இலங்கைப் பிரச்சனை: மக்களவைத் தேர்தலில் எதிரொலிக்கும்

தமிழக மக்களவைத் தேர்தலில் இலங்கைப் பிரச்சனை தொடர்பாக மத்திய, மாநில அரசுகள் இதுவரை எடுத்துள்ள நடவடிக்கைகள் தேர்தல் முடிவுகளை ஏற்படுத்தும் முக்கிய காரணங்களில் ஒன்றாக விளங்கும் என்று மக்கள் ஆய்வகம் நடத்திய கருத்துகணிப்பில் தெரிவிக்கப்பட்டுள்ளது.

மக்கள் ஆய்வகம் சார்பில் லயோலா கல்லூரி முதுகலை ஊடகக்தலைத்துறை மாணவர்கள் சார்பில் பேராசிரியர் டாக்டர் ராஜநாயகம் தலைமையில் தேர்தல் காலங்களில் மாநில அளவிலான கள ஆய்வு கருத்து கணிப்புகள் நடத்தப்படுகின்றன.

ஏப்ரல் 1-ம் தேதியில் இருந்து 10-ம் தேதி வரை 39 தொகுதிகளிலும் தொகுதிக்கு 150 பேர் வீதம், மொத்தம் ஐந்து ஆயிரத்து 850 வாக்காளர்களிடம் கருத்துகள் நடத்தப்பட்டது. இதன் முடிவுகள் குறித்து பேராசிரியர் ராஜநாயகம் நிருபர்களிடம் கூறியது.

இலங்கைத் தமிழர் பிரச்சனை நடைபெற உள்ள மக்களவைத் தேர்தலில் முக்கிய பிரச்சனையாக வாக்காளரிடம் உள்ளது என்றும், இதனை அடுத்து விலைவாசி உயர்வு, சட்டம்-ஒழுங்கு, மின்வெட்டு, வேலையில்லாத் திண்டாட்டம் ஆகியவை இடம் பெற்றுள்ளன என்றார்.

கடந்த 3 ஆண்டுகளில் திமுக ஆட்சியின் செயல்பாடுகள் குறித்து 47. 5 சதவீதம் வாக்காளர்கள் திருப்தி தெரிவித்துள்ளனர் என்றும், கடந்த 5 ஆண்டு கால காங்கிரஸ் தலைமையிலான ஆட்சி குறித்து 43.3 சதவீத வாக்காளர்கள் திருப்தி தெரிவித்துள்ளனர் என்றும் கூறினார்.

கருத்து கணிப்பின்படி திமுக அணிக்கு 34.5, அதிமுக அணிக்கு 34.9 தேமுதிகவுக்கு 12.3, பாஜக அணிக்கு 3.5 சதவீதம் பேர் வாக்காளர்கள் ஆதரவு அளித்துள்ளனர் என்றார்.

எந்த கூட்டணிக்கு வாக்கு அளிப்பதை என்பதை இன்னும் தீர்மானிக்காமல் 13.1 சதவீதம் வாக்காளர்கள் உள்ளனர் என்றும் கூறினார்.

திமுகவிற்கும், அதிமுவிற்கும் சம நிலையில் ஆதரவு உள்ளது என்றும் முடிவெடுக்காத வாக்காளர்களுடைய முடிவே வெற்றி-தோல்வியை தீர்மானிக்கும் என்றார்.

மக்களவைத் தேர்தலை தமிழக வாக்காளர்கள் ஒரு திருவிழாவாகவே கருதுகின்றனர் என்றும், தேர்தலை கொண்டாடுவதற்கு தயார் நிலையில் வாக்காளர்களின் மன நிலை உள்ளது என்றும், தேர்தலில் போட்டியிடுவோர் தங்களை நன்றாக ‘கவனிப்பார்கள்’ என்றும் தங்களுக்கு பணமாகவும், பரிசாகவும் நிறைய கிடைக்கும் என்ற எதிர்பார்ப்பு எல்லாத் தொகுதிகளிலும் பெரும் எதிர்பார்ப்புடன் காணப்படுகிறது என்றும் ராஜநாயகம் கூறினார்.

தேர்தல் வாக்குறுதிகளை குறித்து நிறைவேற்றாத கட்சியினர் மீது ஒரு வித தனிப்புணர்வு வாக்களர்களிடையே காணப்பட்டாலும், மின்வெட்டு போன்ற பிரச்சனைகளில் கடந்த செப்டம்பர் மாதம் காணப்பட்ட வெறுப்பும், கோபமும் வாக்காளர்களிடம் தற்போது இல்லை என்றும் புள்ளி விவரங்கள் தெரிவிப்பதாக கூறினார்.

இலங்கைத் தமிழர் பிரச்சனை நீரு பூத்த நெருப்பாக கனன்று கொண்டுள்ளதாகவும் இந்த பிரச்சனையை வாக்காளர்கள் மாநில பிரச்சனையாக கருதாமல் தேசிய பிரச்சனையாக கருதுவதை தெளிவாக உணர முடிகிறது என்றும் கூறினார்.

விடுதலைப் புலிகளுக்கும், தமிழீழ ஆதரவாளர்களுக்கும் வாக்காளர்களிடையே ஆதரவு பெருகி உள்ளது என்றும் குறிப்பிட்டார். திமுக, அதிமுக அணிகளுக்கு இடையே மையமான பிரச்சனைகள் பெரிய அளவில் எதுவும் இல்லாத சூழ்நிலையில், இலங்கைத் தமிழர் பிரச்சனையிலும், தனிப்பட்ட வாக்காளர்களை கவரும் வகையில், வேட்பாளர்கள் மேற்கொள்ளும் தந்திர நடவடிக்கைகளும், கவர்ச்சிகரமான அன்பளிப்புகளும், பண உதவிகளும், வெற்றியை நிர்ணயிக்கும் என்று பேராசிரியர் ராஜநாயகம் உறுதிபட தெரிவித்தார்.

நன்றி : சங்கம்லைவ்