அரசசார்பற்ற நிறுவனங்களின் வெளியேற்றம் தற்காலிகமாக இடைநிறுத்தம்: ஏற்படும் விளைவுகளுக்கு அரசாங்கம் பெறுப்பல்ல என்கிறார் கோதபாய

வன்னியிலிருந்து அரசசார்பற்ற நிறுவனங்கள் வெளியேறுவதற்கு எதிர்ப்புத் தெரிவித்து இடம்பெயர்ந்த மக்கள் நடத்திய தொடர் வீதிமறியல் போராட்டங்களைத் தொடர்ந்து வன்னியிலிருந்து வெளியேறும் முயற்சிகளை அரசசார்பற்ற நிறுவனங்கள் தற்காலிகமாக இடைநிறுத்தியுள்ளன.

மோதல்கள் உக்கிரமடைந்திருப்பதால் பாதுகாப்பு உத்தரவாதம் வழங்கமுடியாதெனக் கூறி வன்னியில் செயற்பட்டுவரும் அரசசார்பற்ற நிறுவனங்களை வெளியேறுமாறு பாதுகாப்பு அமைச்சு அறிவித்திருந்தது. இந்த அறிவிப்பை ஏற்று ஐ.நா. மனித உரிமை ஸ்தாபனங்கள் உட்பட பல அரசசார்பற்ற நிறுவனங்கள் வன்னியிலிருந்து வெளியேற ஆரம்பித்தன.

எனினும், ஐ.நா. ஸ்தாபனங்கள் உள்ளிட்ட அரசசார்பற்ற நிறுவனங்களை வெளியேறவிடாது வெள்ளிக்கிழமையும், சனிக்கிழமையும் பொதுமக்கள் வீதி மறியல் போராட்டத்தில் ஈடுபட்டதுடன், அரசசார்பற்ற நிறுவனங்களின் நுழைவாயில்களை மறித்து ஆர்ப்பாட்டத்திலும் ஈடுபட்டிருந்தனர். தம்மைக் கைவிட்டுவிட்டுப் போகவேண்டாமெனக் கோரி பெண்கள், சிறுவர்கள், வயதுமுதிர்ந்தவர்கள் உட்பட பலர் இந்தப் போராட்டங்களில் கலந்துகொண்டிருந்தனர்.

மக்களின் ஆர்ப்பாட்டங்களைத் தொடர்ந்து தமது தலைமையங்களுடன் தொடர்புகொண்ட அரசசார்பற்ற நிறுவனங்கள் வன்னியிலிருந்து வெளியேறுவதைத் தற்காலிகமாக இடைநிறுத்தின.

வன்னியிலிருந்து வெளியேறும் நடவடிக்கையைத் தற்காலிகமாக இடைநிறுத்தியிருப்பதுடன், அடுத்த கட்ட நடவடிக்கை பற்றி நியோர்க்கிலுள்ள தலைமையத்தின் பணிப்புரைக்குக் காத்திருப்பதாக கொழும்பிலுள்ள ஐ.நா. அலுவலகத்தின் பேச்சாளர் கோர்டன் வெய்ஸ் தெரிவித்துள்ளார்.

“தற்போதைய நிலைவரம் தொடர்பாக இலங்கை அரசாங்கத்துடன் நாங்கள் கலந்துரையாடியுள்ளதுடன், எமது நிலைப்பாட்டை தெளிவுபடுத்தியுள்ளோம். எமது நிலைப்பாடு குறித்து அரசாங்கத்துக்கு நன்கு தெரியும். வன்னியிலிருந்து வெளியேறவேண்டுமென்ற அரசாங்கத்தின் கோரிக்கையுடன் நாங்கள் முழுமையாக உடன்படுகின்றோம்” என அவர் கூறினார்.

வன்னியிலிருந்து ஐ.நா.ஸ்தாபனங்கள் முழுமையாக வெளியேறுவதாக அர்த்தப்படாது எனவும், பாதுகாப்பு அமைச்சின் வேண்டுகோளுக்கு அமையவே வெளியேவேண்டிய நிலை தமக்கு ஏற்பட்டதாகவும் ஐ.நா. அலுவலகம் தெரிவித்துள்ளது. வன்னியிலிருந்து அரசசார்பற்ற நிறுவனங்கள் வெளியேறக்கூடாதென்ற தமது கோரிக்கை ஐ.நா. தலைமையகத்துக்குத் தெரியப்படுத்தப்பட வேண்டுமென மக்கள் கோரிக்கை விடுத்திருந்ததாகவும், அவர்களின் கோரிக்கைக்கு அமைய தலைமையகத்துக்கு அறிவிக்கப்பட்டிருப்பதாகவும