ஜெயலலிதாவுக்கு ஆதரவான அதிமுகவினரின் போராட்டத்திற்கு விஜயகாந்த், ராமதாஸ் கண்டனம்!

தமிழகத்தின் பல்வேறு இடங்களில் அதிமுகவினர் போராட்டங்களை நடத்தி வருவதற்கு தேமுதிக தலைவர் விஜயகாந்த் மற்றும், பாமக நிறுவனர் டாக்டர் ராமதாஸ் ஆகியோர் கண்டனம் தெவித்துள்ளனர். இது குறித்து தேமுதிக தலைவர் விஜயகாந்த் வெளியிட்டுள்ள அறிக்கையில் கூறியிருப்பதாவது... சரஸ்வதி பூஜை, விஜயதசமி, பக்ரீத், தீபாவளி போன்ற பண்டிகை காலங்களில் அதிமுக வினரின் போராட்டங்களால் பொதுமக்களும், வணிகர்களும் பெரிதும் பாதிக்கப்பட்டுள்ளனர். நாளொன்றுக்கு சுமார் ஐந்தாயிரம் கோடி ரூபாய் இழப்பு ஏற்பட்டு வருவதாக வணிகர் சங்கங்கள் தெரிவிக்கின்றன.

எதற்கெடுத்தாலும் 144 தடை உத்தரவு போடும் அதிமுக அரசு மிகப்பெரிய அளவில் அசம்பாவிதங்கள் மற்றும் வன்முறைச் சம்பவங்கள் நடைபெற்றும், தமிழ்நாட்டில் 144 தடை உத்தரவை அமல்படுத்தாதது ஏன்?

தமிழ்நாட்டின் அரசியலில் சொத்துக்குவிப்பு வழக்கின் தீர்ப்பு ஒரு வெற்றிடத்தை உருவாக்கி இருக்கிறது. கடந்த காலத்தில் ஆட்சியில் இருந்த திமுக, தற்போது ஆட்சியில் உள்ள அதிமுக ஆகிய இரண்டு கட்சிகளும் ஊழல் வழக்குகளில் சிக்கி குற்ற பின்னணி உள்ள கட்சிகளாக உள்ளதென மக்கள் கருதுகிறார்கள். எனவே வரும் காலங்களில் ஊழலற்ற, நிலையான மக்களாட்சி மலர வேண்டும் என்ற மனநிலைக்கு தமிழக மக்கள் வந்துள்ளனர். இவ்வாறு அவர் கூறியுள்ளார்.

பாமக நிறுவனர் டாக்டர் ராமதாஸ் வெளியிட்டுள்ள அறிக்கையில் கூறியிருப்பதாவது.. தமிழ்நாட்டில் ஆண்டுக்கு 2 லட்சம் குடும்பங்களை ஆதரவற்றவர்களாக்கி வரும் மது அரக்கனை ஒழித்து, முழு மதுவிலக்கை நடைமுறைப்படுத்த வேண்டும் என்று வலியுறுத்தி சென்னையில் இன்று பாமக சார்பில் எனது தலைமையில் அறப்போராட்டம் நடைபெறும் என்று அறிவிக்கப்பட்டிருந்தது. இதற்கு காவல்துறை அனுமதியளிக்க மறுத்ததால் கடைசி நேரத்தில் போராட்டத்தை கைவிட நேர்ந்தது.

தமிழகத்தின் இன்றைய முதன்மைத் தேவை மதுவிலக்கு தான். இத்தகைய உன்னத நோக்கத்தை வலியுறுத்தி நடத்தப்படும் போராட்டத்திற்கு அனுமதி தர காவல்துறையினர் தயாராக இல்லை. இதற்காக காவல்துறை அதிகாரிகள் கூறிய காரணம் போராட்டம் நடத்துவதற்குரிய சூழல் தமிழகத்தில் இல்லை என்பது தான். தமிழ்நாட்டில் நீதிக்காக எத்தனையோ போராட்டங்கள் நடந்துள்ளன. ஆனால், நீதிக்கு எதிராகவும், ஊழலுக்கு ஆதரவாகவும் ஆளுங்கட்சியினரே போராட்டம் நடத்தும் கொடுமை தமிழகத்தில் இப்போது தான் அரங்கேறுகிறது.

சென்னை அண்ணா சாலையில் கடந்த 30 ஆம் தேதி 18 இடங்களில் அதிமுக வினர் போராட்டம் நடத்தியுள்ளனர். சென்னையில் அனுமதிக்கப்பட்ட 3 இடங்களைத் தவிர வேறு எங்கும் போராட்டம் நடத்தினால் உடனடியாக கைது நடவடிக்கை மேற்கொள்ளப்படும் என்று அறிவித்திருந்த போதிலும், அதிமுகவினரின் போராட்டத்தைத் தடுக்க காவல்துறை முன்வரவில்லை. இந்த நேரத்தில் நிர்வாகத் துறையினரும், காவல்உதுறையினரும் தங்களின் கடமையை உணர்ந்து செயல்பட்டால் தான், பொருளாதார வளர்ச்சியில் ஏற்கனவே கடைசி இடத்திற்கு சென்று விட்ட தமிழகத்தை அதைவிட அதலபாதாளத்திற்கு சென்று விடாமல் தடுக்க முடியும்.உ இவ்வாறு டாக்டர் ராமதாஸ் கூறியுள்ளார்.

http://seithy.com/breifNews.php?newsID=118026&category=IndianNews&language=tamil