 
எமக்கு முன்னும் பின்னும் 
அருகிலும் பக்கத்திலும் 
புத்தரின் வேர்கள் 
முளைத்து விட்டன 
இப்போது எல்லாம் 
சப்பாத்து கால்களின் 
சத்தங்கள் தான் 
நிலம் முழுக்க 
நிரம்பிக் கிடக்கின்றன 
உதைபடும் நிலங்கள் 
மௌனமாக அழுதுகொண்டு 
இருப்பதை 
யார் தான் அறிவர் .

எப்படி மறப்பாள் -பா .உதயன்

5 months 2 weeks ago

 

தூங்கும் போதும் 
தூங்கி எழும்பும் போதும் 
எல்லா நேரமும் 
எப்பவும் இவளுக்கு இவள் மகன் 
நினைப்புத்தான் 
ஊர் உறங்கி கிடந்த 
மாலை ஒரு நாள் 
ஒருவருக்கும் தெரியாமல் 
இழுத்துப்  போனார்கள் 
அன்று போனவன் போனவன் தான் 
இன்றும் இவன் நினைப்பு தான் இவளுக்கு 
இன்று  இவள் ஊரின் 
அம்மன் தேர் திருவிழா 
ஆண்டு தோறும் 
அந்த கற்பூர சட்டியை 
தலையில்  வைத்தபடி 
அவனை இடுப்பில் அணைத்தபடி 
அந்த ஊரே அதிரும்படி 
அரோகரா சொன்னபடி 
அந்த அம்மன் தேர் பார்க்க 
அவனோடு சென்ற 
அந்த நாட்களின்  நினைப்போடு 
எப்பவும் இவளுக்கு இவன் 
மகன் நினைப்பு தான் 
கடைசியாய் இவன் எடுத்த 
படத்தை காவியபடி 
தேடித்தேடி அலைந்து
தெரு முழுக்கு கூவி திரிந்தும் 
எவனும் திரும்பி கூட பார்க்கவில்லை 
எட்டி ஒரு ஆறுதல் கூட சொன்னதில்லை 
விட்ட பாடாயும் இல்லை 
இவள் விம்மலும் அழுகையும் 
இப்பவும் இவளுக்கு 
இவள் மகன் நினைப்பு தான் 
எப்படி மறப்பாள் 
அவள் வலி அவளுக்கு 
தானே தெரியும் .

ஓ அமேசான் (Pray for Amazon) பா .உதயன்

5 months 3 weeks ago

ஓ அமேசான் (Pray for Amazon)

உலகத்தின்  உடல் 
தீ பிடித்து எரிகிறது 
உன்னோடு சேர்த்தே 
மனிதப் பிழைகளினால் 
மண்ணில் 
மனிதனும் இல்லை 
மரமும் இல்லை 
என்றாகிப்போய் விடுமோ
ஒரு உலகம் தானே 
உனக்கும் எனக்கும் 
ஏதோ பயமாக இருக்கிறது 
உலகக் குழந்தைகளை 
நினைக்கையிலே 
ஓ உனக்காகவே ஆமேசூன் 
ஒவ்வொரு எங்கள் கண்ணீர் துளிகளும் 
உன்னை வந்து அணைக்கட்டும் .

 

 

 

 

பாலக்காடு 2006 - வ.ஐ.ச.ஜெயபால‎‎ன்

5 months 3 weeks ago

பாலக்காடு 2006
ஒரு தோழியோடு பாலக்காட்டில் திரைக் கதை விவாதத்தில் ஈடுபட்டிருந்தேன். பகல் முழுக்க கதை விவாதம் நடக்கும். மிகவும் அன்பான தோழி. ஆனால் மாலைப்பொழுது கறுத்ததும் அவள் முகமும் கடு கடுப்பாகும். /இனி அவள் த‎‎ன் மனசின் ஒப்பனைப் பெட்டி திறப்பாள். /முகம் ததும்பும் நட்ப்பை ஒட்டத் துடைத்து விட்டு பகை பூசிபோர்ச் ச‎ன்னதங்கள் எழுதுவாள்./ எதில் ‏‏இருந்தும் கண்டுபிடிப்பாள் ஒரு பெரும் தாக்குதலுக்கான கூச்சலை./
.
பெண்கள் எல்லா ஒப்பனை பெட்டிகளையும் ஆயுதங்களையும் தங்கள் மனசுக்குள் வைத்திருக்கிறார்கள் என்பதை அந்த நாட்க்களில்தான் உணர்ந்தேன். 
.

.68409794_365087234158893_3969578688164397056_n.jpg?_nc_cat=104&_nc_oc=AQkuCeRwjeqMU0XDUtSJ9H-0i6pl_Eyv_d2vNpq1vCnNymiQwkmwFEqLmOsqXXefPcWXMAisiNfG6PAJoNXtoyo4&_nc_ht=scontent.fmaa2-1.fna&oh=5a3c9139e34edfe24af5803da507a594&oe=5DCB51F3


பாலக்காடு 2006
வ.ஐ.ச.ஜெயபால‎‎ன்
.
வண்ன ஆடைகளை
வானெங்கும் வீசிவிட்டு
அம்மணச் செஞ் சூரிய‎ன்
அரபிக் கடல்‏ இறங்க
ஆகாச விளிம்பு பற்றும்.
நாமும்பகலி‎‎ன் பல்லக்குத் தூக்கி
களைத்துப்போய் ‏இருந்தோம்.
கிளர்ந்து கு‎‎ன்று தளுவும் முகிலி‎ன் ஈரக்கருங்கூந்தல் இரப்பர்காட்டில்சரிந்து கீழே அறுவடையாகும் வயல்மீதும் சிந்திப் படர்கிறது.
.
வா‎ன் நோக்கும் அறுவடைக்காரி
முதல் துளியையே
குருவி எச்சமாய் அருவருத்து
நச்சு வசவுகளை உமிழ்கிறாள்.
நாளை ‏அவளேவெட்கமி‎‎ன்றி
பொங்கலும் வைத்து
மழையே வா எனப் பாடுவாள்.‏
இது வாழ்வு.

வானில் இரவு த‎ன்
இளம்பிறை மதுக் கிண்ணத்தை
உயர்த்தியாயிற்று.
எ‎ன்‎ தோழியோ பரபரக்கிறாள்.
இனி அவள் த‎‎ன் மனசின்
ஒப்பனைப் பெட்டி திறப்பாள்.
முகம் ததும்பும் நட்ப்பை
ஒட்டத் துடைத்து விட்டு
பகை பூசிபோர்ச் ச‎ன்னதங்கள் எழுதுவாள்.
எதில் ‏‏இருந்தும் கண்டுபிடிப்பாள்
ஒரு பெரும் தாக்குதலுக்கான கூச்சலை.
காலையே கிளம்புகிற பாவனையில்
தே‎ன் கமழும் மு‎ன்னிரவின்
தலையை மிதித்து எழுவாள்.
.
யுத்த த‎ந்திரங்களை அறிவே‎‎ன்.‏
இது தந்திர யுத்தம்.
ஆனாலும் வழக்கம்போல்
காலை விடியும்ஒப்பனைகளின்‎றி. 

- 2006

மனக்குரங்கு -பா .உதயன்

5 months 4 weeks ago

மனக்குரங்கு 

 

கால்  நீட்டி 
குந்தி இருந்தபடி 
கட்டளை இடுகிறது 
என் மனக்குரங்கு 
அதை கட்டிப்போட்டு 
சும்மா இரு 
என்று சொல்ல 
நான் என்ன 
புத்தனா புனிதனா 
ஆசையும் பாசமும் கொண்ட 
அந்த மனக்குரங்கு தானே 
அது ஆடி அடங்கும் வரையிலிம் 
எந்தக்கிளை வேண்டுமானாலும் 
தாவித் திரியட்டும் 
ஆசையும் பாசமும் அகன்று 
அந்த ஞானம் அடைந்தவனை 
அறியும் வரையிலும் 
இப்போதைக்கு இது 
இப்படியே 
இருந்து தொலையட்டும் .

கடலோரம் தென்னம் தோப்பு_பா .உதயன்

6 months 1 week ago

கடலோரம் தென்னம் தோப்பு 
கரை மீது இரண்டு கிளிகள் 
கடல் அலையில் சுரம் எடுத்து 
கனவுகளை பாடுது 

காற்றினிலே தொட்டில் கட்டி 
கிளி இரண்டும் ஆடுது 
தென்றலிலே முகம் நனைத்து 
தேன்நிலவை தேடுது 

விழி ஓரம் கவி எழுதி 
வரம் ஒன்று கேக்குது 
வாழ்வு தனை வரையுது 
வசந்தத்தை பாடுது 

அலை வந்து சுரம் பாட 
அவள் மடி மீது தலை வைத்து 
மனதோடு பல ராகம் 
கிளி இரண்டும் சுக ராகம் 

அந்தி வானம் சிந்தி விட்ட 
அழகான மழை துளியில் 
கிளி இரண்டும் நனையுது 
கீதங்கள் கேக்குது 

ஏழு சுரத்தில் கவிதை எழுதி 
இதயம் இரண்டும் பேசுது 
எல்லை இல்லா வானத்தருகே 
ஏதோ கீதம் பாடுது .

கிளி இரண்டும் இசை பாட 
கிண்கிணியின் ராகத்திலே 
கடல் அலையும் ஆடுது 
காதல் மொழி பேசுது 

நினைவு அழியா கனவுடனே 
நீண்ட தூரம் பறப்பதற்கு 
கிளி இரண்டும் சமரசங்கள் 
கடற்கரையில் புது வசந்தம் .

 

மூன்றாவது மனிதனின் கவிதை. - வ.ஐ.ச.ஜெயபாலன்.

6 months 1 week ago

(உன் கணவன்) ”காட்டான்தான். என்றாலும் எம்முன்னே, நட்போடு அவனுதிர்த்த பூமுறுவல்கள் இன்றும் கமழும்.  ஜனநாயகமே கற்பென்றிருந்த அவன் காதலின் முன் இந்த ஞாலம் கடுகு”
.

Image may contain: 1 person

.
மூன்றாவது மனிதனின் கவிதை.
- வ.ஐ.ச.ஜெயபாலன்.
.
என்றோ ஆழ்மனதுள் தைத்து
இன்ன்னும் சிப்பிச் சிறு மணலாய் நெருடும்
காலமுகமான
ஒரு கவிதையடி நீ.
தொடுவான் எரிய
மணல் ஊருகி அலை புரளும் பாலையிலே
ஈடன் பூந்தோட்டத்து வழி தவற
ஓயாமல் சபிக்குமொரு 
ஒட்டகத்தைப் புணர்ந்தவன் நான்.
.
ஏவாள் நீ இன்றெங்கே.
உந்தன் உடற் தணலின் முலைச் சுவாலை
இதழ் பொசுங்கத் தின்று உயிர் எரிந்த காலத்தே
நீ இச்சித்தும் நான் தவிர்த்த
அந்த விலக்கப் பட்டகனி இன்னும் இருக்கிறதா.
உன்னிடத்தே வளைய வளைய வந்து
எனைக் கண்டால் நச்சுப் பொறாமை வழியச் சிரித்திடுமே
அந்த அருவருத்த பாம்பு
அது எங்கே.
உன் பிள்ளை ஒன்றுக்குப் பாம்புக் கழுத்து
மற்றதற்ககுப் பாம்புக் கண் என்ற
ஊர்வாய் மொழியைஒப்பவில்ல்லை என் மனசு.
.
இருள் கலைய முன்னெழுந்து காடு செலல்
நள்ளிரவிற் சுமையோடு வீடடைதல்
இரவெல்லாம் பதனிடுதல் என்றிருக்கும்
ஆதாம் சுகமா.
காட்டான்தான்
என்றாலும் எம்முன்னே
நட்போடு அவனுதிர்த்த பூமுறுவல்கள்
இன்றும் கமழும்.
ஜனநாயகமே கற்பென்றிருந்த அவன் காதலின் முன்
இந்த ஞாலம் கடுகு.
.
இது யாருடைய வாழ்வு.
யார் பட்டி மந்தைகள் நாம்.
கூடல் கழிதல் பெருகல் பிரிதலென்று
நம் இருப்பு யாருடைய கணித விழையாட்டு.
எது பகடை எவர் காய்கள்
இது எவருடைய சதுரங்கம்.
.
- 1995

எங்கிருந்தோ பாடுகிறாள் -பா .உதயகுமார்

6 months 1 week ago

 

அழகிய நிலவு சிரிக்கிறது 
ஆயிரம் பறைவைகள் பறக்கிறது 
ஆயிரம் பறைவைகள் பறக்கையிலே 
அழகிய கீதங்கள்  இசைக்கிறது 

காலைச்  சூரியன் கண் விழிக்க 
காற்றினில்   ஆடிய கார்த்திகை பூ 
காலையின் அழகை பூமியில் வரையுது 
கண்ணைத் திறந்து ஒரு மல்லிகை மொட்டு 
சோம்பலை முறித்து சிரிக்கிறது 

காற்றினில் ஆடிய திசைகளில் என் மனம் 
பாட்டுக்கு மொட்டு ஒலி இசைக்கிறது 
கண்ணுக்கு தெரியா தூரத்தில் இருந்து 
என் கனவினை ஒருத்தி பாடுகிறாள் 
கனவுகள் எழுதிய கவிதையின் நினைவினை 
காத்திடம் சொல்லி அனுப்புகிறாள் .   

நன்றி யாழ் இணையம் - வ.ஐ.ச.ஜெயபாலன்

6 months 2 weeks ago

”முரட்டு மேதை என்பர் மேலோர்
'இங்கிதம் அறியான் அறியான்' என்பர்
கபடம் நிறைந்த இளம் சீமாட்டிகள்.”

.

Image may contain: one or more people, beard and indoor

.

இது என் சுய தரிசனக் கவிதை. யாழ் பல்கலைக் கழகத்தில் மாணவர் தலைவனாக செயல்பட்ட நாட்க்களில் எழுதியது. ஒரு போராட்டத்தின்போது பல்கலைக்கழக தலைவராக இருந்த பேராசிரியர் கைலாசபதி என்னை intellectual and Thug என திட்டினார். அவருக்கு பதிலாக எழுதி பல்கலைகழக மாணவர் மன்ற அறிவுப்பு பலகையில் ஒட்டிய கவிதை. தற்செயலாக யாழ் இணையத்தில் தேடியபோது கிருபன் என்னைபற்றிய குறிப்புகளோடு பதிவிட்டிருந்தார். யாழ் இணையத்துக்கும் கிருபனுக்கும் நன்றிகள். என் இளமைக் காலம்பற்றி கிருபன் எழுதிய குறிப்பின் இணைப்பு கீழே இணைக்கபட்டுள்ளது. 
.
கள்ளிப் பலகையும் கண்ணீர்த் துளிகளும்
- வ.ஐ.ச.ஜெயபாலன் -
.
முரட்டு மேதை என்பர் மேலோர்
'இங்கிதம் அறியான் அறியான்' என்பர்
கபடம் நிறைந்த இளம் சீமாட்டிகள்.
.
ஓயாது துரத்தும் சவக்குழி விழுங்குமுன்
ஒரேஒரு முறையே வாழுமிவ் வாழ்வில்
கையா லாகாத கோழையைப் போல
கொடுமையும் சூதும் நிறைந்த உலகை
சகித்தும் ரசிக்கும் பாவனை செய்தும்
சான்றோன் என்று மாலைகள் சூட
நானும் எனது நண்பரும் விரும்போம்.
.
வீணையோடும் தூரிகையோடும்
மூலைமட்டம் ஸ்டெதஸ்கோப் அரிவாள்
சம்மட்டி போன்றவை பழகிப் போன
கைகளை உயர்த்தி நெஞ்சுகள் நிமிர்த்தி
எனது தோழர் புடை சூழ்வார்கள்.
.
பொன்னாய் அழகு பொலியினும் விலங்கை
அப்பிய மலமாய் அருவருத் துதறுவோம்.
வெடி மருந்துகள் தோய்ந்த எம்நாவு
ஓய்ந்திருக்காது.
தடைகள் சீனப் பெரு மதிலாயினும்
தகர்க்கும் பணியினைப் பேனைக் குச்சியால்
அங்குரார்ப்பணம் செய்வேன்.
தடைகளை தகர்த்தும் விலகியும் தொடர்ந்து
அதிமானிடராய் முன் சென்றிடுவோம்.
விழுமிடத் தெமக்கோர் நடுகல் நிமிர்த்தி
எமது பிள்ளைகள் பெண்டுகள் தொடர்வார்.
.
கடலின் மணலை எண்ணித் தீர்ப்பினும்
மானிடர் எமது வம்சக் கொடியை
சவக்குழி விழுங்கித் தீர்த்திடல் முடியுமோ?
விலங்கும் சிறையும் வளைத்திடல் கூடுமோ?
.
விடுதலை பெற்ற தோழியரோடு
கட்டாந் தரையின் வாழ்வே உவப்பு.
பெரிய இடத்துச் சீமை நாய்களாய்
கார்ப்பவனி வரும் இல்லறக் கனவில்
எமது தோழர் தோழியர் தேயார்.
.
கொடிய உலகம் சான்றோன் என்னவும்
இளம் சீமாட்டிகள் இனியவன் என்னவும்
குனிந்து நடக்கும் கூழங்கையர்கள்
பெறுமதி கூடிய காலணி இலங்கும்
கால்களைத் தேடியே முத்தம் கொடுப்பர்.
பொன்முலா மிட்ட சவப்பெட்டிப் பரிசால்
உலகம் அவர்களைக் கெளரவம் செய்க.
.
வெளிப் பூச்சற்ற கள்ளிப் பலகையும்
வெம்மை நிறைந்த கண்ணீர்த் துளிகளும்
எங்களுக்காக இருக்கவே செய்யும்.
.
- 1979
யாழிணையத்தில் கிருபன் எழுதிய குறிப்பு.
https://yarl.com/…/162206-%E0%AE%9C%E0%AF%86%E0%AE%AF%E0%…/…

பல முகங்கள்

6 months 2 weeks ago


அன்பாக பேசி 
அருகோடு இருப்பவர் போல் 
நடிப்பவர் எல்லாம் 
தங்கள் தேவை முடிந்தவுடன் 
உன்னை விட்டு விலகிவிடுவார்கள் 
உண்மைகளை மறைப்பதற்காக 
பல பொய்களை கூட 
சொல்லுவார்கள் 
இருந்தபோதும் 
பகைமைகளை 
வளர்த்துக்கொள்வதில் 
பயன் ஏதும் இல்லை 
வலிகளையும் துன்பங்களையும்
பட்ட காயங்களையும் 
நினைத்து கொண்டு இருந்தால் 
வாழ்க்கை நகராது 
உண்மைகளை ஒரு நாள் 
இவர்கள் அறியும் பொழுது 
தாங்கள் கொட்டிய 
குப்பைகளை நினைத்து 
வருத்தப்படுவார்கள் 
பார்க்க வேண்டிய சந்தர்பங்களில் 
ஒரு புன்னகையோடு 
நகர்ந்து விடுங்கள் .

 


 

சதுரங்கம் - வ.ஐ.ச.ஜெயபாலன்.

6 months 2 weeks ago

ஆண் பெண்ணுக்கிடையில்
ஒரு கண்ணுக்குத் தெரியாத சதுரங்கப் பலகை
எப்போதும் விரிகிறது.

.

Image may contain: 2 people, including Booma Eswaramoorthy, people smiling, people sitting and outdoor

சதுரங்கம்
- வ.ஐ.ச.ஜெயபாலன்.
.

சிருஸ்ட்டி வேட்கையில்
ஆனைமலைக் காடுகள் பாடுகிற
அந்தி மாலை.
அங்கு உயிர்க்கிற மந்திரக் கம்பளத்தில்
உன்னையே சுற்றுதடி மனசு.
.
இது தீராத காதலடி
நீதான் கண்டு கொள்ளவில்லை.
அதோ புல்லின்கீழ் கட்டெறும்பாய்
தொலை கீழ் மூங்கிற் காடுகளுள் ஊரும்
யானைபோல
உண்மையில் என் காதலும் பெரியதடி.
,
காமத்தில் சூரியன்
பொன்சிந்த இறங்கி வர.
நாணிப் புவிமகள்
முந்தானையாக முகிலை இழுக்கின்றாள்..
ஆகா அப்பன் குதிருக்குள் இல்லை என்கின்ற
உனது நாடகம் அல்லவா இது.
,
ஆண் பெண்ணுக்கிடையில
ஒரு கண்ணுக்குத் தெரியாத சதுரங்கப் பலகை
எப்போதும் விரிகிறது.

.
என்னோடு இன்னும் சிலரை
பந்துகளாய் எறிந்து ஏந்தி ஆடும்
வித்தைக்காரியில்தான் காதலானேன்.
அதனால் என்ன.
கீழே காட்டில் .
ஒரு மூங்கில் புதரை மட்டுமே மேய்ந்த
யானையும் இல்லை
ஒரு யானை மட்டுமே மேய்ந்த
மூங்கில் புதரும் இல்லை.
.
எதுவும் செய்..
ஆனால்
இறுதியில் நாம் மட்டுமே மிஞ்சவேண்டும்.
நம் மரபணுக்களில் கவிதை கோர்க்க.

இல்லறம் - வ.ஐ.ச.ஜெயபாலன்

6 months 2 weeks ago
”நமது அன்றாட மறதிக்குப் பரிசுதானே
இந்த நட்பும் வாழ்வும்.”
*
Image may contain: one or more people, plant, flower and outdoor
.
இல்லறம்
- வ.ஐ.ச.ஜெயபாலன்
.
ஆற்றங்கரையில்
இன்னமும் தோற்றுப் போகாத மரம் நன்.
.
இன்று தெளிந்து போய்
புல்லும் சிலம்பாமல் நடக்கிறது காட்டாறு.
விடியலில் இருந்தே ஒளியைக் கசக்கி
ஹோலிப் பண்டிகைக் குறும்போடு
வண்ணங்கள் வீசி
தொட்டு தொட்டுச் செல்கிறது அது
நேற்று வெறி கொண்டாடியது தானல்ல என்பதுபோல.
.
எனது கன்றுகள்
முளைத்தெழுகிற நாள்வரையேனும்
கைவிட்டகலும் வேர்மண் பற்றி
பிழைத்திருக்கிற போராட்டத்தில்
நேற்று அடைந்த விரக்தியை மறந்தேன்
அது நானல்ல என்பது போல.
.
நேற்றைய துன்பமும் உண்மை.
நாளைய பயமோ அதனினும் உண்மை
எனினும் இன்றில் மொட்டவிழ்கிறதே வாழ்வு
சிறகசைக்கிறதே வண்ணத்துப் பூச்சிகள்
துள்ளி மகிழுதே பொன்மீன்கள்
.
நமது அன்றாட மறதிக்குப் பரிசுதானே
இந்த நட்பும் வாழ்வும்.
 
- 1997
 

இருமை. - வ.ஐ.ச.ஜெயபாலன்.

6 months 2 weeks ago

 

”காற்றரனாய்
தீபத்தில் கூப்பிய கரம்போல்,
அலைப்புறும் என்மீது
நம்பிக்கைகளும் விஞ்ஞானங்களூம்.”

Image may contain: one or more people, glasses and close-up

.

இருமை.
- வ.ஐ.ச.ஜெயபாலன்.
.
நான் சிறுசாய் இருக்கையில்
உலகம் தட்டையாய் இருந்தது.
எங்க பாட்டிக்குத் தெரிந்த ஓர் அரக்கன்
ஒருமுறை உலகைப் பாயாய்ச் சுருட்டி
ஒளித்து விட்டானாம்.
அப்போதெல்லாம்
பகல்தொறும் பகல்தொறும்
ஏழு வண்ணக் குதிரைத் தேரில்
சூரியன் வருகிற வழி பார்த்திருந்து
பாட்டி தொழுவாள் நானும் தொடர்வேன்.
.
ஒரு நாள் வகுப்பறையில்
என் அழகான ஆசிரியை
உலகை உருண்டையாய் வனைந்து
பிரபஞ்சத்தில் பம்பரம் விட்டாள்.
சூரியனை தேரினால் இறக்கி
பிரபஞ்சத்தின் அச்சாய் நிறுத்தினாள்.
பின்னர் கல்லூரியிலோ
ஆசிரியர்கள் பிரபஞ்சத்துள்
கோடிகோடி சூரியன் வைத்தார்.
.
இப்படியாக என்
பாட்டியின் மானச உலகில்
வாழ்வு மனசிலாகியது.
கற்ற உலகிலோ எனது அறிவு
கவசம் பூண்டு ஆயுதம் தரித்தது.
இந்த இருவேறு உலகும்
என் இருப்பு நதியின்
எதிர் புதிர்க் கரைகள்.
.
நதியின் அக் கரையோ
முன்பொரு காலத்தில்
அங்கு உண்மை பேசியதால்
ஏழை விறகு வெட்டிக்கு
பொற்கோடரியும் தருகிறாள்
வனதேவதை.
இக் கரையோ எதிர்காலத்தில்,
அங்கு மனிதனையே
பிரதிமை செய்கிறார்கள் விஞ்ஞானியர்கள்.
.
காற்றரனாய்
தீபத்தில் கூப்பிய கரம்போல்,
அலைப்புறும் என்மீது
நம்பிக்கைகளும் விஞ்ஞானங்களூம்.

Checked
Thu, 02/20/2020 - 12:34
கவிதைக் களம் Latest Topics
Subscribe to கவிதைக் களம் feed
texte-feed
https://www.yarl.com/forum3/forum/214-%E0%AE%95%E0%AE%B5%E0%AE%BF%E0%AE%A4%E0%AF%88%E0%AE%95%E0%AF%8D-%E0%AE%95%E0%AE%B3%E0%AE%AE%E0%AF%8D/