யாழ் நீர்ப் பிரச்சினைக்கு இன்னமும் தீர்வில்லை! மூடப்பட்ட தொழிற்சாலை திறக்கப்பட்டது!

 

வடக்கு மாகாணத்தில் நிலத்தடி நீர் மாசுபடுவதனால் நீதிமன்ற உத்தரவின் பேரில் மூடப்பட்டிருந்த தென் யாழ்ப்பாணத்தின் சுண்ணாகம் மின் உற்பத்தி நிலையம் மீண்டும் திறக்கப்பட்டுள்ளது.

 

குறித்த மின் உற்பத்தி நிலையத்தின் நடவடிக்கைகளை தற்காலிகமாக நிறுத்துமாறு நீதிமன்றம் கடந்த ஜனவரி மாதம் 27ஆம் திகதி உத்தரவிட்டிருந்தது.

 

இந்த உத்தரவை இரத்துச் செய்யக் கோரி மேன்முறையீட்டு நீதிமன்றத்தில் தாக்கல் செய்யப்பட்ட மனுவிற்கு அமைய குறித்த மின் உற்பத்தி நிலையம் மீண்டும் திறக்கப்பட்டுள்ளது.

 

இதுகுறித்து சுற்றுச்சூழல் பாதுகாப்பு மத்திய நிலையத்தின் அதிகாரி ரவீந்திர காரியவசத்திடம் ஶ்ரீலங்கா மிரர் இணையத்தளம் கேட்டபோது, 

 

யாழ்ப்பாணம், சுண்ணாகம் பிரதேசத்தில் குடிநீரில் எவ்வித விஷயத் திரவமோ அல்லது வேறு எவ்விதக் கழிவுப் பொருட்களோ கலக்கவில்லை என நீர்வள, நீர் வடிகாலமைப்புச் சபையினால் மேற்கொள்ளப்பட்ட விசாரணைகளில் இருந்து தெரியவந்துள்ளதாகக் கூறினார்.

 

138 கிணறுகளில் இருந்து எடுக்கப்பட்ட மாதிரி நீரில் 60 வீதமானவை, கீரிஸ், எண்ணெய் போன்ற திரவங்கள் கலந்து அசுத்தமடைந்துள்ளமை கண்டறியப்பட்டுள்ளது.

 

சாதாரணமாக ஒரு லீட்டர் தண்ணீரில் ஒரு மில்லி கிராம் எண்ணெய் கலந்திருப்பதானது உடலுக்கு தீங்கு ஏற்படுத்தாது என்றும் அவர் தெரிவித்தார். 

 

எனினும், இந்த நீர் மாதிரிகளில் லீட்டருக்கு 8 மில்லி கிராம் எண்ணெய் கலந்திருக்கிறது. இது உடல் நலத்திற்கு கேடுவிளைவிக்கும். அத்துடன், நாளுக்கு நாள் நீரில் எண்ணெய்த் தன்மை அதிகரித்துச் செல்கிறது. இந்த நிலை தற்போது சுண்ணாகம் முதல் வலிகாமம் வரை வியாபித்துள்ளது.

 

இது குடிநீரை பாரியளவில் அசுத்தப்படுத்தியுள்ளது. இந்த மக்களின் குடிநீர் பிரச்சினைக்கு இதுவரை உரிய தீர்வு வழங்கப்படவில்லை என்று அந்த அதிகாரி மேலும் தெரிவித்தார்.