சந்தேகநபரை 18 மாதங்கள் தடுத்துவைக்கும் வர்த்தமானி அறிவித்தல் நிராகரிப்பு--கோதபாய கொதிப்பு

சந்தேகநபர் ஒருவரை அவசரகாலச்சட்டத்தின் கீழ், நிறைவேற்று அதிகாரம் கொண்டவர் ஒன்றரை வருடங்கள் பொலிஸ் கட்டுப்பாட்டில் தடுத்துவைக்கப்பதற்கு அனுமதிக்கும் வர்த்தமானி அறிவித்தலை உயர்நீதிமன்றம் நிராகரித்துள்ளது.

சந்தேகநபர் ஒருவரை 90 நாட்களுக்கு பொலிஸாரின் கட்டுப்பாட்டில் தடுத்துவைத்து விசாரிப்பதற்கு அனுமதிப்பதற்கும், விளக்கமறியலில் வைத்திருப்பவரை மீண்டும் பொலிஸாரின் கட்டுப்பாட்டில் கொண்டுவருவதற்கும் சட்டமா அதிபருக்கு அதிகாரங்களை வழங்கும் வகையில் சட்டத்தில் மாற்றம் செய்யப்பட்டிருந்தது.

மாற்றுக் கொள்கைகளுக்கான கேந்திர நிலையத்தின் நிறைவேற்றுப் பணிப்பாளர் பாக்கியசோதி சரவணமுத்து தாக்கல் செய்திருந்த அடிப்படை உரிமை மீறல் மனுவை ஆராய்ந்த பின்னர் உயர்நீதிமன்றம் இந்த வர்த்தமானியை ரத்துச் செய்தது

வர்த்தமானி அறித்தலானது அடிப்படை மனித உரிமையை மீறும் செயலெனக் கூறி மாற்றுக்கொள்கைகளுக்கான நிலையத்தால் தாக்கல் செய்யப்பட்ட மனுவை பிரதம நீதியரசர் சரத் என்.சில்வா தலைமையிலான நீதிபதிகள் குழு நேற்று திங்கட்கிழமை விசாரணைக்கு எடுத்துக்கொண்டது.

அவசரகாலச் சட்டம் ஆண்டாண்டு காலமாக ஆட்சிக்கு வந்தவர்களால் மாற்றியமைக்கப்பட்டாகவும், இறுதியாக 2005ஆம் ஆண்டு ஓகஸ்ட் 13ஆம் திகதி மாற்றப்பட்ட புதிய அவசரகாலச்சட்ட விதிமுறைகளே தற்பொழுது அமுலில் இருப்பதாகவும் மனுதாரர்கள் சுட்டிக்காட்டியுள்ளனர்.

அவசரகாலச் சட்டத்தில் அண்மையில் ஏற்படுத்தப்பட்ட மாற்றத்துக்கமைய கைதுசெய்யும் ஒருவரை ஒரு வருடத்துக்கு மேலாகத் தடுத்துவைப்பதற்கான அதிகாரங்களை பாதுகாப்பு அமைச்சின் செயலாளருக்கு வழங்கப்பட்டுள்ளது.

கைதுசெய்யப்படும் ஒரு சந்தேகநபர் 90 நாட்களின் பின்னர் தடுத்துவைக்கப்படும் இடம் சிறைச்சாலையாகவே இருக்கவேண்டும் எனவும், அதனைவிடுத்து அரசாங்கத்தின் நிறைவேற்று அதிகாரத்தின் கீழ் பணியாற்றும் பொலிஸ்மா அதிபரோ அல்லது வேறெந்தநபரோ சந்தேகநபரைத் தடுத்துவைக்கும் இடத்தைத் தீர்மானிக்க முடியாது என அந்த மனுவில் சுட்டிக்காட்டப்பட்டுள்ளது.

அவசரகாலச் சட்டத்தின் கீழ் கைதுசெய்யப்படும் நபர் ஒருவர் தடுத்துவைக்கப்படும் இடத்தையும், தடுத்துவைக்கப்படும் காலத்தையும் நிறைவேற்று அதிகாரம் தீர்மானிப்பது ஏற்றுக்கொள்ளக்கூடியது இல்லையென அந்த மனுவில் குறிப்பிடப்பட்டுள்ளது.

கைதுசெய்யப்படும் நபரை பிணையில் விடுதலை செய்வதற்கு நீதவான் நீதிமன்ற நீதிபதி, சட்டமா அதிபரின் எழுத்துமூல அறிவித்தலுக்குக் காத்திருக்கவேண்டிய நிலை இருப்பதாகவும் மனுதாரர்கள் சுட்டிக்காட்டியுள்ளனர்.

http://www.tamilskynews.com/ http://www.tamilskynews.com/ http://www.tamilskynews.com/