மீண்டும் ஒருமுறை சண்டே லீடர் ஆசிரியர்கள் மரண அச்சுறுத்தலுக்கு உள்ளாக்கப்பட்டுள்ளனர்

கடந்த ஒக்.22ஆம் திகதி வியாழக்கிழமை சண்டே லீடரின் ஆசிரியரான பெரட்றிக்கா ஜான்ஸ்,செய்தி ஆசிரியரான முனாஸ் முஸ்தாக் ஆகிய இருவருக்கும் கையால் எழுதப்பட்ட இரண்டு மரண அச்சுறுத்தல் கடிதங்கள் தபால் மூலம் அனுப்பி வைக்கப்பட்டுள்ளன.

இரண்டு சிவப்பு நிற மையால் எழுதப்பட்டுள்ள இரண்டு கடிதங்களும் 2009 ஒக்.21ஆம் திகதி தபாலிடப்பட்டுள்ளது. இதேபோன்றே சண்டே லீடரின் ஆசிரியராக இருந்த லசந்த விக்ரமதுங்க கொல்லப்படுவதற்கு மூன்று வாரங்களுக்கு முன்னர் இதேபோன்று சிவப்பு நிற மையால் எழுதப்பட்ட மரண அச்சுறுத்தல் கடிதம் அனுப்பி வைக்கப்பட்டிருந்தமை குறிப்பிடத்தக்கது.

சண்டே லீடர் பத்திரிகை தனது இந்தப் 15 வருட காலத்திலும் தொடர்ச்சியாகப் பலமுறை தாக்குதலுக்குள்ளாகியுள்ளது. அது எரிக்கப்படடடிருக்கிறது. குண்டுத் தாக்குதலுக்கு உள்ளாகி இருக்கிறது. தடை செய்யப்பட்டிருகிறது. அச்சுறுத்தலுக்கும் தொந்தரவுக்கும் ஆளாகி வந்திருக்கிறது. அதன் உச்சமாக சண்டே லீடரின் ஆசிரியர் லசந்த விக்ரமதுங்க துரோகத்தனமான முறையில் இவ்வருட ஆரம்பமான ஜனவரியில் படுகொலை செய்யப்பட்டார்.

இந்தப் படுகொலையோடு திருப்தி அடையாதவர்கள் சண்டே லீடர் மீது தொடர்ந்து தாக்குதல் நடாத்தினார்கள். இவ்வருடமே மாதத்தில் பாதுகாப்புச் செயலாளர் கோத்தபாய ராஜபக்ச சண்டே லீடர் மீதும் அதன் ஆசிரியர் பெரட்றிக்கா ஜான்ஸ் மீதும் வழக்கொன்றைத் தாக்கல் செய்தார்.

இந்த வழக்கில் எமது சார்பில் ஆஜரான ஐந்து வழக்கறிஞர்கள் மீதும் துரோகிகள் என்ற பட்டத்தை அரசாங்கத்திற்குச் சொந்தமான பாதுகாப்பு அமைச்சின் இணையத்தளம் சுமத்தியிருந்தது.

இதனைத் தொடர்ந்து செப்டம்பரில், சனல் 4 தொலைக்காட்சி வெளியிட்ட காணொளி தொடர்பாக சண்டே லீடர் ஆசிரியர் பெரட்றிக்கா ஜான்ஸ் அல் ஜசீராவுக்குத் தெரிவித்த கருத்துக்கள் தொடர்பில் அபகீர்த்தியை ஏற்படுத்தும் வண்ணம் தேசியபாதுகாப்புக்கான ஊடக மையத்தின் இணையத்தளத்தில் கட்டுரை ஒன்று எழுதப்பட்டிருந்தது. அக்கட்டுரையில் விபச்சாரிகள் விபச்சாரம் செய்கிறார்கள் எனும் மொழிக்கையாடல் கூடப் பாவிக்கப்பட்டிருந்தது. அல்ஜசீராவுக்கான அந்நேர்காணலில் சனல் 4 இவ்வாறான சர்ச்சைக்குரிய காணொளியை ஒளி பரப்பவதற்கு முன்னதாக அதனுடைய நம்பகத் தன்மையைப் பரிசோதிக்காமல் ஒளி பரப்பியிருக்க மாட்டார்கள் என பெரட்றிக்கா ஜான்ஸ் தெரிவித்திருந்தார்.

சனல் 4 காணொளி தொடர்பாக அதனைப் பரீட்சித்த அமெரிக்க நிறுவனத்தின் ஆரம்ப அறிக்கையில் அந்தக் காணாளியில் எத்தகைய காணொளிக்காட்சி மாற்றங்களோ அல்லது ஒலிமாற்றங்களோ மேற்கொள்ளப்பட்டிருக்கவில்லை என்று தெரிவித்திருந்தது தொடர்பாக சண்டே லீடர் ஒக்.18ஆம் திகதி அறிக்கையிட்டிருந்தது. சிறிலங்கா இராணுவ உடையணிந்தவர்கள் சாதாரண மக்களைக் கொல்வதாக அந்தக் காட்சி இருந்ததை எல்லோரும் அறிவர். அந்த அறிக்கையை அடிப்படையாகக் கொண்டு செய்தி வெளியிட்ட நாம் அமைச்சர் கெகலிய ரம்புக்வெலவின் அது தொடர்பான கருத்தையும் அச்செய்தியோடு சேர்த்து வெளியிட்டிருந்தோம்.

சண்டே லீடர் பத்தரிகை சர்ச்கைக்குரிய ஒரு பத்திரிகையாகவே எப்போதும் இருந்து வருகிறது. ஏனெனில் நாங்கள் எதை எவ்வாறு காண்கிறோமோ அதை அவ்வாறே அறிக்கையிடுகிறோம். இடக்கரடக்கல்களுக்குப் பின்னால் நாம் ஒளிந்து கொள்வதில்லை. புலனாய்வு செய்து நாம் வெளியிட்ட அறிக்கைகள் போதிய ஆதாரங்களைக் கொண்டுள்ளன. நாம் மோசடிகள் தொடர்பாக தொடர்ந்து அறிக்கையிட்டு வருகிறோம். எனினும் இந்தப் 15 வருடங்களில் எவரும் அதில் ஏதாவது தவறு உள்ளது என்று நிரூபிக்கவில்லை.

இவற்றினூடாக சண்டே லீடரிலிருந்து உங்கள் தேசத்தைப் பற்றி நீங்கள் அறிந்து கொள்கிறீர்கள். உங்களுடைய குழந்தைகளின் எதிர்காலத்திற்காக நீங்கள் தெரிவு செய்து கொடுத்துள்ள அரசைப்பற்றி நீங்கள் அறிந்து கொள்கிறீர்கள்.

சில சமயங்களில் நாம் சொல்பவை உங்களுக்கு உவப்பற்றதாகக் கூட இருக்கலாம். உங்களுக்காக உங்கள் தேசத்தின் பிரதிமையைப் பார்க்கக் கூடியவாறு பத்திரிகை எனும் கண்ணாடியைத் தூக்கிப் பிடிப்பவர்கள் கடும் அபாயத்தை எதிர்கொள்பவர்களாக இருக்கிறார்கள். அதனால் தான் நாம் இவற்றைச் சொல்கிறோம். நாம் எவற்றையுமே தட்டிக்கழிப்பவர்கள் அல்லர்.

இணைய இணைப்பு http://www.globaltamilnews.net/tamil_news1.php?nid=16411&cat=1