சாம்பிராணி உற்பத்திகள் வெற்றியா தோல்வியா ?

[shanthy]

சாம்பிராணி உற்பத்திகள் வெற்றியா தோல்வியா ?

 

2012 நேசம் உற்பத்திகள் தொழில் முயற்சியினை பரீட்சார்த்தமாக ஆரம்பித்திருந்தோம். இதில் உணவு உற்பத்தியாக மிக்சர் மட்டக்களப்பினை தளமாகக் கொண்டும் மற்றும் சாம்பிராணி உற்பத்தியினை அம்பாறையிலும் ஆரம்பித்திருந்தோம்.

25.05.2012அன்று அம்பாறையில் சாம்பிராணி உற்பத்திக்கான ஒருநாள் பயிற்சி வகுப்பினை நடாத்தி அதில் பயிற்சி பெற்றவர்களை வைத்து செயற்படத் தொடங்கியது நேசம் சாம்பிராணி உற்பத்தி.

இதுவொரு சிறு கைத்தொழில் முயற்சியாகையால் ஆரம்ப வருமானமும் உற்பத்திக்கு ஏற்பவே எனும் அடிப்படையில் தொடங்கப்பட்டது. தொழிலில் ஈடுபட்ட 11 பெண்களுக்கும் மாதம் 4ஆயிரம் ரூபாய் வருவாயை தரக்கூடியதாக முதலில் நடைபெறத் தொடங்கியது. இத்தோடு உணவு உற்பத்திகளிலும் 11பேரையும் ஈடுபடுத்தும் நோக்கில் ஆரம்பிக்கப்பட்டது. பயிற்சி பெற்ற 11பேருடன் மேலும் நான்குபேர் இணைந்து 15பேருடன் சாம்பிராணி உற்பத்தி ஆரம்பமானது.

நாளடைவில் பங்கு கொண்டிருந்த பெண்கள் ஆளாளுக்கு முரண்பட்டுக் கொண்டிருந்தார்கள். இவ் நிருவாகத்தின் பொறுப்பாக நியமிக்கப்பட்டிருந்தவருக்கு சாம்பிராணி உற்பத்தியைக் கவனிப்பதிலும் விட ஆளாளுக்கு நாளுக்கொரு முறைப்பாட்டோடு வரும் பெண்களை சமாளிப்பதே பெரும் தலைவலியாகியது.

15பேரிலும் 8பேர் நாளடைவில் தங்களுக்கு மாதம் 10ஆயிரம் சம்பளம் தந்தால் மட்டுமே தங்களால் சாம்பிராணி உற்பத்தியில் ஈடுபட முடியுமென நிபந்தனை விதித்தார்கள். எவ்வித வருமானமும் இன்றி எம்மால் மாதாந்தம் 15பேருக்கும் 150000.00(ஒருலட்சத்து ஐம்பதாயிரம் ரூபா) வழங்க நிதிவசதியில்லை. இந்த இழுபறியில் எம்மால் தொடர்ந்து இழுபட முடியாது போனது. ஒவ்வொருவராக விலகி 5மாதத்தில் 4பேர் மட்டும் மிஞ்சியிருந்தார்கள்.

தொழிலைத் தொடர விரும்பிய 4பெண்களும் தனித்தனியே வீடுகளில் இருந்து தொடர்ந்து சாம்பிராணி உற்பத்தியில் ஈடுபடவிரும்பி விண்ணப்பித்திருந்தனர்.

ஒரு நிர்வாக ஒழுங்கில் இயங்க மறுத்தவர்களைத் தவிர்த்து தனித்தனியே சாம்பிராணியை உற்பத்தி செய்ய விரும்பிய 4பெண்களுக்கும் உற்பத்திப் பொருட்களை பகிர்ந்தளித்து அவர்களை தனித்தனியே செயற்படவிட்டோம்.

சாம்பிராணி உற்பத்திப் பொருட்களோடு ஒருவருக்கு ஒரு தையல் மெசின் , இன்னொருவருக்கு கோழிவளர்ப்பு உதவி, மற்றைய இருவருக்கும் ஆடுவளர்ப்பிற்கு 30ஆயிரம் ரூபாவும் முதலீடாக வழங்கியிருந்தோம்.

சாம்பிராணி உற்பத்தியை பகுதிநேர உற்பத்தியாகவும் மற்றும் நிரந்தர வாழ்வாதார உதவியாக வழங்கப்பட்ட தையல் மெசின் , கோழிவளர்ப்பு , ஆடுகள் மூலம் தற்போது அன்றாடம் தேவைகள் பிள்ளைகளின் கல்வியை சமாளிக்கும் நிலமைக்கு வளர்ந்துள்ளார்கள்.

தற்போது இதில் ஒருவர் தனக்கு கிடைத்த மேற்படி உதவிகள் மூலம் கிடைத்த வருமானத்தில் சேமித்த பணத்தில் வீட்டுத் தோட்டமொன்றையும் அமைத்து தனது பிள்ளைக்கான கல்வியை உணவை வழங்கும் நிலமையிலிருந்து சற்று உயர்ந்து மேம்பட்டுள்ளார்.

சாம்பிராணி உற்பத்திக்கான தங்கள் நிதியுதவியை பிரான்சிலிருந்து சுவி அவர்கள் 50யூரோவும், அவுஸ்ரேலியாவிலிருந்து றட்ணா ராசாத்தி அவர்கள் 100அவுஸ்ரேலிய டொலர்களும் உதவியிருந்தார்கள். அவர்களது உதவியில் கிடைத்த உற்பத்திப் பொருட்கள் தொடர்ந்து சாம்பிராணி உற்பத்தியை செய்ய விரும்பியவர்களுக்கான உற்பத்திப் பொருட்களாக வழங்கப்பட்டது.

மேற்கொண்டு இவ்வுற்பத்தியை அதிகரிக்க நிதியாதரவும் மேலதிகமாக இல்லாது போனது. அத்தோடு தொழிலில் ஈடுபட வருவோர் தாங்கள் கேட்கும் சம்பளத்தை தருமாறு எம்மை பெரும் தொழில் நிறுவன உயரத்தில் எண்ணிக் கொண்டு வருவதாலும் சாம்பிராணி உற்பத்தி 6மாதங்களுடன் தோல்வியடைந்து போனது. மற்றும் இப்போது போல 2வருடங்கள் முன்னால் எமக்கான பணியாள் வளமும் இல்லை.

 சாம்பிராணி உற்பத்தியின் ஆரம்பம் பயிற்சி பற்றிய செய்தி இணைப்பு கீழே :-

http://nesakkaram.org/ta/%E0%AE%A8%E0%AF%87%E0%AE%9A%E0%AE%95%E0%AF%8D%E0%AE%95%E0%AE%B0%E0%AE%AE%E0%AF%8D-%E0%AE%86%E0%AE%A4%E0%AE%B0%E0%AE%B5%E0%AE%BF%E0%AE%B2%E0%AF%8D%E0%AE%A8%E0%AF%87%E0%AE%9A%E0%AE%AE%E0%AF%8D/