தனித் தமிழ் நாடு அமையுமா? : கைதுக்கு முன் கண்ணப்பன் சிறப்புப் பேட்டி

கைதுக்கு முன் கண்ணப்பன் சிறப்புப் பேட்டி - நமது சிறப்புச் செய்தியாளர். தடை செய்யப்பட்ட விடுதலைப் புலிகள் அமைப்புக்கு ஆதரவாகப் பேசியதாக மறுமலர்ச்சி திராவிட முன்னேற்றக் கழகப் பொதுச் செயலாளர் வைகோ, அவைத் தலைவர் கண்ணப்பன் ஆகியோர் இன்று கைது செய்யப்பட்டனர். கைது சம்பவத்துக்கு சில மணி நேரத்துக்கு முன்பாக கண்ணப்பன்

நமக்களித்த சிறப்புப் பேட்டி:

கே:சென்னை ராஜா அண்ணாமலை மன்றக் கூட்டத்தில் தனித் தமிழ்நாடு மலர்ந்தே தீரும் என்று பேசியிருக்கிறீர்களே?

இலங்கையில் வசிக்கும் பூர்வீகத் தமிழர்கள், கடந்த அறுபதாண்டுகளாக தங்கள் உரிமைக்காகப் போராடி வருகிறார்கள். 1948_ல் அந்நாடு சுதந்திரம் அடைந்ததில் இருந்து சுமார் 35 ஆண்டுகள் ஈழத்து காந்தி என்று அழைக்கப்படும் தந்தை செல்வா தலைமையில் அறவழியில் உரிமைப் போராட்டம் நடந்தது. ஆனால் தமிழ் இனத்தையே பூண்டோடு அழிக்கும் இலங்கை அரசுக்கு எதிராக ஆயுதம் ஏந்த வேண்டிய கட்டாயத்துக்கு அங்குள்ளவர்கள் தள்ளப்பட்டனர். இந்த ஆயுதப் போர் கடந்த 25 ஆண்டுகளாக நடந்து வருகிறது. இலங்கையின் உள்விவகாரத்தில் தலையிட முடியாது என்று கூறிக் கொண்டே அந்நாட்டுக்கு ஆயுதம் உதவி வழங்கி வருவதோடு இலங்கை ராணுவ வீரர்களுக்கு இந்தியாவில் பயிற்சி அளித்தும் வருகிறது, மத்திய அரசு. ஆயுத உதவியோடு நிதி மற்றும் ராணுவத் தொழில்நுட்ப உதவிகளை செய்து வருவதையும் இந்திய அரசு ஒப்புக் கொண்டுள்ளது. நம்முடைய வரிப் பணத்தை நம் சமுதாய மக்களையே அளிக்கப் பயன்படுத்துகிறது, மத்திய அரசு. தமிழ் இனத்தை அழிக்கும் மத்திய அரசின் இந்த செயல் தொடர்ந்தால் தனித் தமிழ் நாடு என்ற எண்ணமும் உணர்வும் மேலோங்கிவிடும் என்ற அர்த்தத்தில் தான் பேசினேன்

கே:இலங்கைத் தமிழர்களுக்கு ஆதரவாக, ராமேஸ்வரத்தில் கலைத் துறையினர் நடத்திய பொதுக் கூட்டத்தில் இயக்குநர்கள் சிலர் தெரிவித்த கருத்துகளுக்கும் எதிர்ப்பு கிளம்பியிருக்கிறதே?

ஈழப் பிரச்னையில் தமிழ்த் திரைப்படத் துறையினர் தங்களுடைய ஆதரவைத் தொடர்ந்து அளித்து வருகிறார்கள். அதை வரவேற்கிறோம். தொடர்ந்து தமிழகமும் தமிழ் இனமும் வஞ்சிக்கப்படும் நிலையில், எதிர்காலத்தில் என்ன வேண்டுமானாலும் நடக்கலாம் என்ற எச்சரிக்கையை அந்தக் கூட்டத்தில் சிலர் வெளிப்படுத்தினார்கள். அதில் காங்கிரஸ் கட்சிக்கு உடன்பாடு இல்லாத காரணத்தால் எதிர்க்கிறார்கள்

கே:இலங்கைக்கு ஆயுதம் கொடுக்க வேண்டாம் என்று வேண்டுமானாலும் கூறமுடியும். ஆனால் அந்நாட்டு உள்விவகாரத்தில் மத்திய அரசைத் தலையிட வற்புறுத்துவது நியாயமா?

கிழக்குப் பாகிஸ்தானில் பிரச்னை வந்த போது, வங்கதேசம் உருவாகக் காரணமாக இருந்தவர், அப்போதைய இந்திய பிரதமர் இந்திரா காந்தி. கிழக்குப் பாகிஸ்தானில் இருந்து வரும் லட்சக்கணக்கான அகதிகளால் இந்தியாவின் சட்ட ஒழுங்கு பாதிக்கப்படுகிறது என்பதால், வங்கதேசம் உருவாக உதவியாக இருந்தோம் என்று இந்திரா காந்தி விளக்கம் அளித்தார். அந்த வகையில், இலங்கையில் போர் நிறுத்தம் அமலுக்கு வர இந்திய அரசு முயற்சி எடுக்க வேண்டும். இதுவரை அந்நாட்டு அரசுக்கு வழங்கி வந்த ராணுவ ரீதியிலான உதவிகளை உடனடியாக திருப்பப் பெற வேண்டும். இலங்கை அரசு மீது பொருளாதாரத் தடையை இந்தியா விதிக்க வேண்டும். மொத்தத்தில், இலங்கையில் தமிழ் இனம் மீது நடக்கும் தாக்குதலைத் தடுத்து நிறுத்த இந்தியா நடவடிக்கை எடுக்க வேண்டும்.

கே:புலிகளுக்கு ஆதரவாகப் பேசுபவர்கள் தேசத் துரோகிகள் என்று உங்கள் கூட்டணியில் உள்ள ஜெயலலிதாவே சொல்லியிருக்கிறாரே?

விடுதலைப் புலிகளை எதிர்ப்பது அவருடைய கட்சியின் கொள்கை. அதை அவர் தெளிவாக சொல்லி வருகிறார். தேர்தல் கூட்டணி என்பது கட்சிகளின் தனிப்பட்ட கருத்துக்கு அப்பாற்பட்டது. ஒரே கூட்டணியில் இப்போது இருக்கும் காங்கிரசும் தி.மு.க.வும் ஒத்தக் கருத்து உடையவர்கள் அல்ல. எங்களுடைய வாதம் என்னவென்றால் தமிழ்நாடும், தமிழ் இனமும் தொடர்ந்து வஞ்சிக்கப்படுகிறது என்பதுதான். ஒகேனக்கல் கூட்டுக் குடிநீர்த் திட்டத்துக்கு கன்னட வெறியர்கள் கடும் எதிர்ப்புக் காட்டி வருகிறார்கள். தமிழர்களின் தாகத்தைத் தீர்க்கும் அந்தத் திட்டம் என்ன ஆனது என்றே தெரியவில்லை. நடுவர் மன்றத்தில் இடைக்காலத் தீர்ப்பை அமல்படுத்த முடியாமல் கன்னட வெறியர்கள் இடையூறு செய்கிறார்கள். இதனால் தமிழக விவசாயிகள் கடுமையாகப் பாதிக்கப்பட்டிருக்கிறார்கள