“Mr.Ten Percent” - பசில் ராஜபக்ச!

“Mr.Ten Percent” என்ற பட்டப் பெயரைக் கொண்டிருந்தார் பசில் ராஜபக்ச! - விக்கிலீக்ஸ் தகவல்!!

சிறிலங்காவின் மகாவலி அபிவிருத்தி அமைச்சில் பசில் ராஜபக்ச பணியாற்றிய போது, ஒவ்வொரு திட்டத்திலும் தனக்கு 10 சதவீதம் தரகுப்பணம் கேட்பதால் அவருக்கு “Mr.Ten Percent” என்ற பட்டப் பெயர் சூட்டப்பட்டதாக விக்கிலீக்ஸ் இயைத்தளம் தகவல் வெளியிட்டுள்ளது.

அத்துடன், காலி பாடசாலை ஒன்றில் கல்வி கற்ற போது, அப்பாடசாலையில் இருந்து அவர் பலமுறை இடைநிறுத்தப்பட்டதாக அவரின் பாடசாலை நண்பர்கள் கூறியதாகவும் விக்கிலீக்ஸ் தெரிவித்துள்ளது. 2007ஆம் ஆண்டு மே மாதம் 15ஆம் திகதி சிறிலங்காவுக்கான அமெரிக்கத் தூதுவராக அப்போது பணியாற்றிய ரொபேர்ட் ஓ பிளேக்கினால் அமெரிக்க இராஜாங்கத் திணைக்களத்துக்கு அனுப்பி வைக்கப்பட்ட இரகசிய தகவல் குறிப்பை மேற்கோள் காட்டியே விக்கிலீக்ஸ் இத்தகவலை வெளியிட்டுள்ளது.

இது குறித்து மேலும் தெரிவிக்கப்பட்டுள்ளதாவது:

'பசில் ராஜபக்சவுக்கு நெருக்கமான ஆலோசகர்கள் என எவரும் இல்லை. அவருக்கு நண்பர்களை விட எதிரிகள் தான் அதிகம். ஏனெனில் அவர் நபர்களை விலைக்கு வாங்கும் பழக்கத்தைக் கொண்டவர்.

சிறிலங்காவின் மகாவலி அபிவிருத்தி அமைச்சில் பசில் ராஜபக்ச பணியாற்றிய போது, ஒவ்வொரு திட்டத்திலும் தனக்கு 10 சதவீதம் தரகுப்பணம் கேட்பதால் அவருக்கு “Mr.Ten Percent” என்ற பட்டப் பெயர் சூட்டப்பட்டது.

சிறிலங்கா ஜனாதிபதி மகிந்த ராஜபக்ச அரசியல் விவகாரங்கள் குறித்து பசில் ராஜபக்சவுடன் தான் கலந்துரையாடுவார். பெரிய கல்வியறிவோ, துறைசார்ந்த அனுபவங்களையோ அவர் கொண்டிராத போதிலும், சிறிலங்கா ஜனாதிபதிக்கு இவரே ஆலோசனைகள் வழங்குகின்றார்.

2005ஆம் ஆண்டு ஜனாதிபதித் தேர்தலின் போது தமிழ் மக்களின் வாக்குகளைப் பெறுவதற்காக விடுதலைப் புலிகளுடன் உடன்பாடு செய்து கொண்டமை, 2007ஆம் ஆண்டில் இடம்பெற்ற அமைச்சரவை மாற்றம் மற்றும் எதிர்க்கட்சி நாடாளுமன்ற உறுப்பினர்களை ஆளும் கட்சிக்குள் இழுத்துக் கொண்டமை போன்றவற்றில் பசில் ராஜபக்ச முக்கிய பங்கு வகித்துள்ளார்.

மாத்தறையிலும், காலியிலும் கல்வி கற்ற பசில் ராஜபக்ச, காலி பாடசாலை ஒன்றில் கல்வி கற்ற போது பாடசாலையில் இருந்து அவர் பலமுறை இடைநிறுத்தப்பட்டதாக அவரின் பாடசாலை நண்பர்கள் கூறியுள்ளனர்.

1970ஆம் ஆண்டு மகிந்த ராஜபக்ச முதல் முறையாக பெலியத்தை தொகுதியில் போட்டியிட்ட போது, சிறிலங்கா சுதந்திரக் கட்சியில் இணைந்த பசில் ராஜபக்ச அவருக்கு ஆதரவாகப் பணியாற்றியிருந்தார். ஆனால் 1977ஆம் ஆண்டில் ஐக்கிய தேசியக் கட்சியில் இணைந்த பசில் ராஜபக்ச தனது சகோதரருக்கு எதிராகவே அரசியல் வேலைகளைச் செய்தார்.

சிறிலங்காவின் மகாவலி அபிவிருத்தி அமைச்சில் பணியாற்றிய போது அவருக்கு “Mr.Ten Percent” என்ற பட்டப் பெயர் சூட்டப்பட்டது. அவர் தற்போது வகிக்கின்ற பதவியிலும் குறிப்பிடத்தக்க ஊழல்களை செய்துள்ளதாக குற்றச்சாட்டுகள் சுமத்தப்பட்டுள்ளன.

1977ஆம் ஆண்டில் ஐக்கிய தேசியக் கட்சியில் இணைந்து பசில் ராஜபக்ச, சில ஆண்டுகளில் மீண்டும் சிறிலங்கா சுதந்திரக் கட்சியில் இணைந்து கொண்டார். அத்துடன், 1990ஆம் ஆண்டில் அவர் மீண்டும் ஐக்கிய தேசியக் கட்சிக்கு மாறினார்.

அதேவேளை, சிறிலங்கா சுதந்திரக் கட்சியில் அவர் மீண்டும் இணைந்து கொள்ள முற்பட்டபோது, அவரை கட்சியில் இணைத்துக் கொள்ள சந்திரிகா குமாரதுங்க மறுத்து விட்டார். இதன் பின்னரே அவர் அமெரிக்கா சென்றிருந்தார்.

2005ஆம் ஆண்டு ஜனாதிபதித் தேர்தலில் மகிந்த ராஜபக்ச போட்டியிட்ட போதே அவர் மீண்டும் இலங்கைக்கு திரும்பினார்' என ரொபேர்ட் ஓ பிளேக்கினால் அமெரிக்க இராஜாங்கத் திணைக்களத்துக்கு அனுப்பி வைக்கப்பட்ட இரகசிய தகவல் குறிப்பில் குறிப்பிடப்பட்டுள்ளதாக விக்கிலீக்ஸ் தெரிவித்துள்ளது.

http://ponguthamil.com/showcontentnews.aspx?sectionid=1&contentid=ef1c8036-3111-49eb-86cb-0a5382e72d43