uthayakumar

ஈழத்தில் 2009 ல் எங்கள் ஆயுத பலத்தை இழந்தோம். இப்போ அரசியல் பலத்தையும் இழந்திருக்கிறோமா. அப்படி இப்படி நாம் அது எல்லாம் இல்லை என்று பூசி மொழுகினாலும் சில தோல்விகளை ஒப்புக் கொள்ளத் தான் வேண்டும். எதிர்காலத்தில் இது நிரந்தரமான தோல்வியாக இருக்காமல் நாம் மாற்றி அமைக்க வேண்டுமானால் நாம் விட்ட தோல்விகளில் இருந்து பாடம் கற்க வேண்டும் முதலையும் மூர்க்கனும் கொண்டது விடா என்பது போல் விடா கொண்டன் கொடாக் கொண்டனாக இருக்காமல் இனியாவது ஒற்றுமையோடு பயணியுங்கள். தமிழ் கட்சிகள் ஒருவரை ஒருவர் குறை கூறுவதும் அதோ போல் புலத்திலும் நிலத்திலும் உள்ளவர்கள் நம்மை நாமே தாழ்த்தியபடி ஆளுக்கு ஆள் மாறி மாறி தேசியம் தெருவில் கிடக்கிறது என்பதும் தமிழ் இனவாதத்தால் வந்த வினை என்பதும் இப்படி தேசியம், தேசம் சுயநிர்ணயம், அடையாளம், இனம் சார்ந்த எந்தத் தெளிவும் இன்றி அவர் அவர் உயரங்களுக்கு தகுந்த மாதிரி எழுதியும் பேசியும் வருகிறார்கள். நாம் வாழும் நாடு நோர்வேயிலே அவர்கள் தமது முழுமை பெற்ற சுதந்திர தினத்தை கொண்டாடும் போது சிறுவர் முதல் பெரியோர் வரை தமது தேசியக் கொடியை தோழில் காவியபடி நாங்கள் எல்லோரும் நமது தேசத்தியும் மண்ணையும் மொழியையும் நேசிக்கிறோம் என்று ஒரே மக்களாக ஒரே திரட்ச்சியாக வானுயர பாடியபடி போவார்கள். இப்படி ஒன்று பட்ட திரட்சியினால் தான் பிரான்சுப் புரட்சியில் இருந்து ரஷியாவின் சிவப்பு சுதந்திர சதுர்க்கம் வரை விடுதலை பெற்ற வரலாற்றை உலகம் நமக்கு கற்றுத் தந்திருக்கிறது. ஒரு இனம் ஒடுக்கு முறைக்கு எதிராக தனது இருப்பு தனது சுதந்திரம் வேண்டிப் போராடுவது எல்லாம் இனவாதம் இல்லை. இனவாதம் என்பது தத்துவார்த்த ரீதியிலான பல கருத்துக்களை கொண்டது அதில் ஒன்று சிறு பான்மை இனத்தின் உரிமை மறுக்கப்படுவதும் சொந்த இனத்தை உயர்வாகக் பார்த்து பிற இனத்தை ஏற்றுக்கொள்ளாமல் தாழ்வாகக் கருதுவது போன்ற கருத்துக்களை அடிப்படையாகக் கொண்டது. ஒரு தேசத்தில் வாழும் தேசிய இனங்களை மரத்தை சுற்றிப் படரும் கொடி என்று பெரும்பான்மை சமூகம் கூறுவதும் தான் இனவாதம். தன்னாட்சி கோருவது பிரிவினைவாதம் அல்ல. சட்டப்படி உரிமைகளை கோருவது இனவாதம் அல்ல. உரிமைகளை மறுப்பதே இனவாதமாகும். ஒடுக்கப்பட்ட ஒரு தேசிய சிறு பான்மை இனம் சுய நிர்ணயம், தன்னாட்சி, உரிமைகள் மற்றும் சமத்துவம் சட்டப்படி தமது உரிமைகளை கோருவது பிரிவினைவாதம் இனவாதம் அல்ல என்பதை தெளிவுபடுத்துகிறது. கொல்லப்பட்ட எம் மக்களுக்கும் தொலைந்து போனவர்களுக்கும் நீதி கேட்பது இனவாதமா அதற்கு மாறாக, அந்த உரிமைகளை மறுப்பது முறையாக மதிப்பீடு செய்யப்படாத செயலாகும் மற்றும் சமத்துவத்தை மறுக்கும் ஒரு நிலையை பிரதிபலிக்கிறது. தமது விடுதலைக்காகப் போராடும் ஒரு இனத்தின் உரிமைக் குரலை மறுத்து பிரிவினை வாதம் இனவாதம் என்று கதைப்பது வாதிடுவது தான் இனவாதம். இதை சரியாக விளங்கிக் கொண்டே ஆளும் கட்சியாக இருந்தாலும் எவரும் எந்தக் கருத்தையும் கூற வேண்டும். ஆழமாக எதையும் விளங்கி சரியானவைகளை எழுத வேண்டும் பேச வேண்டும். பிளவு படாத ஒரே நாட்டுக்குள் சமத்துவமாக வாழ்வோம் என்பதை விட அந்த மக்களின் உரிமைகளை அங்கீகரித்து விட்டு அனைவரும் சமத்துவமாக வாழ்வோம் என்று அழைப்பது தான் உண்மையான சமத்துவம். தமிழர் தேசங்களில் உரிமைகள் மதிப்பு, நீதி, நிர்வாகம், சட்டம், பாதுகாப்பு முறை என்பன அவர்களின் கோரிக்கைகளுக்கு இணங்க மரியாதையுடன் சமத்துவமாகவும் நடைமுறைப் படுத்த வேண்டும். இன்று இலங்கையில் பல மாற்றம் நடந்திருக்கிறது குறிப்பாக தெற்கு அரசியல் வாதிகளே முழுக்கு முழுக்கு இனவாதம் பேசியவர்கள் அந்த முகங்கள் எல்லாம் காணாமல் போய் இருக்கிறார்கள் இது வரவேற்கத் தக்க மாற்றமாகும். சமத்துவமான சமுதாயமாகவும் நாம் எல்லாம் பொருளாதார ரீதியாக முன்னேற்றம் அடைந்த நாடக இலங்கை இருக்க வேண்டும் என்ற கனவு கண்டால் முதலில் தீர்க்கப்பட வேண்டிய பிரச்சினை தேசிய இனப் பிரச்சினையாகும். இதன் மூலம் நாம் எல்லோரும் ஒன்றாக சமத்துவமான ஊழல் அற்ற ஒரு கனவுத் தேசத்தை கட்டி எழுப்ப முடியும் என்ற யதார்த்தத்தை ஆளும் தரப்பினர் சரியாகப் புரிய வேண்டும். நாமும் இனி வரும் காலத்தில் ஒற்றுமையோடு பயணித்தால் தான் எமக்கான விடுதலையும் அடைய முடியும் என்பதையும் தமிழர் தரப்பும் உணர வேண்டும். பா.உதயன் ✍️

நல்ல சிந்தனைகள் கருத்துக்கள் எல்லோருக்கும் நன்றிகள் .

தமிழ் யூடியூப் தம்பிமாரே- பா.உதயன் தமிழ் யூடியூப் சில தம்பிமாருக்கு லொத்தர் சீட்டிலுப்பு விழுந்தது போல் சோக்காய் தான் வாச்சுப்போச்சு இலங்கை தேர்தல் திருவிழாவாச்சு சுத்தி அடிச்சு கதை பேசி சும்மா எல்லாம் உசுப்பேத்தி நாளுக்கு ஒரு கதை சொல்லி ஆளுக்கு ஒரு அரசியல் ஆய்வாளர் போல காலை ஒரு காணொளி மாலை ஒரு காணொளியாய் கனக்கவெல்லோ வருகுதிப்போ புலத்திலும் தான் நிலத்திலும் தான் சிங்கம் தனியா சிங்குலா வருகுது கோட்டைக்கு என்று வட்டுகோட்டைக்கு வழி கேட்டால் கொட்டை பாக்குக்கு விலை சொல்லி அரசியல் வகுப்பு எடுக்கினம் யாருக்கும் ஒன்றும் தெரியாது போலவே கனக்க எல்லாம் புழுகியடிச்சு பணத்தை மட்டும் பார்கிறார்கள் சொந்த இனத்தை எண்ணி கவலை இல்லை இவர்களோடு கூட நின்று மேடை போட்டு முழங்கியது போலவே அருச்சுனன் பீமன் சகாதேவன் நகுலன் என்று நல்லாத் தான் நடிக்கிறார்கள் அந்தப் பாராளுமன்ற கதிரைக்காக ஆளுக்கு ஒரு சின்னத்தோட வீட்டுக்கு ஒரு வேட்பாளர் போல சிலர் சமத்துவமே வந்தது போல் தமிழர் பிரச்சினையே தீர்ந்தது போல் கனக்க வந்து காணொளியில் புழுகிறார்கள் நினைக்கவே கவலையாய் இருக்கு சமூக ஊடகங்கள் பொறுப்பாய் இல்லை ஏதோ ஒரு அலை எல்லோரையும் மயக்கத்தில தள்ளுது தமிழ் யூடியூப் தம்பிமாரே எல்லோரையும் சொல்லவில்லை நல்லோரும் உண்டு லைக்கை மட்டும் பார்க்காமல் கைக்கு வரும் காசை மட்டும் நினைக்காமல் குழம்பிய குட்டையில் மீன் பிடிக்காமல் பொறுப்பாய் கொஞ்சம் பேசுங்கள் அறிவாய் எதையும் அணுகுங்கள். பா.உதயன்✍️

உண்மையான சமத்துவம் எது- பா.உதயன் ரோமானியா ஒரே இரவில் கட்டப்படவில்லை Rome was not built in a day, அதே போல் மாற்றம் என்பது ஒரே இரவில் செய்யப்பட முடியாதது. இவை பழையன கழிந்து கடந்து போக பல ஆண்டுகளாகலாம் அத்தோடு மிகவும் சவால் நிறைந்தது. பெரும்பான்மை சமூகம் எதிர் கொள்ளும் பிரச்சினைகளின் இருந்து ஏனைய தேசிய இனப் பிரசினையை எப்படி கையாளப் போகிறது புதிய அரசு என்பதனை இணைக்கும் புள்ளியில் தான் இதன் மாற்றத்திற்கான வெற்றி உள்ளது என்ற யதார்த்த உண்மையை முதலில் உணர வேண்டும். இந்த சவால்களை எதிர் கொள்ள அரசு மாத்திரம் பலமாக இருந்தால் மட்டும் போதாது எதிர் கட்சி ஒன்றும் பலமாக இருக்க வேண்டும். இதுவே ஜனநாயகத்துக்குமான பண்புமாகும். ஈழத் தமிழர் பிரச்சினையை நாம் சரியாக கையாளுவதற்கு எமக்கும் பலம் வாய்ந்த ஒரு தமிழர் கூட்டுத் தெரிவும் மிக அவசியமானதாகும். எவ்வளவு தான் எம் தமிழர்களிடையே பிரிவுகள் இருந்தாலும் எதிர் காலம் எப்படியோ நல்லதாக அமையும் என்ற நம்பிக்கையோடு தமிழர்கள் தேசிய ஒருமைப்பாட்டோடு கூடிய தமிழ் கட்சிகளுக்கு தான் வாக்களிக்க வேண்டும். சிங்களக் கட்சிகளுக்கோ அல்லது அவர்களோடு சேர்ந்து போட்டி போடும் கட்சிகளுக்கோ வாக்களிக்கலாமா என்று நீங்கள் சிந்தித்துப் பார்க்க வேண்டும். தமிழர் வாக்குகளை பிரித்து உங்கள் பலத்தை சிதறடிக்காமல் எதிர்கால உங்கள் இருப்பு நலனை வேண்டி சரியாக சிந்தித்து வாக்களியுங்கள். அனுபவமும் ஆற்றலும் இராஜதந்திரமும் மொழி அறிவும் முக்கியம் என்பதையும் நாம் உணர வேண்டும். நாலு சுவருக்குள் நாம் பேசிக் கொண்டிருக்காமல் வெளி உலகத்துக்கும் நாம் பேசுவது தெரிய வேண்டும். தமிழர் பலமான கூட்டோடு ஒரு அணியை படித்த இளம் சமுதாயத்திடம் இருந்தும் அனுபவம் ஆற்றல் தலைமைப் பண்பு கொண்டவர்களில் இருந்தும் எதிர் காலத்தில் கட்டும் வரையிலாவது எவ்வளவு பிரச்சினை இருப்பினும் இன்று நாம் வீடு, சங்கு, சயிக்கிள், ஜனநாயக போராளிகள் எதுகும் வேண்டாம் என்றால் வேறு என்ன தெரிவு எமக்கு, பின் யாருக்கு வாக்குப் போட்டு பாராளுமன்றம் அனுப்பி வைக்கப் போகிறோம். புதிதாக அடிக்கும் அலைகளோடு நாமும் சேர்ந்து போனால் நமது நலன்களும் எங்கள் தியாகங்களும் அர்பணிப்புக்களும் பாதுகாக்காப்படுமா என்று நாம் சிந்திக்க வேண்டும். எத்தனை உயிர்களை எத்தனை தியாகங்கள் எத்தனை இரத்தங்களை இந்த மண்ணோடு மண்ணாய் விதைத்திருக்கிறோம் என்பதை நீங்கள் சிந்தித்து பார்க்க வேண்டும். எமது விடுதலைக்காய் நாம் கொடுத்த விலை அதிகம் என்பதை சிந்தியுங்கள். உங்கள் நேசத்திற்கும் பாசதிற்கும் உரிய பிள்ளைகள் இந்த மண்ணில் தான் புதைந்து கிடக்கிறார்கள். உயிர்களையே தந்து சென்றார்கள் உங்கள் உன்னதமான விடுதலைக்கே. ஒடுக்கப்பட்ட அடக்கப்பட்ட பல தேசிய இனங்கள் தம் அடையாளம் தொலையாமல் இருந்து போரடியதனால் தான் இன்று விடுதலை அடைந்த வரலாற்றை உலகம் கற்றுத் தந்திருக்கிறது. தமிழர் பிரச்சினைக்கான நியாயமான தீர்வை முன் வைத்தால் எந்தப் பெரும்பான்மை சிங்களக் கட்சிகளுடனும் அனைவரினதும் அரசியல் பொருளாதார நலன் கருதி நாம் இணைந்த அரசியல் செய்ய முடியும் அது வரை நாம் நாமாகவே பலமாக இருந்து நமக்காக போராட வேண்டும். நாங்களும் நீங்களும் ஒன்று எனக் கூறுவது சரியான சமத்துவம் ஆகாது இந்தக் கூற்றானது எங்களோடு அதாவது பெரும் பான்மை இனத்தோடு சேர்ந்து வாருங்கள் என்று கூறிக் கொள்வதன் மூலம் இத்தனை காலமும் எந்த உரிமை கேட்டு தமிழர்கள் போராடினார்களோ அவற்றை எல்லாம் அடியோடு நிராகரிற்பதற்கு சமமாகும் இதை தமிழர் தேசம் சரியாக புரிந்து கொள்ள வேண்டும். எமது அடையாளம், எமது மொழி, எமது பாரம்பரிய பிரதேசம், அத்தோடு நாம் ஒரு தனித்துவமான தேசிய இனம் என்பதையும் நாம் நாங்களாக இருக்க வேண்டும் எங்கள் இருப்பை பாதுகாக்க வேண்டும் என்று மறந்து விடாமல் இவை அழிந்து விடாமல் ஒரே சக்தியாக பயணியுங்கள். பெளத்தர்களின் அடையாளம் ஆக்கப்பட்டு இந்த நாடு பெளத்தர்களுக்கு மட்டுமே சொந்தமானது என்றும் ஏனைய இனங்கள் இரண்டாம் தர பிரஜைகள் போல் ஒரே நாடு ஒரே தேசம் ஒரு நாடு ஒரு சட்டம் என்று இன்னும் ஒரு இனத்தின் உரிமையும் விடுதலையும் மறுக்கப்பட்டு அவர்கள் விருப்புகள் ஏற்றுக் கொள்ளாமையினால் தான் இத்தனை மானிடப் பேரழிவுகளை இலங்கை சந்தித்தது. மாற்றம் என்பது ஏழைகளுக்கு உணவு கொடுப்பதில் இருந்தும் விழுந்து கிடப்பவனை தூக்கி விடுவதில் இருந்து ஆரம்பிப்பதே மானிடம் இதுவே சமத்தும் இதுவே மாற்றம். மாக்ஸ் சொன்ன மகத்தான தத்துவம் இதுதான். நாம் மாற்றத்தை நாடினால், அரசியல் விவகாரங்களை பற்றி மதத் தலைவர்களுடன் எப்போதும் சந்தித்து பேசுவது போன்ற நிகழ்வுகளும் நிறுத்தப்பட வேண்டும். மதத்தை தனிப்பட்ட வாழ்க்கையாக வாழ அனுமதித்து, தனி மனித உரிமையாக அரசியலில் இருந்து விடுதலையாகி இருக்க வேண்டும். அதே போல் பெரும் துன்பமும் துயரமும் நிறைந்து சிறுபான்மை மக்களின் தீர்வுகளையும் வெளிப்படையாக பேச வேண்டும். லெனினின் தன்னாட்சி கொள்கையில் கூறும் ஜனநாயகம் என்பது எந்த மக்களும் தங்கள் எதிர்காலத்தை பெரும்பாலான வாக்குகளின் மூலம் தீர்மானிக்க முடியும் என்ற கருத்து நிலைத்துவிட்டது. லெனினின் தன்னாட்சி குறித்த சிந்தனைகள் மார்க்சியம்தான், மேலும் இவை போல்ஷெவிக் சிந்தனையாகவும் விளங்கின. ஒரு தேசிய சிறுபான்மை இனத்தின் சுய நிர்ணய விடுதலையை முழுமையயாக அங்கீகரிக்காத வரை அவர்கள் ஒரு தனித்துவமான தேசிய இனம் என்று அங்கீகரிக்காத வரை எவன் பேசும் சமத்துவமும் சமத்துவம் இல்லை இதில் சமூக நீதியும் இல்லை என்பதை உண்மையான சோஷலிசவாதிகளுக்கு மட்டுமே இது தெரிந்திருக்கும். இதை விடுத்து சிவப்பாக தெரிவது எல்லாம் சோசலிசம் என்றும் கொம்யூனிசம் என்றும் யானை பார்த்த குருடர்கள் போல இருக்கக் கூடாது. பா.உதயன்✍️

நிற்பது பெரிதல்ல நின்ற இடத்தில் நிற்க வேண்டும் -பா.உதயன் பல படைகளை உருவாக்கி ஒரு காலம் சிங்கள அரசையும் அதன் படைகளையும் நிலை குலைத்து போராடி தமிழர் அடையாளத்தை உலகுக்கு சொல்லி யாருக்காகவும் தன் கொள்கையை விட்டுக்கொடுக்காது ,எவனுக்கும் தலை வணங்காமல் பல அரசியல் கட்சிகளை இணைத்து தமிழ் தேசியக் கூட்டமைப்பு ( TNA ) என்ற அரசியல் பலத்தை உருவாக்கி எல்லோரையும் நிற்பது பெரிதல்ல நின்ற இடத்தில் நிற்க வேண்டும். “Not only must you stand, but you must also stay.” என்று வட கிழக்கு உட்பட நாம் தமிழர் என்ற ஒரே குடையின் கீழ் கொண்டு வந்து போராடி மடிந்த தலைவர் பிரபாகரனுக்கு இருந்த வீரம், நெஞ்சுரம், திறமை, பொறுப்பு, சுய நலன் இல்லாத பார்வை இதில் ஏதாவது இன்று தேர்தலில் நிற்கும் தமிழ் தலைவர்களிடம் அல்லது பல பிரிவுகளாக தமிழர் தமக்குள்ளேயே போட்டியிடுபவர்களிடம் இருக்கின்றதா என்று எல்லோரும் ஒரு கணம் எண்ணிப் பாருங்கள் ? இருந்த அனைத்தையும் அழித்ததை தவிர. ஒரு சிலரை தவிர இன்று இருப்பவர்கள் எல்லாம் பதவிக்காகவும் சுய நலனுக்காகவும் இருப்பவர்கள் இது எம் நிலத்துக்கு மட்டும் இன்றி புலத்துக்கும் பொருந்தும். இன்று சுமந்திரனும், சாணக்கியனும், தவராசாவும், கஜேந்திரனும், விக்கினேஸ்வரனும் ஏனைய அனைத்து தேசியக் கட்சிகளும் இணைந்து வேற்றுமையிலும் ஒற்றுமை என்பதற்கு இணங்க” “Unity in diversity.” தேர்தலில் ஒரே அணியில் நின்றிருந்தால் எமது பலத்தை ஏனும் நிரூபித்து இருக்கலாம். சிங்கள தேசம் ஒற்றுமையாக நின்று வாக்களித்து பெரும் ஊழல் வாதிகளையும் இனவாதிகளையும் இவர்களுடன் சேர்ந்து நின்ற டமிழ் ஊழல் வாதிகளையும் இருந்த இடம் தெரியாமல் கலைத்து இருக்கிறது. இந்த சந்தர்ப்பத்தை பயன் படுத்தி நாமமும் ஒரு திரள்சியாய் எமது பிரச்சினைகளையும் தீர்பதற்கான வழி முறைகளை கையாண்டிருக்கக் கூடிய சந்தர்ப்பமும் ஏற்பட அழுத்தம் கொடுத்திருக்கலாம் சிங்களத்துக்கு ஒரு செய்தியை சொல்லி இருக்கலாம். அதை விடுத்து இன்று தமிழர் தலைமை என்ற அங்கீகாரத்தையும் தொலைத்து எல்லோரும் சிரிக்கும் அளவுக்கு வந்து நிற்கிறது எமது பலம். எத்தனையோ மாவீரர்களின் உயிர்த் தியாகங்கள் இந்த மக்கள் பட்ட வலிகள் சொந்த மண்ணை விட்டு அகதியாக தமிழன் அலைந்தும் எல்லாமே மறந்து இன்று நீங்கள் எல்லோரும் நாளுக்கு நாள் பிரிந்து நின்று வட கிழக்கு தமிழர் பிரதேசத்தில் இருந்து பெரும் வாக்கு வங்கியை சிங்களத்துக்கு உருவாக்கி தமிழரை பிரித்து விட்டிருக்கிறீர்கள். இதன் எல்லாப் பொறுப்பும் நீங்கள் தான் என்பதை உணருங்கள். ஈழத் தமிழரிடம் இன்று இருக்கும் பெரும் குறையானது ஒற்றுமையீனம் தான் இதனால் நாமே நம் தலையில் மண்ணை போட்டுக் கொண்டு வாழ்கிறோம். எது எப்படி இருப்பினும் தமிழ் மக்கள் தம் எதிர்கால இருப்புக்கு சரியான பாதையை தெரிவார்கள் என நம்புவோம். உங்களிடம் இருக்கும் ஒரே அரசியல் கூட்டுப் பலத்தையும் இழந்தீர்களேயானல் உங்கள் எதிர் காலம் பெரும் இருள் சூழ்ந்ததாகவே அமையலாம். இதுவும் போனால் உங்களுக்கு எதுகும் இல்லை என்று நினையுங்கள். வெறும் ஊமை மக்களாகவே உலகம் உங்களைப் பார்க்கும். இருந்தும் நம்பிக்கையோடு இருப்போம் நாளை என்றோ ஒரு நாள் உலக ஒழுங்கு மாற்றத்திற்கு ஏற்ப எமக்கும் ஒரு மாற்றம் வரும் என்றே ஒற்றுமையை அரசியல் பலத்தை தொலைக்காமல் எதிர்காலத்திலாவது வாழப் பாருங்கள். பா.உதயன் ✍️

நாங்களும் விதைக்கப் பட்டவர்களே-பா.உதயன் They tried to bury us. They didn’t know we were seeds.” அவர்கள் எங்களை புதைக்க நினைத்தார்கள் ஆனால் நாங்கள் விதைகள் என்று அவர்களுக்குத் தெரியாது. இலங்கையின் புதிய ஜனாதிபதியாக தெரிவு செய்யப்பட்ட அனுர குமாரா திசநாயக்கா சொன்ன முதல் வாக்கியம் இது. எந்த இனமாக இருந்தாலும் அந்த இனத்தின் விடுதலைக்காக போராடும் விடுதலைப் போராளிகளை ஆட்சியாளர்களும் அடக்குமுறையாளரும் கொன்று புதைக்கலாம் என்று தான் நினைகிறார்கள் ஆனால் அவர்கள் புதைக்க நினைப்பதெல்லாம் விதை என்பதை மறந்து விடுகிறார்கள். ஒரு காலம் பயங்கரவாதிகள் என்று சொல்லப்படுபவர்கள் எல்லாம் இன்னொரு காலம் விடுதலைப் போராளிகளே. உங்களைப் போலவே ஒரு காலம் மாற்றம் வேண்டியும், சம நீதி வேண்டியும், எமக்கான சுதந்திரம் வேண்டியும், போராடிய புரட்சிகர தமிழ் போராளிகளையும் புதைத்தார்கள் நீங்கள் சொல்லுவது போலவே இந்த இளைஞர்களும் புதைக்கப்படவில்லை அவர்கள் கூட விதைக்கப் பட்டிருக்கிறார்கள். ஒரு மனிதனின் வாழ்வில் உணவு, உடை, உறைவிடம் என்பது அத்தியாவசிய தேவை. இது கிடைக்காத போது பசி, பட்டினி, துன்பம் என்று ஒரு மனிதனுக்கு வந்தால் அந்த ஆட்சியாளரை எதிர்த்து அந்த மக்கள் போராடுவார்கள். இதை தீர்த்து வைக்கும் ஒருவன் வந்தால் அவனுக்கு பின்னால் தான் எவனும் ஓடுவார்கள் இவர்களுடன் மதம், சாதி, இனவாதம் எதுகுமே கூட வராது. ஆனால் எப்பொழுது அவன் அந்த மக்களின் தேவைகளை நிறைவேற்றாமல் விடுகிறானோ அப்பொழுதே அவனுக்கு எதிராக மக்கள் திரும்பமும் போராட வேண்டிய நிலைமை உருவாகிறது. அது திரும்பவும் ஒரு ஆட்சி மாற்றத்திற்கு ஆயுதமாக பாவிக்கப்படும் என்பதை மறுக்க முடியாது. இலங்கை மக்கள் கோபமும் வெறுப்புமாக பழைய ஆட்சியாளர்களை நிராகரித்து அந்த மக்கள் மாற்றங்களோடு கூடிய புதிய பாதையை தெரிந்துள்ளார்கள் இது அறகலயா என்ற போராட்டத்தின் தொடர்ச்சியே என்று கூட நினைக்கலாம். ஆகவே எல்லா மக்களுடைய எதிர்பார்ப்பையும் பெரும்பான்மையாக இருந்தால் என்ன சிறுபான்மை இனத்தவர்களாக இருந்தால் என்ன அவர்களின் அவிலாசைகளை முடிந்த வரை நிறைவேற்ற வேண்டும். தமிழ் மக்களின் உரிமைகளுக்கு தடையாக ஒரு காலம் இருந்தது போலன்றி மாற்றங்களோடு கூடிய உண்மையான இதய சுத்தியுடன் இந்த எதிர்பார்ப்புகளை பூர்த்தி செய்ய வேண்டும். இதுவே சமூக நீதி கொண்ட ஒரு சமுதாயத்தை உருவாக்க உதவும். அறகலயா போராட்டமானது பெரும்பான்மை சிங்கள மக்கள் மனதில் ஒரு மாற்றத்தை ஏற்படுத்தி இருந்தால் இவர்கள் இனி இனவாதத்தை நிராகரித்து இலங்கையை பொருளாதார ரீதியாகவும் அரசியல் ரீதியாகவும் பலப்படுத்த வேண்டுமானால் இந்த நாட்டில் புரை ஓடிபோய் இருக்கும் தமிழர் பிரச்சினைக்கு நிரந்தர தீர்வு வேண்டும் என்பதையும் ஏற்றுக் கொள்ள வேண்டும். மலையக மக்களின் சமத்துவ வாழ்வுக்கும் ஏனைய எல்லா இனங்களின்அவிலாசைகளையும் பூர்த்தி செய்ய வேண்டும் இதுவே உண்மையான மாற்றமாகவும் சமூக நீதியுடன் கொண்ட ஒரு தேசமாகவும் மாற உதவும். இவைகளை வைத்தே எதிர்காலத்தில் இவர்கள் உண்மையாகவே மாற்றம் செய்ய வந்தவர்கள் என்பதை மக்கள் உணர முடியும். இலங்கையில் சுதந்திரத்திற்கு பிறகு பாரம்பரிய உயர்குடியிலிருந்தும் பல சகாப்தமாக தொடரும் குடும்ப ஆட்சியிலும் இருந்தும் வெளியே ஒரு அதிபரை மக்கள் தேர்வு செய்திருப்பது இதுவே முதல் முறை. மாற்றம் ஒன்றே மாறாதது பல சகாப்தகால குடும்ப அரசியலில் இருந்து இலங்கையை விடுவித்து ஒரு புதிய பாதையை திறந்து விட்டிருக்கிறீர்கள். மாற்றங்கள் அனைத்தையும் அவ்வளவு இலகுவில் மாற்ற முடியாது. சவால்களை தாண்டி தமிழ் மக்கள் தங்கள் சுய நிர்ணய உரிமையோடு பாதுகாப்பாக வாழக்கூடிய பாதையை திறந்து சமத்துவ தேசம் ஒன்றை கட்டி எழுப்புவீர்கள் என்ற எதிர்பார்ப்புகளுடன் மக்கள் காத்திருக்கிறார்கள். பா.உதயன் ✍️

அன்று ஒரு நாள் அந்த ஈழத்தின் தந்தை செல்வா சொன்னார் ஆண்டவன் தான் தமிழனை காப்பாற்ற வேண்டும் என்று. ஆண்டன் கூட கை விட்டு அனைத்தும் இழந்த தமிழனாய் குந்தி இருக்கக் கூட ஒரு முழ நிலம் கூட இல்லாமல் அடிமை ஆகிப் போன வரலாறாய் தொடர்கிறது துன்பம் இன்று வரை. எப்பொழுது ஒரு சிறுபான்மை தேசிய இனம் தனது போராட்டத்தின் சம பலத்தை இழக்கிறதோ (Balance of power) அன்றில் இருந்தே அதன் பேரம் பேசும் பலத்தையும் (Bargaining power) இழந்து பெரும்பான்மை இனத்தின் ஆக்கிரமிப்போடு அடிமையாகி விடுகிறது. அதன் பூர்வீக பிரதேசங்கள் யாவும் அரச ஒடுக்கு முறைக்கி உள்ளாகி அந்த மக்கள் அடிமைகளாக இரண்டாம் தர பிரஜைகளாக ஒடுக்கப்படுவர். ஈழ தமிழர்களின் போராட்டம் முள்ளிவாய்க்காலின் பின் இப்படிதான் ஆக்கப்பட்டிருக்கிறது. வெற்றி கொள்பவன் எல்லாவற்றையும் தனதாக்கி கொள்கிறான். Winner takes it all. தொலைந்தவனை தேடும் தாயின் கண்ணீர் நிலம் முழுக்க நனைகிறது. யுத்தம் முடிந்து பல வருடம் ஆகிறது பதின் மூன்றுக்கு மேல் (13th plass amendment) தருவோம் என்றார்கள் அதில் பாதி கூடி தரவில்லை. இன்று வரையில் எந்த அதிகாரப் பகிர்வையும் ( Devolution of power) செய்ய முயலவில்லை .அரசியல் கைதியாக அவர்கள் படும் துன்பம் வேறு. தாய் வேறு பிள்ளை வேறாய் தமிழன் துயர் தொடர்கின்றது. தானாகவே வந்து சிங்களம் தமிழனுக்கு தருவதற்கு என்ற ஒன்றும் இல்லை. அன்று ஒரு நாள் அந்த கிழவன் கேட்ட சமஸ்டியை (Federal state ) கொடுத்து இருந்தால் இத்தனை அழிவு இலங்கையில் இருந்திருக்குமா, அன்று தொடக்கம் அரசியல் தலைவர்கள் விதைத்த இனவாதம், மதவாதம், இன்று எல்லா இன மக்களையும் பிரித்து இருக்கிறது. இது ஒரு புறம் இருக்க அமைதியையும், சமாதானத்தையும் , அன்பையும் , போதித்த புத்த பகவானின் சிந்தனையில் இருந்து விலகி இன்று இலங்கையின் பௌத்த தேரர்கள் முழுமையான இனவாதத்தை பேசி இலங்கையின் அமைதிக்கும் சமாதானத்துக்கும் பங்கம் விளைவிப்பதோடு மட்டும் அன்றி சகல இனங்களுக்கு இடையிலான பிளவை ஏற்படுத்தி மேலும் இனங்களுக்கு இடையிலான மோதலை வன்முறையை வளர்த்து வருகின்றனர். இலங்கையின் சிங்கள அரசியல் தலைவர்கள் உண்மையான பெளத்தர்களாக இருந்து இருந்தால் நாம் துப்பாக்கி ஏந்தி இருக்க மாட்டோம். if jayawardana was real buddhist we would not be carrying a gun. என்று விடுதலைப் புலிகளின் தலைவர் பிரபாகரன் (India today) இந்தியா ருடே என்ற இதழுக்கு பேட்டி கொடுக்கும் போது கூறியது இன்று எவ்வளவு பொருத்தமாக உள்ளது என்று தெரிகிறது. இலங்கை சுதந்திரம் அடைந்த காலத்தில் இருந்து குடும்ப ஆட்சியில் இருந்த கட்சிகளும் அதன் தலைவர்களும் இன்று வரை எமக்கு தந்த துன்பம் எழுத்தில் அடங்காது. தமது மண்ணை விட்டு ஓடினார்கள் அகதியானார்கள. கல்வியே வாழ்வு என்று இருந்த தமிழன் வாழ்வை தீ இட்டு எரித்தது இன்னும் ஒரு இனவாத அரச பயங்கரவாதம். தமிழனின் வாழ்வும் வளமும் அடையாளமும் அழித்து ஒழித்த வரலாறு அந்த மண்ணுக்குள் சிவப்பாக சிதறிக் கிடக்கிறது. வட கிழக்கு தமிழர் தாயகத்தை பிரித்து அங்கெல்லாம் புத்தர் சிலையை கொண்டு வந்தார்கள். எழுதுவதும் ஏமாற்றுவதும் கிழிப்பதுமாய் எத்தனை ஒப்பந்தங்கள். அரசியல் தீர்வு ரீதியாக நாங்கள் ஏமாற்றபட்ட (Political duplicity) வரலாறுகளே அதிகம் . இதே போல் இன்று வரை பல சகாப்தமாக மலையக தமிழர் இன்று வரை தொடரும் துன்பம் இன்னும் ஒரு கறை படித்த அத்தியாயம். எல்லா குடும்ப ஆட்சியாளரின் கையில் ஈழ தமிழனின் இரத்த கறைகள் பதிந்துள்ளன. இப்படி இருக்கையில் ஜனாதிபதி தெரிவு நடக்கவிருக்கிறது எவரை தெரிவு செய்வது என்ற பெரும் குழப்பம் தமிழர்களிடையே நிலவுகின்றது. எந்த ஜனாதிபதி வேட்ப்பாளர்களிடமும் அவர்களின் தேர்தல் விஞ்ஞாபனத்தில் தமிழர் தீர்வுக்கான முழுமையான எந்த அரசியல் தீர்வும் முன்வைக்கப்படவில்லை. வேறு எந்த தெரிவும் இல்லாத தமிழ் மக்கள் முள்ளி வாய்க்காலின் பின் தம் பலத்தை இழந்து நிற்கும் தமிழ் மக்கள் என்ன தெரிவை மேற்கொள்ள போகின்றார்கள் என்று பொறுத்து இருந்து தான் பார்க்க வேண்டும். கடந்த காலங்களில் விட்டு சில பிழைகளையும் படிப்பினையாக கொண்டு என்ன முடிவை எடுப்பதென்பது அந்த மக்களின் நீண்ட கால அரசியல் விடுதலைக்கு வித்து இடுவதாக அமைய வேண்டும். யுத்தம் முடிந்து பல ஆண்டுகள் ஆகியும் அழிக்கப்பட்ட தமிழர் பிரதேசதில் அபிவிருத்தி எதுகும் இல்லை. அரசியலும் அபிவிருத்தியும் ஒரு நாணயத்தின் இரு பக்கங்கள் போலவே. அரசியல் தீர்வு ஒன்று அடிப்படையாக அமையும் இடத்து அவிவிருத்தி பாதைக்கு இது வழி சமைக்கிறது. இன்றும் கூட சர்வதேச நாடுகளினால் ஒரு பாரிய அவிவிரித்தி பணி செய்ய முடியாமைக்கு அங்கு ஓர் அடிப்படை அரசியல் தீர்வு ஒன்று இல்லாமல் இருப்பது தான். அரசியல் ஸ்திரத்தன்மை( Political stability) இல்லாமல் செய்யும் எந்த அபிவிரித்தியும் உதவிகளும் அந்த மக்களுக்கு போய் சேர முடியாது மாறாகவே ஊழ அரசியல் வாதிகளின் கைகளுக்குகே போய் சேருகின்றன. ஒரு காலம் ஒற்றுமையோடு இருந்த ஈழத் தமிழர் இனம் இன்று ஒற்றுமை இன்றி சிதைந்து கிடக்கிறது. ஒரு பொது தெளிவான இலக்கின் அடிப்படையிலேனும் இவர்களால் ஒன்று பட முடியவில்லை. ஜனநாயக சூழலுக்கு ஏற்ப பல கட்சி அமைப்பு இருந்த போதிலும் ஒடுக்கப்பட்ட ஒரு இனத்தின் சார்பில் ஒற்றுமையாக குரல் கொடுக்க முடியாதவர்களாகிப் போனார்கள். இன்று 70 வருடங்களுக்கு மேல் தீர்வு தருவார்கள் என மாறி மாறி சிங்கள அரசை நம்பி பேச்சுவார்த்தைள் நடத்தியும் இவர்களுக்கு ஆதரவு வழங்கியும் இதுவரை எதுவுமே தராத எந்த சிங்கள தலைமைகளையும் இனி நம்பி பிரியோசனம் இல்லை என்று தெரிந்து இன்று தமிழர் தரப்பில் இருந்து ஒரு பொது வேட்பாளரை நிறுத்தி இருக்கிறார்கள். எது எப்படி இருப்பினும் தமது எதிர்காலம் கருதி தமிழ் மக்கள் நிதானமாக அறிவு பூர்பமாக சிந்திப்பார்கள் என நம்புவோம். பா.உதயன் ✍️

தமன்னாவும் எங்கள் தம்பிமாரும் பொருளாதார அபிவிருத்தியும் -பா.உதயன் ஒரு சமூகத்தில் எல்லா விதமான மக்களும் இருப்பார்கள். எது பிழை எது சரி என்று அறிந்து கொள்வதில் தான் சமூகங்களிடையே குழப்பங்களும் பிரச்சினைகளும் உருவாகுகின்றன. கலாச்சாரம் எல்லாம் இப்போ மெல்ல மெல்ல காணாமல் யாழ்ப்பாணத்தில் இருக்க கல்வி தாறன் என்று சொல்லி தமன்னாவை கூட்டி வந்து காட்டினா தம்பிமார் சும்மாவா இருப்பாங்கள் மானாட மயிலாட இவங்கள் சேர்ந்தாடி கூத்தாடாமலா விடுவார்களா. பொருளாதார அபிவிருத்தி என்று வந்தால் தனியவே உங்கள் பொக்கற்றை மட்டும் நிரப்புவது இல்லை. இந்த மக்களுக்கும் இதன் பலன் போய் சேர வேண்டும். சரியான திட்டமிடல் இல்லாமல் மக்களை குழப்பக் கூடாது. ஒரு தொழில் அதிபருக்கு சரியான திட்டமிடல் Leadership and planning என்பது தெரிந்து தான் இருக்கவேண்டும் இல்லாவிடில் ஆலோசனைகளை அந்த மக்களிடமோ சிவில் அமைப்புகளிடனோ கூடி கதைத்திருக்க வேண்டும். A vision without a strategy remains an illusion. சரியான திட்டமிடலும் மூலோபாயத் திட்டமும் ஒரு நிறுவனத்தின் வெற்றிக்கான பாதையாகும். வன்னியிலும் மலையகத்திலும் மனிதர் படும் துன்பம் கண்டும் ஒருவேளை உணவுக்காய் பல சனம் படும் பாடு கண்டும் பள்ளி சென்று படிக்க கூட வழியில்லாமல் பலர் இருக்க யுத்த வடுக்களும் துன்பமும் துயரமும் இன்னும் எம் இனத்தை விட்டு அகலாத போதும் இத்தனை லட்ஷம் பணத்தை இப்படியா தமிழர் கொட்டுவது. நாங்கள் அறிவு சிந்தனை நாகரீகத்தோடு வாழ்ந்த மக்கள் ஆதலால் நாம் இன்று தொலைந்து போன எம் அமைதி வாழ்வையும் சுதந்திரத்தையும் தான் முதலில் தேட வேண்டும். பொருளாதார அவிவிருத்தி மட்டுமே போதும் அரசில் தீர்வும் தேவை இல்லை என்பது தான் இலங்கை அரசின் நிலைப்பாடு. நிரந்தர ஒரு சமாதான தீர்வு இல்லாத எமக்கான பாதுகாப்பு இல்லாத திட்டமிடப்படாத பொருளாதார அபிவிருத்திகள் இப்படியான குழப்பங்கள் பிரச்சினைகளில் தான் முடியும். எது எப்படி இருப்பினும் 2009 க்கு பின் ஈழத் தமிழர் மத்தியிலே பல மாற்றங்கள் நடந்திருப்பது அவதானிக்க முடிகிறது. ஒன்றாக கூடி ஒரே தலைமையின் கீழ் இணைந்திருந்த மக்கள் இன்று அந்தத் தலைமை எதுவும் இல்லாமல் சிதறிப் போய் இருக்கிறார்கள். கல்வி கலை ஒழுக்கம் என்று அமைதியாக வாழ்ந்து வந்த மக்கள் இன்று பெரும் அச்சுறுத்தல்களுக்கும் இன்னல்களுக்கும் உள்ளாக்கப் பட்டிருக்கிறார்கள் அதேபோலவே திட்டமிட்டு கொண்டுவரப்பட்ட கலாச்சார சீரழிவுகளும் போதைப் பொருட்களின் உபயோகமும் என இளைஞர்கள் மத்தியிலே கூடி அங்கு வன்முறைகளாக குழு மோதல்களாக இருந்து வருவதைப் பார்க்கிறீர்கள். ஒரு காலம் கல்வியிலே முன்னேறி இருந்த யாழ்ப்பாணம் இன்று இந்த கலாச்சார சீரழிவுகளினால் மெல்ல சிதைந்து வருவது உண்மைதான். மேய்ப்பவன் இல்லா மந்தைகள் போல சரியான தலைமைகள் இல்லாமல் நாம் எங்கு போவதென்று தெரியாமல் நிற்கிறோம். இருந்த போதிலும் இந்த இளையர்களை குறை கூறி என்ன வருவது. இவர்களை மட்டும் குறை சொல்லி எந்த பயனும் இல்லை சரியான வழிகாட்டல் இன்றி இந்த இளைஞர்கள் பிழையான பாதைகளை தெரிவு செய்கின்றனர். ஒரு நாணயத்தின் இரண்டு பக்கங்கள் போலவே நல்லவை கெட்டவை என்ற பக்கங்கள் இருக்கும். குழப்பங்களும் பிரச்சனைகளும் எல்லா உலக சமூகத்திலும் தான் இருக்கின்றன தனியவே தமிழர் சமூகத்தில் மட்டும் இல்லை. நாகரீகமான சமுதாயமென்று சொல்லிக் கொள்ளும் ஐரோப்பிய சமுதாயத்தில் அரசியல் ரீதியாகவும் கலாச்சார ரீதியாகவும் இங்கும் எத்தனையோ குழப்பங்களை கண்டிருக்கிறோம். ஒரு உதைபந்தாட்ட போட்டிகள் நடைபெறும் பொழுது அங்கு கூடி பல குழப்பங்களை விளைவித்து அடிதடியில் முடிவடைவதை நாம் பலமுறை கண்டிருக்கிறோம். அரசியல் பொருளாதார பிரச்சினைகள் என்று இருக்கும் தேசங்களில் இது இன்னும் பிரச்சினையானதாகவே இருக்கும். நாமும் நம் மூதாதையினர் விட்டுச்சென்ற நாகரிகமான பாதையில் சென்று அறமும் தர்மமும் ஒழுக்கமும் தொலையாமல் எங்கள் ஒற்றுமையோடு கூடிய தேசிய உணர்வும் அடையாளமும் தொலையாமல் இருப்போம். பா.உதயன்✍️

சர்வதேச அரசியலில் பூகோள அரசியல் சார்ந்து அதிகாரம் மிக்க நாடுகள் இராஜதந்திர ரீதியாக தமது சுய நலன் சார்ந்தோ அல்லது அவர்கள் மூலோபாயம் சார்ந்தோ சர்வதேச அரசியலில் பொய் சொல்லி வருவதை பார்க்கிறோம். Selfish lies and strategic lies அரசுகள் கூறும் இப்படியான பொய்கள் அவர்களுக்கு நன்மையாகவும் முடிகின்றன அதே வேளையில் தோல்வியாகவும் முடிகின்றன. அரசுகளுக்கு இடையிலான யுத்தங்களுக்கும் குறிப்பாக சோவியத் யூனியனுக்கும் அமெரிக்காவுக்கும் இடையிலான பனிப் போர் காலத்தில் அமெரிக்காவால் சொல்லப்பட்ட அனைத்து பொய்களும் இறுதியில் அவர்களுக்கு வெற்றியை கொடுத்தது. ஆனால் எல்லா நேரத்திலும் அது வெற்றி அளிக்காததற்கான பல காரணங்களும் உண்டு. அதிகாரம் கொண்ட இந்த அரசுகளின் பொய்கள் குறித்து அரசியல் வெளியுறவு ஆய்வாளர்கள் இப்படியான தமது தர்க்கங்களை முன் வைக்கிறார்கள். ஈராக்கில் இரசாயன ஆயுதங்கள் உள்ளதாகவும் அங்கு ஓர் ஆட்சி கவிழ்ப்புக்காக அமெரிக்காவின் நலன் சார்ந்து பொய்கள் பல சொல்லப்பட்டது. இது இவ்வாறு இருக்க இப்படி எத்தனையோ ஜனநாயக ரீதியாக தெரிவு செய்யப்பட்ட எத்தனையோ நாடுகளை அமெரிக்கா கவிழ்த்திருக்கிறது. இன்று உலகில் நடக்கும் யுத்ததங்களை பார்க்கும் போது இதை அவதானிக்க முடிகிறது. அமெரிக்க சொல்லும் பொய்களை அப்படியே ஏற்றுக் கொண்டு எல்லா உண்மைகளையும் சொல்ல மறுக்கிறார்கள் ஐரோப்பிய தலைவர்கள் இது தான் அவர்கள் ஜனநாயகம். இன்னும் எத்தனை யுத்தங்களை எவ்வளவு காலம் கொண்டு நடத்தப் போகிறார்கள் அமெரிகாவும் ஐரோப்பாவும் இன்னும் எத்தனை விடுதலைப் போராட்டங்களை தம் நலன் சார்ந்து அழிக்கப் போகிறார்கள் இன்னும் எத்தனை மனிதப் படுகொலைக்கு உதவப் போகிறார்கள். பொய் சொல்லுவதில் அமெரிக்காவை அடிக்க யாரும் இல்லை. அந்தப் பொய்களை எல்லாம் மூடி மறைப்பதில் ஐரோப்பாவை வெல்ல யாரும் இல்லை. உண்மைகளை உலகுக்கு சொல்ல மறுக்கிறார்கள் பெரிய அண்ணனும் தம்பிமாரும். சிரியாவில் சொன்னது பொய், ஈராக்கில் சொன்னது பொய், ஆப்கானிஸ்தானில் சொன்னது பொய், கியூபாவில் சொன்னது பொய், லிபியாவில் சொன்னது பொய், ஐ. நா. சபையில் அனைத்து தேசங்களுக்கும் சொல்லுவது பொய், ஏன் ஈழத் தமிழர் போரட்டத்திலும் சொன்னது பொய் இப்படி எத்தனை பொய்கள் அமெரிக்க சொன்ன பொய்கள் அதை ஆமோதித்து ஐரோப்பா சொன்ன பொய்கள் எத்தனை. இன்று இஸ்ரேலுடன் சேர்ந்து பாலஸ்தீனத்தில் பொய் சொல்லிக் கொண்டு பெரும் இனஅழிப்புக்கு துணை போய்க் கொண்டு பல்லாயிரக் கணக்கான குழந்தைகளையும் பெண்களையும் கொன்று குவித்து வருகிறார்கள். மனிதாபிமானத்தை தொலைத்துவிட்டு இன்று உலகம் கண்ணை மூடி பார்த்துக் கொண்டு இருக்கிறது. பல அரபு நாடுகள் உட்பட ஐரோப்பிய நாடுகளும் அமைதியாய் இருக்க இன்று தென்னாபிரிக்கா இஸ்ரேல் பாலஸ்தீனியர்களை இனப்படுகொலை செய்ததாக இஸ்ரேல் குற்றச்சாட்டுகளை எதிர்கொள்கிறது. இனப்படுகொலை வழக்கின் மீதான விசாரணையை சர்வதேச நீதிமன்றில் (ICJ) தென்னாபிரிக்கா வாதாடி வருகிறது. அடுத்தவர்களின் துன்பத்தை மனிதாபிமானம் கொண்டு பார்க்க வேண்டும் முதலில் மனிதாபிமானம் பேசும் மானிடர்களாக வாழ வேண்டும். அன்பும் கருணையும் தான் ஆண்டவன் மொழி என்பதை மானிடம் உணர வேண்டும். மத அடிப்படை வாதிகளினதும் காலனித்துவவாதிகளினதும் ஏகாதிபத்திய வாதிகளினதும் அடிப்படை சிந்தனைகளிலோ அல்லது அவர்கள் நலன் சார் வெளியுறவுக் கொள்கைகளிலோ இன்னும் மாற்றம் ஏற்படாத வரை யுத்தங்கழும் மனித அழிவுகளும் அகதிகள் பிரச்சனைகளும் தொடர்ந்து கொண்டு தான் இருக்கும். இன்று உலகம் பெரும் அச்சுறுத்தக்குக்கு உள்ளாகி இருக்கிறது இன்றைய மோதல்கள் நாளை ஒரு பிராந்தியங்களுக்கு இடையிலான மோதலாக வெடிக்குமா என உலகம் அச்சத்தில் உறைந்துள்ளது. Leaders believe lying is wrong but do it anyway. பா.உதயன் ✍️

யாழ்ப்பாணம் வந்தாராம் ரணிலார் சோக்கான கதை எல்லாம் சொன்னாராம் சேர்ந்து பல பேருடன் நின்று செல்பியும் எடுத்தாராம் நல்லவன் போல நடிப்பார் நாம் நினைப்பது போல அவர் இருக்கார் அது தருவன் இது தருவன் என்றாராம் அவர் அருகோட நின்று தலை ஆட்டிப் பொம்மைகள் தாளங்கள் போட்டாராம் அவர் சொன்னதை செய்வார் என்றும் சொன்னாராம் போன சுதந்திரத்துக்கு முன் ஏதோ தருவன் என்றாராம் இந்த சுதந்திரத்தோட என்னதான் தருவாராம் எல்லாமே மறந்தாராம் எதுகுமே பேசாராம் நம்புங்கள் ரணிலை நல்லது நடக்கும் என்றாராம் சேர்ந்து தாளம் போடும் சில சில்லறை மனிதர் தந்திரக்கார ரணிலார் தான் ஒரு சமாதான காரன் போல் காட்டியும் நடிப்பார் புலம் பெயர் தமிழரை கூப்பிடப் பார்ப்பார் குள்ள நரி போல கள்ளத் தனமாக காரியம் முடிப்பார் அபிவிருத்தி என்றெல்லாம் பேசி அரசியல் தீர்வை மறக்கவும் செய்வார் அறிவோட தமிழ் இனம் இப்போ ஆழமாய் சிந்திக்க வேண்டும் பேரினவாதத்தில் என்றும் இப்போ பெரிதாய் மாற்றங்கள் வராது இந்தியா சொன்ன 13 ம் தீர்வுக்கும் எந்தப் பதிலும் இதுவரை இல்லை இதக் கூட தராத ரணிலார் பின்ன எதக் கூடத் தருவார் வடக்கு கிழக்கு என்று இனி வலம் வருவார் தேர்தல் வருகிறது திரும்பவும் வருவார் தீர்வு வரும் ஆனால் வராது என்றனர் மக்கள். பா.உதயன்✍️

இலங்கையின் ஜனாதிபதி ரணில் இந்த வருட இலங்கையின் சுதந்திர விழாவில் ஈழத் தமிழருக்கு தீர்வு என்று சொன்னார். ஒரு சிறு நகர்வு கூட நகர்ந்ததாய் இல்லை. மக்களினால் தெரிவு செய்யப்பட்ட தமிழ் பிரதிநிதிகள் இருக்கும் போதும், வாய் கிழிய பாராளுமண்றத்தில் தீர்வை தாருங்கள் என்று கத்திய போதும், எதுகும் நடக்காத போதும் எதையுமே அவர்களை காதில் போட்டுக் கொள்ளாத போதும், அவர்களிடம் ஏதும் பேசாத போதும், இன்னுமே தொலைத்து போனவர்களுக்கான ஒரு தீர்வை வழங்காத போதும், புத்த சிலைகளை எல்லாம் போகும் இடம் எல்லாம் தமிழர் பூமியில் புதுசாய் நட்டு வைத்தும் எந்த வித நல்லிணக்க செயல்பாடோ Act of reconciliation இது வரை ஏதும் செய்யாமல், தமிழர் தீர்வில் எத்தனையோ ஆணையகங்களின் சிபாரிசுகளை ஏற்க மறுத்தும், தமிழர் மனங்களை வெல்லாமல் Winning the hearts of tamils minds எந்த நகர்வுமே இல்லாமல், எப்படி தீர்வை கொண்டு வருவார்கள். ஏதாவது தீர்வுக்கு ஒரு பாதையை தன்னும் திறந்தால் தானே எவரும் நம்ம முடியும். அற்ப சொற்ப தீர்வான 13 ம் சரத்துக்கு மேல் சென்று தமிழருக்கு தீர்வு வழங்குவோம் என்று பல முறை கூறியும் இந்து சமுத்திரத்தில் சக்தி வாய்ந்த அண்ணனும் இலங்கை பொருளாதாரம் வங்குரோத்து அடைந்து மூழ்கும் நிலைக்கு போகும் போது கை கொடுத்து தூங்கி விட்ட இந்தியா தமிழருக்கான 13 ம் சரத்து தீர்வை முழுமையாக வழங்குங்கள் என்று ஆயிரம் தடவைக்கு மேல் கூறியும் அதை கூட காதில் வேண்டாத சிங்கள பேரினவாதம் இனி என்ன நல்லிணக்கத்தையோ தீர்வையோ தரப் போறார் ரணில் என்று ஈழத் தமிழர் பேரவை ( Global Tamil forum(GTF) இங்கிலாந்தில் இருந்து வந்து இன ஐக்கியம் பேசுகிறார்கள். பொறுத்து இருந்து பார்ப்போம் புதுசாய் ஏதும் நடக்குதோ என்று. இல்லை இன்னும் இன்னும் தமிழர்கள் நம்பி நம்பி ஏமாற்றப்படுவார்களா என்று. கடந்த கால அனுபவங்கள் இது சாத்தியமாகுமா இலங்கையில் என்பது கேள்விக் குறியே. எல்லா தமிழர் தரப்பும் ஒற்றுமையாக எந்த நேரத்தில் எப்போ என்று நேரமும் காலமும் அறிந்து தான் நாம் காலை வைக்க வேண்டும். யாரும் பேசலாம் முயற்சி செய்யலாம் அது ஜனநாயக பண்பு இருந்த போதிலும் இலங்கையின் இனப்பிரச்சினையில் எல்லா தமிழர் தரப்பும் ஒற்றுமையோடும் பங்கு பற்றக் கூடிய அடிப்படையில் பலத்தோடு பேச வேண்டும். இராஜதந்திரம் என்பது சரியான நேரத்தில் சரியான விஷயங்களை சரியான பலத்தோடு சொல்லுவதும் எந்த நேரத்திலும் தவறான விஷயங்களைச் சொல்வதையோ அல்லது செய்வதையோ தவிர்ப்பதுமாகும். புத்தர் எதுகுமே வேண்டாம் என்று எல்லா ஆசைகளையும் துறந்து ஞானம் பெற்றார். “Desire is the root of suffering.” ஆசையே துன்பத்தின் வேர் என்றார். பெளத்த மத குருமார்கள் இலங்கையில் புத்த தர்மங்களின் சிந்தனைகள் இருந்து முற்றும் வேறு பட்டவர்கள். இவர்கள் எல்லா வகை ஆசை பற்றுக்களோடு வாழ நினைப்பவர்கள். இலங்கையின் வன்முறையான பாதை ஒன்றிற்கு வரலாற்று ரீதியாக துணை நின்றவர்கள். பேரினவாதத்தின் ஒரு அடையாளமாக இருப்பவர்கள் இவர்களுடனான சமரசம் என்பது சாத்தியமா என்பது கேள்விக் குறியே. தமிழர் ஒடுக்கு முறைக்கான போராடடம் ஆரம்பித்த காலத்தில் இருந்து எத்தனை போராட்டங்கள் சாத்வீக வழியில் இருந்து ஆயுதப் போராட்டம் வரையிலும் இன்று வரை சிங்களத்திடம் இருந்து எதுகுமே பெற முடியவில்லை. 13 ம் சரத்து கூட தமிழ் ஈழ விடுதலைப் புலிகளின் ஆயுதப் போராட்தினால் கிடைத்த தீர்வு தான். இது கூட தமிழ் மக்களின் விருப்புக்கு மாறாக அவர்களின் எந்த வித அபிப்பிராயமும் இன்றி இறக்குமதி செய்யப் பட்ட தீர்வாகும். இன்று இலங்கை ஓர் பொருளாதர ரீதியாக அபிவிருத்தி அடைந்து அமைதிப் தேசமாக இருக்க வேண்டுமானால் தமிழருக்கானா தீர்வை உடன் வழங்குவதன் மூலமே சாத்தியம் என்பதை சிங்கள மக்களும் பெளத்த பீட மதகுருமாரும் உணர்ந்து கொள்ள வேண்டும். வெறும் இனவாத பேச்சின் மூலமும் புலம் பெயர் தமிழர்களை எந்த வித ஆதாரமும் இன்றி பிரிவினை வாதிகள் என்பதும் வெறும் வன்முறையும் வெறுக்கத் தக்க பேச்சின் மூலமும் சிங்கள பேரினவாதம் எதையும் சாதிக்கப் போவதில்லை. முழுமையான எதார்த்தத்தை உணர்ந்து இனியும் ஓரு மாற்றத்தினுடாக சிங்களம் பயணிக்குமா என்பது இன்னும் கேள்விக்கு குறியே. விட்ட பிழைகளில் இருந்து பாடம் கற்றுக் கொள்வது போல் Learn from the mistakes சிங்கள தரப்பும் அத்தோடு தமிழர் தரப்பும் உணர்ந்து கொண்டு பயணிக்க வேண்டும். இனியும் சரியான பாதையை தேடவில்லையானால் இன்னும் பல அறகலைய போராட்டங்களை சிங்களம் சந்திக்கும் என்பதில் சந்தேகம் இல்லை. பா.உதயன் ✍️

எது நிஜம் எது நிழல்-பா.உதயன் விடுதலைப் புலிகளின் தலைவரின் மகள் துவாரகாவின் சர்ச்சையில் எது நிஜம் எது நிழல் என்பது என்று படித்தவனும் அறிந்தவனும் ஆளுமையுள்ளவனும் சரியாக பொய் சொல்லத் தெரிவதும் ஒரு வகை இராஜதந்திரம் என்பது தெரிந்து கொண்டு கடந்து போய் விடுவான். சிங்கள இனவாதம் வேண்டுமானால் இதை தூக்கிப் பிடித்து கன கதைகளை சித்தரிக்கலாம். இதைத் பெரிதாக பெருப்பித்து எழுதுவதும் பேசுவதும் சித்தரிப்பதுவும் நகைசுவை செய்வதுவும் அதை சிலர் ஆதரிப்பதையும் எழுதுவதையும் பார்க்க துவராகாவை கொண்டு வந்தவர்களுக்கும் இவர்களுக்கும் வித்தியாசம் இல்லை போல் தெரிகிறது. இவர்களின் பார்வை எல்லாம் புலிகளை வைத்து அரசியல் செய்வதும் அத்தோடு தாங்கள் புத்திஜீவிகள் போல் காட்டிக் கொள்வதும் தங்கள் சுய நலத்தோடு தாங்கள் எல்லாம் தெரிந்தவர் போல் போலியான ஒரு முகத்தை சமூகத்துக்கு காட்டிக் கொள்வதற்காக மட்டும் இன்றி வேறோன்றும் இல்லை. சிலரது எழுத்துக்களையும் பேச்சுக்களையும் பார்க்கும் போது ஒன்றும் தெரிவதில்லை இவர்கள் உயரம் மட்மே தெரிகிறது. எதிரிக‌ளை விட‌ துரோகிகளே ஆபத்தான‌வ‌ர்க‌ள். என்ன தான் வேறுபாடுகள் இருப்பினும் சரி பிழைகள் கடந்து தன் சொந்த இனத்தின் வலியும் துயரமும் தெரியாமல் இருப்பவனிடம் மனிதாபிமானம் இருக்கப் போவதில்லை. இவன் தனக்காக மட்டுமே வாழ நினைப்பவன். எந்த ஒரு தேசத்தவனாக இருந்தாலும் அவன் நோர்வேஜியனாகவோ பிருத்தானியனாகவோ பிரான்ஸ்காரனாகவோ அல்லது இத்தாலியனாகவோ ஏன் ஆபிரிக்க எந்த தேசத்தவனாக இருந்தாலும் தங்கள் இனம் சார்ந்து பெருமையாக தான் பேசிக் கொள்வான். ஆனால் தமிழர்கள் ஆகிய நாங்கள் மட்டும் இது எமது முதலாம் தலைமுறையில் இருந்து இரண்டாம் தலைமுறை வரையும் நம் இனத்தை எதுகுமே தெரியாதவர்கள் போல் குறைத்து பேசிக்கொள்கிறோம். எங்கள் சமுதாயக் கட்டமைப்பிலும் பிழைகள் இல்லமால் இல்ல. மாற்றம் ஒன்று தானே மாறாதது எதுகும் எல்லாம் ஒரு நாள் மாறித் தானே ஆக வேண்டும். அமெரிக்க கறுப்பு இன புத்தியீவியும் அந்த இனத்தின் விடுதலைக்காக குரல் கொடுத்த வருமாகிய Malcolm X ஆணித்தரமான கருத்தை தன் சொந்த இனமான அமெரிக்க கறுப்பு இன மக்களை பார்த்து சொன்னார். Who taught you to hate your own kind? Who taught you to hate the race that you belong to, so much so that you don't want to be around each other ... உங்கள் சொந்த இனத்தை வெறுக்க உங்களுக்கு யார் கற்றுக் கொடுத்தது நீங்கள் ஒருவரையொருவர் சுற்றி இருக்க விரும்பாத அளவுக்கு, நீங்கள் சேர்ந்த இனத்தை வெறுக்க உங்களுக்கு யார் எந்தப் பாடசாலை கற்றுக் கொடுத்தது ... இதே போல் ஈழத் தமிழர்கள் தன் இனத்தை தானே குறைவாகவும் வெறுக்கும் அளவுக்கும் ஒற்றுமை இல்லாமல் வாழும் அளவுக்கும் இவர்களுக்கு யார் எந்தப் பாடசாலையில் கற்றுக் கொடுத்தார்களோ தெரியாது. எல்லா சமூகங்களில் நல்லதுக்கு கெட்டதும் இருக்கும் இது தனியவே தமிழ் இனத்துக்கு மட்டும் இல்லை. தூய்மையான போராட்டம் என்று எதுகும் இல்லை பயங்கரவாதி யார் என்பதையும் விடுதலை போராளிகள் யார் என்பதையும் தமது தேசிய நலனுக்கு ஏற்றதால் போல் இந்த உலகின் பலம் வாய்ந்த ஆதிக்க சக்திகளே தீர்மானிக்கின்றன. Thomas Hobbes என்ற அரசியல் தத்துவாசிரியர் ஆரம்பகால மனித வாழ்வு சுய நலன் மிக்கதும் வன்முறை மற்றும் கொடூரமானது என்றார் அது இப்போதும் தொடருவதை பார்க்கிறோம். இந்த உலக வரலாறு வன்முறையால் தான் கட்டப் பட்டுள்ளது. இந்த வரலாறு இன்னும் தொடர்கிறது காசாவில் ஐயாயிரம் குழந்தைகளுக்கு மேல் இறந்தும் இந்த உலகம் அமைதியாக தான் இருக்கிறது. எது எப்படி இருப்பினும் உங்கள் இனத்தினதும் அதோ போல் அடுத்தவர்களின் வலியிலும் துன்பத்திலும் மனிதாபிமானம் மிக்க மனிதராய் நடந்து கொள்ளுங்கள் மனிதர்களை மதிக்கத் தெரிந்து கொள்ளுங்கள் அன்பு தான் கடவுள் என்பதையும் அறிந்து கொள்ளுங்கள் இது தான் உண்மையான மனிதனின் அறமும் அன்பும் தர்மமும் என்று விளங்கிக் கொள்ளுங்கள். சரியானவைகளை இனம் கண்டு தேடிக் கொள்ளுங்கள் Be at peace and humanity with a pain and suffering of your own and others. பா.உதயன்

சுவே எந்தத் தேனீக்கள் வந்தாலும் இந்தப் பூ என்னை காப்பாற்றும்.நன்றிகள் 🌺

இனப்படுகொலையும் இரட்டைவேடமும்-பா.உதயன் அமெரிக்காவும் அதன் நண்பர்களும் அடுக்கடுக்காய் பொய் சொல்லுவதில் வல்லவர். அன்று ஒரு நாள் இராக்கில் இரசாயன குண்டுகள் இருப்பதாக சொன்னது போல் இப்போ இஸ்ரேல் போடவில்லை குண்டுகள் மருத்துவ மனையில் என்று மறுபடியும் பொய். இப்படி எத்தனை பொய்கள் உலகத்துக்கு தெரியும். அண்ணன் சொல்லி விட்டார் இனி அவர் தம்பிமாரும் தொடருவார்கள். நீதி நியாயம் எதுகும் இல்லா உலகமாகிவிட்டது. அண்மையில் நோர்வீய ஏழு வயதுச் சிறுவன் ஒருவன் தனது பெற்றோருடன் நடை பயணம் போகும் போது காணமல் போய் விட்டான் போலீஸ் மக்கள் உட்பட அனைவரும் தேடினார்கள் நாம் எல்லோருமே அவன் உயிரோடு திரும்பி வரவேண்டும் என்றே மன்றாடினோம் ஆனால் துர்அதிஸ்டமாக அவர் இறந்து விட்டான். இது பெரும் அவலம் நோர்வே கூட அழுதது. ஒரே ஒரு சிறுவனுக்காக நோர்வே மக்கள் அழுதார்கள் இது தான் மனிதம் மனித தர்மம் மனித உயிர்கள் மகத்தானது பெறுமதி மிக்கது. இதே போலவே தான் அன்று முள்ளிவாய்க்கால் போல் இன்று பாலஸ்தீனத்திலும் பல்லாயிரம் குழந்தைகள் படுகொலை செய்யப்படுகின்றனர் ஆனல் இன்று இவை எல்லாம் இவர்கள் பார்வையில் மதிப்பு குறைந்த மனிதர்களாக பார்க்கப் படுகின்றனர். எல்லா உயிர்களுமே பெறுமதியானவை. உலகம் முழுவதும், முடிவில்லாத வெறுப்பும், வன்முறையும், மனித அழிவுகளுமாக உள்ளது. நாடுகள் சமூக சீர்கேட்டில் உள்ளன, பொருளாதார பிரச்சினைகள் யுத்தம் பசி பட்டினி என்பது சமூகங்களை அச்சுறுத்துகின்றன, மக்கள் மனிதாபிமானமற்ற முறையில் நடத்தப்படுகின்றனர், மற்றும் இனங்கள் அழிவுக்கு தள்ளப்படுகின்றன. நம் உலகம் துன்பத்தில் உள்ளது. நாகரீகம் கொண்ட உலகில் எங்கேயோ ஒரு மூலையில் மனிதர் மரணித்தபடி பெரும் அவலத்தோடு இருக்க ஒன்றுமோ தெரியாது போல் லண்டன், ஜெர்மனி, பிரான்ஸ் என்று பல பலம் மிக்க நாடுகள் அமைதியாகவே இருக்கின்றன. ஐ.நாவின் பாதுகாப்பு சபை கூட அமெரிகாவினதும் அதன் நண்பர்களினதும் நிகழ்ச்சி நிரலிலும் அவர் சார் நலனின் ஊடாகவே பயணிக்கிறது. நோபல் சமாதான பரிசு வழங்கும் நோர்வே கூட பார்த்திருக்கிறது இவர்களோடு சேர்ந்தே. ஜனநாயக வாதிகள் மனிதாபிமானிகள் என்று தம்மை கூறிக் கொள்ளும் இவர்களது இரட்டை வேடத்தை காட்டுகிறது. சமாதானம் விரும்பிகள் என்று சொல்வோரும் ஐ,நா வினால் கொண்டு வரப்பட்ட இஸ்ரேல் பலஸ்தீனம் இடையிலான யுத்த நிறுத்தத்தை ஆதரிக்காமல் யுத்தம் தொடருவதை ஆதரித்தனர். இதே நாடுகள் தான் தமது நலனுக்கும் ஆயுத விற்பனைக்கும் ஏற்றபடி யுத்தத்தை ஆதரிப்பதுமாக இருக்குகின்றனர். உலகில் மானுடத்திற்கு எதிரான கொலைகள் புரிபவர்களை விட அதை பார்த்துக் கொண்டு இருப்பவர்களே அவர்களை விட கொடியவர்கள். இது (Genocide and hypocrisy) இனப்படுகொலைகளை ஆதரிப்பதற்கும் இரட்டை வேடம் போடுவதற்கும் சமமாகும் இது பெரும் வெட்கம். it’s shame! ஒவ்வொரு மனிதனும் மனிதாபிமானத்துடன் நடத்தப்பட வேண்டும். Every human being must be treated humanely. பா.உதயன் ✍️ பா.உதயன்

பற்றி எரிகிறது பாலஸ்தீனம்-பா.உதயன் பற்றி எரிகிறது பாலஸ்தீனம் அன்று ஒரு நாள் முகம் எரிந்த முள்ளிவாய்க்கால் போலவே எரிந்துகொண்டிருப்பது பாலஸ்தீனம் மட்டும் இல்லை அமெரிக்காவினதும் ஐரோப்பாவினதும் பொய்ச் சத்தியமும் போலி முகங்களும் வரலாற்றுத் துரோகங்களும் அவர்கள் மனசாட்சியும் கூடவே எரிகிறது ஐ நாவின் அறமும் அதன் தர்மமும் அமைதியாகவே பார்த்திருக்கிறது எரிந்து கிடக்கும் சாம்பலில் இருந்து எப்போதாவது ஒரு பூ பூக்காத என்று ஏங்கித் தவிக்கின்றன பாலஸ்தீன குழந்தைகள். பா.உதயன்✍️

சட்டத்தின் ஆட்சியும் ஜனநாயகமும்-Rule of Law and democracy -பா.உதயன் —————————————————————————————————————— ஆக்குவதும் நானே அழிப்பதுவும் நானே என்பது போல் நானே அரசு “l am the state“ என்றான் 1655 இல் பாரிஸ் பாராளுமன்றத்தில் உரையாற்றிய பிரெஞ்சு மன்னர் பதினான்காம் லூயிஸ். ஒரு கையில் எல்லா அதிகாரத்தையும் வைத்திருந்து சட்டம், நீதி, நிர்வாகத்திற்கு (Executive legislative and judiciary) இடையிலான அதிகாரப் பிரிவும் (Separation of power) சமநிலை சட்ட வரையறையும் ( Checks and balances) இல்லாத விடத்தில் தனி நபர் சுதந்திரமும் இருக்கப் போவதில்லை. இவை அனைத்தும் ஒருவர் கையில் இருந்தால் இது ஓர் சர்வாதிகார ஆட்சியே (Authoritarianism ) ஒரு காலத்தில் அரசனுடைய அதிகாரத்தை குறைப்பதற்காகவும் இதை இல்லாமல் ஆக்குவதற்காகவும் அரசியலமைப்பு முடியாட்சி, பாராளுமன்ற முடியாட்சி அல்லது ஜனநாயக முடியாட்சி பின்பு முழுமையான மக்கள் ஆட்சி என்று அதிகாரங்கள் மாறின. பெரிய பிருத்தானியாவில் ஏற்பட்ட மாற்றங்களும் பிரஞ்சுப் புரட்சியும் இதற்கு நல்ல உதாரணங்களாகும். நீதி, நிர்வாகம், சட்டம் இந்த மூன்று துறைகளுக்கு இடையிலான அதிகாரங்களைப் பிரிப்பதற்கான (Separation of power) நவீன கோட்பாட்டை முதல் முறையான தோற்றுவித்தவர் பிரெஞ்சு தத்துவவியலாளர் மான்டெஸ்கியூ ஆவர். இவரே இந்தத் துறைகளுக்கு இடையிலான அதிகார பிரிவையும் அதிகார சம நிலையையும் இதன் முக்கிய பங்களிப்பையும் விளக்கினார். அரசியல் விஞ்ஞானத்தில் ஆழமான தத்துவார்த்த சிந்தனை கொண்ட மார்க்கிய வல்லி, தோமஸ் ஹோப்ஸ், ஜோன் லொக், ஜான் ஜாக் ரூசோ. வோல்ட்டயர், ஹெகல், கார்ல் மார்க்ஸ் போன்ற அரசியல் வரலாற்றுத் தத்துவவியலாளர் போலவே மான்டெஸ்கியூ( Montesquieu ) என்று அனைவராலும் அறியபட்டவர். முன்னணி சிந்தனையாளர்களில் ஒருவர். இவர் பல புத்தகங்களை எழுதியுள்ளார் இதில் சட்டத்தின் உயிர் (The Spirit of Law ) என்னும் புத்தகம் மிகவும் பிரபல்யமானது. இவர் எழுதிய புத்தகங்கள் இன்றும் பல்கலைக்கழகங்களில் கற்பிக்கப்படுகின்றன. நீதியை மதிக்காவிடில் தனி நபர் பாதுகாப்பும் சுதந்திரமும் கேள்விக்குறியே. எந்த மக்களுக்கும் சமத்துவமான சட்டரீதியான நீதி கிடைகாது போனால் அது ஒரு தோல்வியான அரசு என்றே கூற முடியும் (Failed State). அதே வேளை அந்த மக்களின் நன் மதிப்பையும் எதிர் காலத்தில் இந்த அரசு இழந்துவிடும். குற்றம் செய்யாதவர்களை சிறையில் அடைப்பதும் கொலைக் குற்றம் செய்தவர்களுக்கு மன்னிப்பு வழங்குவதும் அதிகாரத்தை துஸ்பிரயோகம் செய்வதுவும் நீதிக்கும் சட்டத்துக்கும் புறம்பான செயலாகும். நீதிபதிகள் வழங்கிய தீர்ப்புக்கு இது முற்றிலும் மாறுபட்டு அதை மதிக்காத ஒரு செயலாகும். இங்கே நீதி என்பது கேள்விக்குறியே. சட்டத்தின் ஆட்சி (Rule of law) சரியாக இல்லாவிடில் மக்கள் எங்கே போய் முறையிடுவது எனவே சரியான நீதி கிடைக்கும் என்ற எல்லா நம்பிக்கைகளையும் மக்கள் இழந்து விடுவார்கள். ஜனநாயகம் மக்கள் ஆட்சி எல்லாம் மறைந்து அரசனின் ஆட்சியில் இருக்கும் ஒரு ஆதிக்கம் போல் ஆகிவிடும் நாடு. இந்த அடிப்படையில் பார்க்கும் போது இலங்கையில் இந்த மூன்று துறைகளும் சுதந்திரமாக இயங்குவது கேள்விக்குறியாகவே இருக்கிறது. நீதித்துறையில் இருந்து நிர்வாகம் சட்டத்துறை சார்ந்த அனைத்து கட்டமைப்புகழும் துஸ்பிரயோகம் செய்யப்பட்டு வருவதை பார்க்கிறோம். அண்மையில் நீதிபதி ஒருவர் சுயமாக இயங்க முடியாத நிலையில் மரண அச்சுறுத்தலுக்கு உள்ளாகி தனது பதவியை துறந்துள்ளார். ஒரு நாட்டின் நீதித்துறை சுயாதீனமாக இயங்கவில்லையானால் அந்த நாடு ஒரு தோல்வியடைந்த நாடாகும். இது இலங்கையின் நீதித் துறையின் இருப்பையே சவாலுக்கு உட்படுத்தி இருக்கிறது. நீதிபதிக்கு, பாராளுமன்ற உறுப்பினருக்கு பாதுகாப்பு இருக்கவில்லை என்றால் மக்கள் எப்படி பாதுகாப்பாக இருப்பார்கள் அதிலும் முக்கியமாக ஈழத் தமிழரைப் பொறுத்த வரையிலும் மற்றும் இஸ்லாம் மக்கள், மலையக மக்களைப் பொறுத்த வரையிலும் இது பெரும் அச்சுறுத்தலாகும். சட்டமும் நீதியும் ஒழுங்கும் சீர்குலையும் போது மக்கள் அமைதியாக இருப்பார்களேயானால் இந்த நாட்டின் எதிர் காலம் என்னவாகும். எந்த வித மாற்றங்களையும் விரும்பாதவரையிலும் இனவாதம் இருக்கும் வரையிலும் இந்த நாட்டினதும் மக்களினதும் எதிர் காலம் இருள் சூழ்ந்ததாகவே இருக்கும். நாடு கூட ஒரு சர்வாதிகார நிலையை நோக்கி நகர்ந்து தோல்வியடைந்த நாடக (Failed State) அத்தோடு “the begging bowl of the world" “ உலகின் பிச்சைக் கிண்ணம்" ஏந்துகின்ற நாடாக தொடர்ந்து இருகப் போகிறதா என்பதை காலம் தான் பதில் சொல்ல வேண்டும். பா.உதயன் ✍️ “சட்டம் எதை அனுமதிக்கிறதோ அதைச் செய்வதற்கான உரிமையே சுதந்திரம்”

புலம் பெயர் முதலாம் தலை முறையினரும் இவர்கள் பிள்ளைகள் இரண்டாம் தலைமுறையும். -பா.உதயன் புலம் பெயர் முதலாம் தலை முறை ஈழத்தமிழர் குடும்ப சமூக நிறுவனம் என்ற அமைப்பு முறைக்கும் இவர்களது இரண்டாம் தலை முறையின் குடும்ப அமைப்பு முறைக்கு இடையில் இடைவெளி கூடிக் கொண்டே போகிறதா. இரட்டைக் கலாச்சாரத்தினால் இவர்கள் தமது இனம் சார்ந்த அடையாளத்தில் இருந்து விலகிப்போகிறார்களா. எதிர் காலத்தில் இரண்டாம் தலை முறையின் குடும்பம் என்கிற ஸ்தாபனம் எப்படியான சவால்களை எதிர் நோக்கப் போகிறது எல்லா சமூகத்தினதும் குடும்ப அமைப்பு முறைமையில் பல குறைகளும் நிறைகளும் இருக்கின்ற போதிலும் ஆசிய குடும்ப அமைப்பு முறைமைகளில் குடும்பம் என்ற ஸ்தாபனம் இயங்கியல் தன்மைக்கு ஏற்ப பல இறுக்கமாக இருப்பதால் இந்த குடும்ப அமைப்பு இன்றும் பலமாக இருப்பதாக ஆசிய ஐரோப்பிய சமூகவியலாளர்களின் ஆய்வு கூறுகின்றது. எது எப்படி இருப்பினும் அரசியல், சமயம், பொருளாதாரம், கலாச்சாரம் போன்ற முக்கிய நிறுவன அமைப்பு முறை போன்றே குடும்பம் ஒரு முக்கியமான நிறுவனமாகும். குடும்பம் என்பது ஒரு சமூக நிறுவனமாகும், அங்கு குழந்தை முதலில் சமூக விதிமுறைகளைக் கற்றுக்கொள்கிறது மற்றும் ஒரு தனிநபராக சமூகமயமாக்கப்படுகிறது. "நான்" என்ற அடையாளத்தை இங்கு ஆரம்பத்தில் கற்றுக் கொள்கிறது. (Family as an important Social institution) என்ற ரீதியில் எமது இரண்டாம் தலை முறையின் குடும்ப வாழ்வியல் எப்படி அமையப் போகின்றது என்பது எதிர் காலம் தீர்மானிக்க கூடியதொன்றாகவே அமையுமா. புலம்பெயர் முதலாம் தலை முறையினருக்கும் பல இரண்டாம் தலை முறையினருக்கும் இடையில் பல வேறுபாடுகளைக் காணக்கூடியதாக இருக்கின்றது. புலம் பெயர் முதலாம் தலைமுறை எப்போதும் குடும்பத்தை தலையில் காவியபடி இருந்தனர். இவர்களின் பிள்ளைகள் இரண்டாம் தலைமுறை தனித்து வாழ்வதே தமக்கான தெரிவு என்றனர். நாட்டில் வாழும் உறவுகளின் வயிற்றுப் பசியையும் காத்து இருந்தனர் முதலாம் தலைமுறை. புலம் பெயர் முதலாம் தலை முறை எப்போதுமே தமது தேசம் பற்றிய சிந்தனையோடும் அங்கு போக வேண்டும் வாழ வேண்டும் என்ற கனவோடிருந்தனர் இரண்டாம் தலை முறைக்கு அது பற்றிய சிந்தனையோ எண்ணமோ இப்போதைக்கு இல்லையென்றனர். தமது தாய் தந்தையர் பிறந்த வாழ்ந்த தேசத்தை விட அவர்களின் விருப்பு வெறுப்புகள் வேறுபட்டதாயிருந்தது. புலம் பெயர் முதலாம் தலைமுறை காசு பொருளில் கவனமாக இருப்பார் சேர்த்து வைக்க வேண்டும் எதிர் காலத்துக்காக என்று நினைப்பார். இது பற்றி எந்தக் கவலையும் இரண்டாம் தலை முறைக்கு கிடையாது. முதலாம் தலை முறையினர் எப்படி தம்மை தம் தாய் தந்தையர்கள் தமது முன்னேற்றகரமான பாதைக்கு பல வலிகளை சுமந்து தாய் தந்தை என்ற பாத்திரங்களில் உழைத்தார்களோ அதே போல் தான் புலம் பெயர் முதலாம் தலைமுறையினரும் பல துன்பங்களை சுமந்த போதும் அப்பாக்களாக அம்மாக்களாக தத் தமது பாத்திரங்களோடு தமது கடமையை சரி வரவே செய்தனர். தேசம் தேசியம் நோக்கிய பார்வையும் அந்த அடையாளமும் அதன் வேர்களை தேடுபவர்களாகவும் மறக்காதவர்களாகவும் இப்பொழுது கூட தாம் பிறந்த இடம் நோக்கி படை எடுத்து போவர்களாகவும் அந்த கீரிமலை கடலில் குழிப்பதும் நண்பர்களோடு கூழ் குடித்து மகிழ்வதும் இவர்களின் பிறந்த வாழ்வு முறையோட அமைந்த ஒரு வகை தேசியப் பிணைப்போடு கூடிய பற்றே காரணம் எனலாம். அத்தோடு தம் பிள்ளைகளின் வளர்ச்சி பாதையிலும் பல அற்பணிப்புகளோடு கடந்த வந்த முதலாம் தலைமுறையினர் தலை முடியில் இப்போ வெள்ளை மயிர் அவர்கள் காலத்தை அறிவித்துக் கொண்டிருக்கிறது. இவர்களின் இறுதிக் காலம் தனிமையோடு போகுமோ இல்லை வேறு எந்தத் தெரிவை நோக்கி செல்லுவார்கள் என்பது பற்றிய கேள்விகளும் எழாமல் இல்லை. பலர் தமது இறுதிக் காலத்தில் தாயகம் திரும்பி அங்கு இருந்து வாழ விரும்பிய போதும் அந்த நாட்டில் இப்போதும் இனவாதமும் வெறுப்பும் வன்முறை கொண்ட கலாச்சாரமும் இன்னும் இலங்கை தேசத்தை விட்டுப் அகலவில்லை. இனங்களுக்கு இடையிலான பிளவு இன்னும் கூடிக் கொண்டே போகிறது ஆதலால் வயோதிப காலத்தில் அங்கு வாழ்வதும் பாதுகாப்பானதா என்பதும் கேள்விக் குறியே. இறுதியில் ஒன்றை மட்டும் சொல்லுகிறேன் பாரசீகக் கவிஞரான ரூமி ( Rumi) என்ற கவிஞன் எழுதியது போல் உங்கள் பிள்ளைகள் உங்கள் பிள்ளைகள் இல்லை நீங்கள் வில்லுகள் மட்டுமே அவர்கள் அம்புகள் அம்புகள் சரியாக இலக்கை அடைய துணை நிற்கும் வில்லுகள் தான் நீங்கள் அவர்களுக்கு உங்கள் அன்பை வழங்கலாமே தவிர உங்கள் சிந்தனையை வழங்கவே முடியாது என்று அந்தக் கவிஞன் எழுதியிருப்பது நினைவில் வருகின்றது. சிந்தனைகளும் செயல் வடிவங்களும் காலத்துக்கும் நேரத்துக்கும் ஏற்ப மாறிக்கொண்டே போகும் என்பது இயற்கையின் விதியாகிறது. இருந்த போதும் அன்பு, பாசம், உணர்வு, சிரிப்பு, சந்தோசம், துயரம், கண்ணீர் எல்லாமே எல்லா மனிதனுக்கும் ஆனதே இதை கடந்து மறந்து துறந்து வருவதென்பதும் கடினமானதே. பா.உதயன் ✍️

புலம் பெயர் ஈழத் தமிழர்களின் இரண்டாம் சந்ததியின் கல்வி வளர்ச்சி -பா.உதயன் கல்வி என்பது கடலைப் போல் அங்கு மூழ்கித் தான் முத்து எடுக்க முடியும். புலம் பெயர் தமிழர் வாழும் நோர்வே நாட்டிலும் எம் தமிழ் பிள்ளைகள் கல்வியில் காட்டி வரும் ஊக்கத்தால் இம் முறையும் பலர் உயர் கல்வி படிப்புக்கு தெரிவாகியுள்ளார்கள். இதனால் நோர்வீய சமூகத்தினரால் பெரிதும் மதிக்கத் தக்கவர்களாகவும் போற்றத் தக்கவர்களாகவும் பார்க்கப்படுகின்றோம். அத்தோடு கடினமான உழைப்பாளிகளாகவும் எந்த வித அரச சமூகக் கொடுப்பனவுகளிலும் தங்கி இல்லாதவர்களாகவும் எல்லாத் துறைகளிலும் வேலை செய்பவர்களாக வாழ்ந்து வருவது பெருமை தான். இதே போலவே இன்னும் பல ஐரோப்பிய நாடுகளிலும் கனடா ஐக்கிய அமெரிக்க உட்பட தமிழன் பெருமை சேர்த்து வருகிறான். அண்மையில் கனடாவில் ஈழத் தமிழன் ஒருவன் அமைச்சரவை அந்தஸ்துள்ள அமைச்சராக நியமிக்கப்பட்டுள்ளார். இது வரையில் இந்தியர்களே பல பலம் மிக்க நாடுகளில் அதி உயர் பதவியை வகித்து வந்தனர். இப்பொது ஈழத் தமிழரின் இண்டாம் தலை முறையினரும் பல கெளரமான அந்தந்த நாடுகளில் மதிப்பு மிக்க தொழிலை செய்து வருகிறார்கள். அந்த நாடுகளின் அரச தலைவர்கள் கூட தமிழர் சமய பண்பாட்டுக் கலாச்சார விழாக்களில் பங்கு பெறுவதும் தமிழர் பெருமை பற்றி அவர்கள் பேசுவதும் பெருமை தான். நாங்கள் விழுந்து விட்டோம் என்று நினைப்பவர்களுக்கு எல்லாம் நாங்கள் மெல்ல எழுந்து வருவோம் என்று சொல்பவர்களாக இருக்க வேண்டும். வீழ்வதும் எழுவதும் வாழ்வின் ஒரு பகுதி (Rise and fall are part of life) புதைத்து விட்டோம் என்று தான் நினைத்தார்கள் ஆனால் அவர்கள் புதைத்ததெல்லாம் விதை என்பதை மறந்து விட்டார்கள். ( “They tried to bury us, they didn’t know we were seeds.” ). நாங்கள் நினைத்தது விரும்பியது கிடைக்கவில்லையே என்று நாம் கவலை கொள்ளக் கூடாது வெற்றியும் தோல்வியும் மனித வாழ்வில் ஒரு அங்கமே ஆதலால் மீண்டும் முயற்சி திருவினையாக்கும் இறுதியில் உங்கள் இலக்கை அடைவீர்கள். கடுமையான உழைப்பும் உன் இலக்கை இறுதியில் அடைவேன் என்ற நம்பிக்கை இருந்தால் வெற்றி நிச்சயம். நாங்கள் வல்லமை படைத்த இனமாக எழுந்து வர வேண்டும். ஆகவே நாங்கள் எல்லாக் கல்வியையும் கற்க வேண்டும் சர்வதேச தொடர்பு (International relations), பொருளாதாரம், (Economics) சமூகவியல், (Sociology) ஐரோப்பிய தத்துவம், (European Philosophy) உலக சரித்திரம், (World History) அரசியல் விஞ்ஞானம், (Political Science) உளவியல், (psychology) ஊடகத் துறை, (journalism ) மானிடவியல்(Social Anthropology) போன்ற கற்கை நெறிகளிலும் கூடிய கவனம் செலுத்தி அதில் ஆழமான தேடலோடு ஐக்கிய நாடுகள், ஐரோப்பிய யூனியன் போன்ற பெரும் பெரும் உலகக் கூட்டு ஸ்தாபானங்களில் முக்கிய பதவிகளை வகிப்பவர்களாக நாம் மாற முயற்சிக்க வேண்டும். இராஜதந்திர ரீதியாக பலம் பெற்றவர்களாக உங்கள் இனத்தின் விடுதலைக்காக உங்கள் அடையாளம் தொலைந்து போகாமல் உழைக்க வேண்டும். உலகில் போற்றக் தக்க தமிழ் மொழியை தாய் மொழியாகக் கொண்டு உலகெல்லாம் தமிழன் பெருமை சேர்த்து வருகின்றான் இருந்தும் தனக்கென ஒரு தாய் நாடு இல்லாதது பெரும் துயரே. எதையும் ஆளமாக பேசவும் எழுதவும் விவாதம் செய்யவும் கற்றுக் கொள்ளுங்கள். எழுத்தும் பேச்சும் இல்லாவிடில் இந்த உலகம் மெளனமாகிவிடும். ஆதலால் எபோதும் எழுதுங்கள் பேசுங்கள். எழுதுவதும் சிந்திப்பதும் உங்கள் மனதில் ஒரு பார்வையை உருவாக்குகிறது, சிந்திக்க வைக்கிறது, கருத்துக்களை உருவாக்குகிறது. தொலைநோக்கு பார்வையாளர்கள் தான் உலகை மாற்றுகிறார்கள். எதையும் தேடாமல் விளங்காமல் எதையும் கடக்க முடியாது. தமிழ்ப் புலவன் வள்ளுவன் சொல்லுவது போல் “கற்க கசடறக் கற்பவை கற்றபின் நிற்க அதற்குத் தக”கற்றிருந்தால் மட்டும் போதாது கற்றபடி நடக்க வேண்டும். எப்பொழுதும் மனிதர்களை மதித்து நடக்க வேண்டும். பண்பான வார்த்தைகளை எழுதக் கற்றுக்கொள்ள வேண்டும். தங்கள் சுய நலன்களுக்காகவும் தனியவே தமது பெருமைக்காகவும் இருந்து வாழாமல் உண்மை மனிதர்களாக வாழப் பழகுங்கள் உங்களுக்காகவே பல தியாகங்கள் செய்து உங்கள் உயர்வுக்காக பாடு பட்ட பெற்றோர்களையும் மதித்து அன்பும் கருணையும் கொண்டவர்களாக நாங்கள் இருக்க வேண்டும். அவர்களின் அவிலாசைகளையும் நீங்கள் இயன்றளவு பூர்த்தி செய்பவர்களாக இருக்கவேண்டும். வேர்கள் இல்லையேல் மரங்கள் இல்லை. பா.உதயன்✍️

சுவே மற்றும் தமிழ் சிறி நல்ல கருதும் கருத்து மிக்க படங்களும் நன்றிகள்!