வடக்கு கிழக்கு மீண்டும் இணைக்கப்படமாட்டாது-ரோஹித போகொல்லாகம

வடக்கு கிழக்கு மீண்டும் இணைக்கப்படமாட்டாது-ரோஹித போகொல்லாகம

1/27/2008 10:09:42 AM

வீரகேசரி இணையம் - வடக்கு - கிழக்கு மீண்டும் இணைக்கப்பட மாட்டாது. அரசியலமைப்பின் 13 ஆவது திருத்தச் சட்டத்திற்கு அமைய தீர்வு யோசனைகள் நடைமுறைப்படுத்தப்படும் போது இவ்வாறு இணைக்கப்படவேண்டி வரும் என்ற கதைக்கே இடமில்லையென வெளிவிவகார அமைச்சர் ரோஹித்த போகொல்லாகம தெரிவித்துள்ளார்.

அனைத்துக் கட்சிகள் பிரதிநிதிகள் குழுவின் இனப் பிரச்சினை தீர்வு யோசனைகள் தற்போது முன்வைக்கப்பட்டுள்ளன. இலங்கை சுதந்திரமடைந்து அறுபது வருடங்கள் பூர்த்தியடைந்துள்ள நிலையில் அரசியல் கட்சித் தலைவர்களிடையே கருத்தொருமைப்பாட்டினை ஏற்படுத்தக் கிடைத்தமை வரலாற்று ரீதியான ஒரு நிகழ்வாகும்.

இந்த தீர்வு யோசனைகள் அதிகாரப் பகிர்வு தொடர்பான முக்கியமானதொரு நகர்வு என்பதனால் இதனை சர்வதேச சமூகம் உட்பட உள்நாட்டிலுள்ள சிறுபான்மைக் கட்சிகளின் பிரதிநிதிகள் பலரும் வரவேற்றுள்ளனர். இந்த தீர்வு யோசனைகளை உடனடியாக நடைமுறைப்படுத்த ஜனாதிபதி தீர்மானித்துள்ளார்.

13 ஆவது திருத்தச் சட்டத்திற்கு அமைய செய்து கொள்ளப்பட்ட இந்திய-இலங்கை உடன்படிக்கையைத் தொடர்ந்து அப்போதைய ஜனாதிபதி ஜே.ஆர். ஜயவர்தன வடக்கு, கிழக்கை இணைத்தார்.இது அரசியல் யாப்பிற்கு முரணானதெனக் கருத்திற்கொண்டு உச்ச நீதி மன்றம் இதற்கெதிராக அண்மையில் தீர்ப்பு வழங்கியிருந்தது எனவும் அமைச்சர் மேலும் தெரிவித்துள்ளார்.