திருகோணமலை சம்பூர் பிரதேசத்திலிருந்து இடம்பெயர்ந்த மக்களை ஏழு இடங்களில் மீள்குடியேற்றத் திட்டம்.

[Thursday, 2013-02-21 08:54:34]

 

திருகோணமலை சம்பூர் பிரதேசத்திலிருந்து இடம் பெயர்ந்துள்ளவர்களை மீளக்குடியமர்த்துவதெற்கென ஏழு இடங்கள் அடையாளம் காணப்பட்டிருப்பதாக திருமலை மாவட்டச் செயலாளர் டி.டி.ஆர். தசில்வா தெரிவித்தார். சம்பூர் பிரதேசத்தின் நான்கு கிராம சேவையாளர் பிரிவுகள் பொருளாதார வலயமாக பிரகடனப்படுத்தப்படவுள்ளதையடுத்து அப்பகுதிகளில் வசித்து வந்த 1086 குடும்பங்களைச் சேர்ந்த 3 ஆயிரத்து 464 பேரும் மேற்படி இடங்களில் மீளக்குடியமர்த்தப்படவிருப்பதாகவும் அவர் கூறினார்.

  

இடம்பெயர்ந்துள்ளவர்கள் மூதூர் பிரதேச செயலாளர் பிரிவிற்குள்ளேயே மீளக்குடியமர்த்தப்படும் வகையிலேயே அதற்கான நடவடிக்கைகள் முன்னெடுக்கப்பட்டு வருவதாகவும் அவர் தெரிவித்தார். கடந்த 2006ம் ஆண்டு மாவிலாறில் இராணுவத்தினர் மனிதாபிமான நடவடிக்கைகளை ஆரம்பித்திருந்த சந்தர்ப்பத்தில் திருமலை மாவட்டத்திலிருந்து 38 ஆயிரத்து 474 குடும்பங்களைச் சேர்ந்த ஒரு இலட்சத்து 38 ஆயிரத்து 664 பேர் இடம்பெயர்ந்திருந்தனர். குறிப்பாக மூதூர் பிரதேச செயலாளர் பிரிவிலிருந்து மாத்திரம் 17 ஆயிரத்து 331 குடும்பங்களைச் சேர்ந்த 65 ஆயிரத்து 170 பேர் இடம்பெயர்ந்திருந்தனர். இருப்பினும் இவர்கள் கட்டம் கட்டமாக தமது சொந்த இடங்களில் மீளக்குடியமர்த்தப்பட்டுள்ளனர். தற்போது மேற்படி மூவாயிரத்து 464 பேர் மாத்திரமே மீளக்குடியமர்த்தப்படவுள்ளதாகவும் அவர் கூறினார்.