அரக்கோணம் அருகே ரயில் விபத்து : ஒருவர் பலி; மேலும் பலர் காயம்

அரக்கோணம் அருகே சித்தேரியில் ரயில் தடம்புரண்ட விபத்தில் ஒருவர் உயிரிழந்தார். முப்பதுக்கும் மேற்பட்டோர் காயமடைந்தனர்.

வேலூர் மாவட்டம் அரக்கோணத்தை அடுத்துள்ள சித்தேரி என்ற பகுதியில் இன்று காலை முஸராப்பூர் - யஷ்வந்த்பூர் ரயிலின் 9 பெட்டிகள் தடம்புரண்டன. அதிகாலை 5.50 மணியளவில் விபத்து நடந்ததால், ரயிலில் உறங்கிக் கொண்டிருந்த பயணிகள் தூக்கி வீசப்பட்டனர்.

நிலைமையின் விபரீதத்தை உணரும்முன் ஏராளமானோர், இடிபாடுகளில் சிக்கிக் கொண்டனர். தகவல் அறிந்து சம்பவ இடத்திற்கு விரைந்த தீயணைப்புப் படையினர், காயமடைந்த 30க்கும் மேற்பட்டோரை மீட்டு மருத்துவமனைக்கு அனுப்பி வைத்தனர்.

தடம்புரண்ட ரயில் பெட்டிகளின் இடிபாடுகளில் சிக்கி பீகாரைச் சேர்ந்த ஒருவர் உயிரிழந்தார். ரயில் தடம்புரண்டதன் காரணமாக தண்டவாளங்கள் சேதமடைந்தன. இதனால் சென்னை - அரக்கோணம் வழித்தடத்தில் ரயில் போக்குவரத்து ரத்து செய்யப்பட்டது. மறுவழித் தடம் சீரமைக்கப்பட்டதால் ஆங்காங்கே நிறுத்தப்பட்டிருந்த ரயில்கள், பல மணி நேரம் தாமதமாக இயக்கப்பட்டன. விபத்து நடந்த பகுதியை ஆய்வு செய்த தெற்கு ரயில்வே பொது மேலாளர் ராகேஷ் மிஸ்ரா, தண்டவாள சீரமைப்புப் பணிகள் நாளை காலையில் முழுமையாக சீரடையும் என நம்பிக்கை தெரிவித்தார்.

ரயில் விபத்திற்கு சதிவேலை காரணமா அல்லது தொழில்நுட்ப கோளாறு காரணமா என்பது பற்றியும் விசாரிக்கப்பட்டு வருகிறது. சித்தேரி ரயில் விபத்தைத் தொடர்ந்து 11 ரயில்களின் சேவை ரத்து செய்யப்பட்டது. மேலும் பல ரயில்கள் மாற்றுவழியில் திருப்பி விடப்பட்டன. இதுபற்றிய அறிவிப்பு தெரியாமல், சென்னை சென்ட்ரல் ரயில் நிலையத்தில் பயணிகள் தவிக்கும் நிலை ஏற்பட்டது.

இதனிடையே, ரயில் விபத்தில் பலியானவரின் குடும்பத்தினருக்கு 2 லட்சம் ரூபாயும் பலத்த காயமடைந்தவர்களுக்கு தலா 50 ஆயிரம் ரூபாயும் நிவாரணம் வழங்கப்படும் என ரயில்வே அமைச்சகம் அறிவித்துள்ளது. சித்தேரியில் கடந்த 2011 ஆம் ஆண்டு நேரிட்ட ரயில் விபத்தில் 9 பேர் உயிரிழந்தனர் என்பது குறிப்பிடத்தக்கது.

http://puthiyathalaimurai.tv/train-accident-in-arakkonam