புதிய சந்தைகளை உருவாக்கும் யுத்தங்கள்

புதிய சந்தைகளை உருவாக்கும் யுத்தங்கள்

-சி.இதயச்சந்திரன்-

பூகோள அரசியலில் புதியதொரு மாற்றம் ஏற்பட்டுள்ளது. இரண்டாம் உலக மகா யுத்தத்திற்குப் பின்னர் நிகழ்ந்த பனிப்போரில் ஈடுபட்ட இரு வல்லரசுகளும் புதிய தளமொன்றில் மோதத் தொடங்கிவிட்டன.

சோவியத் யூனியனின் சிதைவோடு, கிழக்கு ஐரோப்பிய நாடுகள் துண்டாடப்பட்டு, அமெரிக்கத் தலைமையிலான நேட்டோ கூட்டமைப்புக்குள் இணையத் தொடங்கியவுடன் பெருங்காயடப்பாவாக விளங்கும் ரஷ்யாவின் பாதுகாப்பிற்கு அச்சுறுத்தல் அதிகரித்துள்ளது.

ஜோர்ஜியா, உக்ரெனில் இருந்து ஆரம்பித்து கொசோவோ வரை அமெரிக்க ஆதிக்கம் வலுவடைகிறது.

ரஷ்யாவை சூழவுள்ள நாடுகளில் ஏவுகணை எதிர்ப்பு நிலையம் அமைக்க மேற்குலகம் மேற்கொள்ளும் முயற்சிக்கு ரஷ்யா கடும் எதிர்ப்பினை தெரிவிப்பதோடு தமது நீண்ட தூர அணு ஆயுத ஏவுகணைகளை சுற்றிவர இருக்கும் நாடுகளை நோக்கி திருப்பப் போவதாக வெருட்ட ஆரம்பித்துள்ளது.

இருப்பினும் எண்ணெய் வளமிக்க வெனிசுவேலாவை மையப்படுத்திய இலத்தீன் அமெரிக்க நாடுகளிடையே ஏற்படும் அமெரிக்க எதிர்ப்பு கட்டமைப்பு போன்று ரஷ்யாவால் உருவாக்க முடியுமாவென்பது சந்தேகமே.

ஏற்கனவே கம்யூனிசப் போர்வைக்குள் தேசிய இனங்களின் தனித்துவம் புறக்கணிக்கப்பட்டதன் பின்விளைவாக, அமெரிக்க ஆதரவு நிலைப்பாடு எதிர்விளைவாக மாற்ற முற்பட்டது.

சைபீரிய எண்ணெய் வளமும், நீண்ட தூர அணுசக்தி ஏவுகணைகளும், பரந்த நிலப்பரப்பின் எல்லையோடு அமைந்துள்ள பல நாடுகளும் மட்டுமே ரஷ்யாவிற்குச் சாதகமாகவுள்ள அம்சங்களாகக் கருதப்படுகிறது.

ஆனாலும் கொல்லைப் புறநாடுகளில் ரஷ்யாவிற்கு சமமான பலங்கொண்ட வல்லரசுகளின் ஆதிக்கம் காலூன்றுவது பாதகமான விடயமே.

ரஷ்யாவின் வான் எல்லைகளைக் கடந்து அவர்களின் ஏவுகணைகளை மேற்கு நோக்கிப் பாயாதவாறு தடுத்தாட்கொள்வதே அமெரிக்க, ஐரோப்பிய நாடுகளின் பாதுகாப்பினை உறுதிப்படுத்தும்.

ஐக்கிய அமெரிக்க இராஜ்ஜிய வான் எல்லையில் பாதுகாப்பு வலைப்பின்னலை உருவாக்குவதை விட ரஷ்யா வான் எல்லைக்கு வேலி போடுவது சிறந்ததென அமெரிக்கா கருதுகிறது.

அதாவது ரஷ்யாவில் இருந்து ஏவப்படும் அணு ஆயுதங்கள், அதன் எல்லையை உடைத்துக் கொண்டு வெளியேற முடியாமல் தடுத்தால், முழு உலகையும் தனது பிடிக்குள் கொண்டு வரமுடியும். அமெரிக்காவுக்கு பாரிய அச்சுறுத்தல் ஒன்று நிவர்த்தி செய்யப்படும்.

புதிய சந்தைகளை உருவாக்கும் போர் உலகக் கோட்பாட்டிற்கு அணு ஆயுதப் போட்டிகளே தடையாக உள்ளன. ஈரான் வடகொரியா மீது மேற்குலகம் காட்டும் கரிசனை இதன் அடிப்படையிலேயே அமைகிறது.

45 நிமிடங்களில் பிரித்தானியாவை தாக்கும் அழிவு ஆயுத ஏவுகணைகளை ஈராக் வைத்திருப்பதாகக் கூறி அதன்மீது யுத்தம் தொடுக்கப்பட்டது.

கையிருப்பில் அவ்வகையான ஆயுதங்கள் இல்லாத நிலையில், இருப்பதுபோல் பாவணை செய்து அமெரிக்காவுடன் முறுகல் நிலையில் இருந்தார் சதாம் ஹ_சைன்.

அடிக்கடி 'ஸ்கட்" ஏவுகணைகளை இஸ்ரேல் மீது ஏவி, எதற்கும் தயாரென அறிக்கைகளை விட்டார். மேற்குலகு விரித்த வலையில் தானே விழுந்து அதன் ஆக்கிரமிப்புக்கான நியாயப்பாடுகளை அவரே வழங்கியிருந்தார்.

மேற்குலகின் இலக்கு, அணு ஆயுத வளர்ச்சியுறும், ஈரான் என்பதை சதாம் புரிந்து கொள்ளவில்லை. ஈரானைச் சுற்றி அமெரிக்கா நீண்ட காலமாக விரிக்கும் பொறியை உணராமல் நாட்டுடன் யுத்தமும் புரிந்தது ஈராக்.

சர்வாதிகாரம், அழிவு, ஆயுதமென கூக்குரலிட்டபடி உள்நுழைந்த அமெரிக்கா, தற்போது பயங்கரவாதத்திற்கெதிராக போரிட வேண்டியிருப்பதால் ஈராக்கை விட்டு வெளியேறப் போவதில்லையென சத்தியம் செய்கிறது.

மத்திய கிழக்கில், தனது சகாவான இஸ்ரேல் தவிர்ந்த ஏனைய நாடுகளில் அணு ஆயுத வளர்ச்சி தோற்றம் பெறுவதை அமெரிக்கா அணுமதிக்காது.

ஏனெனில், இவ்வுலகை ஆட்டுவிக்கும் எண்ணெய் வள சந்தையின் மையமாக கருதப்படும். மத்திய கிழக்கை கையகப்படுத்தும் திட்டத்திற்கு முன்னுரிமை வழங்குகிறது அமெரிக்கா.

பாலஸ்தீன பிரச்சினை தீர்ந்தால் மத்திய கிழக்கு மோதல்கள் முடிவுக்கு வரும் என்பது போலியான கற்பிதங்கள்.

அப்பிரச்சினையை தூண்டிவிட்டு, தக்கவைத்தவாறு, முழு பிராந்தியத்தை தமது சந்தை ஆதிக்கத்துள் கொண்டு வருவதே அமெரிக்காவின் தூர நோக்குத்திட்டம்.

புதிய சந்தைக் கலங்களை உருவாக்குவதற்கு யுத்தம் ஒரு கருவியாக பிரயோகிக்கப்படுகிறது. சுயநிர்ணய உரிமைக் கோட்பாடுகள் யாவும், பொருளாதார நலன் சார்ந்த சந்தை போட்டியின் சாதக, பாதக நிலையினை ஒட்டியே நிராகரிக்கப்படும் அல்லது ஏற்றுக்கொள்ளப்படும்.

கொசோவோ மக்களின் விடுதலையை மேற்குலகம் அங்கீகரிப்பதன் பின்புலத்தை, இதன் அடிப்படையில் விளங்கிக் கொள்ளலாம். பாலஸ்தீன மக்களின் சுயநிர்ணய உரிமையை இல்லாதொழிப்பதற்கு மக்களால் ஜனநாயக முறைமையூடாக தெரிவு செய்யப்பட்ட ஹமாஸ் இயக்கத்தை பயங்கரவாதிகளாக்கி பாலஸ்தீனத்தை பிளவுபடுத்திப் பலவீனமாக்குகிறது மேற்குலகம்.

இஸ்ரேல் ஹமாஸை அங்கீகரிக்க மறுக்கிறது என்ற குற்றச்சாட்டை முன்னிலைப்படுத்தியவாறு பாலஸ்தீன மக்களின் ஒற்றுமையை சிதைப்பதே மேற்குலகின் தந்திரோபாயமாகும்.

இவர்கள் உளப்பூர்வமாக நேர்மையுடன் செயற்பட்டிருந்தால், யசீர் அரபாத் காலத்திலேயே இப்பிரச்சினைக்கு சுமுகமாக முடிவொன்றினை எட்டியிருக்கலாம்.

மத்திய கிழக்கின் விவகாரங்களின் தமது இருப்பையும் நேரடி தலையீடுகளையும் தக்க வைப்பதற்கே இஸ்ரேலிய பாலஸ்தீன விவகாரம் மேற்குலகால் கையாளப்படுகிறது.

பாலஸ்தீனத்தில் குவிமையப் புள்ளியிட்டு ஈரான் வரை தனது ஆதிக்கத்தை விரிவு படுத்தியுள்ளது இந்த அமெரிக்கா தலைமையிலான மேற்குலகம்.

புதிய சந்தைகளை உருவாக்கும் யுத்தங்கள் பிராந்திய ஆதிக்க விரிவாக்கத்திற்கு இடையூறாக உள்ள சிரியாவும், ஈரானும், பயங்கரவாதத்தின் முதன்மை ஏற்றுமதியாளர்களென பரப்புரை செய்தவாறு, ஜோர்தான், எகிப்து, சவூதி அரேபியா போன்ற மேற்குலக நண்பர்களுக்கு அனுசரணையாளர்கள் பொறுப்பினை அளித்து, அரபு மக்களை சமாதானப்படுத்தும் புதிய உத்திகளை பிரயோகிக்கின்றது.

இஸ்ரேலுடன் முட்டிக்கொண்டிருக்கும் லெபனானிய ஹிஸ்புல்வாவிற்கு வழங்கும் ஆதரவினை சிரியா மறுபரிசீலனை செய்தால் போரில் கைப்பற்றப்பட்ட கோலான் குன்றுகளை அன்பளிப்புச் செய்ய தயாரென இஸ்ரேல் கூறுகிறது.

இஸ்ரேலுடன் சமரச போக்கைக் கடைப்பிடிக்க சிரியா தயாரென்றால் அந்நாட்டை தலை வைத்து கூத்தாடப் புது வேடம் பூண அமெரிக்கா தயார்.

எதிரிகளை யுத்தம் மூலம் அடிபணிய வைக்கலாம். அல்லது பொருளாதார உதவிகள் வழங்குவதாக வாக்குறுதியளித்து பண்டமாற்று மூலம் வென்றெடுக்கலாம். இங்கு கூறப்பட்ட இரண்டாவது வழிமுறை மூலமே வடகொரியா விவகாரம் கையாளப்படுகிறது.

சோவியத் யூனியன் போன்று, தனது பொருளாதார வளம் அனைத்தையும் அணு ஆயுத படை விரிவாக்கத்தினுள் கொட்டி, சமூக பொருளாதார தொழில் துறை வளர்ச்சியினை புறக்கணித்து உணவிற்காக தென்கொரியாவிடம் கையேந்தும் நிலைக்கு வந்து விட்டது வடகொரியா.

அணு ஆயுத பலமிருந்தால் அமெரிக்கா போகலாமென்கிற மறுபக்கச் சிந்தனை, வட கொரியா போன்ற நாடுகளின் உளவியலில் மிதப்பு நிலையிலுள்ளது.

அணு ஆயுத உலக வல்லரசுகளின் ஒன்றான சீனாவின் பாதுகாப்பு, வடகொரியாவிற்கு இருந்தாலும், அணு நிலை உருவாக்கத்திற்கான தொழில்நுட்ப உதவிகளை வழங்கி அதனை அணுஆயுத நாடாக்க சீனா முயற்சித்ததன் பின்னணியில் பிராந்திய படைவலுச் சமநிலை, பேணப்படுவதே முன்னிலைபடுத்தப்படுகிறது.

இதே போன்று இந்தியாவிற்கு எதிராக பாகிஸ்தானின் அணு ஆயுத விரிவாக்கலிற்கும், நவீன படைக்கட்டுமான வளர்ச்சிக்கும் அமெரிக்கா சீனா தொடர்ச்சியாக அளித்துவரும் உதவிகளை பிராந்திய சமநிலை தக்கவைப்பதின் நோக்கில் பிரயோகிக்கப்படுகின்றன.

படைத்துறை வளர்ச்சிக்கு மித மிஞ்சிய உதவிகளை வழங்கி, நாடுகளிடையே முரண்நிலை தோற்றமுறும் போது, பேச்சுவார்த்தை என்கிற தளத்தில் அனுசரணையாளர்களாக நுழைந்து பிராந்தியத்தை தமது நேரடிக் கட்டுக்குள் கொண்டுவருவதே ஏகாதிபத்தியங்களின் தந்திரோபாயமாகும்.

சீனாவின் பங்களிப்பில்லாமல் வடகொரியா பிரச்சினையை தீர்க்க முடியாது. இந்தியா அணுசரணையை பெறாமல் இலங்கைப் பிரச்சினையை கையாள முடியாது என்கிற பரப்புரை யாவும் இத்தந்திரோபாயங்களின் எதிர் விளைவுகளே.

ஆயுதங்களை வழங்குதல், மோதல் நிலையை அதிகரித்தல், பின் தீர்வினை ஏற்படுத்தப்போவதாகக் கூறிக் கொண்டு தலையிடுதல்.

இரண்டு நாடுகளுக்கிடையே உருவாகும் மோதல் நிலை களமும், ஒரு நாட்டுக்குள்ளே நிகழும் யுத்தங்களும் அளவு ரீதியில் மாறுபட்டாலும் பண்புரீதியாக ஒரே விதமான ஏகாதிபத்தியங்களின் பிரயோக உத்தியே பயன்படுத்தப்படுகிறது.

ஸ்ரீலங்காவை பொறுத்தவரை இவ்வகையான சமூக, பிராந்திய ஏகாதிபத்தியங்களின் அணுகுமுறை, நிகழ்ச்சிநிரல் அற்ற சிக்கலுக்குள்ளாகியிருப்பதை