வடக்கு – கிழக்கு பகுதிகளில் உள்ள ஐ.நா அலுவலகங்களை மூட சிறீலங்கா அரசு திட்டம்

* Tuesday, December 7, 2010, 3:31

வடக்கில் கிளிநொச்சி மற்றும் கிழக்கில் திருமலை ஆகிய பகுதிகளில் உள்ள ஐக்கிய நாடுகள் சபை அலுவலகங்களை மூடுவதற்கு சிறீலங்கா அரசு திட்டமிட்டுள்ளதாக யாழ்ப்பாணத்தில் உள்ள பொது அமைப்புக்கள் தெரிவித்துள்ளன.

இது தொடர்பில் அவை மேலும் தெரிவித்துள்ளதாவது:

கிளிநொச்சி மற்றும் திருமலை ஆகிய பிரதேசங்களில் இயங்கிவரும் யுனிசெஃப் மற்றும் யு.என்.எச்.சி.ஆர் ஆகியவற்றின் அலுவலகங்களை இந்த வருட இறுதிக்குள் மூடுமாறு சிறீலங்கா அரசு உத்தரவிட்டுள்ளது.

அதன் நிர்வாக அலுவலகங்களை வடக்கு – கிழக்கு பகுதிகளுக்கு வெளியில் மாற்றுமாறு அரசு உத்தரவிட்டுள்ளது. அரச சார்பற்ற நிறுவனங்களை முற்றுமுழுதாக வடக்கு – கிழக்கு பகுதிகளில் இருந்து அகற்றும் நடவடிக்கையின் தொடர்ச்சியாகவே இது மேற்கொள்ளப்படுகின்றது.

போர் உக்கிரமாக நடைபெற்ற காலப்பகுதியில் வன்னியில் இருந்து ஐ.நா உதவி அமைப்புக்களை வெளியேற்றிய சிறீலங்கா அரசு போர் நிறைவுபெற்ற பின்னரும் அந்த நிறுவனங்களுக்கு மீண்டும் இயங்குவதற்கு அனுமதிகளை வழங்கவில்லை.

பளை மற்றும் கிளிநொச்சிப் பகுதிகளில் நான்கு பாடசாலைகள் யுனிசெஃப் இன் உதவியில் இயங்கி வருகின்றன. உலக உணவுத்திட்ட அமைப்பு வன்னியில் உள்ள மக்களுக்கு உணவுகளை வழங்கி வருகின்றது.

சிறீலங்கா அரசின் அழுத்தங்களை தொடர்ந்து வவுனியா, மட்டக்களப்பு மற்றும் யாழப்பாணம் ஆகிய பகுதிகளில் உள்ள தமது அலுவலகங்களில் பணியாற்றும் பணியாளர்களின் எண்ணிக்கைகளை ஐ.நா நிறுவனங்கள் குறைத்து வருவதாக அவை மேலும் தெரிவித்துள்ளன.

tamilthai.com

ஐ.நா. அலுவலகங்கள், செஞ்சிலுவை சங்கம் போன்றவை சர்வதேச பலம் பொருந்திய தொண்டு நிறுவனங்கள்.

அவர்களே.... இவ்வளவு காலமாகியும் ஸ்ரீலங்காவில் நடந்த போர்க்குற்றங்களை நிரூபிக்க முயலவில்லை....

இன்னும் காலக்கெடு விதித்து காலத்தை கடத்திக் கொண்டுள்ளார்கள்.

இவர்கள் நினைத்திருந்தால் எப்பவோ..... சிங்களவன் திருந்தியிருப்பான்.