தீர்வுத் திட்டம்: மகிந்தவின் சிந்தனையா விதாரணவின் யோசனையா?

தீர்வுத் திட்டம்: மகிந்தவின் சிந்தனையா விதாரணவின் யோசனையா?

[27 - January - 2008]

-எம்.ஏ.எம்.நிலாம்-

இலங்கையின் 60 ஆவது சுதந்திர தினம் நாட்டின் அதிமுக்கியத்துவம் வாய்ந்ததொரு கால கட்டத்தில் கொண்டாடப்படவிருக்கின்றது. கிட்டத்தட்ட மூன்று தசாப்தங்களாக புரையோடிப் போயுள்ள இனப்பிரச்சினைக்கு அரசியல் தீர்வொன்றை எட்டுவதற்கான பகீரதப் பிரயத்தனம் மேற்கொள்ளப்பட்டு வருகின்ற ஒரு காலமாகவே இன்றைய நிலைமைகளை அவதானிக்கக் கூடியதாக உள்ளது.

பேராசிரியர் திஸ்ஸ விதாரண தலைமையிலான சர்வகட்சிப் பிரதிநிதிகள் குழு 63 தடவைகள் கூடி ஆராய்ந்த பின்னர் தீர்வுப் பொதியொன்றை ஜனாதிபதி மகிந்த ராஜபக்‌ஷவிடம் ஒப்படைத்திருக்கின்றது. இந்தத் தீர்வுப் பொதியில் நாடும் சர்வதேசமும் எதிர்பார்த்தது போல் ஒன்றும் புதுமையான எந்த அம்சங்களும் காணப்படவில்லை. புதிய மொந்தையில் பழைய கள்ளுத் தான் அதில் உள்ளடக்கப்பட்டிருக்கின்றது.

13 ஆவது அரசியலமைப்புத் திருத்தத்தின் கீழ் அதிகாரப் பரவலாக்கத்துக்கு வகை செய்யப்பட்டு பல வருடங்கள் கடந்துவிட்டன. ஆனால், மாறி மாறி வந்த சுதந்திரக்கட்சி, ஐக்கிய தேசியக் கட்சி, அரசாங்கங்கள் இந்த அதிகாரப் பரவலாக்கத்திற்கு ஆக்கபூர்வமான எந்தவிதமான நடவடிக்கைகளையும் எடுக்கவில்லை. அதற்கு முக்கிய காரணம் பிரதான எதிர்க்கட்சிக்குத் தள்ளப்பட்ட சமயங்களில் இந்த இரண்டு பிரதான கட்சிகளும் குறுக்கீடாக இருந்தமையாகும்.

இப்போது ஐக்கிய தேசியக் கட்சியும் ஜே.வி.பி.யும் வெளியே நிற்கும் நிலையில் சர்வகட்சி என்ற பெயரில் ஒரு குழு அமைக்கப்பட்டு பழைய அறிக்கை தூசு தட்டப்பட்டு ஜனாதிபதியிடம் ஒப்படைக்கப்பட்டுள்ளது.

இந்தச் சந்தர்ப்பத்தில் இன்னுமொரு முக்கிய விடயத்தை சுட்டிக்காட்டியாக வேண்டியுள்ளது. வடக்கு, கிழக்கு மக்களின் பிரச்சினைகளுக்குத் தீர்வு காண்பதற்கான யோசனைகளை தயாரிப்பதற்காக ஜனாதிபதி மகிந்த ராஜபக்‌ஷவின் வேண்டுகோளின் பேரில் அமைக்கப்பட்ட சர்வகட்சி மாநாடு, அத்தோடு சர்வகட்சிப் பிரதிநிதிகள் குழுவில் தமிழ் மக்களை பிரதிநிதித்துவப்படுத்தும் தமிழ்த் தேசியக் கூட்டமைப்பு எந்தவொரு சந்தர்ப்பத்திலும் உள்வாங்கப்படவேயில்லை. அக்கட்சிக்கு அழைப்பே விடுக்கப்படவில்லை.

விடுதலைப் புலிகளுக்கல்ல தீர்வு, தமிழ் மக்களுக்கே அரசியல் தீர்வு என்று கூறுகின்ற அரசாங்கமும், ஜனாதிபதியும் தமிழ் மக்களின் பிரதிநிதிகளாக பாராளுமன்றத்தில் இருக்கின்ற தமிழ்த் தேசியக் கூட்டமைப்பை புறக்கணித்ததன் மூலம் தாங்கள் தருவதை நீங்கள் ஏற்றுக் கொள்ள வேண்டுமெனக் கூறி ஏதோவொன்றைத் திணிக்கும் முயற்சியாகவே இதனை நோக்க வேண்டியுள்ளது.

எமது நாட்டைப் பொறுத்தமட்டில் சர்வகட்சி மாநாடுகள் என்பவை புதுமையானதாகவோ, புதியவையாகவோ காணப்படவில்லை. ஜே.ஆர்.ஜயவர்தனவின் காலம் தொட்டு நாம் பல சர்வகட்சி மாநாடுகளைச் சந்தித்துள்ளோம். அவற்றின் மூலம் பயனுறுதியான எந்தத் திட்டமும் முன்வைக்கப்படவுமில்லை அவை குறித்து கவனம் செலுத்தப்படவுமில்லை என்பது தான் உண்மை.

பிரச்சினையை முடிந்தளவுக்கு இழுத்தடிப்பதன் நோக்கத்துக்காகவே இந்த சர்வகட்சி மாநாடுகள் நன்றாகப் பயன்படுத்தப்பட்டிருக்கின்ற