கனரக ஆயுத பாவனை ‐ அரசாங்கத்தின் தீர்மானம் ஏற்றுக்கொள்ள முடியாது – ஐ.தே.க: பொதுமக்கள் இழப்புக்களை தவிர்க்கும் நோக்கிலேயே நிறுத்தப்பட்டது – அரசாங்கம்:

கனரக ஆயுத பாவனை தவிர்க்கப்பட வேண்டும் என்ற அரசாங்கத்தின் தீர்மானத்தை ஏற்றுக்கொள்ள முடியாதென ஐக்கிய தேசியக் கட்சி குறிப்பிட்டுள்ளது.

தமிழீழ விடுதலைப் புலிகளுடனான யுத்தம் இறுதிக் கட்டத்தை அடைந்திருந்கும் இந்தத் தருணத்தில் படையினரின் யுத்த இயலுமையை வரையறுக்கும் வகையிலான கட்டளைகள் பிறப்பிக்கப்படக் கூடாது என ஐக்கிய தேசியக் கட்சியின் பாராளுமன்ற உறுப்பினர் ரங்கே பண்டார தெரிவித்துள்ளார்.

கனரக ஆயுதப் பயன்பாட்டை தவிர்க்கும் நோக்கில் அரசாங்கம் எடுத்துள்ள தீர்மானம் ஒர் அரசியல் தீர்மானமாகவே கருதப்பட வேண்டுமென அவர் குறிப்பிட்டுள்ளார்.

இராணுவத் தீர்மானங்களை அரசியல்வாதிகள் எடுக்கக் கூடாது என அவர் சுட்டிக்காட்டியுள்ளார்.

சர்வதேச சமூகத்தின் அழுத்தங்களுக்கு கட்டுப்பட்டு அரசாங்கம் இந்தத் தீர்மானத்தை எடுத்துள்ளது.

தமிழீழ விடுதலைப் புலிகள் ஐக்கிய தேசியக் கட்சிக்கு பாரிய சேதத்தை ஏற்படுத்தியுள்ளதாக ரங்கே பண்டார குறிப்பிட்டுள்ளார்.

அதிகளவு கனரக ஆயுதங்களைப் பயன்படுத்தி தமிழீழ விடுதலைப் புலிகளை விரைவில் தோற்கடிக்க நடவடிக்கை எடுக்கப்பட வேண்டும் என அவர் மேலும் கோரிக்கை விடுத்துள்ளார்.

பொதுமக்கள் இழப்புக்களை தவிர்க்கும் நோக்கிலேயே கனரக ஆயுத பயன்பாடு நிறுத்தப்பட்டது – அரசாங்கம்:

பொதுமக்களுக்கு ஏற்படக் கூடிய இழப்புக்களை தவிர்க்கும் நோக்கிலேயே கனரக ஆயுத பயன்பாடு நிறுத்தப்பட்டதாக ஊடக அமைச்சர் அனுர பிரியதர்சன யாபா தெரிவித்துள்ளார்.

தமிழீழ விடுதலைப் புலிகள் தற்போது மிகவும் சிறிய நிலப்பரப்பிற்குள் சிக்கியிருப்பதாகவும், பொதுமக்கள் குறித்த பிரதேசத்தில் சிக்காதிருந்தால் மூன்று நாட்களுக்குள் யுத்தத்தை முடிவுக்குக் கொண்டு வர முடியும் எனவும் அவர் குறிப்பிட்டுள்ளார்.

இதனைத் தவிர வேறு எந்த காரணத்திற்காகவும் கனரக ஆயுதப் பயன்பாடு நிறுத்தப்படவில்லை என அவர் தெரிவித்துள்ளார்.

அசராங்கத்தின் சகல நடவடிக்கைகளிலம் ஐக்கிய தேசியக் கட்சி குறை கண்டு பிடிக்க எத்தனிப்பதாக அவர் சுட்டிக்காட்டியுள்ளார்.

பிரதான எதிர்க்கட்சி என்ற வகையில் இதனைவிட பொறுப்புணர்ச்சியுடன் ஐக்கிய தேசியக் கட்சி செயற்பட வேண்டுமென அவர் குறிப்பிட்டுள்ளார்.

GTN