பட மூலாதாரம்,GETTY IMAGES

சனிக்கிழமையன்று (அக்டோபர் 12), அமெரிக்காவின் கலிபோர்னியா மாகாணத்தின் கோச்செல்லா நகரில் டொனால்ட் டிரம்பின் பேரணி நடைபெற்றது. இந்தப் பேரணி நடந்த இடத்திற்கு அருகிலுள்ள சந்திப்பில், ஒரு வேட்டைத்துப்பாக்கி மற்றும் தோட்டாக்கள் நிறைந்த கைத்துப்பாக்கியைச் சட்டவிரோதமாக வைத்திருந்த ஒரு நபரைக் கைது செய்துள்ளதாக போலீசார் தெரிவித்துள்ளனர்.

வெம் மில்லர் எனப்படும் 49 வயதான அந்த சந்தேகத்திற்குரிய நபர், ஒரு கறுப்பு நிற எஸ்.யூ.வி வாகனத்தை ஓட்டிச் சென்றபோது காவல்துறை சோதனையில் சிக்கியுள்ளார். ஒரு ஒரு பாதுகாப்புச் சோதனைச் சாவடியில், அவரது காரை நிறுத்திச் சோதித்த போது, இரண்டு துப்பாக்கிகள் மற்றும் ‘அதிக திறன் கொண்ட ஒரு மேகசின் (Magazine)’ ஆகியவற்றைக் காவல்துறையினர் கண்டுபிடித்தனர்.

எந்த அசம்பாவிதமும் நடப்பதற்கு முன்னதாகவே மில்லர் கைது செய்யப்பட்டார் என ரிவர்சைடு கவுண்டி ஷெரிப் அலுவலகம் தெரிவித்துள்ளது. மேலும் லோட் செய்யப்பட்ட துப்பாக்கி மற்றும் அதிக திறன் கொண்ட மேகசினை வைத்திருந்த குற்றத்திற்காக அவருக்கெதிராக வழக்கு பதிவு செய்யப்பட்டது.

இதனால் டிரம்புக்கு எந்தவொரு ஆபத்தும் இல்லை என்றும், இந்தச் சம்பவம் அவரது பாதுகாப்பு நடவடிக்கைகளை பாதிக்கவில்லை என்றும் அமெரிக்க உளவுத்துறை தெரிவித்துள்ளது.

இது தொடர்பாகப் பேசிய உள்ளூர் காவல்துறை அதிகாரி ஒருவர், கைது செய்யப்பட்ட சந்தேகத்திற்குரிய நபரை ‘மனநலம் பாதிக்கப்பட்டவர்’ என்று விவரித்தார், மேலும் இந்த சம்பவம் டிரம்ப் அல்லது பேரணியில் பங்கேற்றவர்களின் பாதுகாப்பை எந்த விதத்திலும் பாதிக்கவில்லை என்று அவரது அலுவலகம் தெரிவித்தது.

ஆனால் பல கேள்விகளுக்கு இன்னும் விடை கிடைக்காமல் உள்ளது.

ரிவர்சைடு கவுண்டி காவல்துறை அதிகாரி (ஷெரிப்) சாட் பியான்கோ கூறுகையில், “சந்தேகத்திற்குரிய நபரின் நோக்கம் என்ன என்பதைப் பற்றி ஊகிக்க முடியவில்லை என்றும், ஆனால் டிரம்ப் மீதான ஒரு மூன்றாவது 'படுகொலை முயற்சியை’ தனது அதிகாரிகள் தடுத்து விட்டதாகத் தான் ‘உறுதியாக’ நம்புவதாகவும்',” தெரிவித்தார்.

ஆனால் டிரம்ப் மீதான தாக்குதல் தான் அந்த நபரின் நோக்கம் என்பதை நிரூபிக்க இயலாது என்றும் அவர் கூறினார்.

அமெரிக்காவின் சட்ட அமலாக்க (Federal law enforcement) அதிகாரி ஒருவர் சி.பி.எஸ் செய்தி முகமையிடம் பேசியபோது, “இந்தச் சம்பவத்தில், கொலை முயற்சிக்கான எந்த அறிகுறியும் இல்லை,” என்று கூறினார்.

ஃபெடரல் அதிகாரிகளின் கூற்றுப்படி, அவர்கள் இந்தச் சம்பவத்தை முழுமையாக ஆராய்ந்து வருவதாகவும், கூடுதலாகச் சில குற்றச்சாட்டுகளைப் பதிவு செய்யலாமா என்பது குறித்து முடிவு செய்யப்படும் என்றும் கூறினார்கள்.

பியான்கோ, ஒரு தேர்ந்தெடுக்கப்பட்ட அதிகாரி மற்றும் குடியரசுக் கட்சியைச் சேர்ந்தவர். முன்னதாக அவர் டிரம்பிற்கு தனது ஆதரவைத் தெரிவித்திருந்தார். டிரம்பின் தேர்தல் பிரச்சாரத்திற்கு பிரதிநிதியாகவும் அவர் செயல்படுகிறார்.

இந்த சம்பவம் இந்திய நேரப்படி காலை 5:30 மணிக்கு மணிக்கு நடந்தது, அதாவது டிரம்ப் பேரணி மேடையில் தோன்றுவதற்கு ஒரு மணி நேரத்திற்கு முன்பு. தேர்தலுக்கு இன்னும் மூன்று வாரங்களே உள்ள நிலையில் நடந்துள்ள இந்தச் சம்பவம், டிரம்பைச் சுற்றியுள்ள தீவிர பாதுகாப்பு நடவடிக்கைகள் மற்றும் அவர் எதிர்கொள்ளும் ஆபத்துகள் ஆகியவற்றை எடுத்துக்காட்டுகிறது.

இந்த ஆண்டு டிரம்ப் மீது நடத்தப்பட்ட இரண்டு கொலை முயற்சிகளைத் தொடர்ந்து, இந்த சம்பவம் அரங்கேறியுள்ளது.

பட மூலாதாரம்,GETTY IMAGES

கைது செய்யப்பட்ட மில்லர் மீது இரண்டு ஆயுதங்களை சட்டவிரோதமாக வைத்திருந்ததாக குற்றச்சாட்டுகள் சுமத்தப்பட்டு, பின்னர் $5,000 மதிப்பிலான (ரூபாய் 4.20 லட்சம்) பிணையில் அவர் விடுவிக்கப்பட்டார். ஃபெடரல் குற்றச்சாட்டுகள் எதுவும் அவர் மீது தாக்கல் செய்யப்படவில்லை.

முன்னதாக ஞாயிற்றுக்கிழமை (அக்டோபர் 13) அன்று நடத்தப்பட்ட ஒரு காவல்துறை செய்தியாளர் சந்திப்பில் பேசிய பியான்கோ "எங்களால் இப்போது எல்லா தகவல்களையும் கொடுக்க முடியாது, ஏனென்றால் நாங்கள் சில நடவடிக்கைகளை எடுத்துவருகிறோம்" என்று கூறினார்.

அந்தச் சந்தேகத்திற்குரிய நபர் முதலில் பேரணி நடக்கும் பகுதிக்கு வந்தபோது அவர் எந்த எச்சரிக்கையையும் தூண்டும்படி நடந்துகொள்ளவில்லை என்றும், ஆனால் பேரணி நடக்கும் இடத்தை நெருங்கியதும் ‘பல முறைகேடுகள் வெளிவந்தன’ எனவும் ஷெரிப் பியான்கோ கூறினார்.

அந்த நபரின் வாகனம் போலியான ‘நம்பர் பிளேட்’ கொண்டிருந்ததாகவும், வாகனத்தின் உள்ளே அனைத்தும் ஒழுங்கற்றுக் கிடந்ததாகவும் அவர் விளக்கினார்.

காரில் பல பெயர்களில் கடவுச்சீட்டுகள் மற்றும் பல ஓட்டுநர் உரிமங்கள் இருந்தன என்றும், வாகனத்தின் ‘நம்பர் பிளேட்’ வீட்டில் போலியாக தயாரிக்கப்பட்டது, அது பதிவு செய்யப்படவில்லை என்றும் ஷெரிப் கூறினார்.

தான் ‘இறையாண்மைக் குடிமக்கள் இயக்கம்’ (Sovereign Citizens) என்ற தீவிர வலதுசாரிக் குழுவைச் சேர்ந்தவர் என அந்தச் சந்தேகத்திற்குரிய நபர் அதிகாரிகளிடம் கூறியதாக ஷெரிப் தெரிவித்தார்.

“வாகனத்தின் நம்பர் பிளேட்டும் கூட ‘இறையாண்மை குடிமக்கள்’ என்று கூறும் தனிநபர்களின் குழுவைக் குறிப்பதாக இருந்தது," என்று காவல்துறை அதிகாரி கூறினார். ஆனால் மில்லர் அந்தக் குழுவின் ஒரு உறுப்பினர் தானா என்பதை ஷெரிப் உறுதியாக கூறவில்லை.

"அதை ஒரு போராளிக் குழு என்று நான் கூறமாட்டேன். அது அரசாங்கம் மற்றும் அரசாங்கத்தின் கட்டுப்பாட்டில் நம்பிக்கை இல்லாத ஒரு குழு. அரசாங்கமும் சட்டங்களும் அவர்களுக்குப் பொருந்தும் என்பதை அந்தக் குழு நம்பவில்லை." என்று அவர் கூறினார்.

பட மூலாதாரம்,GETTY IMAGES

அமெரிக்க அட்டர்னி அலுவலகம், அமெரிக்க உளவுத்துறை மற்றும் ஃஎப்.பி.ஐ (FBI) ஆகிய அமைப்புகளுக்கு இந்த கைது நடவடிக்கை பற்றி தெரியும் எனவும் ஃபெடரல் அதிகாரிகளின் அறிக்கையில் தெரிவிக்கப்பட்டுள்ளது.

"இந்தச் சம்பவம் பாதுகாப்பு நடவடிக்கைகளை பாதிக்கவில்லை என்றும், முன்னாள் அதிபர் டிரம்ப் எந்த ஆபத்திலும் இல்லை என்றும் அமெரிக்க உளவுத்துறை கருதுகிறது," என்று அந்த அறிக்கையில் கூறப்பட்டுள்ளது.

“தற்சமயம் ஃபெடரல் அதிகாரிகளின் சார்பில் கைது நடவடிக்கைகள் எதுவும் எடுக்கப்படவில்லை என்றாலும், விசாரணை நடந்து வருகிறது. நேற்றிரவு நிகழ்வுகளின் பாதுகாப்பை உறுதிப்படுத்த உதவிய பிரதிநிதிகள் மற்றும் உள்ளூர் அதிகாரிகளுக்கு அமெரிக்க அட்டர்னி அலுவலகம், அமெரிக்க உளவுத்துறை மற்றும் ஃஎப்.பி.ஐ (FBI) ஆகியவை தங்கள் நன்றியைத் தெரிவித்துள்ளன,” என்றும் ஃபெடரல் அதிகாரிகளின் அறிக்கையில் தெரிவிக்கப்பட்டுள்ளது.

கொலை முயற்சி நடந்ததாகக் கூறப்படுவதையடுத்து, டிரம்ப்பைச் சுற்றியுள்ள பாதுகாப்பு பலப்படுத்தப்பட்டுள்ளது.

மில்லர் கைது செய்யப்படுவதற்கு முந்தைய சனிக்கிழமை, பென்சில்வேனியாவின் பட்லரில் இரண்டாவது முறையாக பேரணியை நடத்தினார் டிரம்ப். கடந்த ஜூலை மாதம் இதே இடத்தில் தான் ஒருவர் ஸ்னைப்பர் துப்பாக்கியால் டிரம்பின் பேரணி மீது துப்பாக்கிச் சூடு நடத்தினார். அதில் கூட்டத்தில் இருந்த ஒருவர் கொல்லப்பட்டார். தாக்குதலில் காயமடைந்த டிரம்ப், தனது காதுகளில் ரத்தம் வழிய அங்கிருந்து வெளியேறினார்.

கடந்த செப்டம்பரில், புளோரிடாவின் வெஸ்ட் பாம் பீச்சில் உள்ள ‘டிரம்ப் சர்வதேச கோல்ஃப் கிளப்புக்கு’ வெளியே கைது செய்யப்பட்ட மற்றொரு நபர் தற்போது சிறையில் உள்ளார். அந்த நபர் கோல்ஃப் மைதானத்திற்கு அருகே புதர்களுக்குள் ரைபிள் துப்பாக்கியுடன் மறைந்திருந்தபோது பிடிபட்டார்.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/ckg05vpyxv0o

சீனா திடீரென தைவானை சுற்றி வளைத்து போர் ஒத்திகையை நடத்தி வருவது அந்த பிராந்தியத்தில் நிலவும் பதற்றத்தை மேலும் அதிகரிக்கச் செய்துள்ளது. தைவானைச் சுற்றிலும் 9 இடங்களில் போர் ஒத்திகையை சீனா நடத்துகிறது.

சீனாவுக்கு கண்டனம் தெரிவித்துள்ள தைவான், ஜனநாயகத்தையும் இறையாண்மையையும் உறுதி செய்ய தேவையான படைகளை அனுப்பியிருப்பதாக கூறியுள்ளது.

சீனா - தைவான் இடையே என்ன நடக்கிறது?

தைவானைச் சுற்றியுள்ள கடற்பரப்பில் ஜாயின்ட் ஸ்வார்ட் 2024பி என்ற பெயரில் போர் ஒத்திகையை சீனா தொடங்கியுள்ளது. தைவான் மீது தாக்குதல் நடத்துவதை உருவகப்படுத்தி, 9 இடங்களில் ஒத்திகை நடத்தப்படுவதாக சீன ராணுவம் தெரிவித்துள்ளது.

தைவான் தீவைச் சுற்றிலும் கண்காணிப்புப் பணியில் ஈடுபட சீன கடலோர காவல்படையும் சில கப்பல்களை அனுப்பி வைத்துள்ளது.

7 கடற்படை போர்க் கப்பல்கள், 25 போர் விமானங்கள் மற்றும் 4 கப்பல்கள் இருப்பதை கண்டுபிடித்திருப்பதாக தைவான் தெரிவித்துள்ளது.

தைவானைச் சுற்றிலும் போர் ஒத்திகை நடப்பதை சீன ராணுவம் தனது சமூக வலைதள பக்கத்தில் வெளியிட்ட அறிக்கையில் உறுதிப்படுத்தியுள்ளது. இந்த ஒத்திகையில் தரைப்படை, கடற்படை, விமானப்படை, ராக்கெட் படை மற்றும் பிற படையினரும் பங்கேற்றுள்ளதாக அந்த அறிக்கை கூறுகிறது. சீன கடலோர காவல்படையும் இந்த ஒத்திகையில் பங்கேற்றுள்ளது.

போர்க்கப்பல்களும், போர் விமானங்களும் பல முனைகளில் இருந்தும் கூட்டு தாக்குதல் நடத்துவதற்கான ஒத்திகையில் ஈடுபட்டிருப்பதாக அந்த அறிக்கையில் கூறப்பட்டுள்ளது. போருக்கான தயார் நிலை, முக்கிய துறைமுகங்களை முற்றுகையிடுவது, கடல் மற்றும் தரைவழித் தாக்குதல்கள் போன்றவற்றை முன்னிறுத்தி இந்த ஒத்திகை நடப்பதாக அந்த அறிக்கை தெரிவிக்கிறது.

இந்த பயிற்சிகளை "பிரிவினைவாத சக்திகளுக்கு எதிரான வலுவான தடுப்பு" மற்றும் "தேசிய இறையாண்மையை பாதுகாக்க மற்றும் தேசிய ஒற்றுமையை பேணுவதற்கான சட்டபூர்வமான மற்றும் தேவையான நடவடிக்கை" என்று சீன ராணுவம் விவரிக்கிறது.

அத்துடன், சீனா ராணுவத்தின் கிழக்கு படைப் பிரிவு, தைவானை சுற்றிலும் செய்யப்படும் போர் ஒத்திகை குறித்த வீடியோவை வெளியிட்டுள்ளது.

தைவானின் இறையாண்மையை சீனா அங்கீகரிக்கவில்லை என்பதும், தைவான் தனக்கு சொந்தமானது என்று சீனா கூறுகிறது என்பதும் நினைவு கூரத்தக்கது.

பட மூலாதாரம்,PEOPLE'S LIBERATION ARMY SOCIAL MEDIA

சீனாவின் நடவடிக்கைக்கு தைவான் கடும் கண்டனம் தெரிவித்துள்ளது. சீனாவின் ஆத்திரமூட்டும் செயலைக் கண்டிப்பதாக தைவான் பாதுகாப்பு அமைச்சகம் தெரிவித்துள்ளது.

அத்துடன், ஜனநாயகத்தையும், இறையாண்மையையும் பாதுகாக்க தேவையான படைகளை அனுப்பியிருப்பதாகவும் தைவான் பாதுகாப்பு அமைச்சகம் கூறியுள்ளது.

அமைதியையும், ஸ்திரத்தன்மையையும் பேணுவது குறித்து கடந்த வாரம் பேசிய அதிபர் லாயின் உறுதிப்பாட்டை அது சுட்டிக்காட்டியுள்ளது.

அச்சுறுத்தலை எதிர்கொள்ள போருக்கு தயாராவோம் என்றும் தைவான் பாதுகாப்பு அமைச்சகம் தெரிவித்துள்ளது.

சீனாவுக்குப் பதிலடியாக, தைவானும் தனது தயார் நிலையை வெளிப்படுத்தும் வீடியோவை வெளியிட்டுள்ளது.

பட மூலாதாரம்,GETTY IMAGES

சீனாவின் நடவடிக்கையை கண்டித்திருந்த தைவான் பாதுகாப்புத்துறை அமைச்சகம் மீண்டும் ஒரு அறிக்கையை வெளியிட்டுள்ளது. அதில், சீனா இந்த பிராந்தியத்தின் பாதுகாப்புச் சூழலை பலவீனப்படுத்துவதாகவும், சர்வதேச விதிகளுக்கு அச்சுறுத்தல் விடுப்பதாகவும் குற்றம்சாட்டப்பட்டுள்ளது. அதேநேரத்தில், நேரடியாக மோதல் ஏற்படும் வராமல் இருக்கும் வகையில் செயல்படுமாறும் அதன் படைகளை கேட்டுக் கொண்டுள்ளது.

சீன ஏவுகணைகளின் நகர்வை ராணுவ புலனாய்வுப் பிரிவு உன்னிப்பாக கண்காணித்து வரும் நிலையில், அனைத்து படைப் பிரிவுகளும் தயார் நிலையில் இருக்குமாறு உத்தரவிடப்பட்டுள்ளதாக தைவான் பாதுகாப்பு அமைச்சகம் தெரிவித்துள்ளது.

தைவானின் பாதுகாப்பு மண்டலங்கள் உச்சபட்ச உஷார் நிலையில் வைக்கப்பட்டிருப்பதாகவும், போர்க் கப்பல்களும் போர் விமானங்களும் அனுப்பப்பட்டிருப்பதாகவும் அந்த அறிக்கையில் குறிப்பிடப்பட்டுள்ளது.

சீனாவிடம் இருந்து வர வாய்ப்புள்ள எந்தவொரு தவறான தகவல் குறித்தும் விழிப்புடன் இருக்குமாறு குடிமக்களை தைவான் கேட்டுக் கொண்டுள்ளது.

பட மூலாதாரம்,GETTY IMAGES

தைவானைச் சுற்றி சீனா மேற்கொண்டுள்ள ராணுவ ஒத்திகையை உன்னிப்பாக கவனித்து வருவதாக அமெரிக்கா தெரிவித்துள்ளது என்று ராய்ட்டர்ஸ் செய்தி முகமை கூறியுள்ளது.

தைவான் அதிபர் லாயின் வழக்கமான பேச்சுக்குப் பிறகான சீனாவின் இந்த ஒத்திகையை எந்த வகையிலும் நியாயப்படுத்த முடியாது என்றும், அந்த பிராந்தியத்தில் அமைதியும், ஸ்திரத்தன்மையும் சீர்கெடும் வகையில் சீனா நடந்து கொள்ளக் கூடாது என்று பைடன் நிர்வாகம் வலியுறுத்தியுள்ளது.

"தைவான் நீரிணை மற்றும் அந்த பிராந்தியத்தில் அமைதி மற்றும் ஸ்திரத்தன்மையை சீர்கெடச் செய்யும் எந்தவொரு நடவடிக்கைகளையும் சீனா தவிர்க்க வேண்டும். அதுவே, பிராந்திய அமைதி மற்றும் வளத்திற்கு அத்தியாவசியமானது" அமெரிக்க வெளியுறவுத்துறை செய்தித் தொடர்பாளர் மேத்யூ மில்லர் தெரிவித்தார்.

பட மூலாதாரம்,EPA

தைவான் அதிபராக இந்த ஆண்டின் தொடக்கத்தில் பதவியேற்ற லாய், அண்மையில் மக்களுக்கு ஆற்றிய உரையில், தைவானின் தன்னாட்சி அந்தஸ்தை கட்டிக் காக்க உறுதியளித்தார்.

தைவானுக்கு உரிமை கோரும் சீனாவை மறைமுகமாக சாடும் வகையில், "இணைப்பு முயற்சியையோ, நமது இறையாண்மை மீதான ஆக்கிரமிப்பையோ தடுப்பதில் உறுதியாக" இருப்பதாக அவர் சூளுரைத்தார்.

லாய் பதவியேற்றதுமே செய்தது போன்ற போர் ஒத்திகையை இம்முறையும் சீனா செய்யும் என்பது எதிர்பார்த்த ஒன்றுதான் என்று புவிசார் அரசியல் வல்லுநர்கள் கூறுகின்றனர்.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/c4g0yy5ppexo

பட மூலாதாரம்,RUSSIAN DEFENCE MINISTRY

கிழக்கு யுக்ரேனில் போர் நடக்கும் இடத்திற்கு மேல் வானில் இரண்டு புகைத் தடங்கள் தோன்றினால் அதன் பொருள், ரஷ்ய ஜெட் விமானங்கள் தாக்குதல் நடத்தவுள்ளன என்பதே.

ஆனால், கிழக்கு யுக்ரேனில் இருக்கும் கோஸ்ட்யான்டினிவ்கா நகருக்கு அருகில் நடந்த சம்பவம் இதற்கு முன் நடந்திராதது. ஒரு புகைத்தடத்தின் கீழ்ப்பாதை இரண்டாகப் பிளந்தது. ஒரு புதிய பொருள் மற்ற பாதையை நோக்கி விரைந்தது. அவை ஒன்றையொன்று கடந்த போது ஒரு பிரகாசமான ஆரஞ்சு வெளிச்சம் வானில் ஒளிர்ந்தது.

பலரும் நினைத்தது போல, போர் நடக்கும் இடத்தின் முன்களத்திலிருந்து 20 கி.மீ தொலைவில், ஒரு ரஷ்யப் போர் விமானம் மற்றொரு போர் விமானத்தைச் சுட்டு வீழ்த்தியதா? அல்லது ஒரு யுக்ரேனிய ஜெட் விமானம் ரஷ்ய விமானத்தைச் சுட்டு வீழ்த்தியதா?

என்ன நடந்தது என்று தெரிந்துகொள்ளும் ஆர்வத்தில், யுக்ரேனியர்கள் சிதறி கிடந்த பாகங்களை ஆராய்ந்த போது, அவற்றிலிருந்து ரஷ்யாவின் புதிய ஆயுதமான எஸ் -70 ரகசிய ட்ரோன் அழிக்கப்பட்டிருப்பதைக் கண்டுபிடித்தனர்.

இது சாதாரண ட்ரோன் அல்ல. ஓகோட்னிக் (வேட்டைக்காரன்) எனப் பெயரிடப்பட்ட இந்த கனரக, ஆளில்லா வாகனம், ஒரு போர் விமானம் அளவுக்குப் பெரியது, ஆனால் இதில் ஓட்டுநர் அறை (காக்பிட்) இருக்காது. இதைக் கண்டறிவது மிகவும் கடினம். இதை வடிவமைத்தவர்கள், இதற்கு ஈடாக உலகில் வேறேதும் இல்லை என்று கூறுகிறார்கள்.

இவையனைத்தும் உண்மையாக இருக்கலாம். ஆனால் இந்த ட்ரோன் வழிதவறிச் சென்றது. வீடியோவில் காணப்பட்ட இரண்டாவது தடம் ரஷ்ய Su-57 ஜெட் விமானத்திலிருந்து வந்ததாகத் தெரிகிறது. அது ரகசிய ட்ரோனை வெளிப்படையாகத் துரத்துகிறது.

பட மூலாதாரம்,REUTERS

ரஷ்யாவின் Su-57 போர் விமானம் வழிதவறிச் சென்ற ட்ரோனுடன் மீண்டும் தொடர்பை ஏற்படுத்த முயற்சித்திருக்கலாம். ஆனால் அவை இரண்டும் யுக்ரேனிய வான் பாதுகாப்பு மண்டலத்திற்குள் பறந்து கொண்டிருந்ததால், எதிரிகளின் கைகளில் சிக்குவதைத் தடுக்க ஓகோட்னிக் ட்ரோனை அழிக்க முடிவு செய்யப்பட்டதாகக் கருதப்படுகிறது.

கோஸ்ட்யாண்டினிவ்காவிற்கு மேல், வானத்தில் என்ன நடந்தது என்பது குறித்து ரஷ்யாவோ, யுக்ரேனோ இன்னும் அதிகாரப்பூர்வமாகக் கருத்து தெரிவிக்கவில்லை. ஆனால், யுக்ரேனின் மின்னணுப் போர் கட்டமைப்புகள் குறுக்கிட்டதன் காரணமாக, ரஷ்யப் படையினர் தங்கள் ட்ரோன் மீதான கட்டுப்பாட்டை இழந்திருக்கலாம் என ஆய்வாளர்கள் நம்புகின்றனர்.

பட மூலாதாரம்,GETTY IMAGES

இந்தப் போரில் பல ட்ரோன்கள் பயன்படுத்தப்பட்டுள்ளன. ஆனால் ரஷ்யாவின் S-70 ட்ரோன் போன்று மற்றொன்றைப் பார்ப்பது அரிது.

இது 20,000 கிலோவுக்கும் அதிகமான எடை கொண்டது. 6,000 கி.மீ வரை செல்லக் கூடியது.

அம்பு வடிவில் இருக்கும் இந்த ட்ரோன், 10 வருடங்களுக்கு முன் உருவாக்கப்பட்ட மற்றொரு ரகசிய போர் ட்ரோனான அமெரிக்காவின் X-47B ட்ரோனைப் போலவே உள்ளது.

ஓகோட்னிக் ட்ரோன் தரைவழி மற்றும் வான்வழி இலக்குகளைத் தாக்குவதற்கும், உளவுப் பணிகளை மேற்கொள்வதற்கும், குண்டுகள் மற்றும் ராக்கெட்டுகளைச் சுமந்து செல்லும் திறன் கொண்டதாகக் கருதப்படுகிறது.

இது ரஷ்யாவின் ஐந்தாம் தலைமுறை Su-57 போர் விமானங்களுடன் இணைந்து செயல்படும் வகையில் வடிவமைக்கப்பட்டுள்ளது.

இது 2012-ஆம் ஆண்டு முதல் வடிவமைக்கப்பட்டு வந்தது. இது 2019-இல் முதலில் பிரயோகிக்கப்பட்டது.

ஆனால், கடந்த வார இறுதி வரை யுக்ரேனில் ரஷ்யா நடத்திவரும் இரண்டரை வருடப் போரில், இந்த ட்ரோன் பயன்படுத்தப்பட்டதற்கான எந்த ஆதாரமும் இல்லை.

இந்த ஆண்டின் துவக்கத்தில், யுக்ரேனைத் தாக்கும் ஏவுதளங்களில் ஒன்றான தெற்கு ரஷ்யாவில் உள்ள அக்துபின்ஸ்க் விமானநிலையத்தில் இது காணப்பட்டதாகக் கூறப்படுகிறது.

எனவே, கோஸ்ட்யான்டினிவ்கா வானில் நடந்தது, ரஷ்யா தனது புதிய ஆயுதத்தைப் போர்ச் சூழ்நிலைகளில் சோதித்துப் பார்க்கும் முயற்சிகளில் ஒன்றாக இருக்கலாம்.

விமானம் விழுந்த இடத்தில், ரஷ்யாவின் பிரபலமான நீண்ட தூர டி-30 கிளைடர் குண்டு ஒன்றின் சிதைவுகள் கண்டுபிடிக்கப்பட்டதாகவும் கூறப்படுகிறது.

இந்தக் கொடிய ஆயுதங்கள் செயற்கைக்கோள் வழிகாட்டுதல் மூலம் இயங்குகின்றன.

ஆனால், ஓகோட்னிக் ட்ரோன் ஏன் ஒரு Su-57 ஜெட் விமானத்துடன் பறந்து கொண்டிருந்தது?

யுக்ரேனின் கியவ் நகரில் இருக்கும் விமானப் போக்குவரத்து நிபுணர் அனடோலி க்ராப்சின்ஸ்கி, ‘தரை தளத்தில் இருந்து போர் விமானம் தங்கள் செயல்பாட்டின் பரப்பை அதிகரிக்க ட்ரோனுக்கு ஒரு சமிக்ஞையை அனுப்பியிருக்கலாம்’ என்கிறார்.

இந்த ரகசிய ட்ரோனின் தோல்வி ரஷ்ய ராணுவத்திற்கு ஒரு பெரிய பின்னடைவு என்பதில் சந்தேகமில்லை. இந்த ட்ரோன்களின் உற்பத்தி இந்த ஆண்டு துவங்கப்படவிருந்தது. ஆனால் இந்த ஆளில்லா விமானம் அதற்குத் தயாராக இல்லை என்பது தெளிவாகியுள்ளது.

இந்த S-70 ட்ரோனின் நான்கு மாதிரிகள் உருவாக்கப்பட்டதாகக் கருதப்படுகிறது. யுக்ரேன் மீது வானத்தில் அழிக்கப்பட்டது அந்த நான்கில் மிகவும் மேம்பட்ட ஒன்றாக இருக்கலாம்.

பட மூலாதாரம்,GETTY IMAGES

ஓகோட்னிக் அழிக்கப்பட்டிருந்தாலும், யுக்ரேனியப் படைகள் அதன் சிதிலங்களில் இருந்து அதனைப் பற்றிய முக்கியமான தகவல்களைச் சேகரிக்க முடியும்.

இதுபற்றிப் பேசிய அனடோலி க்ராப்சிஸ்கி, "இந்த ட்ரோன் இலக்குகளைக் கண்டறிவதற்கான சொந்த ரேடார்களைக் கொண்டிருக்கிறதா அல்லது குண்டுகள் எங்கு தாக்க வேண்டும் என்பது முன்கூட்டியே திட்டமிடப்பட்டுள்ளதா என்பதை நாங்கள் அறியலாம்," என்கிறார்.

புகைப்படங்களை ஆராயும் போதே, ட்ரோனின் ரகசியத் தாக்குதல் திறன்கள் குறைவாகவே உள்ளன என்பது தெளிவாகிறது என்று அவர் நம்புகிறார்.

இந்த ட்ரோனின் என்ஜின் முனை வட்ட வடிவத்தில் இருப்பதால், அதை ரேடார் மூலம் கண்டுபிடிக்க முடியும் என்கிறார் அவர். பெரும்பாலும் அலுமினியத்தால் செய்யப்பட்ட இந்த விமானத்தில் உள்ள பல ரிவெட்டுகளுக்கும் (ஆணிகள்) இது பொருந்தும்.

இந்த சிதைவுகள் யுக்ரேனியப் பொறியாளர்களால் நுட்பமாக ஆராயப்பட்டு, அந்தத் தகவல்கள் யுக்ரேனின் மேற்கத்தியக் கூட்டணி நாடுகளுடன் பகிரப்படும் என்பதில் சந்தேகமில்லை.

இந்தச் சம்பவம் ரஷ்யா தனது பெரும் மனித வளம், மற்றும் வழக்கமான ஆயுதங்களை நம்பியிருக்கவில்லை என்பதைக் காட்டுகிறது.

அவர்கள் போரிடுவதற்கான புதிய, புத்திசாலித்தனமான வழிகளைக் கண்டறிய முயன்று வருகிறார்கள். இப்போது தோல்வி அடைந்திருப்பது அடுத்த முறை வெற்றி பெறலாம்.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/crejl9175zro

பட மூலாதாரம்,GETTY IMAGES

இரான் நடத்திய பல்வேறு ஏவுகணைத் தாக்குதல்களுக்கு இஸ்ரேலின் பதிலடி விரைவில் தொடங்கும் எனத் தோன்றுகிறது. முன்பு, இரானின் நெருங்கிய கூட்டாளிகளாகிய ஹெஸ்பொலா அமைப்பின் தலைவர் ஹசன் நஸ்ரல்லாவையும், ஹமாஸின் அரசியல் தலைவர் இஸ்மாயில் ஹனியேவையும் இஸ்ரேல் கொலை செய்ததற்கான பதிலடியாகவே இரான் இந்தத் தாக்குதலை நடத்தியதாகக் கூறுகிறது.

இஸ்ரேலின் பதிலடி "துல்லியமானதாகவும் மரண அடியாகவும்" இருக்கும் என்றும், இரான் எதிர்பார்க்காத தருணத்தில் பதிலடி விழும் என்றும் இஸ்ரேல் பாதுகாப்பு அமைச்சர் யோவ் காலண்ட் கூறினார்.

வளைகுடாவில் இருக்கும் சில அரபு நாடுகள், இஸ்ரேலுடன் முழு அளவிலான ராஜ்ஜீய உறவுகளைக் கொண்டுள்ளன. அவை, இரான் மீதான எந்தவொரு தாக்குதலுக்கும் தங்கள் வான்வெளியைப் பயன்படுத்த அனுமதிக்கக்கூடாது என்று இரான் எச்சரித்துள்ளது.

இரான் மீது தாக்குதல் நடத்த இஸ்ரேலுக்கு உதவி செய்யும் எந்த நாடும் தனது பதிலடியை எதிர்கொள்ள நேரிடும் என்றும் இரான் கூறியுள்ளது.

இஸ்ரேலின் திட்டமிட்ட தாக்குதல் எவ்வாறு அமைய வேண்டும் என்பது குறித்து அமெரிக்காவும் இஸ்ரேலும் ஆலோசனை நடத்தும் இந்த நேரத்தில் கீழ்க்காணும் காரணிகள் கவனத்தில் எடுத்துக் கொள்ளப்பட்டுள்ளன. இரானின் அணு ஆயுத கட்டமைப்புகள் மீதான எந்தவொரு தாக்குதல் நடவடிக்கைக்கும் அமெரிக்கா தனது எதிர்ப்பை வெளிப்படையாகத் தெரிவித்துள்ளது.

எண்ணெய் உற்பத்தியகங்கள் மீதான தாக்குதல் எரிபொருள் விலைகளை உயர்த்தும். அமெரிக்க அதிபர் தேர்தலுக்கு நான்கு வாரங்கள் மட்டுமே உள்ள நிலையில், வெள்ளை மாளிகை அந்த வகையான தாக்குதல்களை வரவேற்காது. அதோடு, மத்திய கிழக்கு மற்றொரு போரில் சிக்கிக் கொள்வதை வெள்ளை மாளிகை விரும்பாது.

கடந்த ஏப்ரல் மாதம் இதுபோன்ற ஒரு நெருக்கடி ஏற்பட்டபோது, இஸ்ரேலின் நட்பு நாடுகளால் முன்னெடுக்கப்பட்ட கட்டுப்பாடுகளுக்கான வாய்ப்புகள் இந்த முறை குறைவாகவே உள்ளது.

லெபனான், காஸா, ஏமன், சிரியா ஆகிய அனைத்து எதிரிகளையும் ஒரே நேரத்தில் எதிர்கொள்ள இஸ்ரேல் தீர்மானித்துள்ளது. இந்தச் சூழலில் நெதன்யாகுவின் அரசுக்கு பின்வாங்கும் மனநிலை கொஞ்சம்கூட இல்லை எனத் தெரிகிறது.

பட மூலாதாரம்,EPA

அமெரிக்க உளவுத்துறையின் செயற்கைக்கோள் உதவியுடனும், இரானில் உள்ள மொசாட் (இஸ்ரேலின் வெளிநாட்டு உளவு முகமை) உளவாளிகளின் உதவியுடனும், பல விதமான இலக்குகளை இஸ்ரேல் பாதுகாப்புப் படைகள் (ஐடிஎஃப்) தேர்வு செய்ய வாய்ப்புண்டு. அவற்றைப் பொதுவாக மூன்று வகைகளாகப் பிரிக்கலாம்:

1. பாரம்பரிய ராணுவ வழிமுறை: இரான் தன்னுடைய ஏவுகணைகளை ஏவிய தளங்கள், இஸ்ரேலின் உடனடியான இலக்காக இருக்கும். ஏவுதளங்கள், கட்டுப்பாட்டு மையங்கள், எரிபொருள் நிரப்பும் தொட்டிகள், சேமிப்பு பங்கர்கள் ஆகியவற்றை அவர்கள் தாக்கலாம். மேலும், ஐஆர்ஜிசி-க்கு சொந்தமான தளங்கள், வான் பாதுகாப்பு மற்றும் பிற ஏவுகணை பீரங்கிகள் மீதும் தாக்குதல் நடத்த வாய்ப்பு உள்ளது. இரானின் ஏவுகணைத் திட்டத்தில் ஈடுபட்டுள்ள முக்கிய நபர்களைக் கொலை செய்திடவும் இஸ்ரேல் முயற்சி எடுக்கலாம்.

2. பொருளாதார முனை: இரானுக்கு கூடுதலான பாதிப்பை ஏற்படுத்தும் விதத்தில், இரானுடைய பெட்ரோகெமிக்கல் ஆலைகள், மின் உற்பத்தி மற்றும் சாத்தியமான கப்பல் போக்குவரத்து தளங்கள் மீதான தாக்குதல்கள் நடத்தப்படலாம். எனினும், இந்தத் தாக்குதலால் ராணுவத்தைவிட சாதாரண மக்களின் வாழ்க்கையே அதிகம் பாதிக்கப்படும் என்பதால் இரான் மக்களிடம் எதிர்ப்பை உருவாக்கும் நடவடிக்கையாக இது இருக்கும்.

3. அணு சக்தி தளங்கள்: இஸ்ரேல் முன் உள்ள வாய்ப்புகளில் இதுவே மிகப்பெரியது. மக்களின் அணுசக்தி தேவைக்கான 20%க்கும் அதிகமாக அளவு யுரேனியத்தை இரான் வளப்படுத்துகிறது என்பது ஐஏஇஏ என்ற ஐ.நா. அணுசக்தி கண்காணிப்பு அமைப்பால் நிறுவப்பட்டுள்ளது. எனவே, இரான் மிகக் குறுகிய காலத்திற்குள் அணுகுண்டு தயாரிக்கும் திறனை அடையும் "பிரேக்-அவுட்" புள்ளியை எட்டிவிட முயல்கிறதோ என்று இஸ்ரேல் சந்தேகிக்கிறது. எனவே, இஸ்ரேலின் சாத்தியமான இலக்குப் பட்டியலில் இரானின் ராணுவ அணுசக்தித் திட்டத்தின் மையமாக உள்ள பர்சின், தெஹ்ரான், போனாப், ராம்சரில் உள்ள ஆராய்ச்சி உலைகள், புஷர், நதான்ஸ், இஸ்பகான், பெர்டோ ஆகிய இடங்களில் உள்ள பெரிய வசதிகள் ஆகியவை அடங்கியுள்ளன.

பட மூலாதாரம்,GETTY IMAGES

அவ்வாறு தாக்குதல் நடத்தினால், இஸ்ரேலின் மீது இரானின் பதிலடி எவ்வாறு இருக்கும் என்று ஊகித்து அதை எப்படித் தணிப்பது என்பது குறித்தும் திட்டமிடப்படுகின்றன.

இஸ்ரேலின் ராணுவ இலக்குகள் எனக் கூறப்படும் இடங்களில் இரான் நடத்திய ஏவுகணைத் தாக்குதல் மூலம் இப்போது கணக்கு சரிசமமாகிவிட்டது என்பதே இரானின் நிலைப்பாடு. ஆனால் இஸ்ரேல் பதிலடி கொடுத்தால் அது திரும்பத் தாக்கும் என்று எச்சரிக்கிறது.

"இது எங்கள் திறன்களின் ஒரு துளி மட்டுமே," என்று இரான் அதிபர் மசூத் பெசெஷ்கியன் கூறினார்.

"சியோனிச ஆட்சி இரானின் நடவடிக்கைகளுக்குப் பதிலளித்தால், பின்னர் அது கொடூரமான் தாக்குதல்களை எதிர்கொள்ளும்," என்று ஐஆர்ஜிசி கூறியது.

ராணுவரீதியாக இரானால் இஸ்ரேலை வெல்ல முடியாது. அதன் விமானப் படை பழையது, சீரற்றது, அதன் வான் பாதுகாப்பில் பல ஓட்டைகள் உள்ளன. மேற்கத்திய நாடுகளின் தடைகளையும் பல ஆண்டுகளாக எதிர்கொண்டுள்ளது.

பட மூலாதாரம்,GETTY IMAGES

ஆனால் அதனிடம் இன்னும் ஏராளமான பாலிஸ்டிக் ஏவுகணைகளும் பிற ஏவுகணைகளும், வெடிபொருள் நிரப்பப்பட்ட ஆளில்லா விமானங்களும் உள்ளன. மேலும், இவற்றோடு சேர்த்து மத்திய கிழக்கில் பல்வேறு நாடுகளில் உள்ள பல ஆயுதக்குழுக்களும் இரானுக்கு ஆதரவாக இருக்கின்றன.

இரானின் அடுத்த பதிலடியில், அது ஏவும் ஏவுகணைகள் இஸ்ரேலின் ராணுவ தளங்களுக்குப் பதிலாக குடியிருப்புப் பகுதிகளை இலக்காகக் கொண்டிருக்கலாம். கடந்த 2019இல் இரான் ஆதரவு ஆயுதக்குழு ஒன்று சௌதி அரேபியாவின் எண்ணெய் வசதிகளைத் தாக்கியது. இரானின் அண்டை நாடுகளை அதனால் எவ்வளவு எளிதில் தாக்க முடியும் என்பதை அந்த நிகழ்வு எடுத்துக் காட்டியது.

வளைகுடாவில் செயல்படும் ஐஆர்ஜிசி கடற்படையிடம், சிறிய, வேகமான ஏவுகணைத் தாக்குதல் படகுகளைக் கொண்ட பெரிய கப்பல் படை உள்ளது. இவை திரள் தாக்குதல் வழியாக அமெரிக்க கடற்படையின் 5வது கப்பல் படைக்குச் சொந்தமான போர்க்கப்பலின் பாதுகாப்புக்கு சவாலாக அமையும்.

உத்தரவு கிடைத்தால், உலகின் தினசரி எண்ணெய் ஏற்றுமதியில் 20% வரை பாதிக்கும் வகையில் ஹோர்முஸ் ஜலசந்தியில் கண்ணி வெடிகளை வைக்க இரான் முயலக்கூடும். இது உலகப் பொருளாதாரத்தில் பெரும் தாக்கத்தை ஏற்படுத்தும்.

குவைத் முதல் ஓமன் வரை அரேபிய நிலத்தில் அமெரிக்க ராணுவ தளங்கள் பரவலாக உள்ளன. இரான் தாக்கப்பட்டால் அது இஸ்ரேலை மட்டுமின்றி, அந்தத் தாக்குதலுக்கு ஆதரவு அளிப்பதாகக் கருதும் எந்த நாட்டையும் தாக்கும் என்று இரான் எச்சரித்துள்ளது.

இஸ்ரேலிலும், அமெரிக்காவிலும் உள்ள ராணுவ வல்லுநர்கள் தற்போது இந்தச் சூழ்நிலைகளைப் பரிசீலித்து வருகிறார்கள்.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/cj4dpe27z20o

பட மூலாதாரம்,GETTY IMAGES

அமெரிக்காவின் மூத்த மற்றும் பிரபல நிருபர் பாப் உட்வர்டின் புதிய புத்தகம் ஒன்று, ‘டொனால்ட் டிரம்ப், அமெரிக்காவில் கோவிட்-19 சோதனை இயந்திரங்கள் பற்றாக்குறையாக இருந்தபோது, அவற்றை ரஷ்ய அதிபர் புதினின் தனிப்பட்ட பயன்பாட்டிற்காக ரகசியமாக அனுப்பி வைத்தார்’ என்று கூறுகிறது.

ஆனால் இந்தக் கூற்றை டிரம்பின் பிரச்சாரக் குழு நிராகரித்துள்ளது.

'வார்' (War) என்று பெயரிடப்பட்ட அந்த புத்தகத்தில், டிரம்ப் அதிபர் பதவியை விட்டு வெளியேறிய பிறகும் கூட ரகசியமாக புதினுடன் தொடர்பில் இருந்தார் என, அமெரிக்க ஊடகங்கள் மேற்கோள் காட்டிய பகுதிகளைக் குறிப்பிட்டுக் கூறப்பட்டுள்ளது.

இதற்குப் பதிலளித்த அதிபர் டிரம்ப், "அவர் (பாப் உட்வர்ட்) ஒரு கதைசொல்லி, அதிலும் மோசமானவர். அவர் தன்னிலையை இழந்துவிட்டார்," என ஏ.பி.சி நியூஸ் சேனலிடம் கூறினார்.

இவை கற்பனைக் கதைகள் என்றும், இதில் எந்த உண்மையும் இல்லை என்றும் டிரம்ப்-இன் பிரசாரக் குழு கூறியுள்ளது.

டிரம்ப் பிரசாரக் குழுவின் செய்தித் தொடர்பாளர் ஸ்டீவன் சியுங் செவ்வாயன்று (அக்டோபர் 😎 பிபிசிக்கு அளித்த பதிலில், “தள்ளுபடி விலையில் புத்தகங்களை விற்கும் ஒரு கடையின், புனைகதைப் பிரிவில் இருக்கவேண்டிய புத்தகம் இது. அல்லது கழிவறை டிஷ்யூக்களாக இது பயன்படுத்தப்படும். இந்தக் குப்பை புத்தகத்தை எழுதுவதற்காகத் தன்னைச் சந்திக்க டிரம்ப் ஒருபோதும் அந்த எழுத்தாளருக்கு அனுமதி வழங்கவில்லை,” என்று கூறினார்.

அடுத்த வாரம் வெளிவரும் இந்த ‘வார்’ எனும் புதிய புத்தகம், முன்னாள் அதிபர் டிரம்புக்கும் புதினுக்கும் இடையேயான தொடர்புகள் குறித்த தகவல்களை டிரம்பின் உதவியாளர் ஒருவர் அளித்தார் என்று கூறுகிறது. அந்த உதவியாளரின் பெயர் வெளியிடப்படவில்லை.

'தி நியூயார்க் டைம்ஸ்' நாளிதழின் செய்தி அறிக்கையின், ஒருமுறை மார்-ஏ-லாகோவில் உள்ள (புளோரிடாவில் உள்ள கடற்கரைப் பகுதி) டிரம்பின் அலுவலகத்தில் இருந்து அவரது உதவியாளர் வெளியேற உத்தரவிடப்பட்டது குறித்து அந்தப் புத்தகத்தில் விவரிக்கப்பட்டுள்ளது. அமெரிக்காவின் முன்னாள் அதிபர் டிரம்ப், புதினுடன் தொலைபேசியில் தனியாகப் பேச வேண்டும் என்பதற்காகவே அந்த உதவியாளர் வெளியேற்றப்பட்டார் என்றும் கூறப்படுகிறது.

2021-ஆம் ஆண்டு, டிரம்ப் வெள்ளை மாளிகையை விட்டு வெளியேறியதில் இருந்து இருவரும் குறைந்தது 6 முறை பேசியிருக்கலாம் என்று அந்த உதவியாளர் தெரிவித்துள்ளார்.

ஆனால் ரஷ்ய அரசு கடந்த புதன்கிழமை (அக்டோபர் 2) அன்று இந்தக் குற்றச்சாட்டை மறுத்தது.

டிரம்ப், புதின் இருவரும் என்ன விவாதித்தார்கள் என்று புத்தகம் கூறவில்லை, ஆனால் இருவருக்கும் இடையேயான தொடர்பு குறித்து டிரம்ப் பிரசாரக் குழுவைச் சேர்ந்த அதிகாரி ஒருவர் சந்தேகங்கள் எழுப்பியதை மேற்கோள் காட்டி அது விவரிக்கிறது.

புத்தகத்தின் பிரதியை பிபிசி இன்னும் பார்க்கவில்லை. டிரம்பின் உதவியாளரது கூற்றைத் தன்னால் உறுதிப்படுத்த முடியவில்லை என்று பாப் உட்வர்ட் கூறியதாக டைம்ஸ் செய்தித்தாள் தெரிவித்துள்ளது. மேலும் டிரம்ப் பதவியை விட்டு வெளியேறிய பிறகு, அவரும் புதினும் ஒருவரையொருவர் தொடர்பு கொண்டது பற்றி வேறு நபர்கள் அறிந்திருக்கவில்லை என்றும் அந்த செய்தித்தாள் கூறுகிறது.

முன்னாள் அமெரிக்க அதிபர் ரிச்சர்ட் நிக்சன், அதிபர் பதவியிலிருந்து விலகுவதற்கு காரணமாக இருந்த வாட்டர்கேட் (Watergate) ஊழலை வெளிக்கொணர்வதில் பெரும் பங்காற்றியவர் மூத்த நிருபர் பாப் உட்வர்ட். உயர்மட்ட நபர்களை அணுகி, தகவல்களைப் பெறுவதன் அடிப்படையில் பல புத்தகங்களை அவர் எழுதியுள்ளார். அவை அதிகளவில் விற்பனையும் ஆகியுள்ளன.

பட மூலாதாரம்,GETTY IMAGES

உட்வர்டை ‘மனவளர்ச்சி குன்றியவர்’ என்றும் 'குழப்பமடைந்தவர்’ என்றும் விவரித்த டிரம்ப் பிரசாரக் குழுவின் செய்தித் தொடர்பாளர், “உட்வர்ட் மலிவான எண்ணங்கள் கொண்ட மனிதர். மேலும் அவர் முன்பு டிரம்புடன் செய்த நேர்காணல் பதிவுகளை அங்கீகாரம் பெறாமல் வெளியிட்டார். இதனால் டிரம்ப் அவர் மீது வெற்றிகரமாக வழக்குத் தொடுத்துள்ளதால், உட்வர்ட் வருத்தத்தில் இருக்கிறார் போல," என்று கூறினார்.

'ரேஜ்' (Rage) என்ற, 2021-ஆம் ஆண்டு புத்தகத்திற்காக டிரம்ப் முன்பு உட்வர்டிடம் பேசியிருந்தார். இருவருக்குமான நேர்காணல்களின் பதிவுகளை அனுமதி இன்றி உட்வர்ட் வெளியிட்டார் என்ற குற்றச்சாட்டின் அடிப்படையில் டிரம்ப், உட்வர்ட் மீது வழக்குத் தொடர்ந்தார். ஆனால் உட்வர்ட் இந்தக் குற்றச்சாட்டை மறுத்தார்.

தனது ‘வார்’ புத்தகத்தில் இப்படி எழுதுகிறார் உட்வர்ட்: “முன்னாள் அதிபர் டிரம்ப் பதவியில் இருந்தபோது, புதினுக்கு அவரது தனிப்பட்ட பயன்பாட்டிற்காக ‘அபோட் பாயிண்ட் ஆஃப் கேர் கோவிட் சோதனை இயந்திரங்களை’ ரகசியமாக அனுப்பி வைத்தார்".

அமெரிக்க ஊடகங்களில் வெளியான உட்வர்டின் புத்தகத்தின் மறுபரிசீலனையின் படி, அப்போது கொரோனா வைரஸால் நோய்வாய்ப்படுவதைப் பற்றி புதின் அதிகம் கவலைப்பட்டதாகக் கூறப்படுகிறது.

'டிரம்பின் நற்பெயருக்குக் களங்கம் விளைவிக்கும் என்ற அச்சத்தில், தனக்கு கோவிட் சோதனை இயந்திரங்களை அனுப்பியதை பகிரங்கமாக கூற வேண்டாம்' என்று புதின் டிரம்பைக் கேட்டுக் கொண்டதாக அந்தப் புத்தகத்தில் கூறப்பட்டுள்ளதாக டைம்ஸ் செய்தி தெரிவிக்கிறது.

“ ‘நீங்கள் யாரிடமும் இதைப் பற்றி சொல்வதை நான் விரும்பவில்லை, ஏனென்றால் மக்கள் உங்கள் மீது தான் கோபப்படுவார்கள். என் மீது அல்ல’ என்று புதின் டிரம்பிடம் கூறியதாக” ‘வார்’ புத்தகத்தை மேற்கோள் காட்டி டைம்ஸ் செய்தித்தாள் கூறுகிறது.

அதற்கு டிரம்ப், "நான் அது குறித்து கவலைப்படவில்லை.” என்று பதிலளித்ததாகக் கூறப்படுகிறது.

நவம்பர் 5 அமெரிக்க அதிபர் தேர்தலுக்குச் சில வாரங்களே இருக்கும்போது, டிரம்புக்கும் புதினுக்கும் இடையிலான உறவு பற்றிய கேள்விகளை இந்தக் கூற்றுக்கள் மீண்டும் எழுப்பியுள்ளன.

முன்னாள் அதிபர் டிரம்ப், அமெரிக்கத் தேர்தல்களுக்காக ரஷ்யாவுடன் கூட்டுச் சேர்ந்ததாக கடந்த காலங்களில் குற்றம் சாட்டப்பட்டது. இருப்பினும் நீதித்துறையின் விசாரணையில் இதற்கு எந்த ஆதாரமும் கிடைக்கவில்லை. அதேபோல டிரம்ப் தனது அதிகாரத்தைப் பயன்படுத்தி இந்த குற்றச்சாட்டின் விசாரணையைத் தடுத்தாரா என்பது குறித்தும் எந்த முடிவும் எட்டப்படவில்லை.

'தி வாஷிங்டன் போஸ்ட்' செய்தித்தாளின் படி, ‘கடந்த நான்கு வருடங்களில் நிகழ்ந்த வெளிநாட்டு மோதல்கள் மற்றும் அப்போது இருந்த மோசமான அமெரிக்க அரசியல் சூழல்கள், ஆகியவற்றில் டிரம்பிற்கு இருந்த பங்கையும் இந்த புத்தகம் ஆராய்கிறது’.

மெர்ரிக் கார்லண்டை அட்டர்னி ஜெனரலாக தேர்வு செய்தது போன்ற, தனது சொந்த தவறுகள் குறித்த அதிபர் ஜோ பைடனின் வெளிப்படையான விமர்சனமும் இந்தப் புத்தகத்தில் இடம்பெற்றுள்ளது.

சிறப்பு வழக்கறிஞர் கார்லண்ட், ஜோ பைடனின் மகன் ஹண்டர் பைடன் மீதான வழக்கின் விசாரணையை முன்னெடுத்தார். இந்த விவகாரம் குறித்து தனது உதவியாளர் ஒருவரிடம் பேசியபோது, "ஒருபோதும் நான் கார்லண்டைத் தேர்ந்தெடுத்திருக்கக்கூடாது," என்று ஜோ பைடன் கூறினார் என்று 'தி வாஷிங்டன் போஸ்ட்' செய்தித்தாள் தெரிவித்துள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/c1jd7ly1p34o

வரலாற்றில் மிகவும் மோசமான தாக்குதலின் தாக்கத்தில் இருந்து இஸ்ரேல் மீண்டு வந்து கொண்டிருந்த அதே நேரத்தில், காஸா கடுமையான வெடிகுண்டு தாக்குதல்களுக்கு ஆளானது. பாலத்தீன - இஸ்ரேல் விவகாரத்தில் இந்த மோதல் ஒரு திருப்புமுனையாக கருதப்பட்டது.

பல ஆண்டுகளாக நம்முடைய திரைகளில் இருந்து விலகியே இருந்த இஸ்ரேல் - பாலத்தீன மோதல்கள் கடந்த ஆண்டு மீண்டும் நம் பார்வைக்கு வந்தன.

இந்த மோதல் அனைவரையும் ஆச்சரியத்தில் ஆழ்த்தியது. அமெரிக்காவின் தேசிய பாதுகாப்பு ஆலோசகர் ஜேக் சலிவன் இந்த தாக்குதல்கள் துவங்குவதற்கு ஒரு வாரத்திற்கு முன்புதான், "இரண்டு தசாப்தங்களாக இருந்த சூழலோடு ஒப்பிடுகையில் மத்திய கிழக்கு பிராந்தியம் தற்போது மிகவும் அமைதியாக இருக்கிறது," என்று கூறியிருந்தார்.

தற்போது ஓர் ஆண்டாக அந்த பிராந்தியம் எரிந்து கொண்டிருக்கிறது.

41 ஆயிரத்திற்கும் மேற்பட்ட பாலத்தீனர்கள் இறந்துள்ளனர். 20 லட்சத்திற்கும் மேற்பட்ட காஸா மக்கள் புலம் பெயர்ந்துள்ளனர். மேற்கு கரையில் மேலும் 600 பாலத்தீனர்கள் கொல்லப்பட்டுள்ளனர்.

லெபனானில் பத்து லட்சம் பேர் புலம் பெயர்ந்துள்ளனர். அங்கு இரண்டாயிரத்திற்கும் மேற்பட்ட மக்கள் கொல்லப்பட்டுள்ளனர்.

இந்த மோதலின் முதல் நாளில் 1200 இஸ்ரேலியர்கள் இறந்தனர். அதன் பிறகு 350க்கும் மேற்பட்ட இஸ்ரேல் ராணுவ வீரர்கள் இறந்து போனார்கள்.

காஸாவின் எல்லையோரமும், பதட்டத்துடன் காணப்படும் லெபனான் நாட்டு எல்லையை ஒட்டிய வடக்கு இஸ்ரேலில் வாழ்ந்து வந்த இரண்டு லட்சம் இஸ்ரேலியர்கள் இடம் பெயர்ந்துள்ளனர்.

ஹெஸ்பொலாவின் வான்வழி தாக்குதலில் 50க்கும் மேற்பட்ட ராணுவ வீரர்களும் பொதுமக்களும் உயிரிழந்துள்ளனர்.

மற்ற நாடுகளும் மத்திய கிழக்கு முழுவதும் நடந்து வரும் இந்த மோதலில் இணைந்துள்ளன.

இந்த மோதல் அதிகரிப்பதை தடுக்க அமெரிக்கா மேற்கொண்ட விடாப்பிடியான முயற்சிகள் அனைத்து ஒன்றும் இல்லாமல் போனது. அதிபர் சந்திப்புகள், எண்ணிக்கையற்ற ராஜ்ஜீய அதிகாரிகளின் பேச்சுவார்த்தைகள், பெரும் அளவிலான ராணுவ ஆயுதங்களை அனுப்புதல் என பல நடவடிக்கைகள் இதில் அடங்கும்.

இராக், ஏமென் போன்ற தொலைதூர நாடுகளில் இருந்தும் ராக்கெட்டுகள் ஏவப்படுகின்றன.

எதிர்பார்க்கப்பட்ட வகையில் இஸ்ரேலும் இரானும் மாறி மாறி தாக்கிக் கொண்டன. அமெரிக்காவின் முயற்சிகள் செல்வாக்கற்றதாக காணப்பட்டது.

மோதல்கள் விரிவடைந்து வருகின்ற சூழலில் அதன் ஆரம்பப்புள்ளி முற்றிலுமாக பார்வையில் இருந்து மறைய துவங்கிவிட்டது.

ஊடகங்கள் அனைத்தும் மத்திய கிழக்கில் முழுமையான போர் சூழல் உருவாகும் என்ற எதிர்பார்ப்பில் இருந்த சூழலில், அக்டோபர் 7க்கு முன்பும் சரி பின்பும் சரி, காஸா மக்களின் வாழ்க்கை மறந்து போன ஒன்றாக மாறிவிட்டது.

தங்களின் வாழ்க்கையையே தலைகீழாக புரட்டிப் போட்ட அந்த நாளில் பாதிக்கப்பட்ட சில இஸ்ரேலியர்களும் கூட ஒதுக்கப்பட்டதாக உணர்கின்றனர்.

"நாங்கள் புறந்தள்ளப்பட்டோம்," என்று கூறுகிறார் பணைய கைதியாக பிடித்து வைக்கப்பட்டிருக்கும் நிம்ரோத் கோஹெனின் தந்தை யெஹுதா கோஹென்.

கடந்த வாரம் இஸ்ரேலின் கன் செய்திகளில் பேசிய அவர், "இந்த அர்த்தமற்ற போரில் அனைத்து எதிரிகளையும் நம் பக்கம் திருப்பியதற்கு நெதன்யாகுதான் காரணம்," என்று கூறினார்.

கடந்த அக்டோபர் 7-ஆம் தேதி நடந்த நிகழ்வு மிகவும் சிறிய நிகழ்வுதான் என்று உணர வைக்க தேவையான அனைத்து நடவடிக்கைகளையும் அவர் வெற்றியுடன் செய்து கொண்டிருக்கிறார் என்றும் யெஹுதா கூறினார்.

பட மூலாதாரம்,GETTY IMAGES

அனைத்து இஸ்ரேலிய மக்களும் யெஹுதா கோஹெனின் கருத்திற்கு உடன்படவில்லை. இஸ்ரேலின் எதிரிகள், யூத நாட்டை அழிப்பதற்கான துவக்கமாகவே ஹமாஸின் தாக்குதலை பார்க்கின்றனர்.

பேஜர்கள் வெடிப்பு, திட்டமிடப்பட்ட கொலைகள், தொலைதூரத்திற்கு சென்று இலக்கை தாக்கும் வான்வழி தாக்குதல்கள், தங்களின் பெருமையாக இஸ்ரேல் கருதும் உளவு பிரிவு மூலமான தாக்குதல்கள் என்று இஸ்ரேல் பதில் தாக்குதல்கள் நடத்தி, கடந்த ஆண்டு இழந்த தன்னம்பிக்கையை தற்போது மீட்டுள்ளது.

கடந்த வாரம் பேசிய நெதன்யாகு, மத்திய கிழக்கில் இஸ்ரேல் அணுக முடியாத பகுதி என்ற ஒன்று இல்லை என்று நம்பிக்கையுடன் கூறினார்.

அக்டோபர் 7 தாக்குதலுக்கு பிறகு பிரதமருக்கான தேர்தல் கருத்துக்கணிப்பில் மோசமான இடத்தில் இருந்தார் நெதன்யாகு. தற்போது அதில் முன்னேறி வருவதை அவரால் காண முடிகிறது. மிகவும் தைரியமான முடிவுகளை எடுக்கும் ஒரு உரிமமாக அது மாறுமா என்ற கேள்வியும் நீடிக்கிறது.

ஆனால் இவை அனைத்தும் எதை நோக்கி செல்கிறது?

''எப்போது இசை முடிய போகிறது? எங்கே அனைவரும் நிற்பார்கள் என்று யாருக்கும் தெரியவில்லை'' என்று கூறுகிறார் - பிபிசியின் டுடே பாட்காஸ்ட் நிகழ்வில் பேசிய இரானுக்கான முன்னாள் பிரிட்டன் தூதர் சிமோன் காஸ்.

மோதலை நிறுத்தும் முயற்சியில் அமெரிக்கா தொடர்ந்து ஈடுபட்டுள்ளது. அமெரிக்காவின் மத்திய கட்டளை தளபதி (Centcom) மைக்கேல் குரில்லா இஸ்ரேலுக்கு வருகை புரிந்தது ராஜ்ஜீய தீர்வுகளை ஆய்வதற்கான ஒரு வருகை போல் இல்லாமல் நெருக்கடியை சமாளிக்கும் முயற்சியாகவே காணப்படுகிறது.

அமெரிக்க அதிபர் தேர்தல் இன்னும் நான்கு வாரங்களில் நடைபெற உள்ளது. மத்திய கிழக்கு முன்பு எப்போதும் இல்லாத வகையில் சிக்கலானதாக இருக்கின்ற இத்தகைய சூழலில் அமெரிக்கா எந்தவிதமான புதிய நடவடிக்கைகளையும் மேற்கொள்ள ஏதுவான நேரம் இது அல்ல.

தற்போதைக்கு, உடனடி சவாலானது இந்த மோதல் மிகப்பெரிய பிராந்திய மோதலாக உருமாறுவதை தடுப்பது.

கடந்த வாரம் இரான் நடத்திய தாக்குதல் உட்பட அனைத்திற்கும் பதிலடி தரும் உரிமை இஸ்ரேலுக்கு இருப்பதாக அதன் கூட்டாளி நாடுகள் கருதுகின்றன.

இரானின் அந்த தாக்குதலில் இஸ்ரேலியர்கள் யாரும் கொல்லப்படவில்லை. இரான் இஸ்ரேலின் ராணுவம் மற்றும் உளவு அமைப்புகளை இலக்காக வைத்தே தாக்குதல் நடத்தியது. இருப்பினும் கடுமையான பதிலடி வழங்குவோம் என்று நெதன்யாகு உறுதி அளித்தார்.

பல வாரங்களாக நடைபெற்ற மோதல்களில் அற்புதமான உத்திகள் மூலம் வெற்றி பெற்ற பிறகு, இஸ்ரேலின் பிரதமர் பல பெரிய கனவுகளை காண துவங்கியுள்ளார்.

இரானிய மக்களுக்கு அவர் நேரடியாக வெளியிட்ட செய்தி ஒன்றில், தெஹ்ரானில் ஆட்சி மாற்றம் ஏற்பட இருப்பதாக மறைமுகமாக கூறினார். "எப்போது இரான் விடுதலை அடையும்? மக்கள் நினைக்கும் காலத்திற்கு முன்பே அது நிகழ்ந்துவிடும். அனைத்தும் மாற்றமடையும்," என்று அவர் கூறினார்.

இராக்கில் 2003-ஆம் ஆண்டு அமெரிக்க போர் தொடுத்த போது அமெரிக்காவின் நவீன பழமைவாதிகள் வெளியிட்ட கூற்றையே நெதன்யாகு எதிரொலிப்பதாக சிலர் கருகின்றனர்.

பட மூலாதாரம்,GETTY IMAGES

இஸ்ரேல் இல்லாத உலகத்தை இரானிய அரசு கனவு காணலாம்.

ஆனால் 'எதிர்ப்பின் அச்சு' என்று அழைக்கப்படுகின்றன இரானின் ஆதரவு பெற்ற அமைப்புகளான ஹெஸ்பொலாவும் ஹமாஸும் ஒடுக்கப்படும் நிலையில், இரான் அந்த பிராந்தியத்தில் இருக்கும் ஒரே ஒரு வல்லரசு நாடான இஸ்ரேலை போரில் எதிர்கொள்ள முடியாத அளவிற்கு பலவீனமாக உள்ளது.

இரான் ஏற்படுத்தியுள்ள அச்சத்தை இஸ்ரேல் மிக விரைவாக கடந்து சென்றுவிட இயலும். சமீபத்திய வெற்றிகள் அதற்கு நம்பிக்கை அளித்தாலும் தனியாக அதனை செய்ய இயலாது என்பதையும் இஸ்ரேல் உணர்ந்தே இருக்கிறது.

ஆட்சி மாற்றம் என்பது ஜோ பைடனின் நோக்கத்தில் இல்லை. அவரது துணை அதிபரான கமலா ஹாரிஸின் நோக்கத்திலும் இல்லை.

டொனால்ட் டிரம்பைப் பொறுத்தவரை ஒரே ஒருமுறை தான் இரானை தாக்கும் எண்ணம் அவருக்கு இருந்தது. 2019-ஆம் ஆண்டு அமெரிக்காவின் ஆளில்லா கண்காணிப்பு விமானத்தை தெஹ்ரான் சுட்டு வீழ்த்திய பிறகு அந்த முடிவை எடுத்தார்.

இருப்பினும் இறுதி நொடியில் அந்த எண்ணத்தில் இருந்து பின்வாங்கினார். ஆனால், அதற்கடுத்த 7 மாதத்தில் இரானின் தளபதி காஸிம் சுலைமானியை கொல்ல உத்தரவு பிறப்பித்தார்.

ஒரு வருடத்திற்கு முன்பு, மத்திய கிழக்கு சில தசாப்தங்களில் காணாத மிகப்பெரிய பேரழிவை சந்திக்க இருக்கிறது என்பதை வெகு சிலரே நினைத்து பார்த்திருப்பார்கள்.

காஸாவில் மோதல் துவங்கி இரண்டாம் ஆண்டை அடியெடுத்து வைத்துள்ள நிலையில் அனைவரும், போர் நிறுத்தத்திற்கு பிறகோ, அல்லது பரந்த போரில் மொத்தமாக மூழ்கிய பிறகோ காஸாவை மீண்டும் கட்டமைப்பது எப்படி என்றும், ஆள்வது எப்படி என்றும் ஆலோசித்துக் கொண்டிருக்கின்றனர்.

ஒரு கட்டத்தில், எப்போது ஹமாஸ், ஹெஸ்பொலாவை போதுமான அளவிற்கு ஒழித்துவிட்டோம் என்று இஸ்ரேல் நினைக்கிறதோ, இது இந்த பிராந்தியத்தை மேலும் நெருக்கடிக்குள் கொண்டு செல்லாது என்று இஸ்ரேலும் இரானும் கூறுகிறதோ, அமெரிக்க அதிபர் தேர்தல் முடிவுக்கு வந்த பிறகோ, ராஜ்ஜீய ரீதியிலான பேச்சுவார்த்தைக்கு மற்றுமொரு வாய்ப்பு கிடைக்கலாம்.

அதுவரை, இந்த மோதலை நிறுத்த நீண்ட காலம் ஆகும் என்றே தோன்றுகிறது.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/ckgn24z6ek1o

பட மூலாதாரம்,GETTY IMAGES

டைனோசர்களின் அழிவுக்கு காரணமாக அமைந்தது, 66 மில்லியன் ஆண்டுகளுக்கு முன்பு பூமியைத் தாக்கிய சிறுகோள் (Asteroid) ஒன்று. ஆனால் அந்த ஒரு சிறுகோள் மட்டும் பூமியைத் தாக்கவில்லை, குறுகிய கால இடைவெளியில் மற்றொரு சிறுகோளும் பூமியில் மோதியுள்ளது என்று விஞ்ஞானிகள் குழு உறுதிப்படுத்தியுள்ளது.

இந்த சிறுகோள் மேற்கு ஆப்பிரிக்காவின் கடற்கரைக்கு அருகில் கடலில் விழுந்துள்ளது. இதனால் அப்போது ஒரு மிகப்பெரிய பள்ளமும் ஏற்பட்டுள்ளது.

ஆராய்ச்சியாளர்களின் கூற்றுப்படி, இது அட்லாண்டிக் பெருங்கடலை கடந்து சென்றிருக்கக் கூடிய, குறைந்தபட்சம் 800 மீட்டர் உயரமுள்ள சுனாமியை உருவாக்கும் திறன் கொண்ட ஒரு ‘பேரழிவு நிகழ்வாக’ இருந்திருக்கும்.

“இந்த நிகழ்வு 450-500 மீட்டர் அகலம் கொண்ட நாதிர் (Nadir) என்ற பள்ளத்தை உருவாக்கியது. இந்த சிறுகோள் மணிக்கு 72,000 கிமீ வேகத்தில் பூமியில் மோதியதாக நம்பப்படுகிறது.”

பட மூலாதாரம்,GETTY IMAGES

ஸ்காட்லாந்தில் உள்ள ஹெரியட்-வாட் பல்கலைக் கழக முனைவர் ஊஸ்டன் நிக்கல்சன் 2022இல் நாதிர் பள்ளத்தைக் கண்டுபிடித்தார், ஆனால் அது உண்மையில் எப்படி உருவானது என்பது தெரியவில்லை.

இப்போது, நிக்கல்சனும் அவரது சகாக்களும் ‘ஒரு சிறுகோள் கடற்பரப்பில் மோதியதால்தான் இந்த 9 கி.மீ பள்ளம் ஏற்பட்டது’ என்று உறுதியாக நம்புகிறார்கள்.

ஒரு சிக்கல் என்னவென்றால், இது எப்போது நிகழ்ந்தது என்பதை விஞ்ஞானிகளால் சரியாகக் கண்டறிய முடியவில்லை. டைனோசர்களின் அழிவுக்கு முன்னரா அல்லது அதற்குப் பிறகா என்பது துல்லியமாக தெரியவில்லை.

டைனோசர்களை அழித்த அந்த சிறுகோள், தென்கிழக்கு மெக்சிகோவில் 180 கிமீ அகலம் கொண்ட சிக்சுலுப் (Chicxulub) என்ற பள்ளத்தை ஏற்படுத்தியது என்பது குறிப்பிடத்தக்கது.

பட மூலாதாரம்,GETTY IMAGES

ஆப்பிரிக்க கடற்கரையில் மோதிய இந்த சிறுகோளை ஆய்வு செய்த ஆராய்ச்சியாளர்கள், டைனோசர்கள் அழிந்துபோன ‘கிரெட்டேசியஸ்’ (Cretaceous) காலத்தின் இறுதியில் இந்த சிறுகோள் பூமியில் மோதியிருக்கும் என்று கூறுகிறார்கள். பூமியின் வளிமண்டலத்தில் நுழைந்தவுடன், அது ஒரு தீப்பந்தமாக உருமாறியிருக்கும் என்றும் அவர்கள் கூறுகிறார்கள்.

“உதாரணத்திற்கு அந்த சிறுகோள் கிளாஸ்கோவை (ஸ்காட்லாந்தில் உள்ள நகரம்) தாக்குகிறது, நீங்கள் அங்கிருந்து 50 கிமீ தொலைவில் உள்ள எடின்பரோ நகரில் இருக்கிறீர்கள் என்று கற்பனை செய்து கொள்ளுங்கள். அங்கிருந்து பார்த்தால், வானத்தில் உள்ள சூரியனை விட 24 மடங்கு பெரியதாகவும், எடின்பரோவில் உள்ள அனைத்து மரங்கள் மற்றும் தாவரங்கள் தீப்பற்றி எரிய போதுமானதாகவும் அந்த நெருப்பு பந்து இருந்திருக்கும்" என்று நிக்கல்சன் விளக்குகிறார்.

இதனால் காற்றில் மிகவும் வலுவான ஒரு வெடிப்பு (Air burst) ஏற்பட்டிருக்கும் என்றும், அதைத் தொடர்ந்து 7 ரிக்டர் அளவிலான நிலநடுக்கத்தை ஒத்த ஒரு நில அதிர்வும் ஏற்பட்டிருக்கும் என கருதப்படுகிறது.

கடலுக்கு அடியில் இருந்து பெருமளவிலான நீர் வெளியேறி, பின்னர் பெரும் அலைகளாக கீழே மோதி, தனித்துவமான தடங்களை உருவாக்கியது.

இரண்டு பெரிய சிறுகோள்கள் நமது கிரகத்தை இவ்வளவு குறுகிய கால இடைவெளியில் தாக்குவது அசாதாரணமானது.

இந்த இரண்டு சிறுகோள்களும் குறுகிய கால இடைவெளியில் பூமியில் மோதியது ஏன் என்பது ஆராய்ச்சியாளர்களுக்குத் தெரியவில்லை.

பட மூலாதாரம்,GETTY IMAGES

ஏறக்குறைய இதே அளவிலான ஒரு நிகழ்வை மனிதகுலம் 1908 ஆம் ஆண்டு கண்டது. சைபீரியாவின் வளிமண்டலத்தில் 50 மீட்டர் சிறுகோள் ஒன்று நுழைந்தது, துங்குஸ்கா நிகழ்வு (Tunguska event) என்று அழைக்கப்படுகிறது.

தற்போது பூமிக்கு மிக அருகில் ‘பென்னு’ (Bennu) எனும் மிகவும் ஆபத்தான சிறுகோள் ஒன்று சுற்றி வருகிறது. நாதிர் பள்ளத்தாக்கை உருவாக்கிய சிறுகோள் ஏறக்குறைய பென்னுவின் அளவைக் ஒத்திருக்கும்.

நாசாவின் கூற்றுப்படி, 2182ஆம் ஆண்டில் செப்டம்பர் 24ஆம் தேதி பென்னு சிறுகோள் பூமியுடன் மோதக்கூடும். ஆனால் இதற்கான வாய்ப்பு என்பது 2,700இல் 1 சதவீதம் மட்டுமே.

மனித வரலாற்றில் இந்த அளவிலான சிறுகோள் தாக்கம் இருந்ததில்லை. இந்த நிகழ்வுகளை புரிந்து கொள்ள விஞ்ஞானிகள் பூமியில் உள்ள பள்ளங்கள் அல்லது பிற கிரகங்களில் உள்ள பள்ளங்களின் படங்களை ஆய்வு செய்ய வேண்டியுள்ளது.

நாதிர் பள்ளத்தை நன்கு புரிந்து கொள்ள, நிக்கல்சனும் அவரது குழுவினரும் டிஜிஎஸ் (TGS) என்ற புவி இயற்பியல் நிறுவனத்தில் இருந்து பெறப்பட்ட உயர் தெளிவுத்திறன் (Resolution) கொண்ட 3டி தரவை ஆய்வு செய்தனர்.

பெரும்பாலான பள்ளங்கள் அரிப்பால் பாதிக்கப்பட்டுள்ளன, ஆனால் இந்த நாதிர் பள்ளம் சேதமில்லாமல் இருப்பது, விஞ்ஞானிகள் பாறைகளை ஆழமாக ஆராய அனுமதிக்கிறது.

"இது போன்ற சிறுகோள் மோதியதால் ஏற்பட்ட ஒரு பள்ளத்தின் உட்புறத்தை நாம் பார்ப்பது இதுவே முதல் முறை. இது மிகுந்த உற்சாகத்தை அளிக்கிறது," என்று நிக்கல்சன் கூறுகிறார்.

பூமியில் வெறும் 20 கடல் பள்ளங்கள் உள்ளன, அவற்றில் எதுவுமே இதுபோன்ற முழுமையான ஆராய்ச்சிக்கு உட்படுத்தப்படவில்லை என்றும் நிக்கல்சன் கூறுகிறார்.

நிக்கல்சன் மற்றும் அவரது குழுவின் ஆராய்ச்சி முடிவுகள் ‘நேச்சர் கம்யூனிகேஷன்ஸ் எர்த் & என்விரான்மென்ட்’ அறிவியல் இதழில் வெளியிடப்பட்டுள்ளன.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/c7v6mz77l88o