சிறுமி கொலையின் பின்னணியில் சிறிலங்கா துணை இராணுவக் குழுவான சந்திரகாந்தன் குழு: காவல்துறை அறிவிப்பு

திருகோணமலையில் ஆறு வயது சிறுமி மேரி வர்சா கடத்திச் செல்லப்பட்டுப் படுகொலை செய்யப்பட்ட சம்பவத்தின் பின்னணியில் சந்திரகாந்தன் தலைமையிலான துணை இராணுவக் குழுவினரே சம்பந்தப்பட்டிருப்பதாக காவல்துறையினர் தமது விசாரணைகளையடுத்துத் திட்டவட்டமாகத் தெரிவித்துள்ளனர்.

இருந்தபோதிலும், இந்தக் கடத்தல் மற்றும் படுகொலைச் சம்பவங்களுக்கும் தமக்கும் எவ்வித தொடர்பும் இல்லை எனத் தெரிவித்துள்ள சந்திரகாந்தன், இதில் சம்பந்தப்பட்டதாக கைது செய்யப்பட்டு பின்னர் சயனைட் உட்கொண்டு மரணமடைந்ததாகத் தெரிவிக்கப்படும் ஜனார்த்தனன் தமது கட்சி உறுப்பினர் அல்ல எனவும், தேர்தல் காலத்தில் மட்டுமே அவர் தம்முடன் இணைந்து செயற்பட்டதாகவும் தெரிவித்திருந்தார்.

இருந்தபோதிலும் இந்த விசாரணை தொடர்பான விபரங்களை தற்போது வெளியிட்டுள்ள காவல்துறையினர் சந்திரகாந்தனின் கருத்தை நிராகரித்துள்ளார்கள்.

கிழக்கு மாகாணத்தில் சந்திரகாந்தன் குழுவினரால் கடத்திச் செல்லப்பட்டு கப்பம் பெறுவதற்காகத் தடுத்துவைக்கப்பட்டுள்ள பலர் தொடர்பான தகவல்களை பொதுமக்கள் அச்சம் காரணமாக வெளியிடுவதில்லை எனவும் காவல்துறையினர் தெரிவிக்கின்றார்கள்.

அரசாங்கத்தில் குறிப்பிடத்தக்க உறவை கொண்டுள்ள ஒரு கட்சியாக சந்திரகாந்தன் குழு இருப்பதனால் அதனுடன் சம்பந்தப்பட்ட விடயங்களில் காவல்துறையினராலும் ஓரளவுக்கு மேல் தலையிட முடியாதிருப்பதாகவும் தெரிவிக்கப்படுகின்றது.

திருகோணமலை புனித மரியாள் கல்லூரியில் கல்வி பயிலும் வர்சா, மார்ச் 11 ஆம் நாள் கப்பம் கோரி துணை இராணுவக் குழுவைச் சேர்ந்த ஒரு குழுவினரால் கடத்திச் செல்லப்பட்டுத் தடுத்து வைக்கப்பட்டார்.

இது தொடர்பான விசாரணைகளின் போது இந்தக்கடத்தலின் பின்னணியில் இருந்தவர்கள் யார் என்பது அடையாளம் காணப்பட்ட பின்னர் கடத்தல்காரர்கள் சிறுமியைப் பாலியல் வல்லுறவுக்கு உட்படுத்திய பின்னர் கொடூரமாகக் கொலை செய்தனர். அதன்பின்னர் கோணிப் பை ஒன்றில் போடப்பட்ட நிலையில் அவரது உடலம் கைவிடப்பட்ட நிலையில் கண்டுபிடிக்கப்பட்டது.

இது தொடர்பான விசாரணைகளை நடத்திய காவல்துறையினர் இதில் தொடர்புடையவர்கள் சந்திரகாந்தனின் ஆயுதக்குழுவைச் சேர்ந்தவர்களே என்பதைத் திட்டவட்டமாகக் கூறியிருப்பதாக கொழும்பிலிருந்து வெளியாகும் ஆங்கிர வார இதழ் ஒன்று இன்று செய்தி வெளியிட்டுள்ளது.

இந்தக் கடத்தல், பாலியல் வல்லுறவு, கொலை மற்றும் கப்பம் கோரியமை தொடர்பான குற்றச்சாட்டுக்களில் சந்திரகாந்தன் குழுவைச் சேர்ந்த நால்வர் காவல்துறையினரால் கைது செய்யப்பட்டனர்.

சந்திரகாந்தன் குழுவின் திருகோணமலை அலுவலகப் பொறுப்பாளர் ஜனார்த்தனனும் இவ்வாறு கைது செய்யப்பட்டபோதிலும் பின்னர் அவர் சையனைட் உட்கொண்டு தற்கொலை செய்துகொண்டார்.

இச்சம்பவம் தொடர்பாகக் கைது செய்யப்பட்ட மற்றையவர்களும் சந்திரகாந்தனின் குழுவைச் சேர்ந்தவர்களே என காவல்துறையினர் தெரிவிக்கின்றனர்.

இவ்வாறு கைதானவர்கள் ஒருவர் தப்பிச் செல்ல முற்பட்ட போது சுட்டுக்கொல்லப்பட்டதாகத் தெரிவிக்கப்படுகின்றது. மற்றைய இருவர் அடையாளம் தெரியாதவர்களால் சுட்டுக்கொல்லப்பட்டதாகக் கூறப்படுகின்றது.

இது தொடர்பான விசாரணைகளை மேற்கொண்ட காவல்துறையினருக்கு மேலும் அதிர்ச்சியயான தகவல்கள் கிடைத்திருக்கின்றது.

அதாவது, திருகோணமலை பல தமிழ் வர்த்தகர்கள் கடத்திச் செல்லப்பட்டு கப்பம் கோரப்பட்ட சம்பவத்துடன் சந்திரகாந்தனின் குழுவே சம்பந்தப்பட்டிருக்கின்றது என்பதை காவல்துறையினர் இப்போது கண்டறிந்துள்ளனர்.

இவ்வாறான பல கடத்தல் மற்றும் கப்பம் பெறப்பட்ட சம்பவங்கள் அச்சம் காரணமாக தொடர்புபட்டவர்களால் மூடிமறைக்கப்பட்டு விட்டதாகவும் தெரிவிக்கப்படுகின்றது.

இதேவேளையில் வர்சா கொலையாளிகள் கைது செய்யப்பட்ட பின்னர் திருகோணமலையில் இடம்பெற்றுவந்த மார்மான கடத்தல் சம்பவங்கள் முடிவுக்கு வந்திருப்பதாகவும் காவல்துறையினர் தெரிவித்தனர்.