"உறவை மறவாதே" [நவம்பர் 14, 2024 அன்று நடக்கவிருக்கும் நாடாளுமன்றத் தேர்தல் முன்னிட்டு]

[kandiah Thillaivinayagalingam]

"உறவை மறவாதே"

[நவம்பர் 14, 2024 அன்று நடக்கவிருக்கும் நாடாளுமன்றத் தேர்தல் முன்னிட்டு]

 

 

"உறவை மறவாதே நட்பைக் குலைக்காதே

உலகம் உனதாகும் கைகள் இணைந்தாலே!

உயிரும் உடலுமாக ஒன்றி வாழ்ந்தாலே

உயர்ச்சி பெறுவாய் மனிதம் காப்பாற்றுவாய்!"

 

"தேர்தல் வருகுது மனத்தைக் குழப்பாதே

தேசம் ஒன்று உனக்கு உண்டே!

தேய்வு அற்ற உறவைச் சேர்த்து

தேசியம் காக்க ஒன்றாய் இணை!"

 

"ஆதி மொழி பேசும் மனிதா

ஆசை துறந்து அர்ப்பணிப்பு செய்யாயோ?

ஆவதும் உன்னாலே அழிவதும் உன்னாலே

ஆறஅமர்ந்து ஒன்றாய் நின்றால் என்ன?"

 

"உறவை மறவாதே உண்மையைத் துறக்காதே

உலகம் உனதாகும் உள்ளம் திறந்தால் !

உதவும் கரங்கள் வெளிச்சத்தைக் கொண்டுவரட்டும்

உவகை கொண்டு எல்லோரையும் அணைக்கட்டும்!"

 

"யாதும் ஊரே யாவரும் கேளிர்

அன்று சொன்னான் எமக்கு வேதமாய்!

யாவரும் ஒன்றாய்க் கூடி இருந்து

இன்று ஒன்றாய் களத்தில் நிற்போம்!"

 

"கூட்டுக் குடும்பம் கூடி மகிழவே

கூத்து அடித்து ஆடி மகிழவே!

கூழும் கூட அமுதம் ஆகும்

கூடிக் குலாவி ஒன்றாய் இருந்தால்!"

 

 

[கந்தையா தில்லைவிநாயகலிங்கம்,

அத்தியடி, யாழ்ப்பாணம்]