அதிகாரப் பகிர்வு: ராஜபட்ச உறுதியளிக்கவில்லை

அதிகாரப் பகிர்வு: ராஜபட்ச உறுதியளிக்கவில்லை'

இலங்கையில் தமிழர்களுக்கு அதிகாரப் பகிர்வு அளிப்பது குறித்து இந்திய எம்.பி.க்கள் குழுவிடம் எந்தவிதமான உறுதியையும் அதிபர் ராஜபட்ச அளிக்கவில்லை என்று "தி ஐலேண்ட்' பத்திரிகை தெரிவித்துள்ளது.

""அரசியல் சட்டத்தின் 13-வது திருத்தப்படி அதிகாரப் பகிர்வு அளிக்கப்படும் என்று இலங்கைக்கு வந்த இந்திய மக்களவை எதிர்க்கட்சித் தலைவர் சுஷ்மா ஸ்வராஜ் தலைமையிலான குழுவிடம் ராஜபட்ச உறுதியளித்ததாக கூறப்படுவதை இலங்கை அரசு திட்டவட்டமாக மறுத்திருக்கிறது.

எனினும், அதற்கு மேலும் செய்வதற்கு அதிபர் தயாராக இருக்கிறார்'' என்று அந்தப் பத்திரிகையில் வெளியாகியுள்ள செய்தியில் கூறப்பட்டிருக்கிறது. அப்படியொரு உறுதிமொழி கோரப்படவுமில்லை, தரப்படவுமில்லை என்று இலங்கையின் அதிகார வட்டாரங்கள் தெரிவித்ததாக அந்த இதழ் குறிப்பிட்டுள்ளது.

கடந்த சனிக்கிழமை இந்திய எம்.பி.க்கள் குழுவுடனான காலை உணவின்போது 1987-ம் ஆண்டில் 13-வது சட்டத் திருத்தத்தை இலங்கை அதிபர் ஜெயவர்த்தன மீது இந்தியா எப்படித் திணித்தது என்பது குறித்து ராஜபட்ச பேசியிருக்கிறார். 13-வது அரசியல் சாசனத் திருத்தப்படி மாகாண முதல்வர்களின் கட்டுப்பாட்டில் காவல்துறை இருப்பது குறித்து இந்திய வம்சாவளி தமிழர்களின் தலைவரான ஆறுமுகன் தொண்டமான் போன்றோர் அதிருப்தி தெரிவித்ததாக ராஜபட்ச அப்போது குறிப்பிட்டார்.

பெரும்பாலான முதல்வர்கள் பெரும்பான்மையினத்தைச்சேர்ந்தவர்களாக இருப்பதால், இந்திய வம்சாவளி தமிழர்களை ஒடுக்குவதற்கு அவர்கள் காவல்துறையை பயன்படுத்தக்கூடும் என்று தொண்டமான் அச்சம் தெரிவித்ததாகக் கூறப்படுகிறது.

13-வது திருத்தத்தை அமல்படுத்த வேண்டும் என்கிற பிரசாரத்தை இந்தியத் தூதர் அசோக் கே.காந்தா தீவிரப்படுத்தியதாகவும் இலங்கை அரசு வட்டாரங்களை மேற்கோள்காட்டி தி ஐலேண்ட் கூறியிருக்கிறது.

""கடந்த மார்ச் 22-ம் தேதி ஐ.நா. மனித உரிமைக் குழுவில் இலங்கைக்கு எதிரான தீர்மானம் வாக்கெடுப்புக்கு வந்தபோது, 13-வது திருத்தம் குறித்து உறுதி தரும்படி இலங்கைக்கு இந்திய அரசு கோரிக்கை விடுத்தது'' என்று அந்தச் செய்தியில் குறிப்பிடப்பட்டிருக்கிறது.

1987-ம் ஆண்டு ஏற்பட்ட இந்தியா-இலங்கை ஒப்பந்தத்துக்குப் பிறகு 13-வது அரசியல் சாசனத் திருத்தம் கொண்டுவரப்பட்டது. இதன்படி மாகாண அரசுகளுக்கு குறிப்பிட்ட அளவு தன்னாட்சி அதிகாரம் அளிப்பதுடன் காவல்துறை, நிலம் போன்றவை தொடர்பான அதிகாரங்களையும் வழங்கியது. ஆனால், இந்தச் சட்டத் திருத்தத்தை அமல்படுத்துவதற்கு தொடர்ந்து வந்த அரசுகள் மறுத்தன.

நிலம் மற்றும் காவல்துறை ஆகியவற்றின் மீதான அதிகாரங்களை மாகாணங்களுக்கு வழங்க முடியாது என்று அடுத்தடுத்து வந்த ஆட்சியாளர்கள் கூறினர். இலங்கையைப் பொருத்தவரை 80 சதவீத நிலம் மத்திய அரசுக்குச் சொந்தமானது. மீதியுள்ள 20 சதவீத நிலம் தனியாருக்குச் சொந்தமானது.

மாகாண அரசுகளுக்கு நிலங்கள் மீது எந்த வகையான உரிமையும் கிடையாது.

நிலத்தின் மீது மாகாணங்களுக்கு உரிமையளிக்கப்பட்டால், தமிழர்கள் அதிகம் வசிக்கும் வடக்கு மற்றும் கிழக்கு மாகாணங்கள் நில உரிமையை எடுத்துக் கொண்டு தன்னிச்சையாக விடுதலை அறிவிப்பை வெளியிட்டுவிடக்கூடாது என்ற அச்சம் மத்திய அரசுக்கு இருக்கிறது. காவல்துறையின் மீதான கட்டுப்பாட்டை மாகாணங்களுக்கு வழங்காததற்கும் இதுதான் காரணம்.

Dinamani