2010ஆம் ஆண்டுக்கு முன்னர் பொதுத்தேர்தல் நடக்காது 2011ஆம் ஆண்டு வரை ஜனாதிபதி தேர்தல் இல்லை

2010ஆம் ஆண்டுக்கு முன்னர் பொதுத்தேர்தல் நடக்காது 2011ஆம் ஆண்டு வரை ஜனாதிபதி தேர்தல் இல்லை

வீரகேசரி நாளேடு

அரசாங்கம் எக்காரணம் கொண்டும் எதிர்வரும் 2010 ஆம் ஆண்டுக்கு முன்னர் பொதுத்தேர்தலை நடத்தாது. அத்துடன் 2011 ஆம் ஆண்டுவரை ஜனாதிபதி தேர்தலும் இடம்பெறாது. இதற்கான தேவைகள் தற்போது ஏற்படவில்லை. ஐக்கிய தேசிய கட்சி பலமடைய ஒருபோதும் இடமளிக்கக்கூடாது என்று ஸ்ரீலங்கா சுதந்திரக் கட்யின் பொதுச் செயலாளரும் அமைச்சருமான மைத்ரிபால சிறிசேன தெரிவித்தார்.

நேற்று மஹரகமையில் இடம்பெற்ற கட்சியின் 17 ஆவது தேசிய சம்மேளனத்தில் கலந்துகொண்டு உரையாற்றுகையிலேயே அவர் மேற்கண்டவாறு கூறினார்.

அவர் அங்கு மேலும் கூறியதாவது:

எதிர்வரும் 2010 ஆம் ஆண்டுக்கு முன்னர் பொதுத்தேர்தலை நடத்தும் எந்தத்தேவையும் அரசாங்கத்துக்கு இல்லை. அத்துடன் 2011 ஆம் ஆண்டுவரை ஜனாதிபதி தேர்தலும் நடைபெறாது. அரசாங்கம் மிகவும் ஸ்திரமாக உள்ளது. எமக்கு எதிரõன சவால்களை நாங்கள் முறியடித்துவருகின்றோம். எமது அரசாங்கத்தை எவராலும் அசைக்க முடியாது.

13 வருடங்களாக சுதந்திரக் கட்சியின் தலைமைத்துவமே இந்த நாட்டை நிருவகிக்கின்றது. புலிகளின் முயற்சியை முறியடித்து வருகின்றோம். ஐக்கிய தேசிய கட்சியும் எமக்கு எதிராக சதிமுயற்சிகளை மேற்கொள்கின்றது. தற்போது புதிதாக மக்கள்வாதிகள் மற்றும் தேசப்பற்றாளர்கள் என்று தம்மை கூறிக்கொள்பவர்களும் அரசாங்கத்துக்கு சவால்விடுவதற்கு ஆரம்பித்துள்ளனர்.

அதேவேளை அரசாங்க சேவையில் உள்ள ஒரு சிலரும் எமக்கு எதிராக சதி முயற்சிகளில் ஈடுபட ஆரம்பித்துள்ளனர். ஆனால் சந்தர்ப்பவாதிகளை மக்கள் நிராகரித்து விடுவார்கள். அரசாங்கம் கிழக்கில் பாரிய வெற்றியை பெற்றுக்கொண்டுள்ளது. பாராளுமன்றத்தில் ஐக்கிய தேசிய கட்சியின் 35 உறுப்பினர்கள் அரசாங்கம் பக்கம் உள்ளனர். நாட்டின் வரலாற்றில் எந்த அரசியல் தலைவரும் செய்யாத வகையில் தற்போதைய ஜனாதிபதி ஏனைய அரசியல் கட்சிகளையும் இணைத்துக்கொண்டு செயலாற்றிவருகின்றார்.

எந்த சதி முயற்சிகளாலும் சுதந்திரக் கட்சியை அசைக்க முடியாது. கட்சியின் ஒழுக்காற்று செயற்பாட்டை இனிவரும் காலங்களில் கடுமையாக்க உள்ளோம். கட்சியில் மகளிர் மற்றும் இளைஞர் அணிகளின் செயற்பாடுகள் திருப்திகரமாக இல்லை. இவை குறித்து கவனம் செலுத்தப்படவேண்டும். கட்சியின் அமைப்பாளர்கள் அமைச்சர்கள் மற்றும் முக்கிய பதவிகளில் இருப்பவர்களுக்காக கட்சி மட்டத்தில் கோவை ஒன்று பேணப்படும். அதில் உறுப்பினர்களின் செயற்திறன்கள் கணிக்கப்படும்.