Published By: Vishnu
09 Oct, 2025 | 07:00 PM
(எம்.ஆர்.எம்.வசீம், இராஜதுரை ஹஷான்)
ஜெனீவா எமக்கு கடவுளோ அல்லது பேயோ அல்ல. எமது மக்களின் மனித உரிமைகளை அரசியலாக்கி குறுகிய அரசியல் செயற்பாடுகளை மேற்கொள்வது எமது நோக்கமல்ல, மனித உரிமைகள்பேரவையில் வாக்கெடுப்பு கோருவது ஒரு பயனற்ற செயல். கடந்த அரசாங்கங்கள், தெரிந்தே செய்த அந்த தவறை மீண்டும் செய்வது எமது அரசாங்கத்தின் கொள்கையும் அல்ல சர்வதேச பொறிமுறையை நிராகரிக்கும் அதே வேளையில், அரசியல் மயமாக்கல் காரணமாக சர்வதேச மயமாக்கப்பட்ட இந்தப் பிரச்சினைகளை நமது சொந்த நாட்டில் சுயாதீனமான செயல்முறைகள் மற்றும் நிறுவனங்கள் மூலம் தீர்க்க அனைவரின் ஆதரவையும் பெறுவதே எங்கள் முயற்சி என வெளிவிவகாரம், வெளிநாட்டு வேலை வாய்ப்புகள் மற்றும் சுற்றுலாத்துறை அமைச்சர் விஜித்த ஹேரத், தெரிவித்தார்.
பாராளுமன்றத்தில் வியாழக்கிழமை (9) நடைபெற்ற அமர்வில் விசேட கூற்றை முன்வைத்து உரையாற்றுகையில் மேற்கண்டவாறு குறிப்பிட்டார்.
அங்கு அவர் மேலும் உரையாற்றியதாவது,
ஒவ்வொரு காலகட்டத்திலும் அரசாங்கங்கள் இந்தத் தீர்மானங்களுக்கு வெவ்வேறு கொள்கைகளை ஏற்றுக்கொண்டுள்ளன. சில நேரங்களில் இந்த அரசாங்கங்கள் இந்தத் தீர்மானங்களை ஆதரித்து அவற்றில் பங்காளிகளாகவும் மாறிவிட்டன (2015,2017, 2019). மற்ற சந்தர்ப்பங்களில், அதிகாரத்தில் உள்ள அரசாங்கங்கள் தீர்மானங்களில் வாக்களித்துள்ளன. (2012, 2013, 2014, 2021, 2022).ஏனைய சந்தர்ப்பங்களில், இலங்கை அரசாங்கம் இலங்கை மீது ஒரு தீர்மானத்தை சமர்ப்பித்துள்ளது. மற்ற சந்தர்ப்பங்களில், அதிகாரத்தில் உள்ள அரசாங்கங்கள் தீர்மானங்களில் வாக்களிக்கவில்லை,மேலும் தீர்மானங்களின் சில பிரிவுகளை மட்டுமே எதிர்த்தன.
இந்த அனைத்து தீர்மானங்களிலும் இரண்டு பொதுவான புள்ளிகள் தெளிவாகத் தெரிகின்றன. முதலாவது, ஜெனீவாவில் இந்த செயல்முறையின் அடிப்படையிலான தேசிய பிரச்சினைகள் எந்த முந்தைய அரசாங்கத்தாலும் முறையாக நிர்வகிக்கப்படவில்லை. இந்தத் தீர்மானங்கள் 16 ஆண்டுகளுக்கும் மேலாக மனித உரிமைகள் பேரவையால் ஏற்றுக்கொள்ளப்பட்டதற்கான முக்கிய காரணம் இதுதான். எந்தவொரு போரிலும் மனித உரிமைகள் பிரச்சினைகள் எழுகின்றன என்பது அனைவருக்கும் தெரியும்
நாடுகள் பலவற்றில் மோதல்கள் இடம்பெற்றுள்ளன. அந்தப் பிரச்சினைகள் அவற்றின் சொந்த தேசிய கட்டமைப்பு நிறுவனங்கள் மூலம் தீர்க்கப்படுகின்றன. தேசிய ஒற்றுமையை மேலும் ஊக்குவிக்கின்றன. ஆனால் நம் நாட்டில் முந்தைய அரசாங்கங்கள் என்ன செய்தன? தேசிய மட்டத்தில் உரிமைகள், பிரச்சினைகளைத் தீர்த்து ஒற்றுமையைக் கட்டியெழுப்புவதற்குப் பதிலாக, அவர்கள் இனவெறி, பாலின வேறுபாடு மற்றும் ஏனைய பிரச்சினைகளை ஏற்படுத்தினார்கள்.நாட்டைப் பிரித்தனர், அனைத்து இனங்கள் மற்றும் மத மக்களின் உரிமைகளை மேலும் கட்டுப்படுத்தினர், மீறினர், மேலும் இலங்கையை சர்வதேச அளவில் அங்கீகரிக்கப்படாத நாடாக மாற்றினர். ஜெனீவா தீர்மானத்தின் பரிணாம வளர்ச்சியைப் பார்த்தால் இது தெளிவாகின்றது.
2009 இல் ஜெனீவாவில் நிறைவேற்றப்பட்ட தீர்மானத்தின் முக்கிய கோரிக்கை, அப்போதைய ஜனாதிபதி ஐக்கிய நாடுகள் சபையின் உயர் ஸ்தானிகருக்கு உறுதியளித்தபடி, அனைத்து சமூகங்களின் பிரச்சினைகளையும் தீர்க்கும் ஒரு நிலையான தேசிய தீர்வை செயல்படுத்துவதாகும். ஆனால் அது நடந்ததா? இல்லை. இந்த செயல்முறை நடைபெறாமல் 3 ஆண்டுகளுக்குப் பின்னர் ,பல நாடுகள் ஒன்றிணைந்து 2012 இல் இலங்கை மீது மற்றொரு தீர்மானத்தை ஏற்றுக்கொண்டன. இந்த 2012 தீர்மானத்தின் முக்கிய கோரிக்கை,அப்போதைய அரசாங்கத்தால் நியமிக்கப்பட்ட கற்றுக்கொண்ட பாடங்கள் மற்றும் நல்லிணக்க ஆணைக்குவின் பரிந்துரைகளை செயல்படுத்துவதாகும். ஆனால் அந்தப் பரிந்துரைகள் அரசாங்கத்தால் செயல்படுத்தப்பட்டதா? இல்லை.
அது நடக்காத இடத்தில், 2013 ஆம் ஆண்டு பேரவையில் மீண்டும் கற்றுக்கொண்ட பாடங்கள் மற்றும் நல்லிணக்க ஆணைக்குழுவின் பரிந்துரைகளை செயல்படுத்தக் கோரியும், தேசிய உண்மை மற்றும் நல்லிணக்க ஆணையகம் மூலம் பிரச்சினைகளுக்குத் தீர்வு காணக் கோரியும் ஒரு தீர்மானம் நிறைவேற்றப்பட்டது. இது நடந்ததா? இல்லை. அவர்கள் நியமித்த கற்றுக்கொண்ட பாடங்கள் மற்றும் நல்லிணக்க ஆணைக்குழுவின் பரிந்துரைகளை செயல்படுத்தி தேசிய ஒற்றுமையை ஊக்குவிப்பதற்குப் பதிலாக, அப்போதைய அரசாங்கங்கள், குறுகிய அரசியல் நோக்கங்களுக்காக, இந்த தேசியப் பிரச்சினைகளையும் ஜெனீவா செயல்முறையையும் பயன்படுத்தின.2013 ஆம் ஆண்டு ஐ. நா. மனித உரிமைகள் ஆணையாளர் இலங்கைக்கு விஜயம் செய்தபோது, அப்போதைய அரசாங்கத்தின் அமைச்சர் ஒருவர் ஆணையாளரை திருமணம் செய்து கொள்ளும் ஆசையை வெளியிட்டார்.
இந்த அரசாங்கங்கள் தொடர்ந்து மக்களின் பிரச்சினைகளை அரசியல் கால்பந்தாட்டமாக மாற்றுவதன் மூலம் சர்வதேச நம்பகத்தன்மையை இழப்பதன் விளைவு என்ன? இலங்கை அதன் சொந்த தேசிய நிறுவனங்கள் மூலம் அதன் மனித உரிமைகள் பிரச்சினைகளை தீர்க்க முடியாது என்ற கருத்து உருவாகி மனித உரிமைகள் ஆணையாளர் அலுவலகம் 2021 ஆம் ஆண்டுக்குள் இலங்கையில் இடம்பெற்றதாக கூறப்படும் மீறல்கள் குறித்த ஆதாரங்களை சேகரிக்க ஒரு சிறப்புப் பிரிவை நிறுவ இணக்கம் தெரிவிக்கப்பட்டது. அதுதான் பிரச்சினை. போருக்குப் பின்னர் உடனடியாக ஒரு தேசிய பொறிமுறை மூலம் எளிதாக தீர்க்கப்படக்கூடிய இந்த ஜெனீவா பிரச்சினை, குறுகிய அரசியல் நோக்கங்கள் மற்றும் குறுகிய பார்வை கொண்ட தலைமை காரணமாக 2021 ஆம் ஆண்டுக்குள் சர்வதேசமயமாக்கப்பட்டது.
2024 ஆம் ஆண்டு, இந்த நாட்டின் அனைத்துப் பகுதிகளைச் சேர்ந்த மக்களும், அனைத்து இன, மதங்களைச் சேர்ந்த மக்களும் வறுமையை ஒழிக்கவும், ஊழலை ஒழிக்கவும், ஒன்றுபட்ட நாட்டைக் கட்டியெழுப்பவும் எங்களுக்கு வலுவான ஆணையை வழங்கினர். இந்த ஆணையை செயல்படுத்துவதும், அனைத்துப் பிரிவு மக்களின் உரிமைகளை உறுதி செய்வதும், இதுவரை சர்வதேசமயமாக்கப்பட்டுள்ள மனித உரிமைகள் செயல்முறையை எப்படியாவது தேசிய மட்டத்திற்குக் கொண்டு வருவதும், வலுவான மற்றும் சுயாதீனமான உள்ளூர் நிறுவனங்கள் மூலம் பிரச்சினைகளைத் தீர்ப்பதுமே எங்கள் நோக்கம். அதற்காக நாங்கள் ஏற்கனவே பல முக்கியமான நடவடிக்கைகளை எடுத்துள்ளோம்.
2009 ஆம் ஆண்டு இலங்கை தொடர்பாக நமது சொந்த அரசாங்கத்தால் கொண்டுவரப்பட்ட தீர்மானம் அதுதான். இலங்கை தொடர்பான அனைத்து திட்டங்களும் வாக்கெடுப்புக்கு விடப்பட்டபோது, அரசாங்கத்தின் கருத்து தோற்கடிக்கப்பட்டது. மேலும், இலங்கை அரசாங்கத்திற்கு கிடைத்த சிறிய எண்ணிக்கையிலான வாக்குகள் படிப்படியாகக் குறைந்து. ஒரு நிலைப்பாட்டை எடுக்காத நாடுகளின் எண்ணிக்கை அதிகரித்துள்ளதாகத் தெரிகிறது. 2012 ஆம் ஆண்டில், 47 வாக்குகளில் 15 வாக்குகளைப் பெற்றோம். 2013 இல், 13 வாக்குகள்,2014 இல், 12 வாக்குகள் 2021 இல், 11 வாக்குகள், 2022 இல், 7 வாக்குகள் என்ற அடிப்படையில் வாக்குகள் பெறப்பட்டன. ஆனால் ஆச்சரியமான விஷயம் என்னவென்றால், அந்தக் கால அரசாங்கங்கள் தாங்கள் தோற்போம் என்பதை அறிந்திருந்தும் இந்தத் தேர்தல் பிரசாரங்களுக்காக மில்லியன் கணக்கான பொதுப் பணத்தைச் செலவிட்டன.
பாராளுமன்ற உறுப்பினர்கள், அமைச்சர்கள் மற்றும் அதிகாரிகள் மனித உரிமைகள் கவுன்சிலின் உறுப்பு நாடுகளுக்குச் சென்றனர். அந்த வாக்குகளைப் பெற அவர்கள் பல்வேறு வழிகளில் தொடர்புடைய நாடுகளுக்கு உதவினார்கள். தேர்தல் தோல்வியடையும் என்ற யதார்த்தத்தை அறிந்தும், ஊடகக் காட்சிகள் மூலம் நாட்டு மக்களைத் தவறாக வழிநடத்துவதற்காகவே அவர்கள் இதையெல்லாம் செய்தார்கள்.
இந்த ஆண்டு மார்ச் மாதம் நடைபெற்ற மனித உரிமைகள் பேரவை அமர்வில் நான் உரையாற்றினேன். வகுப்புவாத மற்றும் மத அரசியலை நிராகரித்து, அனைத்து இலங்கையர்களின் பொருளாதார மற்றும் அரசியல் உரிமைகளைப் பாதுகாக்கும் அதே வேளையில், தேசிய ஒற்றுமை மற்றும் நல்லிணக்கத்தைக் கட்டியெழுப்ப நமது சொந்த தேசிய வழிமுறைகள் மூலம் நாம் எடுத்து வரும் நடவடிக்கைகள் குறித்து பேரவை நாடுகளுக்குத் தெரிவித்துள்ளேன்.
கடந்த ஜூன் மாதம், மனித உரிமைகளுக்கான உயர் ஸ்தானிகர் வோல்கர் டர்க் சமர்ப்பித்த தீர்மானம் பேரவையில் தோற்கடிக்கப்படுவது மிகவும் அரிது. இலங்கையின் பார்வையில், எங்கள் நாடு தொடர்பான ஒரு தீர்மானம் ஒரு முறை மட்டுமே வெற்றி பெற்றுள்ளது. அதுதான் 2009 ஆம் ஆண்டு இலங்கை தொடர்பாக நமது சொந்த அரசாங்கத்தால் கொண்டு வரப்பட்ட தீர்மானம். அதன் பிறகு, இலங்கை தொடர்பான அனைத்து தீர்மானங்களும் வாக்கெடுப்புக்கு விடப்பட்டபோது, அரசாங்கத்தின் கருத்து தோற்கடிக்கப்பட்டது.
9 ஆண்டுகளுக்குப் பிறகு ஐ.நா. மனித உரிமைகள் உயர் ஸ்தானிகர் ஒருவர் இலங்கைக்கு வருகை தந்தது இதுவே முதல் முறை. நாங்கள் பதவியேற்று ஒரு வருடத்திற்கும் குறைவான காலத்திலேயே அரசாங்கத்தின் அழைப்பின் பேரில் அவர் இலங்கைக்கு விஜயம் செய்தார். இந்த விஜயத்தின் போது, ஜனாதிபதி மற்றும் அரசாங்கம், மதத் தலைவர்கள், பொதுமக்கள், சிவில் சமூகம், அரசியல் கட்சிகள் மற்றும் பல சமூகத் துறையினருடன் அவர் திறந்த கலந்துரையாடல்களை நடத்தினார். இலங்கையின் உண்மையான நிலைமையை அவர் நேரடியாகக் கண்டார்.
இந்த விஜயத்தைத் தொடர்ந்து, உயர் ஸ்தானிகர் இலங்கை குறித்து மிகவும் நேர்மறையான கருத்துக்களைத் தெரிவித்தார். இலங்கை சமூகம் முழுவதும் முற்போக்கான மாற்றத்தின் போக்கு, பிரச்சினைகளைத் தீர்ப்பதில் இலங்கை அரசாங்கத்தின் உண்மையான திறந்த தன்மை மற்றும் உள்நாட்டு வழிமுறைகள் மூலம் பிரச்சினைகளைத் தீர்க்க இலங்கை எடுத்த முயற்சி ஆகியவற்றை அவர் பாராட்டினார். கடந்த செப்டம்பரில் நடைபெற்ற பேரவையின் 60ஆவது அமர்வில் உயர் ஸ்தானிகர் சமர்ப்பித்த அறிக்கையிலும் இந்த நேர்மறையான கருத்துக்களை அவர் வெளிப்படுத்தியிருந்தார்.
வலுவான உள்நாட்டு வழிமுறைகள் மூலம் மனித உரிமைகள் பிரச்சினைகளைத் தீர்க்க இந்த வரலாற்று வாய்ப்பைப் பயன்படுத்துமாறு இலங்கையை அவர் வலியுறுத்தினார். இந்த அறிக்கையையும் அதற்கு இலங்கை அரசு வழங்கிய பதிலையும் நான் சமர்ப்பிக்கிறேன். அவர்களுடன் கலந்தாலோசிக்க உங்களை அழைக்கிறேன். ஜெனீவா தீர்மானம் நிறைவேற்றப்படுவதற்கு முன்பு நியூயோர்க்கில் நடந்த ஐ.நா. பொதுச் சபை அமர்வின் போது மனித உரிமைகளுக்கான உயர் ஸ்தானிகர் ஜனாதிபதியையும் என்னையும் சந்தித்தார்.
நான் முன்னர் கூறியது போன்று ல், தேசிய பிரச்சினைகள் மற்றும் மக்களின் மனித உரிமைகள் அரசியல் சந்தர்ப்பவாத நோக்கங்களுக்கு பல ஆண்டுகளாக அடிபணிந்ததன் காரணமாக, இலங்கை மீதான ஜெனீவா தீர்மானம் 2021 ஆம் ஆண்டுக்குள் சர்வதேசமயமாக்கப்பட்டது. 2021 ஆம் ஆண்டு நிறைவேற்றப்பட்ட தீர்மானம் 46/ 1, இலங்கையில் நடந்ததாகக் கூறப்படும் மீறல்கள் குறித்த ஆதாரங்களைச் சேகரிக்க உயர் ஸ்தானிகராலயத்தில் இலங்கை பொறுப்புக்கூறல் திட்டம் என்ற ஒரு பிரிவை நிறுவியது.
மார்ச் மற்றும் செப்டம்பர் மாதங்களில், வெளியுறவு அமைச்சராக, நானும் ஜெனீவாவில் உள்ள எங்கள் நிரந்தர பிரதிநிதியும், இதுபோன்ற உள்நாட்டு அல்லாத வழிமுறைகளை இலங்கை ஏற்றுக்கொள்வதில்லை என்று பேரவையில் தெளிவாகக் கூறினோம்.சர்வதேச வழிமுறைகளை நிராகரிக்கும் அதே வேளையில், அரசியல்மயமாக்கல் காரணமாக சர்வதேசமயமாக்கப்பட்ட இந்தப் பிரச்சினைகளை நமது சொந்த நாட்டில் சுயாதீனமான செயல்முறைகள் மற்றும் நிறுவனங்கள் மூலம் தீர்க்க அனைவரின் ஆதரவையும் பெறுவதே எங்கள் முயற்சி. இது ஒரு வருடம் போன்ற குறுகிய காலத்தில் முடிக்கக்கூடிய பணி அல்ல. ஆனால் அதற்கான அடித்தளத்தை நாங்கள் அமைத்து வருகிறோம். இதற்கான எங்கள் உறுதிப்பாட்டை மனித உரிமைகள் பேரவை அங்கீகரித்துள்ளது. மனித உரிமைகளுக்கு முக்கியத்துவம் வாய்ந்த எங்கள் நீதித்துறை அமைப்பு மற்றும் சட்ட அமுலாக்க நிறுவனங்களை நாங்கள் வலுப்படுத்தி சுயாதீனமாக்குகிறோம்.
காணாமல் போனோருக்கான அலுவலகம், இழப்பீட்டுக்கான அலுவலகம் மற்றும் தேசிய ஒற்றுமை மற்றும் நல்லிணக்கத்திற்கான அலுவலகம் ஆகியவை வலுப்படுத்தப்பட்டு சுயாதீனமாக்கப்படுகின்றன. பயங்கரவாதத் தடுப்புச் சட்டத்தை ரத்து செய்வதன் மூலம் சர்வதேச அளவில் அங்கீகரிக்கப்பட்ட மரபுகளுக்கு இணங்க மனித உரிமைகளைப் பாதுகாக்கும் ஒரு மசோதாவை விரைவில் கொண்டு வருவோம். இந்த சட்டம் நாட்டில் அவசரநிலைகளுக்கு மட்டுமே நிறைவேற்றப்பட்டது. ஆனால் போர் முடிந்து 16 ஆண்டுகளுக்குப் பிறகும் நடைமுறையில் உள்ளது. மனித உரிமைகளைப் பாதுகாக்கும் ஆன்லைன் அமைப்புகளின் பாதுகாப்புச் சட்டத்தில் திருத்தங்களைக் கொண்டுவர நாங்கள் எதிர்பார்க்கிறோம்.
2009 ஆம் ஆண்டு போர் முடிவடைந்தவுஉடனேயே, மக்கள் விடுதலை முன்னணி என்ற வகையில், அது தொடர்பான மனித உரிமைகள் பிரச்சினைகள் குறித்து உண்மை மற்றும் நல்லிணக்க ஆணையத்தை நிறுவுவதற்கு நாங்கள் முன்மொழிந்தோம். இந்த தேசிய ஆணையம் நிறுவப்பட்டு அதன் பரிந்துரைகள் செயல்படுத்தப்பட்டிருந்தால், இன்று ஜெனீவா தீர்மானம் இருக்காது. நீங்களும் நானும் அதைப் பற்றி விவாதிக்க வேண்டிய நிலை ஏற்பட்டிருக்காது. 16 ஆண்டுகளுக்குப் பின்னர் நாங்கள் ஆட்சிக்கு வந்தபோது அது நடந்திருக்காது. எனவே, உண்மை மற்றும் நல்லிணக்கச் சட்டம் விரைவில் இந்த பாராளுமன்றத்தில் நிறைவேற்றப்படும் என்றும், ஆணைக்குழுவின் பணிகள் தொடங்கும் என்றும் நாங்கள் நம்புகிறோம். ஒரு சுயாதீனமான வழக்குத் தொடுநர் அலுவலகம் நிறுவப்படும்.ஜெனீவாவுக்கு காண்பிக்க இந்த முற்போக்கான நடவடிக்கையை நாங்கள் எடுக்கவில்லை.
பல ஆண்டுகளாக, அரச அடக்குமுறை மற்றும் மனித உரிமை மீறல்களுக்கு ஆளான மக்கள் ஒரு அரசியல் இயக்கமாக, மனித உரிமைகள் மீதான எங்கள் உண்மையான அர்ப்பணிப்பு மற்றும் அனைத்துப் பிரிவு மக்களின் பாதிக்கப்பட்டவர்களுக்கும் எங்கள் உண்மையான அனுதாபம் காரணமாக நாங்கள் இந்த நடவடிக்கையை எடுக்கிறோம்.போரை முடிவுக்குக் கொண்டு வந்த இராணுவ அதிகாரிகளையோ அல்லது வேறு எந்த மக்கள் பிரிவையோ குறிவைத்து இந்த நடவடிக்கையை நாங்கள் எடுக்கவில்லை என்பதையும் தெளிவுபடுத்த விரும்புகிறோம். நமது நாட்டு மக்களின் மனித உரிமைகளைப் பாதுகாப்பது, சட்டத்தின் ஆட்சியை உறுதி செய்வது, ஒற்றுமையைக் கட்டியெழுப்புவது மற்றும் பயங்கரமான மோதல்கள் மீண்டும் நிகழாமல் தடுப்பது நம் அனைவரின் பொறுப்பு . இது நாம் தனியாக அடையக்கூடிய ஒரு குறிக்கோள் அல்ல.
இலங்கை மீதான தீர்மானம் கடந்த 6 ஆம் திகதி மனித உரிமைகள் பேரவையில் வாக்கெடுப்பு இல்லாமல் நிறைவேற்றப்பட்டதாக சில ஊடகங்கள் செய்தி வெளியிட்டிருந்ததைக் கண்டேன். எனது உரையின் ஆரம்பத்தில் நான் விளக்கியது போல், மனித உரிமைகள் பேரவையில் வாக்கெடுப்பு கோருவது ஒரு பயனற்ற செயல். முந்தைய அரசாங்கங்கள், தெரிந்தே பொதுப் பணத்தையும் நேரத்தையும் வீணடித்து, வாக்கெடுப்பு தோல்வியடையும் என்ற நம்பிக்கையில் செய்த அந்த பயனற்ற, அந்த தவறான செயலை மீண்டும் செய்வது எங்கள் அரசாங்கத்தின் கொள்கை அல்ல. இந்தத் தீர்மானம் சமர்ப்பிக்கப்பட்டபோது,இந்த விஷயத்தில் எங்கள் நிரந்தர பிரதிநிதி இலங்கையின் நிலைப்பாட்டை தெளிவாக முன்வைத்தார்.
செப்டம்பர் 8 ஆம் திகதி இலங்கை தொடர்பான உரையாடலின் போது நான் கூறியதையும், அக்டோபர் 6ஆம் திகதி ஜெனீவாவில் நிரந்தரப் பிரதிநிதி தீர்மானம் தொடர்பாக வெளியிட்ட அறிக்கையையும் மீண்டும் வலியுறுத்துகிறேன்.அக்டோபர் 6 ஆம் திகதி சமர்ப்பிக்கப்பட்ட தீர்மானம், இலங்கை தொடர்பான முந்தைய தீர்மானங்களுடன் ஒப்பிடும்போது பல நேர்மறையான அம்சங்களைக் கொண்டிருந்தது. இது இலங்கையில் ஏற்பட்டுள்ள ஜனநாயக மாற்றம்,பொருளாதார நெருக்கடியைத் தீர்க்க எடுக்கப்பட்ட நடவடிக்கைகள், ஊழலுக்கு எதிரான போராட்டம் மற்றும் மனித உரிமைகளைப் பாதுகாத்தல் ஆகியவற்றை எடுத்துக்காட்டியது.
முன்னெடுக்கப்பட்டுள்ள தேசிய நல்லிணக்க செயல்முறை பாராட்டப்பட்டுள்ளது. இது தேசிய நிறுவனங்களுக்கு பிரச்சினைகளைத் தீர்க்க இடமளித்துள்ளது.இந்தத் தீர்மானம் 2021 தீர்மானத்தின் நீட்டிப்பு என்பதால், அதன் இறுதி அத்தியாயம் இலங்கை பொறுப்புக்கூறல் திட்டத்தின் பணிகளைத் தொடர்வதற்கு ஒப்புதல் அளித்துள்ளது. நான் முன்னர் குறிப்பிட்டது போல,இது ஒரு உள்ளக பொறிமுறை அல்ல என்பதால் எங்கள் அரசாங்கம் இந்த பொறுப்புக்கூறல் திட்டத்தை நிராகரிக்கிறது. இந்தத் தீர்மானத்தைப் பற்றி விவாதிக்கும் போது 6 ஆம் திகதி வெளியிட்ட அறிக்கையில் இதை நாங்கள் கடுமையாக வலியுறுத்தினோம். இது பிளவுகளை தீவிரப்படுத்தும் மற்றும் அரசாங்கம் தொடங்கிய திட்டங்களைக் குறைமதிப்பிற்கு உட்படுத்தும் என்று நாங்கள் சுட்டிக்காட்டினோம்.
அரசாங்கம் தொடங்கிய உள்ளக பொறிமுறை மற்றும் மனித உரிமைகள் பேரவை நாடுகளில் அதற்காக கட்டமைக்கப்பட்டு வரும் நம்பகத்தன்மையின் அடிப்படையில், 2021 இல் நிறுவப்பட்ட இந்த பொறுப்புக்கூறல் திட்டத்தை விரைவில் முடித்து, நமது சொந்த பிரச்சினைகளைத் தீர்க்கக்கூடிய சூழ்நிலையை விரைவில் உருவாக்க முடியும் என்று நாங்கள் உறுதியாக நம்புகிறோம்.
இலங்கையில் ஏற்பட்டுள்ள ஜனநாயக மாற்றம், பொருளாதார நெருக்கடியைத் தீர்க்க எடுக்கப்பட்ட நடவடிக்கைகள், ஊழலுக்கு எதிரான போராட்டம் மற்றும் மனித உரிமைகளைப் பாதுகாத்தல், அத்துடன் அரசாங்கம் தொடங்கிய உள்நாட்டு வேலைத்திட்டம் மற்றும் இதற்காக மனித உரிமைகள் பேரவை நாடுகளில் கட்டமைக்கப்பட்டு வரும் நம்பகத்தன்மையின் அடிப்படையில், 2021 இல் நிறுவப்பட்ட இந்த பொறுப்புக்கூறல் திட்டத்தை முடித்து, எங்கள் பிரச்சினைகளை நாமே தீர்க்கக்கூடிய சூழ்நிலையை விரைவில் உருவாக்க முடியும் என்று நாங்கள் உறுதியாக நம்புகின்றோம்.
அரசாங்கம் அடைந்துள்ள மகத்தான முன்னேற்றத்தைப் பாராட்டி வெள்ளிக்கிழமை நடைபெற்ற கலந்துரையாடலில் முன்மொழிவை சமர்ப்பித்த நாடுகளின் குழுவின் சார்பாகப் பேசிய ஐக்கிய இராச்சியம் வெளியிட்ட அறிக்கையிலிருந்தும் இது தெளிவாகிறது. அந்தக் குழுவைத் தவிர, சீனா, பங்களாதேஷ், மாலைத்தீவு, கியூபா, ஜப்பான், தென் கொரியா, ஐரோப்பிய ஒன்றியம், எத்தியோப்பியா, கோஸ்டாரிகா மற்றும் உலகின் பல்வேறு பிராந்தியங்களை பிரதிநிதித்துவப்படுத்தும் பிற நாடுகள் உட்பட பேரவை உறுப்பினர்களாக உள்ள பல நாடுகள் மனித உரிமைகள் தொடர்பாக இலங்கையில் ஏற்பட்டுள்ள முன்னேற்றத்தைப் பாராட்டி அறிக்கைகளை வெளியிட்டன. மேலும், கடந்த செப்டம்பர் 8 ஆம் திகதி இலங்கை தொடர்பாக நடைபெற்ற உரையாடலில், சுமார் 43 நாடுகள் தங்கள் கருத்துக்களை வெளிப்படுத்தின, கிட்டத்தட்ட அனைத்து நாடுகளும் உள்நாட்டு செயல்முறைகள் மூலம் அரசாங்கம் எடுத்த நடவடிக்கைகளைப் பாராட்டின. மனித உரிமைகளை அரசியல்மயமாக்குவது நமது அரசாங்கத்தின் நோக்கம் அல்ல.
நமது சொந்த மக்களின் மனித உரிமைகளைப் பாதுகாப்பது என்பது இந்த மதிப்புமிக்க சபையில் நாம் விவாதிக்க வேண்டிய ஒன்றல்ல. அந்த உரிமைகளைப் பாதுகாப்பது மக்களின் பிரதிநிதிகளாகிய நமது முழுமையான கடமை. பொறுப்பு.. நீங்கள் அனைவரும் அதை ஏற்றுக்கொள்வீர்கள் என்று நினைக்கிறேன். ஜனாதிபதி கூறியது போல், அனைத்து இலங்கையர்களும் சுதந்திரமாக ஒன்றாக வாழும் அமைதியான மற்றும் வளமான நாடு என்ற கனவு நமக்கு உள்ளது. அனைத்து பங்குதாரர்களுடனும் சர்வதேச சமூகத்துடனும் நேர்மறையாக ஈடுபடுவதன் மூலம் நமது எதிர்கால சந்ததியினருக்கான இந்தக் கனவை நனவாக்கும் பயணத்தில் நாங்கள் உறுதிபூண்டுள்ளோம். இந்த தேசிய முயற்சியை ஆதரிப்பது அனைவரினதும் பொறுப்பு என்றார்.
https://www.virakesari.lk/article/227355
Athavan News
அமைச்சரவை மாற்றம்: மூன்று அமைச்சர்கள், 10 பிரதி அமைச்சர்கள்!
Tamilwin
பொன்சேகா மீது போர்க்குற்றம் ஏன் முன்வைக்கப்படவில்லை? மகிந...