தொண்டு நிறுவனங்கள் வன்னியில் இருந்து வெளியேற 20 ஆம் திகதிவரை கால அவகாசம்: மஹிந்த சமரசிங்க

ஐக்கிய நாடுகள் அமைப்பின் 75 வாகனங்கள் கிளிநொச்சியில் இருந்து வவுனியாவுக்கு கொண்டு வரப்பட்டுள்ளதாகவும் எதிர்வரும் 20 ஆம் திகதி வரை

சகல அமைப்புகள் மற்றும் வாகனங்களை வன்னியில் இருந்து விலகி கொள்ள கால அவகாசம் வழங்கியுள்ளதாகவும் அனர்த்த முகாமைத்துவ மற்றும் மனித உரிமைகள் அமைச்சர் மகிந்த சமரசிங்க தெரிவித்துள்ளார்.

ஐக்கிய நாடுகள் சபையின் இணை நிறுவனங்கள் உள்ளிட்ட தன்னார்வ நிறுவனங்கள் இலங்கையில் இயங்கினாலும் இயங்காவிட்டாலும் இடம்பெயர்ந்த மக்களுக்கு நிவாரணங்களை வழங்க தற்போதைய அரசாங்கம் அதிகபட்ச செயற்பாடுகளை முன்னெடுத்து வருவதாகவும் அவர் கூறியுள்ளார்.

சர்வதேச மன்னிப்புச் சபை போன்ற அமைப்புகள் எதனைக் கூறினாலும் இடம்பெயர்ந்துள்ள மக்கள் மற்றும் அரசசார்பற்ற நிறுவனங்களை பாதுகாக்க அரசு உரிய நடவடிக்கைகளை மேற்கொள்ளும். அமைச்சர் மகிந்த சமரசிங்க நேற்று (12) மல்வத்தை மஹாநாயகர் ஸ்ரீ சித்தார்த்த சுமங்கள தேரரைச் சந்தித்த பின்னர் இந்தக் கருத்துக்களைத் தெரிவித்துள்ளார்.

அரசசார்பற்ற நிறுவனங்கள் இலங்கை அரசாங்கத்தின் அழைப்பின் பேரிலேயே இலங்கைக்கு வருகின்றன. இதனால் அவை அரசின் சட்டவரையறைக்கு உட்பட செயற்பட வேண்டும் எனவும் அவர் கூறியுள்ளார்.

இது அரசசார்பற்ற நிறுவனங்களை நாட்டில் இருந்து விலகிக் கொள்ளுமாறு விடுத்த அறிவிப்பு அல்ல எனவும் அவர்கள் மோதல் நடைபெறும் பிரதேசங்களில் இருந்து மாத்திரம் விலகி வவுனியாவில் இருந்தவாறு செயற்படுமாறு மாத்திரமே அறிவிக்கப்பட்டுள்ளதாகவும் அமைச்சர் சமரசிங்க குறிப்பிட்டுள்ளார்.

http://www.tamilskynews.com/index.php?opti...&Itemid=108