வட-கிழக்கு நிர்வாகத்தினை முடிந்தால் கூட்டமைப்பிடம் ஒப்படைத்து பாருங்கள்...

முடிந்தால் வடக்கு கிழக்கு நிர்வாகத்தை தமிழ்த் தேசியக் கூட்டமைப்பிடம் ஒப்படைத்துப் பாருங்கள் என சவால் விடுத்துள்ள தமிழ் தேசியக் கூட்டமைப்பு மட்டக்களப்பு மாவட்ட பாராளுமன்ற உறுப்பினர் பா. அரியநேத்திரன், நாங்கள் அபிவிருத்தியுடன் தமிழ் மக்களின் அபிலாஷைகளையும் ஒரு வருடத்தில்

நிறைவேற்றிக் காட்டுவோம் எனவும் தெரிவித்தார்.

தென் பகுதியில் இருந்து வடக்கு கிழக்குக்கு வருகின்ற அமைச்சர்கள் தமிழ்த் தேசியக் கூட்டமைப் பின் பலத்தை அறியாது கட்டச் சம்பலுக்கு ஒப்பிட்டு ஏளனமாகப் பேசுவதை விடுத்து தமிழ்த் தேசியக் கூட்டமைப்புத்தான் வடக்கு கிழக்கு தமிழ் மக்களின் அரசியல் சக்தி என்பதனை புரிந்துகொள்ள வேண்டும் எனவும் அவர் தெரிவித்தார். சனிக்கிழமை அம்பாறை மாவட்டத்தின் தாண்டியடியில் இடம் பெற்ற தேர்தல் பிரசாரக் கூட்டத்தில் கலந்துகொண்டு உரையாற்றும் போதே அவர் இவ்வாறு தெரிவித்தார்.

அவர் அங்கு மேலும் கருத்துத் தெவிக்கையில், கிழக்கு மாகாணத்திற்கு வருகை தரும் தென்பகுதியைச் சேர்ந்த அமைச்சர்களுக்கு பாலும் தேனும் தயிரும் இறாலும் நண்டும் விருந்துபசாரத்தின் போது கிழக்கிலங்கை அதிகாரிகளாலும் அரசியல்வாதிகளாலும் வழங்கப்படுகின்றன.

ஆனால், அந்த அமைச்சர்களுக்கு அவர்களின் விருப்பமான உணவான சம்பல் வழங்கப்படுவதில்லை. இதனால்தான், குறித்த அமைச்சர்கள் தமிழ்த் தேசியக் கூட்டமைப்பினை சம்பலாகப் பயன்படுத்துகிறார்கள்.

தென்பகுதி அமைச்சர்கள் தமிழ்த் தேசியக் கூட்டமைப்பினை கட்டச் சம்பலாக விமர்சித்தாலும் கண்ணியமுள்ள தலைவர்கள் தமிழ் தேசியக் கூட்டமைப்பினர்தான் என வடக்கு- கிழக்கு தமிழ் மக்கள் ஏற்றுக் கொண்டிருக்கின்றனர்.

இங்கு அபிவிருத்தி என்று கூறுவதெல்லாம் ஜப்பான் நாடு கொடுத்த நிதியில் போடப்பட்ட வீதிகளும், சீன நாட்டின் உதவியுடன் நிர்மாணிக்கப்படும் பாலங்களும் இந்திய அரசாங்கத்தினால் கட்டி வழங்கப்பட்ட வீடுகளுமேயாகும். இதைத் தான் இந்த அமைச்சர்கள் அபிவிருத்தி என்று கூறுகிறார்கள்.

ஆனால், இலங்கை அரசாங்கத்தினால் 225 பாராளுமன்ற உறுப்பினர்களுக்கு வழங்கப்படுகின்ற இந்த வருடத்திற்கான பன்கப்படுத்தப்பட்ட வரவு செலவுத்திட்டத்தின் கீழான நிதி இதுவரை இன்னும் ஒதுக்கப்படவில்லை.

வெறுமனே தண்ணீர்ப் போத்தல்களையும் நிவாரணப் பொதிகளையும் வழங்கினால் மட்டும் தமிழ் மக்களின் அபிலாஷைகள் தீர்ந்து விடாது. கடந்த 61 வருடங்களாக தமிழ் மக்கள் கண்ணீலும் செந்நீரீலும் வெந்து போயிருக்கிறார்கள். அவர்களின் வேதனைகள் தீர்வதாக இருந்தால் புரையோடிப் போயிருக்கின்ற இனப்பிரச்சினைக்கு நிரந்தர மான அரசியல் தீர்வு வழங்கப்பட வேண்டும்.

அமைச்சர்களே! முடிந்தால் வடக்கு - கிழக்கு நிர்வாகத்தை தமிழ்த் தேசியக் கூட்டமைப்பிடம் ஒப்படைத்துப் பாருங்கள். நாங்கள் அபிவிருத்தியுடன் தமிழ் மக்களின் அபிலாஷைகளையும் நிறைவேற்றிக் காட்டுவோம். தென் பகுதியில் இருந்து வடக்கு கிழக்குக்கு வருகின்ற அமைச்சர்கள் தமிழ்த் தேசியக் கூட்டமைப்பின் பலத்தை அறி யாது கட்டச்சம்பலுக்கு ஒப்பிட்டு ஏளனமாகப் பேசுவதை விடுத்து தமிழ் தேசியக் கூட்டமைப்புத்தான் வடக்கு கிழக்குத் தமிழ் மக்களின் அரசியல் சக்தி என்பதனை புரிந்து கொள்ள வேண்டும்.

எதிர்வரும் நடைபெறவிருக்கின்ற உள்ளூராட்சி மன்றத் தேர்தலிலும் தமிழ்த் தேசியக் கூட்டமைப்பின் பலத்தை தமிழ் மக்கள் நிரூபித்துக் காட்டுவார்கள் என்பதில் எந்தச் சந்தேகம் இல்லை என அவர் மேலும் தெரிவித்தார்.

http://akkinikkunchu.com/new/