முப்படைகளின் பிரதானி என்ற பதவியிலிருந்தும், சிறிலங்கா இராணுவத்திலிருந்தும், பதவி விலகுவதற்கான இராஜினாமாக் கடிதத்தை சிறிலங்கா ஜனாபதிக்கு நேற்று அனுப்பிவைத்தார் முன்னாள் இராணுவத் தளபதி சரத் பொன்சேகா.

இவரது ராஜினாமா கடிதம் கிடைத்ததை ஜனாதிபதிச் செயலகம் உறுதி செய்திருந்தது. அவரது பதவி விலகலுக்கான காரணங்களாக பதினாறு காரணங்களைக் குறிப்பிட்டிருந்தார். அந்தப் பதினாறு காரணங்களும் இப்போது ஊடகங்களுக்குத் தெரியவந்துள்ளது. சரத் பொன்சேகா ஜனாதிபதி மீது தொடுத்திருக்கும் கனைச் சரங்களாகவோ , அல்லது குற்றச் ஷரத்துக்களாகவோ கறிப்பிடக் கூடிய அந்தப பதினாறு காரணங்களாவன;

1) விடுதலைப்புலிகளுடனாக போர் முடிவுற்ற பின்னர் அரசுக்கு எதிரான ஆட்சிக்கவிழ்ப்பில் சிறிலங்கா இராணுவம் ஈடுபடவுள்ளதாக உங்களிடம் தெரிவிக்கப்பட்ட ஆதாரமற்ற கதைகளை நம்பி, என்னை இராணுவ தளபதி பதவியிலிருந்து நீக்கினீர்கள். சிறிலங்கா இராணுவத்தின் 60 ஆம் ஆண்டு நிறைவு தினத்துக்கு முன்னர் நான் இராணுவ தளபதி பதவியிலிருந்து நீக்கப்பட்டமை எனக்கு மிகுந்த மனஉளைச்சலை தந்துள்ளது.

2) யாழ் மாவட்ட தளபதியாக மூன்று வருடங்கள் பணியாற்றிய - திறமைவாய்ந்த - மேஜர் ஜெனரல் சந்திரசிறியை அடுத்த இராணுவ தளபதியாக நியமிக்குமாறு நான் பிரேரித்தும்கூட, அந்த பிரேரணை நிராகரிக்கப்பட்டு, படைக்கட்டமைப்பில் எனது உத்தரவுக்கு மரியாதை அற்ற சூழ்நிலையை தாங்கள் ஏற்படுத்தினீர்கள்.

3) படைகளின் பிரதானி என்ற பாரிய பொறுப்புவாய்ந்த பதவியை எனக்கு வழங்கியது போன்று மக்கள் ஏமாற்றப்பட்டார்களே தவிர, அந்த பதவியில் எந்த அதிகாரமும் எனக்கு தரப்படவில்லை. போர் முடிவுற்ற இரண்டு வாரங்களிலேயே இந்த பதவியை என்னிடம் திணிப்பதற்காக பாதுகாப்பு அமைச்சின் செயலர் என்னை இராணுவ தளபதி பதவியிலிருந்து விலகுமாறு அழுத்தம் தந்தார்.

4) மேற்படி பதவி எனக்கு முன்னர் இருந்த அதிகாரங்களை விட அதிகமான அதிகாரங்களை வழங்கும் என்று கூறி புதிய பதவிக்கான நியமனக்கடிதம் தரப்பட்டு அதில் எனது அதிகாரங்களும் தெரிவிக்கப்பட்டிருந்தன. ஆனால், பதவி எனக்கு தரப்பட்ட பின்னர், அது தனியோ படைகளின் பொறுப்புக்களை ஒழுங்கு செய்யும் எந்த அதிகாரமும் இல்லாத பதவி என்று தெரிவிக்கப்பட்டது. அவ்வாறு அதிகாரங்களை உடைய பதவியை தருவதற்கு உங்களுக்கு என் மீது நம்பிக்கை இருக்கவில்லை. அது எனக்கு பாரிய மனத்தாக்கத்தை ஏற்படுத்தியது.

5) தேசிய பாதுகாப்பு சபை கூட்டமொன்றில் எல்லா படைத்தளபதிகளுக்கும் முன்னால், பாதுகாப்பு அமைச்சின் ஆலோசகர் பேசுகையில் - " எல்லா அதிகாரங்களையும் படைகளின் பிரதானி என்ற பதவிக்கு வழங்குவது ஆபத்தானது" - என்று கூறியமை, என்னை எல்லா படைத்தளபதிகளுக்கு முன்னால் வைத்து அவமதித்தது போல அமைந்தது.

6) விடுதலைப்புலிகளுடனான போர் முடிவடைந்த பின்னர் நடைபெற்ற முதலாவது தேசிய பாதுகாப்பு சபை கூட்டத்தில் நீங்கள் பேசுகையில் - இராணுவத்திற்கு இனி ஆட்சேர்ப்பு அவசியமில்லை என்று கூறி - " நாடு சக்திவாய்ந்த இராணுவத்தின் பிடியில் உள்ளது என்று மக்கள் எண்ணுகிறார்கள்" என்று ஒரு வார்த்தை கூறினீர்கள். இந்த விடயத்தை நான் உங்களிடமிருந்து எதிர்பார்க்கவே இல்லை. பல்லாயிரக்கணக்கான படையினரின் உயிரை காணிக்கையாக்கி மிகப்பெரிய இராணுவ வெற்றி ஒன்றை ஈட்டிதந்த படையினரின் மீது நம்பிக்கையில்லாமல், நீங்கள் பேசிய இந்த விடயத்தை மிகவும் அருவருக்கத்தக்கதாகவே நான் உணர்ந்தேன்.

7) தற்போது இராணுவ தளபதியாக பதவியேற்றுள்ளவர், எனது மனைவி பணிபுரியும் இராணுவ அமைப்பில் வேலை செய்யும் கனிஷ்ட இராணுவ உத்தியோகத்தர்கள் முதல் போரின்போது முக்கிய பங்காற்றிய முக்கிய தளபதிகள் வரை அனைவரையும் தனது இஷ்டத்துக்கேற்ப இடமாற்றம் செய்துவருகிறார். அதனை தடுத்து நிறுத்தமுடியாத அதிகாரமற்றவராக என்னை காண்பிப்பதாகவும் இந்த நடவடிக்கை அமைந்துள்ளது.

8) இந்த மனவேதனைகள் ஒருபுறமிருக்க, நாட்டை பயங்கரவாதத்திலிருந்த மீட்டெடுத்த இராணுவத்தினரே ஆட்சியை கவிழ்ப்பதற்கு திட்டமிடுகிறார்கள் என்ற ஒரு வதந்தியை நம்பி கடந்த ஒக்டோபர் 15 ஆம் திகதி இந்திய அரசிடம் உதவிகோரிச்சென்று, அந்நாட்டு அரச படைகளும் இங்கு வந்து ஆட்சிக்கவிழ்ப்பை பாதுகாக்க தயாராகியிருந்ததாக தெரிவிக்கப்பட்டது. இது எமது இராணுவத்தினரின் நன்மதிப்பையும் அவர்களது தொழில்பக்தியையும் அவமதிக்கும் செயலாகும்.

9) என்னால் உருவாக்கி வளர்த்தெடுக்கப்பட்ட படையணி என்ற காரணத்திற்காக இராணுவத்தின் சிங்க ரெஜிமென்ட் அணி பாதுகாப்பு அமைச்சுக்கு பாதுகாப்பு வழங்கும் பணியிலிருந்து நீக்கப்பட்டுள்ளது. கடந்த நான்கு வருடங்களாக இந்த பணியிலிருந்த சிங்க ரெஜிமென்ட் அணியினரின் பணிகள் - நான் அண்மையில் அமெரிக்கா சென்றிருந்தவேளை - எனக்கு தெரியாமல் மாற்றப்பட்டிருக்கின்றன. இது என் மீதும் படையினர் மீதும் உள்ள நம்பிக்கையீனத்தையே காண்பிக்கிறது.

10) சிங்க ரெஜிமென்ட் படையணி நீக்கப்பட்டு பாதுகாப்பு அமைச்சின் பாதுகாப்புக்கு கஜபாகு படையணி வரவழைக்கப்பட்டுள்ளமை, இராணுவத்தின் படையணிகளுக்கு மத்தியில் விசுவாச ஏற்றத்தாழ்வு உண்டு என்று காண்பிப்பது போன்ற நடவடிக்கையாகும்.

11) நாட்டின் பெருவெற்றிக்கு நான் இவ்வளவு பெரிய பங்களிப்பை நல்கியிருந்தும்கூட, நான் ஒரு துரோகி என்று செய்தியாகவும் வதந்தியாகவும் அரசின் பக்கமுள்ள அரசியல்வாதிகளும் மற்றும் பலரும் கதைகளை பரப்பிவருகின்றனர்.

12) நான் அண்மையில் வெளிநாடு சென்றிருந்த காலப்பகுதியில் - ஏகபோக அதிகாரங்கள் உள்ள பதவியாக அரசினால் வர்ணிக்கப்பட்ட - எனது படைகளின் பிரதானி என்ற இடத்துக்கு எவருமே பதில் அதிகாரியாக நியமிக்கப்படவில்லை. இதிலிருந்து இந்த பதவிக்கு அரசாங்கம் இந்தப்பதவிக்கு எவ்வளவு முக்கியத்துவம் வழங்கியிருக்கிறது என்பது புலனாகிறது.

13) மிகவும் கட்டுக்கோப்புடனும் ஒழுக்கத்துடனும் நான் கட்டிவளர்த்த சிறிலங்கா இராணுவம் இன்று சின்னாபின்னப்பட்டுப்போயிருக்கிறது. படைகளிலிருந்து இராணுவத்தினர் தப்பியோட்டம், படைக்கட்டமைப்புகளிடையே சீரற்றநிலை, தளபதிகளிடையே முரண்பாடு என எத்தனையோ பிரச்சினைகளால் சிறிலங்கா இராணுவம் இன்று ஈடாடுகிறது. கடந்த இரண்டு மாதங்களில் இராணுவத்துக்கு புதிதாக சேர்த்துக்கொள்ளப்பட்டவர்களின் எண்ணிக்கையிலும் பார்க்க இராணுவத்திலிருந்து தப்பியோடியவர்களின் எண்ணிக்கை அதிகம்.

14) நாட்டு மக்கள் சுதந்திரமாக வாழவேண்டும் என்று படையினரின் மிக்பெரிய தியாகத்தால் பெறப்பட்ட வெற்றி இன்று, அரசாங்கத்தின் ஆற்றலற்ற போக்கினால் நாட்டுமக்களுக்கு எதையும் வழங்காத நிலையை ஏற்படுத்தியுள்ளது. போரினால் இடம்பெயர்ந்து முகாம்களில் துனப்பப்படும் மக்களது விடயத்தில் அரசிடம் முறையான திட்டமில்லை. அவர்களை அவர்களது உறவினர்களது வீடுகளிலாவது தங்க அனுமதிக்கும் நடவடிக்கை எதையும் அரசு மேற்கொள்ளவில்லை.

15) எனது தலைமையின் கீழ் எமது படைகள் இராணுவ வெற்றியை பெற்றுத்தந்துள்ளன. இதன் மூலம் தமிழ்மக்களது மனங்களை வெல்லும்வகையில் நாட்டில் அமைதியை ஏற்படுத்தாவிட்டால், இந்த வெற்றி உதாசீனப்படுத்தப்பட்டு, எதிர்காலத்தில் மீண்டும் கிளர்ச்சிக்கு முகம் கொடுக்க நாடு தள்ளப்படும்.

16) போரின் முடிவில் இந்த நாட்டில் அமைதி ஏற்படும் என்ற எதிர்பார்ப்பில் நாட்டுமக்கள் உள்ளனர். ஆனால், லஞ்சமும் ஊழலும் அதிகரித்து ஊடகங்களுக்கு எதிராக அடக்குமுறை அதிகரித்து ஜனநாயக உரிமைகள் நசுக்கப்படுகின்றன. இதனால், தாய்நாட்டுக்காக எமது படையினர் மேற்கொண்ட அர்ப்பணிப்புகள் நிச்சயம் துஷ்பிரயோகமாகப்போகின்றன.

இந்த பதினாறு காரணங்களில் எட்டாவதாகக் குறிப்பிடப்பட்டுள்ள காரணத்தில் தெரிவிக்கபட்டிருக்கும் " கடந்த ஒக்டோபர் 15 ஆம் திகதி இந்திய அரசிடம் உதவிகோரிச் சென்று, அந்நாட்டு அரச படைகளும் இங்கு வந்து ஆட்சிக்கவிழ்ப்பை பாதுகாக்க தயாராகியிருந்ததாக தெரிவிக்கப்பட்டது" என்ற வரிகள் இலங்கையின் உள் நாட்டுவிவகாரத்தில் எவ்வளவுதூரம் இந்தியா உட்பட்டிருக்கின்றது என்பதற்குத் தகுந்த ஆவணமாகக் கொள்ளலாம். சரத் ஜனாதிபதித் தேர்தலில் பொது வேட்பாளராக நியமிக்கப்பட்டால் சிங்கள மக்கள் மத்தியில் சரத்தின் பிரச்சாரத்துக்கு இது மேலும் வலுச்சேர்க்கும் எனவும் கொள்ளலாம்.

மேலும் செய்திகளுக்கு

இந்த மனவேதனைகள் ஒருபுறமிருக்க, நாட்டை பயங்கரவாதத்திலிருந்த மீட்டெடுத்த இராணுவத்தினரே ஆட்சியை கவிழ்ப்பதற்கு திட்டமிடுகிறார்கள் என்ற ஒரு வதந்தியை நம்பி கடந்த ஒக்டோபர் 15 ஆம் திகதி இந்திய அரசிடம் உதவிகோரிச்சென்று, அந்நாட்டு அரச படைகளும் இங்கு வந்து ஆட்சிக்கவிழ்ப்பை பாதுகாக்க தயாராகியிருந்ததாக தெரிவிக்கப்பட்டது. இது எமது இராணுவத்தினரின் நன்மதிப்பையும் அவர்களது தொழில்பக்தியையும் அவமதிக்கும் செயலாகும்

மகிந்தாவும் சரத்தும் சேர்ந்து இந்தியாவுக்கு ஆப்பு வைக்கத்தான் இந்த நாடகம் போல.

ஜக்கிய தேசியக்கட்சியை ஒரம்கட்ட சர்த்தை பாவிக்கினம் போல.

இந்தியாவைச் சூழ இராணுவத்தளபதிக்ள் ஜனாதிபதியாக வந்தால் இந்தியாவுக்கு ஒரு அச்சுறுத்தல் இருந்துகொன்டே இருக்கும்