வன்னியிலிருந்து வெளியேறாவிட்டால் தொண்டர் அமைப்புக்களின் பாதுகாப்புக்கு அரசு பொறுப்பல்ல அரசாங்கத்தின் சார்பில் அறிவிப்பு

உள்நாட்டு மற்றும் வெளிநாட்டு தொண்டர் அமைப்புகள் வன்னியில் இருந்து வெளியேறாமல் தொடர்ந்தும் அங்கு இருந்தால், அந்நிறுவனங்கள் மற்றும் அதன் பணியாளர்களுக்குரிய பாதுகாப்பிற்கான பொறுப்பை இலங்கை அரசு ஏற்காது. அந்த நிறுவனங்களின் பணியாளர்களது பாதுகாப்புக்கு இனி எந்த உத்தரவாதமும் கிடையாது.

இவ்வாறு பாதுகாப்பு அமைச்சின் செயலாளர் கோத்தபாய ராஜபக்ஷ ஆங்கில வார இதழ் ஒன்றுக்குத் தெரிவித்துள்ளார்.

இது தொடர்பாக அவர் மேலும் தெரிவித்தவை வருமாறு:

உள்ளூர் மற்றும் வெளிநாட்டு அரச சார்பற்ற நிறுவனங்கள் வன்னியில் அபிவிருத்திப் பணியில் ஈடுபட்டு வந்தன. அங்கு யுத்தம் தொடங்கியுள்ளதால் அப்பணிகளை அரச சார்பற்ற நிறுவனங்களால் முன்னெடுக்க முடியவில்லை.

இந்த யுத்த நேரத்தில் அரச சார்பற்ற நிறுவனங்கள் தொடர்ந்தும் அங்கு இருப்பது அந்நிறுவனங்களின் பாதுகாப்புக்கு அச்சுறுத்தலாக அமையும் என்பதால் நாம் அந்நிறுவனங்களை அங்கிருந்து வெளியேறி அரச கட்டுப்பாட்டுப் பகுதிக்குள் வருமாறு கேட்டிருந்தோம்.

எமது உத்தரவை ஏற்காமல் அந்நிறுவனங்கள் தொடர்ந்தும் வன்னியில் இருந்தால் அந்நிறுவனங்களின் பாதுகாப்புக்கான பொறுப்பை அரசால் ஏற்க முடியாது.

தொண்டு நிறுவனங்கள் வெளியேறினாலும்

வன்னி மக்களை கைவிடமாட்டோம்

குறிப்பாக வன்னியில் பணியாற்றும் ஐ.நா. அதிகாரிகளது பாதுகாப்பில் நாம் அதிக கவனம் செலுத்தியுள்ளோம்.

ஐ.நாவின் மனிதாபிமானப் பணிகளை அரச அதிபர்களிடம் ஒப்படைத்துவிட்டு வவுனியாவில் தங்களது அலுவலகத்தை அமைத்துக்கொள்ளுமாறு நாம் அவர்களுக்கு அறிவுறித்தியுள்ளோம். அதேபோல், ஏனைய அரச சார்பற்ற நிறுவனங்களின் பணியாளர்களுக்கும் அறிவுறுத்தியுள்ளோம்.

தற்போது வன்னியில் அரச நிர்வாகம் சீராக இருப்பதால் மனிதாபிமானப் பணிகள் பாதிப்படையா. அரச சார்பற்ற நிறுவனங்கள் வெளியேறினாலும் நாம் வன்னி மக்களை கைவிடமாட்டோம்.

நாம் கிழக்கைக் கைப்பற்றியபோது அங்கிருந்து வெளியேறிய ஒரு லட்சத்து 70 ஆயிரம் அகதிகளை நல்லவிதமாகக் கவனித்ததுபோல் வன்னியில் இருந்து வெளியேறும் அகதிகளையும் கவனிப்போம். அதற்கான அனைத்து ஏற்பாடுகளையும் நாம் செய்துள்ளோம்.

ஆகவே, அரச சார்பற்ற நிறுவனங்கள் அனைத்தும் வன்னியில் இருந்து உடன் வெளியேறுவது நல்லது என்றார்.

uthayan