Search the Community

நீரிழிவும் சிறு நீரகமும் "ஒரு வினைத்திறனான இயந்திரம் மிகவும் சிக்கனமானது. அதனால், அவசியமில்லாத எந்தவொரு பாகமும் ஒரு நல்ல இயந்திரத்தில் இருக்காது!" - HUGO திரைப்படத்தில் கதாநாயகன். பட உதவி நன்றியுடன்: Huppert’s Notes: Pathophysiology and Clinical Pearls for Internal Medicine; 2021. எங்கள் உடலும் ஒரு வினைத்திறனான இயந்திரத்திற்கு ஒப்பிடக் கூடிய ஒன்று. கூர்ப்பின் எச்சங்களாக குடல்வால் போன்ற சில அமைப்புகள் முக்கிய தொழில்களின்றி எங்கள் மனித உடலில் தங்கி விட்டாலும், அனேகமாக எல்லா உறுப்புகளும் எங்கள் வாழ்க்கைக்குத் தேவை. இவ்வுறுப்புகளில், உயிர் உடலில் தங்கி நிற்க அவசியமான ஐந்து உறுப்புகளை முக்கியமான உறுப்புகள் (vital organs) என்று சொல்லலாம். இதயம், மூளை, சுவாசப்பை, சிறு நீரகம், கல்லீரல் என்பனவே அந்த 5 முக்கிய உறுப்புகள். எனவே, இந்த உறுப்புகளை நேரடியாக , அல்லது மறைமுகமாகப் பாதிக்கும் நோய்கள் அனேகமாக உயிராபத்தை ஏற்படுத்தக் கூடியவை. தற்போது, உலகளாவிய ரீதியில் அதிகரித்து வரும் நீரிழிவு இந்த உறுப்புகளில் மூன்றை நேரடியாகப் பாதிக்கும் தன்மை கொண்டதால் பிரதானமான மரணம் விளைவிக்கும் தொற்றா நோயாக விளங்குகின்றது. நீரிழிவினால் கல்லீரல், சிறுநீரகம், இதயம் என்பன பாதிக்கப்படுகின்றன. இந்தக் கட்டுரையில் நீரிழிவிற்கும் சிறுநீரகத்திற்குமிடையிலான தொடர்பைப் பார்க்கலாம். சிறுநீரகத்தின் முதன்மைத் தொழில் கழிவுகளை அகற்றுவதே சிறுநீரகத்தின் முதன்மையான தொழில். உடலினுள் உருவாகும் கழிவுகளும், நாம் உள்ளெடுக்கும் உணவுப் பொருட்களை, மருந்துகளை உடல் உடைப்பதால் வரும் கழிவுகளும் இப்படி அகற்றப்படும். இப்படி சிறுநீரகம் அகற்றும் கழிவுகளை இரத்தத்தில் அளப்பதன் மூலம் சிறுநீரகத்தின் கழிவகற்றும் செயல்பாட்டை ஓரளவு மதிப்பிட முடியும். உதாரணமாக கிரியற்றினைன் (creatinine) எனும் கழிவுப் பொருளை இரத்தத்தில் அளந்து சிறுநீரக நலனை மதிப்பிடுவர். ஆனால், இந்தக் கழிவகற்றல் மூலம், உடலின் மேலும் பல தொழிற்பாடுகளுக்கும் சிறுநீரகம் பங்களிப்புச் செய்கிறது. உதாரணமாக, சிறுநீரகம் உப்பையும், நீரையும் அகற்றுவதால் எங்கள் இரத்த அழுத்தத்தை சீராக்கும் முக்கிய வேலையை மறைமுகமாகச் செய்கிறது. மேலும், சிறுநீரகத்தில் இருக்கும் ஒரு குறிப்பிட்ட பகுதி இரத்த உற்பத்திக்கு அவசியமான ஒரு ஹோமோனையும் சுரக்கிறது. எனவே, நீண்டகால சிறுநீரக செயலிழப்பினால் பாதிக்கப் பட்டோரில் இரத்தச் சோகையும் ஏற்படக் கூடும். நீரிழிவில் சிறுநீரகம் பாதிக்கப் படுவது ஏன்? நாள்பட்ட சிறுநீரக வியாதி (Chronic Kidney Disease – CKD) என்று அழைக்கப்படும் சிறுநீரக செயலிழப்பிற்கு நீரிழிவு பிரதான காரணியாக இருக்கின்றது. Diabetic nephropathy என்று அழைக்கப் படும் இந்த நாள்பட்ட சிறுநீரக வியாதி அமெரிக்காவைப் பொறுத்த வரை மூன்றில் ஒரு பங்கு நீரிழிவு நோயாளர்களில் ஏற்படுகிறது. உலக ரீதியிலும், ஏனைய நாடுகளிலும் கூட இதே விகிதாசாரத்தில் நாள்பட்ட சிறுநீரக நோய் இருக்கக் கூடும். எங்கள் ஒவ்வொரு சிறுநீரகத்தினுள்ளும் சிறுநீரகத்திகள் (nephrons) என அழைக்கப் படும் நுண் அமைப்புகள் வடிகட்டிகளாக வேலை செய்த படி இருக்கின்றன. இந்த வடிகட்டிகள் 30 மணித்தியாலங்களில், எங்கள் உடலின் 5 லீற்றர் வரையான இரத்தத்தை முழுமையாக சுத்திகரிக்கும் அயராத பணியைச் செய்கின்றன. நீரிழிவின் போது ஏற்படும் ஒரு முக்கியமான மாற்றம் மேலதிகமாக எங்கள் இரத்தத்தில் சுற்றித் திரியும் குழூக்கோஸ் இந்த சிறுநீரகத்திகளால் வடிக்கப் பட்டு, அதில் ஒரு பகுதி சிறுநீரோடு வெளியேற்றப் படுவது. இதைத் தான் நாம் glucosuria என்று அழைக்கிறோம். நீரிழிவு நோயாளர்களில் இது நீண்டகாலப் போக்கில் நிகழும் போது, சிறுநீரகத்திகள் நிரந்தரமாகப் பாதிப்படைந்து அவற்றின் வடிகட்டும் தொழிலும் பாதிக்கப் படுகிறது. சேதமடைந்த சிறுநீரகத்திகளூடாக, சாதாரணமாக வடிக்கப் படாத புரதங்களும் கூட வெளியேறுவதால், உடல் மேலும் புரத இழப்பையும், பின் விளைவுகளையும் எதிர் கொள்ள வேண்டியேற்படுகிறது. குழூக்கோஸ் என்பது பக்ரீரியாக்களுக்கு மிகவும் பிடித்தமான ஒரு போசணைப் பொருள். இதனால், அதிகரித்த குழூக்கோஸ் சிறுநீரில் சேரும் போது, பக்ரீரியாத் தொற்றுக்கள் ஏற்படுவதாலும் சிறுநீரகம் பாதிக்கப் படலாம். இன்னொரு பொறிமுறை, நீரிழிவு நோயாளர்களில் ஏற்படக் கூடிய உயர் குருதியமுக்கம் காரணமாகவும் சிறுநீரகங்கள் பாதிக்கப் பட்டு, அதனால் நாள்பட்ட சிறுநீரக நோய் ஏற்படலாம். எனவே, இந்த மூன்று முக்கிய பொறிமுறைகளையும் கட்டுப் படுத்துவது மூலம், நீரிழிவு நோயாளர்கள் சிறுநீரக ஆரோக்கியத்தைப் பேண முடியும். பொதுவாக, 10 ஆண்டுகளுக்கு மேலாக நீரிழிவு நோயோடு வாழும் நோயாளிகளில் தான் இந்த நாள்பட்ட சிறு நீரக நோய் நிலை ஏற்படுகிறது. ஆனாலும், மூன்றில் ஒரு நீரிழிவு நோயாளியில் தான் இந்த நிலை ஏற்படுகிறது. எனவே இதைத் தடுக்கும் இயற்கையான பாதுகாப்பு சிலரில் இருக்கக் கூடும். இது ஏற்படும் ஆபத்து அதிகம் இருப்போரில் கூட வாழ்க்கை முறை மாற்றங்களும், முன்னெச்சரிக்கை நடவடிக்கைகளும் நாள்பட்ட சிறுநீரக நோயேற்படும் ஆபத்தை நீக்க அல்லது குறைக்க உதவுகின்றன. தடுப்பு முறைகள் எவை? நாள்பட்ட சிறுநீரக நோய்க்கு, இரத்த குழூக்கோஸ் எகிறுவதும், அதனால் சிறுநீரில் குழூக்கோஸ் வெளியேறுவதும் முக்கிய காரணிகள் என மேலே பார்த்தோம். எனவே, நீரிழிவு நோயாளிகள் இரத்த குழூக்கோஸ் அளவை கட்டுக்குள் வைத்திருக்க வேண்டியது அவசியம். இதனை ஒழுங்காக நீரிழிவு மருந்துகளை மருத்துவரின் ஆலோசனைப் படி எடுத்துக் கொள்வதாலும், உணவு முறையில் கட்டுப்பாடு கொள்வதாலும், உடற்பயிற்சிகளாலும் தான் அடைய முடியும். உலகின் 90% ஆன நீரிழிவு நோயாளிகளுக்கு உடலில் இன்சுலின் சுரந்தாலும் அது வேலை செய்யாத "இரண்டாம் வகை" நீரிழிவு (T2D) தான் வருகிறது. இவர்களில் அதிகம் பரிந்துரைக்கப் படும் மருந்து மெற்fபோமின் (Metformin) எனப்படும் தீவிர பக்க விளைவுகள் குறைவான மருந்தாகும். ஆனால், உடலில் தன் வேலையை முடித்த பின்னர், மெற்fபோமின் நேரடியாக சிறுநீரகத்தினால் அகற்றப் படுவதால், நாள் பட்ட சிறுநீரக நோயுடைய நோயாளிகளில் மெற்fபோமின் பயன்பாடு பிரச்சினைக்குரியதாக இருக்கிறது. சில ஆய்வுகளில், மெற்fபோமின் நாள் பட்ட சிறுநீரக நோயாளிகளில் மரணத்தைக் குறைத்ததாகவும் கண்டறிந்திருக்கிறார்கள். ஆனால், மெற்fபோமின் பாவனையினால் நாள் பட்ட சிறுநீரக நோய் உருவாவதாக நிறுவும் ஆய்வுத் தகவல்கள் இல்லை. எனவே, தற்போதைய ஆய்வு முடிவுகளின் படி, மோசமான நாள்பட்ட சிறுநீரக நோயுடையோரில் மட்டும் மெற்fபோமின் பாவனையைத் தவிர்க்கும் படி ஆலோசனை வழங்கப் படுகிறது. ஏனைய சிறுநீரகப் பாதுகாப்பு நடவடிக்கைகள் எவை? 35 - 40 வயதுக்கு மேல் அனைவரும் வருடாந்தம் மருத்துவப் பரிசோதனை செய்து கொள்ள வேண்டும். இரத்த, சிறுநீர்ப்பரிசோதனைகள் இந்த வருடாந்த சோதனையில் உள்ளடங்கியிருக்க வேண்டும். முக்கியமாக நீரிழிவு நோயாளிகள், சிறு நீரக செயல்பாட்டை மதிப்பிடும் சில பரிசோதனைகளை வருடாந்தம் அல்லது மருத்துவர் பரிந்துரைக்கும் கால இடைவெளியில் செய்து கொள்வது அவசியம். அனேகமாக இந்தப் பரிசோதனைகளில் இரத்த கிரியேற்றினைன் மட்டம், இரத்த யூரியா நைட்ரஜன் (Blood Urea Nitrogen – BUN) மட்டம், Glomerular Filtration Rate (GFR) எனப்படும் சிறுநீரக வடிகட்டல் வேகம் ஆகிய மூன்று அளவீடுகளை மருத்துவர் கவனித்து உங்கள் சிறுநீரக நலனை மதிப்பீடு செய்வார். மேலதிகமாக, சிறுநீரில் வெளியேறும் அல்புமின் புரதத்தின் அளவையும் பரிசோதிப்பார்கள் - இது நீரிழிவு நோயாளிகளில் முக்கியமானது. இவற்றை அடிப்படையாகக் கொண்டு, மருத்துவர் ஆலோசனைகளை வழங்கினால், அவற்றைக் கவனமாகப் பின்பற்றுவது உசிதம். நீரிழிவு நோயாளிகளில் மட்டுமன்றி, எல்லோரிலும் உப்புக் குறைந்த உணவுப் பழக்கம் சிறுநீரகத்தின் நண்பன். உப்புக் குறைந்த உணவினால் இரத்த அழுத்தம் குறையும், இதனால் சிறு நீரகம் மட்டுமன்றி, இதயமும் நன்மை பெறும். மூளை இரத்த அடைப்புக்கான (stroke) ஆபத்தும் குறையும். எனவே, சுருக்கமாக, நீரிழிவு நோயாளிகள்: 1. இரத்த குழூக்கோசைக் கட்டுப் பாட்டில் வைத்திருக்க வேண்டும். 2. கிரமமாக சிறுநீரக நலனை மருத்துவர் மூலம் பரிசோதித்துக் கொள்ள வேண்டும். 3. உப்பைக் குறைத்த உணவை எடுத்துக் கொள்ள வேண்டும். 4. உயர் குருதி அமுக்கம் இருந்தால் அதைக் குறைக்கும் உணவு, மருந்து வழியான வழிகளைப் பின்பற்ற வேண்டும். இவ்வழிகளால் சிறுநீரக நலனைச் சிறப்பாக நீண்டகாலத்திற்குப் பேண முடியும். - ஜஸ்ரின். மூலங்களும், மேலதிக தகவல்களும்: 1. அமெரிக்க உணவு மருந்துக் கட்டுப்பாட்டு அமைப்பு: மெற்fபோமின் பற்றிய 2022 குறிப்பு. https://www.fda.gov/drugs/fda-drug-safety-podcasts/fda-drug-safety-podcast-fda-revises-warnings-regarding-use-diabetes-medicine-metformin-certain 2. அமெரிக்க சுகாதார ஆராய்ச்சி மையம் (NIH). நாள்பட்ட சிறுநீரக நோய் பற்றிய குறிப்பு. https://www.niddk.nih.gov/health-information/kidney-disease/chronic-kidney-disease-ckd/causes 3. அமெரிக்க சுகாதார ஆராய்ச்சி மையம் (NIH). மெற்fபோமின் பாவனை, சிறுநீரக நலன் பற்றிய விளக்கங்கள். https://www.niddk.nih.gov/health-information/professionals/diabetes-discoveries-practice/metformin-and-chronic-kidney-disease 4. சிறுநீரக அமைப்புத் தொழில்பாடுகள் பற்றிய குறுங்காணொளி: நாள்பட்ட சிறு நீரக நோயோடு தொடர்பில்லா விட்டாலும், விளக்கத்திற்காகப் பார்க்கக் கூடியது. https://www.nature.com/articles/d41586-023-00805-8

கல்லீரல்: நீரிழிவின் நடுநாயகம் "In Buckingham Palace, the butler is more powerful than the King" "பக்கிங்ஹாம் அரண்மணையில், அரசரை விட பற்லருக்கு பவர் அதிகம்" – ஒரு உள்ளூர் பிரிட்டிஷ் சிலேடை. இப்படிப் பட்ட ஒரு பற்லரைப் பற்றி இன்று பேசுவோம். நீரிழிவு தொடர்ந்து நிலைக்கவும், அதன் விளைவுகள் உடலைப் பாதித்து ஏனைய பக்க விளைவுகளைக் கொண்டு வரவும் அவசியமான கல்லீரல் பற்றிப் பேசுவது நீரிழிவைப் புரிந்து கொள்ள உதவும். கல்லீரலின் தொழில்கள் எவை? கல்லீரலுக்கு எங்கள் உடலில் பெரிதும் சிறிதுமாக பல தொழில்கள் இருக்கின்றன. முக்கியமாக, கல்லீரல் உடலின் அனுசேபத்தோடு தொடர்பான அங்கம். இதனால் தான் அது நீரிழிவிலும் பெரிய பங்கை வகிக்கிறது. ஆனால், கல்லீரலின் பல தொழில்கள் உடலுக்கு இன்றியமையாதவை. உடலினுள் உணவு மூலமும், மருந்து மாத்திரைகள் வழியாகவும் புகும் பொருட்களை உடைத்து, அவற்றுள் நச்சுத் தன்மை இருந்தால் அதனை அகற்றும் வேலையையும் கல்லீரல் செய்கிறது. மறு பக்கம், உடலுக்கு அவசியமான பல புரதங்களை கல்லீரல் தான் உற்பத்தி செய்கிறது. கல்லீரல் செயலிழந்தால், எங்கள் உடலில் இரத்தம் உறைய அவசியமான பல மூலக்கூறுகள் குறைய, இரத்தக் கசிவினால் நாம் பாதிக்கப் படுவோம். உடலினுள் மீள்சுழற்சிக்காக உடைக்கப் படும் புரதங்கள், ஏனைய பொருட்களை கல்லீரல் அகற்றா விட்டால், அவை உடலில் சேர்ந்து அதனாலும் நம் உடல் நலம் கெடும். சிறந்த உதாரணம், கல்லீரல் நோயினால் பிலிருபின் மீள்சுழற்சி பாதிக்கப் பட்டால், பிலிருபின் இரத்தத்தில் அதிகரித்து மஞ்சள் காமாலை ஏற்படும். இப்படி ஏராளமான உப தொழில்களை தன் வசம் வைத்திருக்கும் கல்லீரல், நீரிழிவிற்கு ஏன் முக்கியம்? குழுக்கோசும் கல்லீரலும் இரத்த குழுக்கோசை அதிகரிப்பதில் எங்கள் உணவு மூலம் உள்ளெடுக்கப் படும் மாச்சத்துகள் மட்டுமன்றி, கல்லீரலினால் உற்பத்தி செய்யப் படும் குழுக்கோசுக்கும் பங்கிருக்கிறது. நாம் உணவருந்திய பின்னர் குழூக்கோஸ் இரத்தத்தில் அதிகரிக்கும். இதை எங்கள் கணையம் உணர்ந்து இன்சுலின் ஹோமோனைச் சுரக்கும். சுரக்கப் படும் இன்சுலின், உடலின் ஏனைய கலங்களினுள் இரத்த குழுக்கோஸ் நுழைவதை ஊக்குவிக்கும். ஆரோக்கியமான ஒருவரில், இந்த நடைமுறை மூலம், உடல் குழுக்கோசைப் பாவிக்க, இரத்த குழுக்கோஸ் சாதாரணமான நிலையில் இருக்கும். விரதமிருக்கும் ஒருவரை எடுத்துக் கொள்வோம். அவர் 12 மணிநேரங்களுக்கு மேலாக உணவருந்தாமல் இருக்கும் போது, இரத்தத்தில் குழுக்கோஸ் குறைவதை கணையம் உணரும். இதை உணரும் கணையம், இன்சுலின் சுரப்பைக் குறைத்துக் கொண்டு, குழூக்காகோன் எனப்படும் இன்சுலினுக்கு எதிரான செயல்பாடு கொண்ட வேறொரு ஹோமோனைச் சுரக்கும். இந்த குழூக்காகோன், கல்லீரலைத் தாக்கும் போது, கல்லீரல் இரண்டு வழிகளில் இரத்த குழுக்கோசை அதிகரிக்கும்: 1. கல்லீரல் புதிதாக குழுக்கோசை உற்பத்தி செய்து இரத்தத்தினுள் விடும். 2. கல்லீரலில் சேமிக்கப் பட்டிருக்கும் கிளைகோஜன் எனப்படும் சேமிப்பை உடைத்து அதிலிருந்து குழுக்கோசை இரத்தத்தினுள் வெளிவிடும். இந்த வழிகளில், ஆரோக்கியமான ஒருவர் உணவு தவிர்ப்பில் 12 மணிநேரங்கள் ஈடுபட்டால், கல்லீரல் குழுக்கோசை உற்பத்தி செய்து இரத்தத்தில் கலக்கும். இப்போது, கணையம் குழுக்கோஸ் அதிகரிப்பதை உணர்ந்து இன்சுலினைச் சுரக்க, உடல் குழுக்கோசைப் பயன்படுத்த ஆரம்பிக்கும். எனவே, தான் ஆரோக்கியமான ஒருவரில், 12 மணிநேரங்கள் பட்டினி கிடந்த பின்னரும், இரத்த குழுக்கோஸ் 70 முதல் 100 mg/dL வரை இருக்கிறது. இப்போது எல்லாம் சுபம் என்று உடல் உணரும். நீரிழிவின் போது என்ன நடக்கிறது? இன்சுலினுடைய தொழிற்பாடு நீரிழிவின் போது குறைகிறது - இது இன்சுலின் சுரப்புக் குறைவதாலோ அல்லது சுரக்கப் படும் இன்சுலினுக்கு உடல் துலங்கல் காட்டுவது குறைவதாலோ நிகழலாம். இந்த நிலையில், ஒரு நீரிழிவு நோயாளி உணவருந்துகிறார் என வைத்துக் கொள்ளுங்கள். அவரது இரத்த குழுக்கோஸ் அதிகரிக்கும். ஆனால், இன்சுலின் செயல்பாட்டுக் குறைவால், கல்லீரல் உட்பட உடலின் அங்கங்கள் இரத்த குழுக்கோசை உள்வாங்கிப் பயன்படுத்த இயலாமல் போகும். சுருக்கமாக, இரத்தத்தில் குழுக்கோஸ் இருந்தாலும், உடலின் பெரும்பாலான அங்கங்களைப் பொறுத்த வரை நீரிழிவு நோயாளி “பட்டினி கிடக்கிறார்” என்பதாகத் தோன்றும். இதனால், கணையம் குளூக்காகோன் ஓமோன் சுரப்பை அதிகரிக்க, குழுக்காகோன் ஹோமோன் கல்லீரலைத் தாக்கும். இந்தப் “பட்டினியையும்” குழூக்காகோனையும் உணரும் எங்கள் பட்லரான கல்லீரல் இப்போது தன் வேலையைக் காட்ட ஆரம்பிப்பார். "பட்டினி" கிடக்கும் உடலுக்காக, கல்லீரல் குழுக்கோசை உற்பத்தி செய்து இரத்தத்தினுள் விடும். ஏற்கனவே உணவின் மூலம் கிடைத்த குழுக்கோசும் இரத்தத்தில் தேங்கிய நிலையில், கல்லீரலும் குழுக்கோசை இரத்தத்தினுள் அனுப்ப, இரத்த குழுக்கோஸ் அளவு எகிறும். இதில் இருந்து, அதிகரித்த இரத்த குழுக்கோஸ், அதனால் ஏற்படும் சிறுநீரகப் பாதிப்பு, குருதிக் கலன்களின் பாதிப்பு என்பன தொடரும். எனவே, உடலின் இரத்த குழுக்கோசை சமநிலைப்படுத்த முயலும் கல்லீரல், பிரச்சினையை மேலும் சிக்கலாக்கி விடும் வேலையைச் செய்வதால், நீரிழிவு இன்னும் மோசமாக வழி வகுத்து விடுகிறது. இதனால் தான், நீரிழிவு நோய்க்காளாகி விட்ட ஒருவரில், உணவு முறையும், உடற்பயிற்சிகளும் மட்டுமே நீரிழிவை இல்லாமலாக்கப் போதுமானவையாக இருப்பதில்லை. மெற்fபோமின் பல வழிகளில் வேலை செய்தாலும், அதன் பிரதானமான ஒரு இலக்கு கல்லீரல். கல்லீரல் குழுக்கோசைப் புதிதாக உருவாக்கி இரத்தத்தினுள் கலக்காமல் மெற்fபோமின் தடுப்பதால் இரத்த குழுக்கோஸ் அதிகரிக்காமல் தடுக்கிறது. மெற்fபோமினோடு, உணவுச் சீராக்கம், உடற்பயிற்சி என்பவற்றை இணைத்தால், நீரிழிவில் அதிகரித்த இரத்த குழுக்கோஸினால் உருவாகக் கூடிய மோசமான பின்விளைவுகளைத் தடுக்கலாம். -ஜஸ்ரின் பட உதவி, நன்றியுடன்: Rines et al., Targeting hepatic glucose metabolism in the treatment of type 2 diabetes. Nature Reviews Drug Discovery volume 15, pages786–804 (2016)

நீரிழிவும் எங்கள் நரம்புகளும் “Magic is organizing chaos” "குழப்பத்தை ஒழுங்கமைப்பது தான் மாயாஜால வித்தை" - The Witcher தொடரில் ஒரு பாத்திரம். என்னுடைய நண்பர் ஒருவருக்கு அடிக்கடி சமிபாட்டுப் பிரச்சினை, வாய்வு என்பன ஏற்படும். இவை ஏற்படும் சமயங்களிலெல்லாம் நீரிழிவு நோயாளியான அவரது இரத்த குழுக்கோஸ் அதிகரிக்கும். என்ன காரணத்தினாலோ, தனது சமிபாட்டுப் பிரச்சினையினால் தான் குழுக்கோஸ் அதிகரிக்கிறது, நீரிழிவுக் குணம் காட்டுகிறது என அவர் நம்ப ஆரம்பித்தார் (இதற்கு சமூக வலை ஊடகங்களில் பரவும் போலி மருத்துவத் தகவல்களும் காரணமாக இருக்கக் கூடும்). இதை அவரது மருத்துவரிடமும் கூறி, சமிபாட்டுப் பிரச்சினையை முதலில் தீர்த்தால் தனது நீரிழிவு மருந்தைக் குறைக்கலாம் என்று ஆலோசனையையும் நண்பர் முன் வைத்திருக்கிறார். இதன் பிறகு, அவருக்கும் மருத்துவருக்கும் இடையிலான தொடர்பாடல் அவ்வளவு சுமூகமாக இருக்கவில்லை என்பதோடு இந்தக் கதையை நிறைவு செய்யலாம்😂. நண்பருக்கு ஏற்பட்ட சமிபாட்டுப் பிரச்சினை, பல நீரிழிவு நோயாளிகளில் ஏற்படக் கூடிய இரைப்பை இயக்கச் செயலிழப்பு நிலை (gastric paresis). இதற்கான காரணங்களில் ஒன்று நீரிழிவினால் உடல் நரம்புகளின் இயக்கம் பாதிக்கப் படுவது. சில ஆய்வுகளின் படி, 10 ஆண்டுகளுக்கு மேலாக நீரிழிவினால் பாதிக்கப் பட்டிருக்கும் நோயாளிகளுள், அரைவாசிப்பேர் வரை நீரிழிவின் நரம்புப் பாதிப்பான diabetic neuropathy எனும் நிலையினால் பாதிக்கப் பட்டிருப்பர். இந்த நரம்புப் பாதிப்பில் பல் வேறு வகைகள் உண்டு, பாதிக்கப் படும் நரம்பைப் பொறுத்து குணங்குறிகள் ஆளுக்காள் மாறுபடும். நீரிழிவு எப்படி நரம்புகளின் தொழிலைப் பாதிக்கிறது? எங்களுடைய நரம்புத் தொகுதி என்பது ஒரு மாயாஜால வித்தகர்: உடலின் ஒவ்வொரு அங்கத்தையும், உடலின் நன்மை கருதி ஒழுங்கமைக்கும் வேலையை நரம்புத் தொகுதி செய்கிறது. முண்ணானில் இருந்து மின்சார வயர்கள் போல உடல் முழுவதும் நீழும் நரம்புகளை சுற்றயல் நரம்புகள் (peripheral nerves) என்போம். இவற்றுள் சில நரம்புகள், உணரும் நரம்புகள் (sensory nerves)- வலி, சூடு, தொடுகை போன்ற உடல் உணர்வுகளை உணர்பவை இவை. இன்னும் சில இயக்க நரம்புகள்(motor nerves) - கிடைக்கும் தகவல்களுக்கேற்ப உடலை இயக்குபவை இவை. இந்த இயக்க நரம்புகளில், இதயம், சமிபாட்டுத் தொகுதி, இரத்தக் குழாய்கள் போன்ற உறுப்புகளைக் கட்டுப் படுத்தும் ஒரு பகுதியை "இச்சையின்றி இயங்கும்" (involuntary) நரம்புகள் என்பர். உதாரணமாக, மேலே நான் குறிப்பிட்ட நண்பரின் இரைப்பையை, அவரது இச்சையின்றியே இயக்கும் நரம்புகளை, நீரிழிவு பாதித்தமையால் தான் அவருக்கு சமிபாட்டுக் குறைவு ஏற்பட்டிருக்கிறது. நீரிழிவினால் ஏற்படும் நரம்புப் பாதிப்புத் தான் சமிபாட்டுக் குறைவை ஏற்படுத்தியது, சமிபாட்டுக் குறைவினால் நீரிழிவு நிலை ஏற்படவில்லை. உணரும் நரம்புகளும் நீரிழிவு நரம்புப் பாதிப்பில் முக்கியமானவை. ஒரு மிகச்சூடான பொருளைத் தவறுதலாகக் கையினால் தொட்டு விட்டீர்ளென வைத்துக் கொள்ளுங்கள். மில்லி செக்கன் நேரத்தில் உங்கள் கை சூடான பொருளில் இருந்து பின்வாங்கிக் கொள்ளும். இந்தப் பின்வாங்கல், மூளை வரை தகவல் சென்று யோசித்து நிகழ்வதில்லை. எங்கள் முதுகுத் தண்டில் இருக்கும் முண்ணான் மட்டத்தில் தொழிற்படும் வலியுணர்வுக் கட்டமைப்பே இந்தக் கண நேரத் துலங்கலை வழி நடத்துகிறது. இத்தகைய உடனடிப் பாதுகாப்பு நடவடிக்கையின் மூலம், சூட்டைத் தொட்ட கை மேலும் சேதமடையாமல் காக்கும் வேலையை எங்கள் உணரும் நரம்புகளும், இயக்க நரம்புகளும் சேர்ந்து செய்கின்றன. வலியுணர்விழப்பினால் நிகழும் அபாயம் நீரிழிவினால் ஏற்படும் நரம்புப் பாதிப்பில், உணரும் நரம்புகள் (ஏனைய நரம்பு வகைகளை விட) சற்று அதிகமாகவே பாதிக்கப் படுகின்றன. எங்கள் உடலின் மிக நீளமான உணரும் நரம்புகள் எங்கள் கால்களில் இருக்கின்றன. முண்ணானில் தொடங்கி காலின் பாதங்களில் இவை முடிகின்றன என்றால் இவற்றின் நீளத்தை நீங்கள் கற்பனை செய்து கொள்ள முடியும். நீரிழிவு காரணமாக ஏற்படும் நரம்புப் பாதிப்பு, முதலில் இந்த நீள நரம்புகளையே பாதிக்கின்றன. இப்பாதிப்பினால் நீரிழிவு நோயாளிகளின் வாழ்க்கையைப் புரட்டிப் போட்டு விடும் உடல் ஊனம் கூட ஏற்படலாம். படத்தில் இருப்பது போல, பொதுவாகக் கால்களும், கைகளும் உணரும் நரம்புகளின் செயலிழப்பினால் பாதிக்கப் படுகின்றன. இதனை "stocking and gloves pattern" என்று அழைப்பர். பட உதவி நன்றியுடன்: Amthor et al., Essentials of Modern Neuroscience (2020). இந்தப் பாதங்களில் முடியும் உணர்வு நரம்புகள் செயலிழக்கும் போது, பாதங்களில் ஏற்படும் சிறு காயங்களால் உருவாகும் வலி உணரப்படுவது குறைய, காயங்கள் பெரிதாகும் வரை அல்லது கண்ணுக்குத் தெரியும் வரை கவனிக்கப் படாமல் போகின்றன. இதனால் தான், நீரிழிவு நோயாளிகளில், முள் குத்துவதால் ஏற்படும் சிறு காயங்கள் கூட பெரிதாகி பாதங்கள் அல்லது கால்களை அகற்ற வேண்டிய நிலை ஏற்படுகிறது. இதே போன்ற நரம்பு மரத்துப் போகும் நிலை, கைகளிலும் கூட ஏற்படலாம். ஆனால், கைகள் அடிக்கடி எங்கள் கவனத்திற்கு வரும் வகையில் அமைந்திருப்பதால், காயங்கள் அலட்சியப் படுத்தப் பட்டுப் பெரிதாகும் வாய்ப்புகள் மிக அரிது. இதனால் தான், நீரிழிவின் நரம்புப் பாதிப்பினால் கால்கள் இழக்கப் படுவதே பொதுவாக இருக்கிறது. சில நீரிழிவு நோயாளிகளில் இந்த உணரும் நரம்புகளின் பாதிப்பு, அதிகரித்த வலியுணர்வாக வெளிப்படும். இந்த வலி அனேகமாக, தொடை, இடுப்பு வலியாக வெளிப்படலாம். நீரிழிவு நரம்புப் பாதிப்பைப் பொறுத்த வரை, அடுத்த படி நிலையில் இருப்பவை எங்கள் உள் உறுப்புகளுக்கு தகவலை அனுப்பும் இச்சையின்றிய நரம்புகள். ஏற்கனவே மேலே குறிப்பிட்ட இரைப்பையின் இயக்கம், சிறு நீர்ப்பைச் செயல்பாடு, பிறப்புறுப்புகளின் செயல்பாடு என்பன இத்தகைய நரம்புகளின் பாதிப்பினால் பாதிக்கப் படும். நீண்டகாலம் நீரிழிவோடு வாழும் மக்களிடையே, கிட்டத் தட்ட அரைவாசிப்பேருக்கு வரக்கூடிய இந்த நரம்புப் பாதிப்புகளை எப்படித் தடுப்பது அல்லது குணமாக்குவது? தடுப்பு முறைகள் நீரிழிவின் போது நரம்புகள் பாதிக்கப் படும் பொறிமுறைகள் பற்றி இன்னும் ஆராய்ந்து வருகிறார்கள். நரம்புகளை உருவாக்கும் நியூரோன்களும், அந்த நரம்புகளை ஒரு பாதுகாப்புக் கவசம் மூலம் சூழ்ந்து பாதுகாக்கும் ஸ்வான் (Schwann) கலங்களும் பாதிக்கப் படுவதாகத் தான் ஆய்வுத் தகவல்கள் காட்டுகின்றன. ஆனால், பொறி முறை இன்னும் தெரியாமையால், இந்தப் பாதிப்புகளைத் தடுக்கும் மருந்துகள் இன்னும் உருவாக்கப் படவில்லை. எனவே, தடுப்பு முறைகள் தான் தற்போதைக்கு நீரிழிவினால் ஏற்படும் நரம்புப் பாதிப்பைக் குறைக்கும் வழிகளாக இருக்கின்றன. யார் அதிகம் நரம்புப் பாதிப்புக்குள்ளாகின்றனர்? ஆய்வுகளின் படி, இரத்த குழுக்கோஸ் (அல்லது அதன் குறிகாட்டியான HbA1c அளவு) கட்டுப்பாட்டில் இல்லாதோரில் நரம்புப் பாதிப்பிற்கான வாய்ப்புகள் அதிகமாக இருக்கின்றன. நரம்புப் பாதிப்பின் வாய்ப்பை அதிகரிக்கும் இரண்டாவது பெரிய காரணியாக உடலின் கொலஸ்திரோல் மட்டம் இருக்கிறது. அதிக உடற்பருமன் உடையோரிலும், நீரிழிவு காரணமான நரம்புப் பாதிப்பு வரும் வாய்ப்புகள் அதிகமாக இருக்கின்றன. எனவே, தடுப்பு முறைகள்: 1. இரத்த குழூக்கோஸ் (அல்லது அதன் குறிகாட்டியான HbA1c) மிகையாக அதிகரிக்காமல் பாதுகாத்தல். 2. இரத்த கொலஸ்திரோல் அளவைக் கட்டுப் பாட்டில் வைத்திருத்தல். 3. உடற் பருமனை ஆரோக்கிய மட்டத்தில் பேணுதல். இதை விட, நான்காவதாக நீரிழிவு நோயுடையோர் பாதப் பராமரிப்பில் கவனம் செலுத்த வேண்டும். நரம்புப் பாதிப்பு ஏற்படாவிட்டாலும் கூட, நீரிழிவு உடையோர் கால் பாதங்களைத் அன்றாடக் கவனத்திற்குட்படுத்த வேண்டும்: 1. பாதணிகள் அணியாமல் கல்லு முள்ளு நிறைந்த பரப்புகளில் நடப்பதைத் தவிர்க்க வேண்டும். ஊரில், குறிப்பாக வன்னிப்பகுதியில், கம்பிக் கட்டைகளால் ஏற்படும் கால் காயங்கள் இந்த இடத்தில் சுட்டிக் காட்டப் பட வேண்டியவை. இது, நீரிழிவு நோயாளிகள், முற்றாகத் தவிர்க்க வேண்டிய ஒரு காயம். 2. ஒவ்வொரு இரவும், படுக்கைக்குப் போகும் முன், பாதங்களை நீரில் கழுவிய பின், துடைத்து காயங்கள் எவையும் இருக்கின்றனவா எனப் பரிசோதிக்க வேண்டும். ஏதாவது காயங்கள் இருப்பின், மருத்துவரின் ஆலோசனையைப் பெற வேண்டும். சுருக்கமாக: நீரிழிவைக் கட்டுப் பாட்டில் வைத்திருப்பதாலும், சில எளிமையான தடுப்பு நடைமுறைகளைப் பின்பற்றுவதாலும், நீரிழிவினால் ஏற்படும் நரம்புப் பாதிப்பை வராமல் தவிர்க்கலாம். அல்லது, வந்த பின்னர் அங்க இழப்பு ஏற்படுவதைத் தவிர்க்கலாம். தகவல் மூலங்கள்: 1. https://www.niddk.nih.gov/health-information/diabetes/overview/preventing-problems/nerve-damage-diabetic-neuropathies. அமெரிக்க சுகாதார அமைப்பின் நீரிழிவு, சிறுநீரகப் பிரிவு, விரிவான தகவல்களைக் கொண்டது.