வடக்கு, கிழக்கு கிரைம் ரவுண்டப்!

பூநகரி பிரதேசத்தில் சீனப் பிரஜை இருவரை பொலிஸார் கைது செய்துள்ளனர்.சட்டவிரோதமான முறையில் வியாபாரத்தில் ஈடுபட்டிருந்த போது குறித்த பிரஜைகளை பொலிஸார் கைது செய்துள்ளனர். சுற்றுலா வீசாக்களின் மூலம் நாட்டுக்குள் பிரவேசித்து வர்த்தக நடவடிக்கைகளில் ஈடுபட்டதாக சீனப் பிரஜைகள் மீது குற்றம் சுமத்தப்பட்டுள்ளது. போலி நகைகளை குறித்த நபர்கள் விற்பனை செய்து கொண்டிருந்த போது பொலிஸார் கைது செய்துள்ளனர்.சந்தேக நபர்கள் வவுனியா நீதிமன்றில் முன்னிலைப்படுத்தப்பட்டனர்.சந்தேக நபர்களை எதிர்வரும் 24ம் திகதி வரையில் விளக்க மறியலில் வைக்குமாறு நீதவான் உத்தரவிட்டுள்ளார்.

  

அட்டாளைச்சேனை விபத்தில் இளைஞர் பலி!

அட்டாளைச்சேனையில் நேற்று இடம்பெற்ற மோட்டார் சைக்கிள் விபத்தில் இளைஞர் ஒருவர் உயிரிழந்த்துடன், மற்றொரு இளைஞர் படுகாயமடைந்து ஆபத்தான நிலையில் அக்கரைப்பற்று வைத்தியசாலையில் அனுமதிக்கப்பட்டுள்ளார். நேற்று பிற்பகல் 3.00 மணியளவில் அட்டாளைச்சேனை மீனோடைக்கட்டு வளைவில் இந்த விபத்து இடம்பெற்றுள்ளது. இரு இளைஞர்கள் சாய்ந்தமருதில் இருந்து அக்கரைப்பற்று நோக்கி பயணித்த மோட்டார் சைக்கிள் வேகக் கட்டுப்பாட்டை இழந்து மின் கம்பம் ஒன்றில் மோதியே இந்த விபத்து இடம்பெற்றுள்ளது. இதன்போது சாய்ந்தமருது 13ஆம் பிரிவைச் சேர்ந்த முஹம்மட் சாஜஹான் (வயது 26) என்பவர் உயிரிழந்துள்ளார். திருக்கோவில் பொலிஸ் நிலைய குற்றத்தடுப்பு பிரிவு பொறுப்பதிகாரி முஹம்மட் அமீரின் புதல்வரான இவர் கடந்த வாரம் கட்டாரில் இருந்து விடுமுறையில் நாடு திரும்பியிருந்தார். இந்த விபத்து தொடர்பில் அக்கரைப்பற்று பொலிஸார் விசாரணைகளை மேற்கொண்டுள்ளனர்.

 

 

கிணற்றுக்குள் கிளைமோர் மீட்பு!

கிளிநொச்சி ரயில் நிலைய வளாகக் கிணற்றுக்குள் இருந்து கிளைமோர்க் குண்டு ஒன்று இன்று மீட்கப்பட்டுள்ளது. கிணற்றை சுத்தம் செய்யும் போதே குறித்த கிளைமோர்க் குண்டு மீட்கப்பட்டுள்ளது.கிணற்றுக்குள் மேலும் பல குண்டுகள் மற்றும் வெடிக்காத பொருட்கள் இருக்கலாம் என்ற சந்தேகத்தில் கிணற்றை துப்பரவு செய்யும் பணி தற்காலிகமாக இடைநிறுத்தப்பட்டுள்ளது. இந்த விடயம் குறித்து இரானுவத்தினருக்கு தகவல் வழங்கப்பட்டுள்ளது. படையினரே இனி கிணற்றினை துப்பரவு செய்யும் பணியில் ஈடுபடவுள்ளனர்.

வங்கியில் பணம் எடுத்துக் கொண்டு திரும்பிய யுவதியைக் காணவில்லை!

மட்டக்களப்பு,களுவாஞ்சிகுடி பொலிஸ் பிரிவுக்குட்பட்ட செட்டிபாளையத்தில் இருந்து மட்டக்களப்பு நகரில் உள்ள தனியார் வங்கியில் பணம் எடுத்துக் கொண்டு வீடு திரும்பிக் கொண்டிருந்த இளம் யுவதி ஒருவர் காணாமல்போயுள்ளதாக களுவாஞ்சிகுடி பொலிஸ் நிலையத்தில் முறையிடப்பட்டுள்ளது.செட்டிபாளையம் பிரதான வீதியை சேர்ந்த சிவலிங்கம் வைஸ்ணவி (21வயது) என்ற இளம்பெண் மட்டக்களப்பில் உள்ள தனியார் வங்கியில் பணம் எடுப்பதற்காக சனிக்கிழமை காலை சென்றுள்ளார். குறித்த பெண் குறித்த வங்கிக்குசென்று பணத்தினை மீள எடுத்துக் கொண்டு சென்றுள்ள நிலையிலும் இதுவரையில் குறித்த பெண் வீடு வந்துசேரவில்லையென பொலிஸ் நிலையத்தில் முறையிடப்பட்டுள்ளது.

 

 

http://seithy.com/breifNews.php?newsID=107570&category=TamilNews&language=tamil