வன்னி மருத்துவர்களுக்கான பிணை தளர்த்தப்பட்டுள்ளது

வன்னியில் மருத்துவப் பணியாற்றிய மருத்துவர்கள் தங்கமூர்த்தி சத்தியமூர்த்தி மற்றும் கேதீஸ் அவர்களின் பிணையானது சற்று தளர்த்தப்பட்டுள்ளது.

வன்னி இறுதிக் கட்ட போரில் மக்களைக் காப்பாற்ற சேவை வழங்கிவந்த மருத்துவர்களில் இருவரான தங்கமூர்த்தி சத்தியமூர்த்தி மற்றும் கேதீஸ் ஆகியோரின் விசாரணை நேற்று கொழும்பு குற்றவியல் நீதிமன்றத்தில் எடுத்துக் கொள்ளப்பட்டது. இலங்கை ராணுவத்தினரின் இன அழிப்பு போரில் இறந்த மக்கள் குறித்த எண்ணிக்கையை இந்த மருத்துவர்கள் சர்வதேச சமூகத்துக்கு பொய்யாக அதிகப்படுத்திக் கூறியதாகக் குற்றம் சாட்டப்பட்டுள்ளனர்.

இவர்கள் அரசாங்கத்துக்கு முரண்பாடாக சட்டவிரோத செயல்கள் புரிந்தார்களா மற்றும் விடுதலைப் புலிகள் அமைப்புடன் நேரடி தொடர்பு கொண்டிருந்தார்களா என தாம் விசாரணை செய்து வருவதாக சி.ஐ.டி இனர் தெரிவித்தனர்.

மேற்படி இரு மருத்துவர்கள் சார்பிலும் வாதாடும் வக்கீல் பூபாலசிங்கம் தனது வாதத்தின்போது மருத்துவர்கள் இருவரும் வவுனியா வைத்தியசாலையில் கடமையில் உள்ளனர். அங்கு வேலைப்பளு அதிகமாக உள்ளது. இதனால் அவர்கள் வவுனியா போலீஸ் நிலையத்துக்குச் சென்று கையொப்பம் இடுவதில் பெருஞ்சிரமம் உள்ளது எனவும் இந்த பிணை நிபந்தனையை மறுபரிசீலனை செய்யுமாறும் கேட்டுக் கொண்டார்.

மேலும் மருத்துவர்கள் தடுத்து வைக்கப்பட்டிருந்த காலத்துக்கான அவர்களின் ஊழியத்தை அவர்கள் பெற விரும்புகிறார்கள், அதற்கான அனுமதியும் வழங்கப்படவேண்டும் என வக்கீல் கேட்டார்.

இவற்றுக்கு பதிலளித்த நீதிபதி நிஷாந்த ஹப்புராச்சி போலீசில் கையொப்பமிடவேண்டும் என்ற பிணை நிபந்தனையை நீக்கியுள்ளதோடு, அவர்களின் ஊதியத்தை பெறுவதற்கு எதுவித தடையுமில்லை அதை அவர்கள் விண்ணப்பித்து பெற்றுக்கொள்ளலாம் எனக் கூறினார்.

மேலும்