பொய்ப் பிரசாரங்களுக்கு முஸ்லிம் மக்கள் ஏமாந்துவிடக் கூடாது - ஜனாதிபதி மஹிந்த தெரிவிப்பு

பொய்ப் பிரசாரங்களுக்கு முஸ்லிம் மக்கள் ஏமாந்துவிடக் கூடாது - ஜனாதிபதி மஹிந்த தெரிவிப்பு

வீரகேசரி நாளேடு 7/8/2009 10:08:09 PM - முஸ்லிம் மக்களுக்கு உயர் பாதுகாப்பையும், அவர்களது உரிமைகளையும் பெற்றுக் கொடுத்த ஒரே அரசாங்கம் எமது அரசாங்கமாகும். ஆனால், ஒரு சில குழுக்கள் அரசாங்கம் முஸ்லிம்களை அடக்கியாள முனைகிறதென பொய்ப் பிரசாரங்களை மேற்கொண்டு வருகிறது.

எனவே இப்பிரசாரங்களுக்கு முஸ்லிம் மக்கள் ஏமாறாது அரசுடன் புரிந்துணர்வுடன் செயற்படவேண்டும் என்று ஜனாதிபதி மகிந்த ராஜபக்ஷ தெரிவித்துள்ளார். அலரி மாளிகையில் நேற்று செவ்வாய்க்கிழமை நடைபெற்ற முஸ்லிம் பிரமுகர்களுடனான சந்திப்பின் போதே ஜனாதிபதி இவ்வாறு தெரிவித்துள்ளார்.

அங்கு ஜனாதிபதி மேலும் உரையாற்றுகையில், கடந்த முப்பது வருடங்களாக வரலாற்றில் என்றுமில்லாதவாறு முஸ்லிம் மக்கள் பல இன்னல்களை சந்தித்து வந்தனர். வடக்கு கிழக்கில் வாழ்ந்த முஸ்லிம் மக்கள் விரட்டியடிக்கப்பட்டார்கள்.

இரண்டு மணிநேரத்திற்குள் யாழ்ப்பாணத்தில் வாழ்ந்த முஸ்லிம் மக்கள் விடுதலைப் புலிகளால் வெளியேற்றப்பட்டனர். இருபத்திரண்டாயிரம் பேர் இவ்வாறு தமது சொந்த இடங்களை விட்டு வெளியேறினர்.

ஆனால் இன்றைய சந்ததியினருக்கு இந்தக் கசப்பான உண்மை தெரியாது.

அன்று ஆட்சியதிகாரத்திலிருந்த ஆட்சியாளர்கள் முஸ்லிம் மக்களை இன்னல்களிலிருந்து பாதுகாக்கவில்லை. காத்தான்குடி பள்ளிவாசலில் மக்கள் கொலை செய்யப்பட்டனர். இதேபோன்று கிழக்கிலிருந்தும் முஸ்லிம்களை வெளியேற்றும் சூழ்ச்சிகள் முன்னெடுக்கப்பட்டன.

இதன்போது அம்மக்களுக்காக எவரும் குரல் கொடுக்கவில்லை. அன்று ஈராக் மீது குண்டுத் தாக்குதல் நடத்தப்பட்டு முஸ்லிம் மக்கள் கொலை செய்யப்பட்டதை எதிர்த்து ஐ.தே.கட்சி ஆட்சியில் அமைச்சராக இருந்த இம்தியாஸ் பாக்கீர் மாக்கார் பிரேரணையொன்றை கொண்டு வருவதற்கு முனைந்தார்.

ஆனால், அரசாங்கத் தரப்பிலிருந்து இதற்கு ஆதரவு கிடைக்கவில்லை. ஆனால், நான் அன்று எதிர்க்கட்சியில் இருந்தபோதும் ஆதரவு வழங்கினேன். இவ்வாறு தான் முஸ்லிம் மக்களுக்கு ஆதரவு வழங்கினோம்

Edited July 8, 200916 yr by கறுப்பி