அடிப்படை வசதிகளின்றி கல்வியைத் தொடரும் சின்னச் சாளம்பன் மாணவர்கள்

[தமிழரசு]

ஒட்டுசுட்டான் சின்னச் சாளம்பன் ஈஸ்வரன் வித்தியாலய மாணவர்கள் அடிப்படை வசதிகளின்றி , தகரக் கொட்டகைக்குள் கல்வியைத் தொடர்ந்து வருகின்றனர். இது பற்றிய பிரதேச மக்களின் தகவலையடுத்து வடமாகாணசபை உறுப்பினர் துரைராசா ரவிகரன் நேரில் சென்று மேற்படி நிலைமையை உறுதிப்படுத்தினார். 

 

அங்கு அவர் கருத்துத் தெரிவிக்கையில் ,

 

தரம் 5 வரை , சுமார் 65 மாணவர்கள் கல்வி கற்கும் ஈஸ்வரன் வித்தியாலயத்தின் நிலை கவலைக்கிடமாக உள்ளது. அங்கு சென்று நிலைமையை நேரில் அவதானித்ததுடன் அப்பாடசாலை அதிபரையும் சந்தித்து குறைகளின் தரவுகளைக் கேட்டறிந்தேன். அப்பாடசாலையானது பழைய தகரங்களால் அமைக்கப்பட்டுள்ளது. கூரையில் பல இடங்களில் துளைகள் காணப்படுவதால், மழை பெய்யும் போது , கல்விச் செயற்பாடுகள் பாதிக்கப்படுகின்றன.

 

காற்றடிக்கும்போதும் அவ்வப்போது தகரங்கள் அள்ளுண்டு போகின்றன. பாடசாலைக்கருகில் மின் கம்பங்கள் மின் வழங்ககூடிய நிலையில் இருந்தும், இன்னும் மின்சாரம் வழங்கப்படவில்லை. இது தவிர பாடசாலைக்கருகில் உள்ள குழாய்க் கிணறு பழுதடைந்து ஒரு வருடமாகியும், பலருக்கு அறிவித்தும் இது வரை திருத்துவதற்கு நடவடிக்கை எடுக்கப்படவில்லை. அந்தப்பகுதியில் 15 இற்கும் மேற்பட்ட குடும்பங்கள் குடிதண்ணீருக்கு படும் சிரமங்களை அறியமுடிந்தது.

 

எனினும் துணுக்காய் வலயக் கல்விப் பணிப்பாளரின் முயற்சியால் பாடசாலையினுள் தண்ணீர் கொள்கலன், கை கழுவும் பீடம், மலசலகூடம் உட்பட சில வேலைகள் செய்யப்பட்டுள்ளன. ஆயினும் கட்டடவசதி உள்ளிட்ட பல பிரச்சினைகள் அங்கு இன்னும் தீர்க்கப்படாத நிலை தான் நிலவுகிறது. பாடசாலையின் நிலைமையை சம்பந்தப்பட்டவர்களின் கவனத்திற்கு கொண்டுவந்துள்ளேன். கூடிய விரைவில் குறைகள் நிவர்த்தி செய்யப்படும் என எதிர்பார்க்கிறேன் என்றார்.

 

 

 

 

 

 

 

http://www.sankathi24.com/news/37857/64//d,fullart.aspx

[விவசாயி விக்]

இப்படியான சமூக நலன் சார்ந்து வெளியிடும் செய்திகளோடு தொடர்புகளையும் வெளியிட்டால் வாசகர்கள் தொடர்பு கொண்டு உதவ ஏதுவாக இருக்கும்.