அதிகாரத்தை பகிர மறுப்பது தமிழீழத்திற்கு வழிவகுக்குமா? வட மாகாண சபை - இன்றுடன் ஒருவருடம்!

அதிகாரத்தை பகிர மறுப்பது தமிழீழத்திற்கு வழிவகுக்குமா? வட மாகாண சபை - இன்றுடன் ஒருவருடம்!

குளோபல் தமிழ் செய்திகளுக்காக பார்த்தீபன்:-

வடக்கு மாகாண சபைத் தேர்தல் நடந்து தமிழ் தேசியக் கூட்டமைப்பு வடக்கில் ஆட்சி அமைத்து இன்றுடன் ஒரு வருடமாகின்றது. வட மாகாண சபையுடன் இனப்பிரச்சினையை முடக்கி விடலாம் என எதிர்ப்பார்த்த இலங்கை அரசின் எண்ணம் ஈடேறவில்லை.

இலங்கை இனப்பிரச்சினையில் தமிழ் மக்களுக்கு தீர்வினை வழங்கும் முகமாக இலங்கை அந்திய ஒப்பந்தத்தின்படி 13ஆவது திருத்தச்சட்டம் கொண்டுவரப்பட்டு மாகாண சபை முறைமை கொண்டுவரப்பட்டது.

வடக்கு கிழக்கு மாகாண சபை தேர்தல் நடைபெற்று அமைக்கப்பட்ட ஆட்சி கலைக்கப்பட்ட பின்னர் 25 வருடங்களின் பின்னர் பிரிக்கப்பட்ட வடக்கு மாகாண சபைக்கான தேர்தல் நடைபெற்றது.

மாகாண சபைக|ளுக்கு காணி, காவல்துறை உள்ளிட்ட அதிகாரங்களை வழங்க வேண்டும் என சர்வதேச தரப்பினால் அழுத்தம் கொடுக்கப்பட்ட நிலையில் 13இற்கு அப்பால் செல்லுவேன் என்ற தன் வாக்குறுதியையும் ராஜபக்ச இன்னமும் நிறைவேற்றவில்லை.

எந்தவொரு அதிகாரமுமற்ற நிலையில் வடக்கு கிழக்கில் தமிழ் மக்களுக்கு நடக்கும் அநீதிகள் எத்தனையும் கட்டுப்பாடுத்த முடியாத நிலைகளில் வடக்கு கிழக்கு மாகாண சபைகள் உள்ளன.

வடக்கு மாகாண சபை தமிழ் தேசியக் கூட்டமைப்பின் வசமுள்ள கடந்த ஒரு வருடத்திற்குள்ளேயே பல காணி அபகரிப்புக்கள், இராணுவ தலையீடுகள் எனப் பல விடயங்கள் நடந்தேறிவிட்டன.

எதனையும் தடுத்து நிறுத்த முடியாது கையாலாகாத சபையாக அதிகாரமற்ற சபையாக வடக்கு மாகாண சபை காணப்படுகிறது. இந்த விடயம் சர்வதேச அளவில் முக்கியமாக பேசப்படுகிறது.

தமிழ் மக்களுக்கு அதிகாரத்தை பகிர்ந்தளிக்க வேண்டும் என சர்வதேச சமூகம் இலங்கைக்கு எடுத்துக் கூறுகிறது. மாகாண சபைகளுக்குக்கூட பாரபட்சமின்றி அதிகாரத்தை பகிர்ந்தளிக்காத இலங்கை அரசு எவ்வாறு தமிழர்களுக்கு அதிகாரப் பரவலாக்கத்தை அளிக்கும் என்ற கேள்வி சர்வதேச அளவில் எழுந்துள்ளது.

இலங்கை அரசாங்கம் தொடர்ந்தும் இதனை நிராகரித்து தமிழ் மக்களை அழித்தொழிக்கும் நடவடிக்கையில் ஈடுபட்டால் தமிழர்களின் உச்சபட்ச கோரிக்கையான தமிழீழத்தை வலியுறுத்த வேண்டிய நிலை ஏற்படலாம்.

http://www.globaltamilnews.net/GTMNEditorial/tabid/71/articleType/ArticleView/articleId/111817/language/ta-IN/article.aspx