தேர்தல் ஆணையத்தில் கமல் மனு!

மக்கள் நீதி மய்யம் கட்சியைப் பதிவு செய்வதற்காக, இன்று டெல்லியிலுள்ள தேர்தல் ஆணைய அலுவலகத்துக்குச் சென்றார் கமல்ஹாசன். கூடிய விரைவில் தங்கள் கட்சிக்கு அங்கீகாரம் கிடைக்குமென்று, அவர் நம்பிக்கை தெரிவித்தார்.

கடந்த பிப்ரவரி 21ஆம் தேதியன்று மக்கள் நீதி மய்யம் என்ற கட்சிப் பெயரையும் கொடியையும் மதுரையில் தொண்டர்கள் மத்தியில் அறிமுகம் செய்தார் நடிகர் கமல்ஹாசன். கட்சி குறித்த அறிவிப்பை வெளியிடுவதற்கு முன்பாக, திமுக தலைவர் மு.கருணாநிதி, இந்திய கம்யூனிஸ்ட் கட்சியைச் சேர்ந்த மூத்த தலைவர் நல்லகண்ணு, நடிகர் ரஜினிகாந்த், தேமுதிக தலைவர் விஜயகாந்த் உள்பட பல தலைவர்களைச் சந்தித்துப் பேசினார். இதைத் தொடர்ந்து, புதிய உறுப்பினர்களைச் சேர்க்கும் முயற்சியில் மக்கள் நீதி மய்யம் நிர்வாகிகள் தொடர்ந்து ஈடுபட்டு வருகின்றனர்.

கடந்த ஏப்ரல் மாதம் உள்ளாட்சி அமைப்புகள் சரிவர இயங்குவதில்லை எனவும், ஆண்டுக்கு 4 முறை கிராம சபை கூட்டங்கள் நடத்தப்படுவதில்லை எனவும் குற்றம்சாட்டினார் கமல்ஹாசன். இதற்கு மறுப்பு தெரிவித்தார் தமிழக அமைச்சர் வேலுமணி. கடந்த மே 16, 17, 18 தேதிகளில் நாகர்கோவில், தூத்துக்குடி, திருநெல்வேலி, விருதுநகர் மாவட்டங்களுக்குச் சுற்றுப்பயணம் மேற்கொண்டார் கமல். மக்களுக்கு என்ன வேண்டுமென்று தெரிந்துகொள்வதே தனது பயணத்தின் நோக்கம் என்று கூறினார். இந்த காலகட்டத்தில், பொதுமக்களின் பிரச்சினைகளைத் தீர்க்கும் வகையில், மக்கள் நீதி மய்யம் சார்பில் மய்யம் விசில் என்ற செயலி அறிமுகப்படுத்தப்பட்டது. காவிரி விவகாரம் தொடர்பாக, மக்கள் நீதி மய்யம் சார்பில் அனைத்துக்கட்சி கூட்டத்தையும் நடத்தினார். இதில் பாமக இளைஞரணித் தலைவர் அன்புமணி ராமதாஸ் உள்ளிட்ட பலர் கலந்துகொண்டனர்.

தனது கட்சியின் பெயர் மற்றும் கொடி ஆகியவற்றைப் பதிவு செய்ய, டெல்லியிலுள்ள தேர்தல் ஆணைய அலுவலகத்தில் கமல் சார்பில் ஏற்கனவே விண்ணப்பிக்கப்பட்டிருந்தது. இதில் ஆட்சேபணை இருந்தால் தெரிவிக்கலாம் என்று அறிவித்தது தேர்தல் ஆணையம். அவ்வாறு எந்தப் புகாரும் வராததால், யாரும் மக்கள் நீதி மய்யம் கட்சிப்பெயருக்கு ஆட்சேபம் தெரிவிக்கவில்லை என தேர்தல் ஆணைய அலுவலகம் சார்பில் தெரிவிக்கப்பட்டது.

இந்த நிலையில், இன்று (ஜூன் 20) காலை டெல்லியிலுள்ள தேர்தல் ஆணைய அலுவலகத்திற்குச் சென்றார் கமல்ஹாசன். அவருடன் மக்கள் நீதி மய்யம் கட்சி நிர்வாகிகளும் சென்றனர். இதன்பின்னர், அவர் செய்தியாளர்களைச் சந்தித்துப் பேசினார். அப்போது, “தேர்தல் ஆணையத்திற்குச் சில கேள்விகள் இருந்தன. அதற்குப் பதில் சொன்னேன். பெரிதாக எந்த ஆட்சேபணையும் சொல்லவில்லை. கூடிய விரைவில் எங்களுக்கான அங்கீகாரம் கிடைக்குமென்று நம்புகிறோம்” என்று தெரிவித்தார் கமல். இதனால், இன்று மக்கள் நீதி மய்யத்திற்கு தேர்தல் ஆணையத்தில் அங்கீகாரம் அளிக்கப்படுமென்று எதிர்பார்க்கப்படுகிறது. இதன்பின்னர், தேர்தல் ஆணையத்தின் இணையதளத்தில் மக்கள் நீதி மய்யம் பற்றிய தகவல்கள் பதிவேற்றம் செய்யப்படும்.

டெல்லியில் கடந்த எட்டு நாட்களாகப் போராட்டம் நடத்திய முதலமைச்சர் அரவிந்த் கெஜ்ரிவாலைச் சந்திப்பது குறித்து இன்னும் முடிவெடுக்கவில்லை என்று தெரிவித்த கமல், மாலையில் விமானநிலையம் செல்வதற்கு முன்பாக அவரைச் சந்திக்க வாய்ப்புள்ளதாகக் கூறினார். சேலம் எட்டுவழிச்சாலை தொடர்பான போராட்டம் பற்றிப் பேசியவர், சுற்றுச்சூழல் குறித்துப் பேசினாலே குற்றம் என்பதை ஒத்துக்கொள்ள முடியாது என்றும், அந்த ஆதங்கமும் கவலையும் எல்லா குடிமகனையும் போலத் தனக்கும் இருப்பதாகவும் அவர் கூறினார். தனது பட நிறுவனத்தின் சார்பாக, நடிகை கவுதமிக்கு கொடுக்கவேண்டிய பணமும் அவருக்கு தரப்பட்டதாகத் தன் பேச்சில் குறிப்பிட்டார் கமல்.

https://minnambalam.com/k/2018/06/20/62