பணிப்பெண்களை கணவருக்கும் மகனுக்கும் விருந்தாக்கிய சசிகலா புஷ்பா! - கைது செய்ய நடவடிக்கை தீவிரம்

மாநிலங்களவை உறுப்பினர் சசிகலா புஷ்பாவை கைது செய்யும் நடவடிக்கைகள் தீவிரமடைந்துள்ளன. தூத்துக்குடியில் அவர் மீது ஜாமீனில் வெளிவர முடியாத பிரிவுகளின் கீழ் வழக்குகள் பதிவு செய்யப்பட்டுள்ளன. நெல்லை மாவட்டம் திசையன்விளையை அடுத்த ஆணைக்குடியை சேர்ந்த இளம்பெண் பானுமதியும், அவரது சகோதரி ஜான்சிராணியும், தூத்துக்குடி மாவட்ட காவல்துறை கண்காணிப்பாளரிடம் கடந்த திங்கட்கிழமை புகார் மனு ஒன்றை அளித்திருந்தனர். அதில் தாங்கள் சசிகலா புஷ்பா வீட்டில் வேலை பார்த்து வந்தபோது அவரது கணவர் லிங்கேஸ்வரர், மகன் பிரதீப் ஆகியோர் தங்களை பாலியல் பலாத்காரம் செய்ய முயன்றதாக தெரிவித்திருந்தனர்.

மேலும் சசிகலா புஷ்பாவும், அவரது தாயார் கௌரியும் தகாத வார்த்தைகளால் பேசி, அடித்து துன்புறுத்தியதாகவும் மனுவில் தெரிவித்திருந்தனர். தூத்துக்குடி மாவட்ட காவல்துறை கண்காணிப்பாளரிடம் கொடுக்கப்பட்ட புகார் மனு அனைத்து மகளிர் காவல் நிலையத்திற்கு மாற்றப்பட்டது. இதன் அடிப்படையில் விசாரணை செய்த ஆய்வாளர், சசிகலா புஷ்பா மற்றும் அவரது கணவர், மகன் உள்ளிட்டோர் மீது பெண்கள் வன்கொடுமை தடுப்பு சட்டத்தின் கீழ் வழக்கு பதிவு செய்துள்ளனர்.

சென்னை போயஸ் தோட்டத்தில் வீட்டுக்கு அழைத்து ஜெயலலிதா தம்மை அடித்ததாக கடந்த 1-ம் தேதி மாநிலங்களவையில் சசிகலா புஷ்பா குற்றம் சாட்டினார். அதன் பிறகு திருச்சியில் அதிமுக வழக்கறிஞர் அணியை சேர்ந்தவர்கள் சசிகலா புஷ்பா மீது அவதூறு வழக்கு ஒன்றை கொடுத்தனர். திருநெல்வேலியை சேர்ந்த ராஜேஷ் என்பவர் வேலை வாங்கி தருவதாக கூறி புஷ்பா தம்மிடம் ரூ.20 லட்சம் வாங்கி கொண்டு தரவில்லை என்றும் புகார் தந்தார். புகார்கள் குவிவதை தொடர்ந்து சசிகலா புஷ்பா, கணவர் லிங்கேஸ்வர திலகன், மகன் பிரதீப் ஆகியோர் டெல்லி உயர்நீதிமன்றத்தில் முன்ஜாமின் கேட்டு மனுத்தாக்கல் செய்துள்ளார்.