ராஜீவ்காந்தி போட்ட ஒப்பந்தத்தை மீறுமா ராஜபக்சே அரசு?

ஞாயிற்றுக்கிழமை, 7, ஜூன் 2009 (8:8 IST)

ராஜீவ்காந்தி போட்ட ஒப்பந்தத்தை மீறுமா ராஜபக்சே அரசு?

இலங்கை தமிழர் பகுதிக்கு கூடுதல் அதிகாரம் வழங்குவதற்காக, இந்தியா-இலங்கை இடையே ராஜீவ் காந்தி ஆட்சி காலத்தின்போது ஒப்பந்தம் ஏற்பட்டது.

அதன்படி, இந்தியாவில் உள்ள மாநிலங்களைப்போல், இலங்கை தமிழர் பகுதி மாகாணங்களுக்கு போலீஸ், நில நிர்வாகம் போன்ற அதிகாரங்கள் வழங்குவது என்று முடிவு செய்யப்பட்டது.

இதற்காக, இலங்கை அரசியல் சட்டத்தில் 13-வது திருத்தம் கொண்டு வரப்பட்டது. இலங்கையில் விடுதலைப்புலிகளுக்கு எதிரான போரை தீவிரப்படுத்திய தற்போதைய அதிபர் ராஜபக்சே, போர் முடிந்ததும் இலங்கை தமிழர் பகுதிக்கு 13-வது அரசியல் சட்ட திருத்தத்தின்படி கூடுதல் அதிகாரம் வழங்கப்படும் என்று உறுதி அளித்து இருந்தார்.

இந்திய அரசும், தமிழ் மாகாணங்களுக்கு கூடுதல் அதிகாரம் வழங்கும்படி இலங்கை அரசுக்கு தொடர்ந்து நிர்பந்தம் கொடுத்து வருகிறது.

இந்த நிலையில், இலங்கையின் சுப்ரீம் கோர்ட் தலைமை நீதிபதி சரத் நந்தா சில்வா தலைநகர் கொழும்பில் நேற்று நிருபர்களுக்கு பேட்டி அளித்தார்.

அப்போது அவர், ‘’இலங்கையில் வடக்கு பகுதியில் தமிழ் மாகாணங்களுக்கு கூடுதல் அதிகாரம் வழங்க வகை செய்யும் 13-வது அரசியல் சட்ட திருத்தம், இந்திய அரசியலமைப்பு சட்டத்தின் அடிப்படையில் அவசர அவசரமாக தயாரிக்கப்பட்டதாகும். இந்திய அரசியலமைப்பு சட்டத்தின் சிதறிய துண்டுகளை அவசரமாக ஒன்று சேர்த்து சட்ட திருத்தம் கொண்டு வரப்பட்டு இருக்கிறது.

இந்த சட்ட திருத்தத்தின் படி, இலங்கை போன்ற ஒரு சிறிய நாட்டில், மாகாணங்களுக்கு போலீஸ் மற்றும் நில அதிகாரங்களை வழங்குவது என்பது நடக்காத காரியம். இந்த சட்ட திருத்தம் நடைமுறைக்கு ஒத்துவராது.

உதாரணமாக, இந்தியாவில் உத்தரப்பிரதேசம், மத்திய பிரதேசம் போன்ற மாநிலங்கள், இலங்கை நாட்டின் மொத்த பரப்பை விட 10 அல்லது 12 மடங்கு பெரிய மாநிலங்களாகும். அதுபோன்ற மாநிலங்களில் வேண்டுமானால் அதிகார பகிர்வை வெற்றிகரமாக அமல்படுத்தலாம். ஆனால் இலங்கையில் உள்ள சிறிய மாகாணங்களில் அதை அமல்படுத்துவது சாத்தியம் அல்ல’’என்று தெரிவித்தார்.

நக்கீரன்