'ஒன்றுபட்ட இலங்கைக்குள் உரிமைகள் கிடைக்காது என்பதை உலக சமூகத்துக்கு நிரூபிக்க வேண்டும்'

'ஒன்றுபட்ட இலங்கைக்குள் உரிமைகள் கிடைக்காது என்பதை உலக சமூகத்துக்கு நிரூபிக்க வேண்டும்'

ஒன்றுபட்ட இலங்கை என்ற அமைப்புக்குள் தமிழர்கள் தமது உரிமைகளைப் பெறுவது சாத்தியமற்றது என்பதை தாம் சர்வதேச சமூகத்துக்கு நிரூபிக்க வேண்டும் என்று இலங்கை தமிழரசுக் கட்சியின் தலைவரான நாடாளுமன்ற உறுப்பினர் இரா. சம்பந்தன் தெரிவித்துள்ளார்.

இலங்கை தமிழரசுக் கட்சியின் 14 வது தேசிய மாநாட்டில் மட்டக்களப்பில் உரையாற்றுகையிலேயே தமிழ் தேசியக் கூட்டமைப்பின் தலைவருமான சம்பந்தன் அவர்கள் இவ்வாறு தெரிவித்துள்ளார்.

இலங்கை உள்நாட்டுப் போரின் போது இலங்கை அரசாங்கத்துக்கு இராணுவ மற்றும் இராஜதந்திர ரீதியில் ஆதரவினை வழங்கிய சர்வதேச சமூகம், அப்போது இலங்கை அரசாங்கம் தமக்கு வழங்கிய உறுதிமொழிகளை நிறைவேற்றுமாறு இலங்கை அரசாங்கத்துக்கு தற்போது அழுத்தங்களை கொடுக்கத் தொடங்கியுள்ளதாகக் கூறியுள்ள சம்பந்தன் அவர்கள், போர் முடிந்த பின்னர் தமிழர்களுக்கு நியாயமான அரசியல் உரிமைகள் வழங்கப்படும் என்பதே அந்த வாக்குறுதிகள் என்றும் குறிப்பிட்டார்.

ஆனால், போர் முடிந்து 3 ஆண்டுகள் ஆனநிலையிலும், அந்த வாக்குறுதிகளை இலங்கை அரசாங்கம் வழங்கத் தவறியதால், சர்வதேச சமூகம் இலங்கையின் மீது தற்போது அழுத்தங்களை பிரயோகிக்கத் தொடங்கியுள்ளது என்றும், ஆகவே இந்தத் தருணத்தில் தமிழ் மக்கள் பொறுமை காக்க வேண்டும் என்றும் அவர் கூறினார்.

''அதேவேளை, மறுபுறமாகக் கூறினால், ஒன்றுபட்ட இலங்கைக்குள் எமக்கான உரிமைகளைப் பெறுவது சாத்தியமற்றது என்பதை நாம் உலக சமூகத்துக்கு நிரூபிக்க வேண்டும்'' என்றும் சம்பந்தர் கூறினார்.

அத்துடன், ''தாம் எடுக்கும் முயற்சிகளில் வெற்றி பெற முடியாது என்பதை அனைத்துலக சமூகம் தானாகவே உணரும் வரை நாம் பொறுமை காக்க வேண்டும்'' என்றும் இரா. சம்பந்தன் கூறினார்.

சர்வதேச சமூகத்துடன் நாம் எமது உறவுகளை பலப்படுத்தி அதன் மூலம் தமிழர் பிரச்சினைக்கு உருப்படியான ஒரு தீர்வை பெற முடியும் என்றும் அவர் குறிப்பிட்டுள்ளார்.

அதேவேளை தமிழர் பிரச்சினைக்கான தீர்வு யோசனை என்பது சர்வதேச சமூகத்தால் ஏற்கப்படக் கூடியதாகவும், அனைத்து தரப்பாலும் நிராகரிக்கப்பட முடியாத நியாயப்பாடு உடைய ஒன்றாகவும், குறிப்பாக தமிழர் தாயகத்தில் வாழும் முஸ்லிம் மக்களால் ஏற்றுக்கொள்ளப்படக் கூடிய ஒரு கட்டமைப்பாக அது அமைய வேண்டும் என்றும் சம்பந்தர் கூறியுள்ளார்.

அத்தகைய தீர்வானது முஸ்லிம்களின் சமூக, பொருளாதார, அரசியல் அபிலாசைகளப் பூர்த்தி செய்வதாகவும் அமைய வேண்டும் என்றும் தமிழரசுக் கட்சியின் தலைவர் தெரிவித்துள்ளார்.

ஞாயிற்றுக்கிழமை மட்டக்களப்பில் நடைபெற்ற அக்கட்சியின் மகாநாட்டில் வடக்கு கிழக்கு உட்பட நாட்டின் பல பாகங்களிலுமிருந்து பெரும் எண்ணிக்கையிலான ஆதரவாளர்களும் உறுப்பினர்களும் கலந்து கொண்டனர்.

BBC - Thanks