சிறையிலிருந்து போதை பொருள் கடத்தல் மன்னன் தப்பியது எப்படி: வெளியான வீடியோ ஆதாரம் (வீடியோ இணைப்பு)

சர்வதேச நாடுகளுக்கு பில்லியன் மதிப்பில் போதை பொருட்களை கடத்தி வந்த Joaquin Guzman என்ற குற்றவாளி கடந்த சனிக்கிழமை அன்று Altiplano சிறையிலிருந்து இரண்டாவது முறையாக தப்பியுள்ளான்.

சிறை அறையின் தளத்தை தோண்டி, பூமிக்குள் குகைப்போல சுமார் 1.5 கி.மீ தூரமுள்ள வழித்தடத்தை உருவாக்கி குற்றவாளி தப்பியுள்ளது விசாரணையில் தெரியவந்துள்ளது.

குற்றவாளி சிறையிலிருந்து தப்பியது குறித்து பேசிய மெக்சிகோ உள்துறை அமைச்சரான Miguel Angel Osorio Chong, சிறையில் பாதுகாப்பு பணியில் இருந்த அதிகாரிகளின் உதவி இல்லாமல் குற்றவாளி தப்பியிருக்க வாய்ப்பில்லை என்றார்.

குற்றவாளி சிறையிலிருந்து தப்பிப்பதற்கு சில நாட்கள் முன்னர், குற்றவாளியின் மகன் தனது டுவிட்டர் பக்கத்தில் ‘தன்னுடைய தந்தை சிறையிலிருந்து தப்பி விடுவார்’ என மறைமுகமாக கூறியிருந்ததும் தற்போது பொலிசாருக்கு சந்தேகத்தை ஏற்படுத்திருக்கிறது.

இந்நிலையில், Joaquin Guzman சிறையில் இருந்து தப்பி செல்வது அங்குள்ள கமெராவில் பதிவாகியுள்ளது தெரியவந்துள்ளது.

Joaquin Guzman அடைக்கப்பட்டிருந்த அறையில் இருந்த அந்த கமெராவில் தான் அந்த காட்சிகள் பதிவாகியுள்ளது.

அந்த வீடியோவில், Joaquin Guzman தன் படுக்கையில் இருந்து எழுந்து குளிக்கும் இடத்தை நோக்கி செல்கின்றான்.

அங்கு குனிந்து எதையோ நகற்றுவது பதிவாகியுள்ளது. அதன் பிறகு அந்த அறையில் Joaquin Guzman-னை காணவில்லை.

குளிக்கும் இடம் என்பதால் அந்த இடத்தில், அங்கே நடப்பவை கமேராவில் முற்றிலுமாக பதிவாகவில்லை.

இந்த வீடியோ ஆதாரத்தை மெக்ஸிக்கோவின் தேசிய பாதுகாப்பு ஆணையர் மாண்டே வெளியிட்டுள்ளார்.

மேலும், கடத்தல் மன்னனின் தப்பியோடும் திட்டத்திற்கு பலர் உதவி புரிந்திருப்பார்கள் என்றும், அந்த சுரங்கத்தை தோண்ட 50 மில்லியன் அமெரிக்க டொலர்கள் செலவும், சுமார் ஒரு வருட காலம் ஆகியிருக்கும் எனவும் தகவல் தெரிவிக்கின்றன.

அதுமட்டுமல்லாமல் இந்த தப்பித்தலுக்காக லஞ்சமாக மட்டுமே சுமார் 50 மில்லியன் அமெரிக்க டொலர்களை Guzman செலவிட்டிருக்கலாம் என்றும் சொல்லப்படுகிறது.

தற்போது வெளியிடப்பட்டுள்ள இந்த வீடியோவால் பெரும் பரபரப்பு ஏற்பட்டுள்ளது.